Agrag-o iti Namnama ti Pagarian!

“Agrag-okayo iti inanama. Agitured iti rigat.”​—ROMA 12:12.

1. Apay a makasaraktay rag-o iti pannakitimpuyog ken Jehova, ket aniat’ inggunamgunam ni apostol Pablo nga aramiden dagiti Kristiano?

“TI NARAGSAK a Dios.” (1 Timoteo 1:11) Anian a nagsayaat panangdeskribir daytoy ken Jehova! Apay? Agsipud ta amin dagiti aramidna mangipaay kinaragsak kenkuana. Yantangay ni Jehova ti Gubuayan dagiti amin a naimbag ken mamaragsak a bambanag, amin dagiti nasaririt a pinarsuana ti makasarak kinaragsak iti pannakitimpuyogda kenkuana. Siuumiso, inggunamgunam ni apostol Pablo kadagiti Kristiano nga apresiarenda ti narag-o a pribilehioda iti panangammo ken Jehova a Dios, nga agyaman kadagiti nakaskasdaaw a sagutna iti panamarsua, ken agrag-o kadagiti naayat a kinamanangaasi nga ipakpakitana kadakuada. Insurat ni Pablo: “Agrag-okayo iti Apo a kankanayon. Ibagak manen, Agrag-okayo!”​—Filipos 4:4; Salmo 104:31.

2. Ania nga inanama ti mangiyeg rag-o, ket aniat’ naiparegta kadagiti Kristiano nga aramidenda maipanggep itoy a namnama?

² Ipangpangag kadi dagiti Kristiano daytoy a pananggutugot nga indatag ni Pablo? La ketdi! Agragrag-o dagiti naespirituan a kakabsat ni Jesus iti nadayag a namnama nga inlukat ni Jehova kadakuada. (Roma 8:19-21; Filipos 3:20, 21) Wen, ammoda a makiramanda iti panangitungpal iti dakkel a namnama para iti masanguanan ti sangatauan, agpadpada dagiti sibibiag ken dagiti natay, babaen panagserbi a kadua ni Kristo iti nailangitan a gobierno ti Pagarianna. Rabakenyo no kasanodanto nga agrag-o kadagiti pribilehioda kas makipagtawid, nga agserbi kas ar-ari ken papadi! (Apocalipsis 20:6) Anianto ketdin ti ragsakda bayat a tulonganda ti matalek a sangatauan a mangragpat iti kinaperpekto ken tumulongda a mangiwanwan iti pannakaipasubli ti Paraiso ditoy dagatayo! Pudno unay, amin dagiti adipen ti Dios addaanda “ti pakaibatayan ti inanama ti biag nga agnanayon nga inkari ti Dios, isu a dina mabalin ti agulbod, kadagiti naundayen a pampanawen.” (Tito 1:2) Gapu itoy a naindaklan a namnama, paregtaen ni apostol Pablo amin a Kristiano: “Agrag-okayo iti inanama.”​—Roma 12:12.a

Pudno a Rag-o​—Maysa a Galad ti Puso

3, 4. (a) Aniat’ kaipapanan ti termino nga “agrag-o,” ken kasano kasansan a rebbeng nga agrag-o dagiti Kristiano? (b) Ania ti pudno a rag-o, ket aniat’ pagpannurayan daytoy?

³ “Ti panagrag-o” kaipapananna ti pannakarikna ken panangiyebkas iti rag-o; dina kayat a sawen a kankanayon nga adda iti naan-anay a kasasaad ti panunot, wenno kinaaglaplapusanan. Dagiti verbo a kaibatogan ti Hebreo ken Griego a sao a nausar idiay Biblia para iti “rag-o,” “panagdir-i,” ken “panagrag-o” iyebkasda agpadpada ti makin-uneg a rikna ken ti makinruar a panangiparangarang iti rag-o. Naparegta dagiti Kristiano nga “agtultuloy nga agrag-o,” “agrag-o a kankanayon.”​—2 Corinto 13:11; 1 Tesalonica 5:16.

⁴ Ngem kasano a kankanayon nga agrag-o ti maysa a tao? Posible daytoy agsipud ta ti pudno a rag-o ket maysa a galad ti puso, maysa a nauneg a galad ti kaunggan, daydiay naespirituan. (Deuteronomio 28:47; Proverbio 15:13; 17:22) Maysa daytoy a bunga ti espiritu ti Dios, nga inlista ni Pablo kalpasan unay ti ayat. (Galacia 5:22) Kas maysa a makin-uneg a galad, daytat’ saan nga agpannuray kadagiti makinruar a bambanag, di uray kadagiti kakabsattayo. Ngem daytat’ agpannuray iti nasantuan nga espiritu ti Dios. Ket daytat’ agtaud manipud nauneg a pannakapnek ti kaunggan iti pannakaammo nga adda kadakayo ti kinapudno, ti namnama ti Pagarian, ken ar-aramidenyo ti makaay-ayo ken Jehova. Ngarud, ti rag-o ket saan a basta paset laeng ti personalidad a nabangonantayo; daytat’ paset ti “baro a personalidad,” ti pagtitiponan dagiti galad a nangiduma ken Jesu-Kristo.​—Efeso 4:24; Colosas 3:10.

5. Kaano ken kasano a mabalin nga adda makinruar a panangiparangarang iti rag-o?

⁵ Nupay ti rag-o ket maysa a galad ti puso, mabalin a naruar pannakaipakitana met dayta no dadduma. Ania dagitoy a sagpaminsan, naruar a panangiparangarang iti rag-o? Mabalin nga aniaman manipud kinatalinaay ti rupa agingga iti aktual a panaglagto iti rag-o. (1 Ar-ari 1:40; Lucas 1:44; Aramid 3:8; 6:15) Kaipapanan kadi daytoy, ngarud, a dagiti tattao a saan a mannanao wenno di kankanayon nga umisem awanandat’ rag-o? Saan! Ti pudno a rag-o dina iyebkas ti bagina iti kankanayon a panagsao, panagkatawa, panagisem, wenno panagrabrabak. Maigapu kadagiti kasasaad a ti rag-o iparangarangna ti bagina kadagiti nagduduma a pamay-an. Saan laeng a ti rag-o ti mamagbalin kadatayo a mannakilangen idiay Kingdom Hall, imbes ketdi, ti nainkabsatan a dungngo ken ayattayo.

6. Apay a kankanayon a makapagrag-o dagiti Kristiano uray no maipasangoda kadagiti di makaay-ayo a kasasaad?

⁶ Ti di agbaliw nga aspeto ti rag-o ket isu ti makin-uneg a kinapermanentena kas maysa a naimpusuan a parupa ti baro a personalidad ti Kristiano. Isu daytoy ti mangaramid a posible ti panagrag-o a kankanayon. Siempre, no dadduma mabalin a mariribukantayo maipapan maysa a banag, wenno mabalin a maipasangotayo kadagiti di-makaay-ayo a kasasaad. Ngem mabalintay latta ti maaddaan rag-o iti pusotayo. Dadduma kadagidi immuna a Kristiano ket paad-adipen, nga addaan kadagiti amo a narigat nga ay-aywen. Makapagrag-o kadi a kankanayon dagiti kakasta a Kristiano? Wen, gapu iti namnamada ti Pagarian ken iti rag-o kadagiti pusoda.​—Juan 15:11; 16:24; 17:13.

7. (a) Aniat’ kuna ni Jesus maipapan rag-o iti sidong ti rigat? (b) Aniat’ tumulong kadatayo nga agibtur iti sidong ti rigat, ken siasinot’ nangituyang iti kasayaatan nga ulidan iti daytoy a banag?

⁷ Kalpasanna unay kuna ni apostol Pablo: “Agrag-okayo iti inanama,” innayonna: “Agituredkayo iti rigat.” (Roma 12:12) Nagsao met ni Jesus maipapan rag-o iti sidong ti rigat idi kunana idiay Mateo 5:11, 12: “Naragsakkayo inton lalaisendakayo ken idadanesdakayo . . . Agrag-okayo ken aglagtokayo iti rag-o, ta ti gunggonayo dakkel sadi langit.” Ti panagrag-o ken panaglagto iti rag-o ditoy di kasapulan nga agbalin a literal a makinruar a panangiparangarang; kangrunaanna daytat’ isu ti nauneg a pannakapnek iti kaunggan nga ikutan ti maysa iti panangay-ayona ken Jehova ken ni Jesu-Kristo no makapagtalinaed a sititibker iti sidong ti pakasuotan. (Aramid 5:41) Kinaagpaysuanna, ti rag-o ti tumulong kadatayo nga agibtur bayat nga adda iti sidong ti rigat. (1 Tesalonica 1:6) Iti daytoy, nangituyang ni Jesus ti kasasayaatan nga ulidan. Ibaga kadatayo dagiti Kasuratan: “Gapu iti rag-o a naikabil iti sanguananna inibturanna ti kayo a pagtutuokan.”​—Hebreo 12:2.

Panagrag-o iti Inanama Agpapan Pay dagiti Parikut

8. Aniada a parikut ti mabalin a maipasango kadagiti Kristiano, ngem apay a dagiti parikut dida ikkaten ti rag-o ti maysa a Kristiano?

⁸ Ti panagbalin nga adipen ni Jehova dina ilibre ti maysa kadagiti parikut. Mabalin nga adda dagiti parikut ti pamilia, kinakurang ti magasto, nakapuy a salun-at, wenno ipapatay dagiti ing-ingungoten. Nupay dagiti kakasta a bambanag mabalin a mangiyegdat’ ladingit, dida iyadayo ti pakaibatayan ti panagrag-otayo iti namnama ti Pagarian, ti makin-uneg a rag-o nga adda iti pusotayo.​—1 Tesalonica 4:13.

9. Naaddaan kadagiti ania a parikut ni Abraham, ken kasanotayo nga ammo nga isut’ addaan rag-o iti pusona?

⁹ Usigenyo ni Abraham, kas pangarigan. Saan a kankanayon a makaay-ayo ti panagbiag kenkuana. Isut’ naaddaan kadagiti parikut ti pamilia. Ti kamalalana, ni Agar, ken ni baketna, ni Sara, dida nagkatunosan. Adda panagsubang. (Genesis 16:4, 5) Nagang-angawan ni Ismael ni Isaac, nga isut’ indadanesna. (Genesis 21:8, 9; Galacia 4:29) Kamaudiananna, natay ti ing-ingungoten nga asawa ni Abraham, a ni Sara. (Genesis 23:2) Agpapan pay dagitoy a parikut, nagrag-oanna ti namnama iti Bin-i ti Pagarian, ti Bin-i ni Abraham, a pakabendisionan dagiti amin a pamilia ti daga. (Genesis 22:15-18) Buyogen rag-o iti pusona, isut’ nagibtur iti serbisio ni Jehova iti sangagasut a tawen kalpasan panangpanawna iti taengna a siudad ti Ur. Ngarud naisurat maipapan kenkuana: “Ta inur-urayna ti siudad nga addaan pudpudno a pamuon, a ti mangipatakder ken mangaramid kenkuana isu ti Dios.” Gapu iti pammati ni Abraham iti um-umay a Mesianiko a Pagarian, ni Apo Jesus, idi dinutokanen ti Dios nga agbalin nga Ari, kunana: “Ni Abraham . . . nagrag-o unay iti panangkitana iti aldawko, ket nakitana ket nagrag-o.”​—Hebreo 11:10; Juan 8:56.

10, 11. (a) Kas dagiti Kristiano addaantayo iti ania a pannakirupak, ken kasanotayo a maispal? (b) Aniat’ mangsupusop iti kinaawan kabaelantayo a makibakal a naan-anay iti dangadang maibusor iti managbasol a lasagtayo?

¹⁰ Kas imperpekto a tattao, addaantayo met iti managbasol a lasag a pakirangetan, ket daytoy a pannakidangadang nga agaramid iti umiso ket mabalin a makapaladingit unay. Ti pannakirupak maibusor kadagiti pagkapuyantayo dina kaipapanan, nupay kasta, nga awanantayo iti namnama. Inay-ay unay ni Pablo daytoy a panagsimparat, ket kunana: “Siasino ti mangluk-atto kaniak itoy bagi ni patay? Agyamanak iti Dios gapu ken Jesu-Kristo nga Apotayo!” (Roma 7:24, 25) Babaen ken Kristo ken ti impaayna a subbot, naispaltayo.​—Roma 5:19-21.

¹¹ Supusopan ti daton a subbot ni Kristo ti kinaawan kabaelantayo a makirupak a naan-anay iti dangadang. Makapagrag-otayo iti daytoy a subbot agsipud ta pagbalinenna a posible ti maysa a nadalusan a konsiensia ken pannakapakawan dagiti basoltayo. Idiay Hebreo 9:14, agsao ni Pablo maipapan iti “dara ni Kristo” nga addaan bileg a “mangdalus kadagiti konsiensiatayo manipud natay nga ar-aramid.” Ngarud, ti konsiensia dagiti Kristiano saanen a kasapulan a mapadagsenan iti pannakadusa ken rikrikna ti panagbasol. Daytoy, agraman ti inanama nga adda kadatayo, ti mangbukel iti nabileg a puersa maipaay iti narag-o a kinaragsak. (Salmo 103:8-14; Roma 8:1, 2, 32) No utobentayo ti namnamatayo, maparegtatayo amin a sibaballigi a makirupak iti dangadang.

Kankanayon a Sipapanunot iti Inanamatayo

12. Ania a namnama ti mautob dagiti napulotan a Kristiano?

¹² Napateg nga agpada para iti napulotan-espiritu a natda ken ti sabsabali a karnero a kankanayon a sipapanunotda iti “inanamada iti pannakaisalakan,” nga isuotda dayta kas maysa a manalaknib a kabal ti ulo. (1 Tesalonica 5:8) Mautob dagiti napulotan a Kristiano ti nakaskasdaaw a pribilehio ti pannakagun-od imortalidad idiay langit, nga addaan pannakilangen ken Jehova a Dios, ken panangtagiragsak iti personal a pannakitimpuyog ken naipadayag a Jesu-Kristo ken dagiti apostol ken isuamin a sabsabali pay kadagiti 144,000, a nangtaginayon iti kinatarnawda kadagiti naglabas a siglo. Anian a di mailadawan a kinabaknang ti panagtitimpuyog!

13. Kasanot’ panagrikna dagiti napulotan nga adda pay ditoy daga maipapan iti namnamada?

¹³ Kasanot’ panagrikna dagiti sumagmamano a natda nga adda pay ditoy daga maipapan iti namnamada iti Pagarian? Mabalin a magupgop daytoy kadagiti sasao ni F. W. Franz, presidente ti Watch Tower Society, a nabautisaran idi 1913: “Sigurado ti inanamami, ket naan-anayto a maitungpal agingga kadagiti kauudian kadagiti 144,000 a kameng ti bassit nga ipastoran iti labes ti rukod a pinanunotmi. Dakami a paset ti natda nga addan idi tawen 1914, idi a ninamnamami a mapantayo amin idiay langit, dimi napukaw ti panangtagipategmi iti dayta a namnama. No di ket napingetkami iti dayta kas idi, ket ap-apresiarenmi dayta nga ad-adda bayat nga umat-atiddug ti panagur-uraymi iti dayta. Daytat’ maikari iti panaguray, uray pay kiddawenna ti maysa a riwriw a tawen. Ad-adda ngem idi ti panangipategko iti namnamami, ket diak pulos kayat a mapukaw ti panangapresiarko iti dayta. Ti namnama ti bassit nga ipasturan mangipaay met pammasiguro a ti ur-urayen ti dakkel a bunggoy dagiti sabsabali a karnero ket, awan posibilidadna a mapaay, matungpalto iti labes dagiti kararaniagan a panangpanunottayo. Isut’ gapuna a sititibkertayo agingga iti daytoy a kanito, ket agtalinaedtayo a sititibker agingga a talaga a napaneknekanen ti Dios nga isut’ pudno kadagiti ‘napateg ken naindaklan unay a karkarina.’”​—2 Pedro 1:4; Numeros 23:19; Roma 5:5.

Panagrag-o Itan iti Namnama ti Paraiso

14. Ania a namnama ti rebbeng a laglagipen ti dakkel a bunggoy?

¹⁴ Ti kasta a panangiyebkas iti managdir-i a pammati ti iyukuokna kadagidiay paset ti dakkel a bunggoy dagiti sabsabali a karnero dagiti naindaklan a rason ti panagrag-o. (Apocalipsis 7:15, 16) Dagita kasapulanda a laglagipen ti namnama ti ilalasat iti Armagedon. Wen, inanamaenyo ti pannakakita iti Pagarian ti Dios nga itan-okna ti unibersal a kinasoberano ni Jehova a Dios ken santipikarenna ti nadayag a naganna babaen panangiyegna iti dakkel a rigat, a mangdalus iti daga kadagiti nadangkes a ti Diablo ti nagbalin a diosda. Anianto ketdin a rag-o ti ilalasat iti dayta a dakkel a rigat!​—Daniel 2:44; Apocalipsis 7:14.

15. (a) Ania a trabaho ti panangagas ti inaramid ni Jesus idi isut’ adda pay ditoy daga, ken apay? (b) Anianto dagiti pakasapulan iti salun-at dagiti makalasat iti Armagedon, ken apay a naidumada kadagidiay kasapulan dagiti mapagungar?

¹⁵ Maipanggep iti dakkel a bunggoy, kunaen ti Apocalipsis 7:17: “Ti Kordero . . . ipastorannanto ida, ket iturongnanto ida kadagiti ubbog ti danum ti biag. Ket punasento ti Dios ti amin a lulua kadagiti matada.” Nupay addaanen daytoy a padto iti naespirituan a kaitungpalan ita, dagiti makalasat iti Armagedon makitadanto a matungpal a literal dayta. Kasano a kasta? Bueno, aniat’ inaramid ni Jesus idi isut’ adda ditoy daga? Inagasanna ti umel, pinapagnana ti pilay, linuktanna dagiti lapayag ti tuleng ken dagiti mata dagidiay bulsek, ken inagasanna ti kukutel, di pannakagunay, ken “isuamin a kita ti sakit ken amin a kita ti an-annayen.” (Mateo 9:35; 15:30, 31) Saan kadi a daytat’ kasapulan dagiti Kristiano ita? Itugotto ti dakkel a bunggoy dagiti pakapilawanda ken an-annayenda idiay baro a lubong. Aniat’ inanamaentayo nga aramidento ti Kordero maipapan iti dayta? Dagiti kasapulan dagiti makalasat iti Armagedon ket naidumadanto unay kadagiti kasapulan dagidiay mapagungar. Dagiti mapagungar nalabit a maparsuadanto manen buyogen sibubukel, nasayaat, nasalun-at a bagbagi, nupay awananda pay natauan a kinaperpekto. Gapu iti milagro ti panagungar, nalawag a kalpasan dayta saandanto a kasapulan ti pannakaritubar kadagidi aniaman a dati a pakapilawanda babaen iti milagro ti panangagas. Iti sabali a bangir, gapu iti naidaddaduma a kapadasanda iti ilalasat iti Armagedon, ti namilagruan a panangagas isut’ kasapulan ken awaten ti adu kadagiti dakkel a bunggoy. Sibabatad, maysa a dakkel a panggep ti panangagas ni Jesus ket tapno ipabigbigna maipaay iti pannakaparegta ti dakkel a bunggoy iti narag-o a namnama a saandanto laeng a makalasat no di ket maagasandanto kalpasanna.

16. (a) Kaano a mabalin a mapasamak ti namilagruan a pannakaagas dagiti makalasat iti Armagedon, ken buyogen ania a resulta? (b) Iti ania a namnama ti agtutuloy a pagrag-oantayo kabayatan ti Milenio?

¹⁶ Ti kasta a namilagruan a panangagas ket nainrasonan a mapasamakto kadagiti makalasat iti Armagedon iti kalleppas ti Armagedon ken saksakbay ti panangrugi ti panagungar. (Isaias 33:24; 35:5, 6; Apocalipsis 21:4; idiligyo ti Marcos 5:25-29.) Kalpasanna ibellengen dagiti tattao dagiti antiparra, sarukod, langkapi, wheelchairs, katulongan iti panagdengngeg, ken dagiti kaaspingna. Anian a pakaigapuan ti panagrag-o! Anian ti pannakaibagay ti kasta a manangipasubli a tignay ni Jesus no iti sasaaden dagiti makalasat iti Armagedon kas dagiti pamuon ti baro a daga! Maiwalinton dagiti mangdadael a lunod tapno makapagabante dagitoy a makalasat buyogen regta, a sigagagar a kumitkitada iti nakaskasdaaw nga aramid idiay Milenio nga agtultuloy pay iti masanguananda, a dida mapakapsutan kadagiti panangsaplit a mabalin nga inyeg idi kadakuada ti daan a lubong. Ken amin kabayatan ti Milenio, agragrag-odanto iti inanama ti pannakadanonda iti tungpal ti perpekto a natauan a biag iti ngudo dagidiay a sangaribo a tawen.

17. Addanto dagiti ania a rag-o bayat a madama ti trabaho ti panangisubli iti Paraiso?

¹⁷ No dayta ti namnamayo, utobenyo met ti rag-o iti pannakiraman iti panangipasubli ti Paraiso ditoy daga. (Lucas 23:42, 43) Awan duadua a dagiti makalasat iti Armagedon tumulongda a mangdalus iti daga ket ngarud mangipaay kadagiti napintas a lugar a pakapagungaran dagiti natay. Dagiti pumpon mabalin a sukatanto dagiti panangabrasa a seremonia para kadagidiay mapagungar, a pakairamanan dagiti inay-ayattayo a napan ken patay. Ken panunotenyo ti mangparang-ay a pannakilangen kadagiti matalek a lallaki ken babbai manipud kadagiti naglabas a siglo. Siasino ti kangrunaanna a kayatyo a pakisaritaan? Ni kadi Abel, Enoc, Noe, Job, Abraham, Sara, Isaac, Jacob, Jose, Moises, Josue, Rahab, Debora, Samson, David, Elias, Eliseo, Jeremias, Ezequiel, Daniel, wenno ni Juan a Mammautisar? Bueno, ngarud, daytoy a makaparagsak a padpadaanan ket paset met ti inanamayo. Mabalinyonto ti makisarita kadakuada, makasursuro kadakuada, ken makipagtrabaho kadakuada iti panamagbalin a paraiso ti intero a daga.

18. Aniada pay a rag-o ti mabalintayo nga utoben?

¹⁸ Panunotenyo, met, ti makapasalun-at a taraon, awan rugitna a danum, ken nadalus nga angin, buyogen ti dagatayo a naisublin iti perpekto nga ekolohikal a kinabalansena iti pamay-an a pinarsua daytoy ni Jehova. Ti biagto ket, saan laeng a basta panangtagiragsak iti kinaperpekto, no di ket maysa nga aktibo ken aduan kaipapanan a pannakipaset kadagiti narag-o nga ar-aramid. Utobenyo ti maysa a sangalubongan a kagimongan dagiti tattao a nawaya manipud krimen, panangitan-ok iti bagi, panagimon, panagaapa​—maysa a panagkakabsat a sadiay dagiti bunga ti espiritu ket masukayan ken mapataud ti isuamin. Anian a makaparagsak!​—Galacia 5:22, 23.

Namnama a Mamagbalin a Napateg ti Agbiag

19. (a) Kaano a mapasaran ti panagrag-o a nadakamat idiay Roma 12:12? (b) Apay a rebbeng a determinadotayo a di ipalubos a dagiti babantot ti biag isiasida ti inanamatayo?

¹⁹ Ti padpadaanan no natungpalen ket saanen a namnama, gapuna a ti panagrag-o nga imparegta ni Pablo idiay Roma 12:12 ket mapasaran itan. (Roma 8:24) Ti panangpanunot laeng kadagiti masanguanan a bendision nga ipagteng ti Pagarian ti Dios ket maysa a gapu ti panagrag-otayo iti dayta a namnama itan. Gapuna nga agbalin a determinado a ditay palubosan dagiti babantot ti biag iti narugit a lubong a mangisiasi iti namnamatayo. Ditay mabannog ken agkapuy, a mapukawtay ti namnama nga adda iti masanguanan. (Hebreo 12:3) Ti panangpanaw iti Nakristianuan a kurso dina risuten dagiti parikutyo. Laglagipenyo, no sumardeng ti maysa nga agserbi iti Dios gapu kadagiti amin a babantot ti biag itan, kaskasdi nga isut’ saan a makaadayo kadagidiay a babantot, ngem mapukawna ti namnama ket ngarud mapukawna ti posibilidad ti panagrag-o kadagiti nakaskasdaaw a padpadaanan iti masanguanan.

20. Ania ti epekto ti namnama ti Pagarian kadagidiay mangabrasa iti dayta, ken apay?

²⁰ Addaan ti ili ni Jehova iti amin a rason tapno maaddaan naragsak a bibiag. Ti naraniag, makaparayray a namnamada ti mamagbalin a napateg ti agbiag. Ket dida pagtalinaeden daytoy a narag-o a namnama kadagiti bagbagida laeng. Saan, sigagagarda met a mangiranud iti daytoy kadagiti sabsabali. (2 Corinto 3:12) Ngarud pudno a dagidiay mangabrasa iti namnama ti Pagarian ket managtalekda a tattao, ket pagreggetanda a paregtaen dagiti sabsabali babaen panangibagada kadakuada iti naimbag a damag manipud iti Dios. Daytoy ti mangpennek iti biag dagidiay a mangawat iti mensahe buyogen ti nakaskasdaaw unay a namnama a naited pay laeng iti sibubukel a sangatauan​—ti namnama ti Pagarian a mangipasubli iti Paraiso ditoy daga. No di awaten dagiti tattao dayta, kaskasdi nga agtultuloytay latta nga agrag-o agsipud ta adda kadatayo ti namnama. Dagidiay di mangipangag ti maabakan; saan a datayo.​—2 Corinto 4:3, 4.

21. Aniat’ asidegen a mapasamak, ken kasanot’ rebbeng a panangtingitingtayo iti namnamatayo?

²¹ Ti kari ti Dios ket: “Adtoy! Pagbalinek a baro dagiti isuamin a bambanag.” (Apocalipsis 21:5) Ti baro a lubong buyogen amin dagiti makaawis ken awan patinggana a bendisionna ket asidegen. Ti namnamatayo​—para iti biag idiay langit wenno iti paraiso a daga​—ket napateg; kumpettayo iti dayta. Kadagitoy napeggad nga al-aldaw, nangnangruna ngem idi, matmatanyo dayta “kas sinipete ti kararua, agpada a sigurado ken natibker.” No ti namnamatayo ket naisentro ken Jehova, “maysa nga agnanayon a bato​—ti Bato dagiti pampanawen,” sigurado nga addaantayo iti nabileg ken makatukay a rason itan tapno “agrag-o iti inanama” a naikabil iti sanguanantayo.​—Hebreo 6:19; Isaias 26:4, The Amplified Bible.

[Footnote]

Dagiti Saludsod a Pangrepaso

◻ Aniat’ dakkel a namnama ti sangatauan?

◻ Ania ti pudno a rag-o?

◻ Kaanonto a nalablabit a mapasamak ti namilagruan a pannakaagas dagiti makalasat iti Armagedon?

◻ Apay a rebbeng a ditay palubosan dagiti babantot ti biag a mangisiasi iti namnamatayo?

◻ Aniada a rag-o ti segseggaanyo idiay baro a lubong?

[Ladawan iti panid 9]

Dina kadi punnuen ti pusoyo iti rag-o ti pannakaimatang iti kita dagiti panangagas nga inramid ni Jesus?

[Ladawan iti panid 10]

Dagidiay agragrag-o iti Pagarian paregtaenda dagiti sabsabali babaen panangiranud iti inanamada