Kasanotay a Masubadan ni Jehova?

IPAAY ni Jehova a Dios ti kasasayaatan nga ulidan ti panangted. Insagutna iti amin a sangatauan ti “biag ken anges ken amin a bambanag.” (Aramid 17:25) Patangkayagen ti Dios ti initna agpada kadagiti nadangkes ken nalinteg a tattao. (Mateo 5:45) Pudno, ‘mangipaay ni Jehova kadagiti tudo manipud langit ken nabunga a pampanawen, a punnuenna dagiti pusotayo iti taraon ken ragsak.’ (Aramid 14:15-17) Ay ket, “isuamin a nasayaat a sagut ken tunggal naan-anay a parabur aggapuda iti ngato, bumaba manipud iti Ama dagiti lawag”!​—Santiago 1:17.

Malaksid kadagiti amin a material a sagut ti Dios, isut’ mangipatulod iti naespirituan a lawag ken kinapudno. (Salmo 43:3) Dagiti nasungdo nga adipen ni Jehova ket sibabaknang a mabendisionanda kadagiti naespirituan a taraon nga ipapaayna iti umiso a tiempo baeten “iti matalek ken naannad nga adipen.” (Mateo 24:45-47) Magunggonaantayo manipud naespirituan a probision ti Dios gapu ta pinagbalinna a posible para kadagiti managbasol ken matmatay a tattao nga agbalin a maikappia kenkuana. Kasano? Baeten iti ipapatay ti Anakna, ni Jesu-Kristo, a nangited iti biagna kas subbot kadagiti adu. (Mateo 20:28; Roma 5:8-12) Anian a sagut manipud naayat a Dios, ni Jehova!​—Juan 3:16.

Adda Aya Aniaman a Maisubad?

Siniglo sakbay a naipaay ti subbot, maysa a napaltiingan a salmista ti nangapresiar unay iti inted-Dios nga asi, pannakaisalakan, ken tulong a kunana: “Ania ti itdekto ken Jehova a subad dagiti paraburna kaniak? Alaekto ti kopa ti naindaklan a pannakaisalakan, ken awagakto ti nagan ni Jehova. Bayadakto dagiti karkarik ken Jehova, wen, iti sanguanan ti amin nga ilina.”​—Salmo 116:12-14.

No dedikadotayo ken Jehova iti isuamin a puso, awagantayo ti naganna iti pammati ket tungpalentayo dagiti karitayo kenkuana. Kas dagiti Saksi ni Jehova, bendituentayo ti Dios babaen ti nasayaat a panangisaritatayo kenkuana a kankanayon ken panangibaga iti mensahe ti Pagarianna. (Salmo 145:1, 2, 10-13; Mateo 24:14) Ngem ditay mapabaknang ni Jehova, a makinkua iti isuamin, wenno isut’ masubadantayo gapu kadagiti gunggona nga intedna kadatayo.​—1 Cronicas 29:14-17.

Ti panangted kadagiti donasion para iti irarang-ay ti intereses ti Pagarian ket saan a pamay-an tapno masubadan wenno mapabaknang ni Jehova. Nupay kasta, ti kasta a panangipaay ikkannatayo kadagiti gundaway tapno maipakita ti ayattayo iti Dios. Dagiti maited a kontribusion, saan nga agtaud iti agimbubukodan a pannakatignay wenno maipaay iti panagdinamag ken pannakaidayaw, no di ket buyogen ti managparabur nga espiritu ken tapno maparang-ay ti pudno a panagdayaw, makaiyeg ragsak iti manangted ken bendision ni Jehova. (Mateo 6:1-4; Aramid 20:35) Maipasigurado iti maysa a tao ti pasetna iti kasta a panangted ken ti agbanag a kinaragsak babaen ti regular a panangilasinna iti aniaman manipud kadagiti material a sanikuana tapno masuportaran ti pudno a panagdayaw ken tumulong kadagiti maikari. (1 Corinto 16:1, 2) Rebbeng kadi a maaramid daytoy babaen ti panamagkapullo?

Rebbeng Kadi nga Agaramidkayo ti Panamagkapullo?

Kuna ni Jehova baeten ken mammadtona a Malakias: “Yegyo ti amin nga apagkapullo iti kamalig, tapno adda koma taraon iti balayko; ket padasendak ita iti daytoy, . . . no siak diakto luktan kadakayo dagiti tawtawa ti langit ket ibuyatkonto kadakayo ti bendision nga awanto ti lugar a makalaon nga umawat.” (Malakias 3:10) Mabasa iti sabali pay a patarus: “Yegyo ti intero nga apagkapullo iti kamalig.”​—An American Translation.

Ti apagkapullo ket kasangapulo a paset ti maysa a banag. Daytat’ 10 porsiento a maited wenno maibayad kas subad. Ti panamagkapullo ket nangnangruna a maaramid maipaay kadagiti narelihiusuan a panggep. Kaipapanan dayta ti panangted iti kasangapulo ti biruk ti maysa a tao tapno maparang-ay ti panagdayaw.

Ni patriarka Abraham (Abram) intedna ken ari-padi a Melquisedec iti Salem ti kasangapulo dagiti samsam iti balligina maibusor ken Codor-laomer ken dagiti aliadona. (Genesis 14:18-20; Hebreo 7:4-10) Kalpasanna, inkari ni Jacob nga itedna ti kasangapulo ti sanikuana iti Dios. (Genesis 28:20-22) Iti tunggal kaso, ti panangted iti kasangapulo ket boluntario, ta dagidiay a nagkauna a Hebreo awanandat’ linlinteg a mangobligar kadakuada a mangted kadagiti apagkapullo.

Panamagkapullo iti Sidong ti Linteg

Kas ili ni Jehova, immawat dagiti Israelitas kadagiti linteg ti panamagkapullo. Nalawag nga inraman dagitoy ti panangusar iti dua a kapullo ti tinawen a biruk, nupay ipagarup dagiti dadduma nga eskolar nga adda laeng maymaysa a tinawen nga apagkapullo. Awan naited nga apagkapullo kabayatan ti tawen a Panaginana, yantangay awan manamnama a biruk iti dayta a panawen. (Levitico 25:1-12) Naited dagiti apagkapullo kas nayon dagiti umuna a bungbunga a naidaton iti Dios.​—Exodo 23:19.

Ti kasangapulo ti apit iti daga ken kadagiti agbunga a kayo ken nalabit iti nainayon kadagiti pangen ken arban ket naipan iti santuario ken naited kadagiti Levita, isuda nga awan tawidna iti daga. Kalpasanna, intedda ti kasangapulo ti inawatda tapno suportaranda ti Aaroniko a kinapadi. Nalawag unay a nariid dagiti bukel ken ti bunga ti ubas ket napagbalin nga arak ken ti bunga ti kayo ti olibo napagbalin a lana sakbay ti panamagkapullo. No tarigagayan ti maysa nga Israelita ti mangted iti kuarta imbes a ti apit, maaramidna a kasta, no inayonna ti kakalima ti gatad dayta.​—Levitico 27:30-33; Numeros 18:21-30.

Sabali pay nga apagkapullo ti kasla nailasin. Kadawyanna, daytat’ usaren ti pamilia no agtataripnong dagiti tattao kadagiti rambak. Ngem ania ngay no ti kaadayona manipud Jerusalem ket nawatiwat unay para iti kumbiniente a pannakailugan daytoy nga apagkapullo? Ti ngarud bukel, baro nga arak, lana, ken dagiti animal napapirakda tapno nalaklaka a maitugot. (Deuteronomio 12:4-18; 14:22-27) Iti ngudo ti kada maikatlo ken maikanem a tawen ti pito a tawen a panagrikus ti panaginana, nailasin ti apagkapullo para kadagiti Levita, dagiti sangsangaili, dagiti balo, ken awanan amma nga ubbing a lallaki.​—Deuteronomio 14:28, 29; 26:12.

Iti sidong ti Linteg, awan dusa iti di pannakaited ti apagkapullo. Imbes ketdi, inkabil ni Jehova ti ilina iti sidong ti nabileg a moral nga obligasion tapno mangipaay kadagiti apagkapullo. No dadduma masapul nga ibagada iti sangona a naiteden amin ti apagkapullo. (Deuteronomio 26:13-15) Aniaman a di umiso ti pannakaikutna ket mamatmatan kas tinakaw manipud iti Dios.​—Malakias 3:7-9.

Ti panamagkapullo ket saan a makapadagsen nga urnos. Kinapudnona, idi sinalimetmetan dagiti Israelitas dagitoy a linteg, ad-adda a nagbalinda a narang-ay. Pinarang-ay ti apagkapullo ti pudno a panagdayaw uray dina inkabil dagiti di maikari a panangipaganetget no kasano nga aramiden dagiti material a probision para iti dayta. Ngarud, ti panamagkapullo nga urnos ket nagsayaatan ti amin nga Israel. Ngem ti kadi panamagkapullo ket para kadagiti Kristiano?

Rebbeng Kadi a Mangted Apagkapullo dagiti Kristiano?

Iti nabayag, ti panamagkapullo ket nasaknap iti masaksakopan ti Kakristianuan. Kunaen ti The Encyclopedia Americana: “Daytat’ . . . nagin-inut a nagbalin a nasaknap idi maika-6 a siglo. Ti Konsilio dagiti Managdaliasat idi 567 ken ti maikadua a Konsilio ti Macon idi 585 inkampaniada ti panamagkapullo. . . . Nagbalin a gagangay dagiti abuso, nangnangruna idi a ti kalintegan a mangkasakas kadagiti apagkapullo ket masansan a naited wenno nailako kadagiti gagangay a tao. Nangrugi ken Papa Gregorio VII naiwaragawag nga ilegal daytoy nga aramid. Adu ngarud a gagangay a tao ti nangipresenta kadagiti kalinteganda iti panamagkapullo kadagiti monasterio ken katedral. Ti Repormasion dina pinukaw ti panamagkapullo, ket naitultuloy ti aramid iti uneg ti Iglesia Katolika Romana ken kadagiti Protestante a pagilian.” Napukaw wenno nagin-inut a nasukatan ti panamagkapullo kadagiti nagduduma a daga, ket sumagmamano la a relihionen ti mangar-aramid iti dayta ita.

Gapuna, ngarud, maiparebbeng kadi kadagiti Kristiano ti apagkapullo? Idiay indese ti Bibliana, kuna ni Alexander Cruden: “Ti Manangisalakantayo, uray dagiti apostolna dida imbilin ti aniaman iti daytoy nga aramid maipapan apagkapullo.” Pudno, saan a nabilin dagiti Kristiano a mangted apagkapullo. Ti Dios a mismo pinagpatinggana ti Mosaiko a Linteg, agraman ti panamagkapullo nga urnosna, nga inlansana iti pagtutuokan a kayo ni Jesus. (Roma 6:14; Colosas 2:13, 14) Imbes a makalikaguman a mangipaay iti naikeddeng a gatad tapno mabayadan dagiti gastos ti kongregasion, ngarud, mangted dagiti Kristiano kadagiti boluntario a kontribusion.

Dayawen ni Jehova Babaen kadagiti Gamengmo

Siempre no boluntario nga ikeddeng ti maysa a Kristiano nga ited ti kasangapulo ti birukna tapno maparang-ay ti pudno a panagdayaw, awan Nainkasuratan nga isusupiat iti panangted kadagiti kakasta a donasion. Iti surat a naipasurot iti donasionna, insurat ti maysa nga agtawen 15 a balasitang idiay Papua New Guinea: “Idi bassitak, kinunkuna ni tatangko kaniak, ‘Inton mangrugikan nga agtrabaho, rebbeng nga itedmo dagiti umuna a birukmo ken Jehova.’ Malagipko ti sasao ti Proverbio 3:1, 9, a kunaenna a masapul nga itedtayo dagiti umuna a bungatayo ken Jehova a panagdayaw kenkuana. Gapuna nga inkarik nga aramiden daytoy, ket ita masapul a tungpalek ti karik. Naragsakak unay a mangipatulod iti daytoy a kuarta tapno tumulong iti trabaho ti Pagarian.” Saan a piliten ti Biblia dagiti Kristiano tapno agaramid ti kasta a kari. Nupay kasta, ti naparabur a panangted ket maysa a nasayaat a pamay-an tapno maipakita ti napasnek nga interes iti panangparang-ay ti pudno a panagdayaw.

Mabalin a pilien ti maysa a Kristiano a di mangituyang iti espesipiko a keddeng dagiti itedna a donasion tapno maparang-ay ti panagdayaw ken Jehova a Dios. Tapno iyilustrar: Iti kaaddada iti maysa nga asamblea dagiti Saksi ni Jehova, pagsarsaritaan ti dua a nataenganen a kakabsat a babbai maipapan kadagiti donasion a mabalin a maited para iti trabaho ti Pagarian. No maipapan iti pannakaiyeg ti taraon idiay lugar ti pagasambleaan, maysa kadagiti kakabsat a babbai, nga agtawen ti 87, insaludsodna no mano ti magasto tapno maidonasionna ti gatad. Ti sabali a kabsat a babai, nga agtawen 90, kunana: ‘Basta itedmo ti ipagarupmo a maiparbeng​—ket nayonam bassit.’ Anian a nagsayaat a kababalin ti impakita daytoy a bakbaket a kabsat!

Yantangay indedikaren ti ili ni Jehova ti isuamin kenkuana, siraragsak a mangtedda kadagiti donasion a kuarta ken sabsabali pay a kontribusion tapno suportaranda ti pudno a panagdayaw. (Idiligyo ti 2 Corinto 8:12.) Kinapudnona, ti Kristiano a wagas ti panangted mangipaay kadagiti gundaway tapno maiparang ti nauneg a panangapresiar iti panagdayaw ken Jehova. Ti kasta a panangted ket saan a nakedngan laeng iti apagkapullo, wenno kasangapulo, ken mabalin nga adda dagiti kasasaad a matignay ti maysa nga indibidual a mangted tapno maparang-ay ti intereses ti Pagarian.​—Mateo 6:33.

Kuna ni apostol Pablo: “Tunggal maysa itdenna koma ti pinanggepna iti pusona, saan nga iti dakes a nakem wenno mapilpilit, ta ti Dios ayatenna ti mangted a siaayat.” (2 Corinto 9:7) No siaayat ken sipaparaburkayo a mangted kas panangsuportar iti pudno a panagdayaw, nasayaatto ti tungpalyo, ta kunaen ti masirib a proverbio: “Pagdayawmo ti sanikuam ken Jehova ken dagiti umuna a bungbunga ti amin a maapitmo. Iti kasta dagiti sarusarmo mapnodanto a sipupusek; ket dagiti timbam agliplipiasdanto iti baro nga arak.”​—Proverbio 3:9, 10.

Ditay mapabaknang ti Katan-okan. Kukuana amin ti balitok ken pirak, dagiti animal iti bambantay, ken dagiti di mabilang a nasudi a bambanag. (Salmo 50:10-12) Pulos a ditay masubadan ti Dios gapu kadagiti ipapaayna a gunggona kadatayo. Ngem maipakitatayo ti nauneg nga apresasiontayo kenkuana ken ti pribilehio a panangipaay sagrado a serbisio iti pakaidayawanna. Ken makasiguradotayo nga agayus dagiti nabaknang a bendision kadagidiay mangted a sibubuslon tapno maparang-ay ti pudno a panagdayaw ken tapno dayawenda ti naayat ken managparabur a Dios, ni Jehova.​—2 Corinto 9:11.

[Kahon iti panid 29]

NO KASANOT’ ITUTULONG TI DADDUMA ITI TRABAHO TI PAGARIAN

◻ DAGITI KONTRIBUSION ITI SANGALUBONGAN A TRABAHO: Adut’ mangilasin wenno mangurnong iti maysa a gatad nga ikabilda iti pagitinnagan kontribusion a kahon a namarkaan: “Kontribusion para iti Sangalubongan a Trabaho ti Sosiedad​—Mateo 24:14.” Kada bulan ipatulod dagiti kongregasion dagitoy a gatad idiay sangalubongan a hedkuarter idiay Brooklyn, Nueva York, wenno iti kaasitgan a sanga nga opisina.

◻ SAGSAGUT: Dagiti boluntario a donasion a kuarta mabalin a maipatulod a direkta iti Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad. Dagiti alahas wenno sabsabali pay a gameng mabalin met a maidonasion. Ti maysa nga ababa a surat a mangibagbaga a daytat’ direkta a sagut rebbeng a maipakuyog kadagitoy a kontribusion.

◻ AGSADAG ITI KASASAAD NGA URNOS TI PANAGDONASION: Mabalin a maited ti kuarta iti Watch Tower Society tapno aywananna dayta agingga iti ipapatay ti nagdonasion, buyogen ti tulagan a no adda personal a panagkasapulan, daytat’ maisubli iti nagdonasion.

◻ SEGURO: Mabalin a maipanagan iti Watch Tower Society ti pannakagunggona manipud annuroten ti seguro wenno iti maysa a retirement/pension plan. Rebbeng a mapakaammuan ti Sosiedad iti aniaman a kasta nga urnos.

◻ KUARTA IDIAY BANGKO: Dagiti naibangko, pammaneknek iti panagdeposito, wenno kuarta iti panagretiro mabalin a maikabil iti panangaywan wenno mabayadan inton matay iti Watch Tower Society, maitunos kadagiti lokal a kalikagum dagiti bangko. Rebbeng a mapakaammuan ti Sosiedad iti aniaman a kasta nga urnos.

◻ DAGITI URNONG KEN PAMMATALGED: Dagiti urnong ken pammatalged mabalin a maidonasion iti Watch Tower Society kas maysa a direkta a sagut wenno iti sidong ti urnos a sadiay agtultuloy a maited ti ganansia iti nagdonasion.

◻ SANIKUA: Dagiti mailako a sanikua mabalin a maidonasion iti Watch Tower Society babaen iti direkta a panangisagut wenno babaen panangireserba iti paggianan ti nagdonasion, a mabalinna ti agnaed sadiay kabayatan ti panagbiagna. Rebbeng a makiuman ti maysa a tao iti Sosiedad sakbay panangitulagna iti sanikuana iti Sosiedad.

◻ PANANGIPATAWID KEN PAUTANG: Dagiti sanikua wenno kuarta mabalin a maiyawat iti Watch Tower Bible and Tract Society of Pennsylvania babaen ti legal pannakaipatungpalna a panagpatawid, wenno mabalin a ti Sosiedad ti maisurat kas agnumar iti tulagan ti panangipautang. Ti pautang a ti maysa a relihiuso nga organisasion ti agnumar ket makaipaay iti bentaha iti panagbuis. Ti maysa a kopia ti panangipatawid wenno tulagan iti panangipautang rebbeng a maipatulod iti Sosiedad.

Para iti ad-adu pay nga impormasion maipanggep kadagita a bambanag, agsurat iti Treasurer’s Office, Watch Tower Bible and Tract Society, P.O. Box 2044, 1099 Manila, wenno iti kaasitgan a sanga nga opisina ti Sosiedad.