Maysa a Ministerio Para Kadakayo?

NI Jehova impakitanan ti kinamanagparaburna iti naan-anay a panangipaayna iti daga para iti panangtagiragsaktayo iti biag. Sipaparabur nga impalubosna nga agtalinaed dagitoy a probision uray kalpasan iyaalsa da Adan ken Eva. Nangnangruna pay, inyebkasna ti mangringbaw nga ayatna iti panangibaonna iti Anakna tapno ispalenna dagiti mamati a tattao manipud didigra ti basol.​—Mateo 5:45; Juan 3:16.

Kasanotayo a masubadan ti kasta nga ayat? Kuna ni Jesus a masapul nga ayatentayo ni Jehova a Diostayo iti isuamin a puso, kararua, panunot ken pigsatayo. Isingasing daytoy a sungsungbatantayo kenkuana ti panagdayaw ken kinasungdotayo ket rebbeng nga agbiagtayo maitunos iti pagayatanna.​—Marcos 12:30; 1 Pedro 4:2.

Ngem aniat’ nainaig iti panangaramid iti pagayatan ti Dios? Adda kadi serbisio a maipaaytay kenkuana​—maysa a ministerio a rebbengtay a pakipasetan?

Pannakasapul kadagiti Ministro

Dagiti relihion inallilawda dagiti tattao no kasano a dayawen ken pagserbian ti Dios. Kaskasdi, ipakita ti Biblia nga adda laeng maymaysa a pudno a relihion, “maysa nga Apo, maysa a pammati, maysa a pammautisar; maysa a Dios ken Ama dagiti isuamin.” Kuna ni Jesus: “Dagiti pudno a managdaydayaw agdaydayawdanto iti Ama iti espiritu ken kinapudno.” Gapuna a nabalakadanda: “Sawenyo amin koma ti maymaysa a banag, ket . . . awan koma dagiti panaglalasin kadakayo.”​—Efeso 4:3-6; Juan 4:23; 1 Corinto 1:10.

Ti pannakariro no ania ti pudno a relihion ket nangrugi idiay Eden idi a kinarit ni Satanas ti kinanainkalintegan ti kinasoberano ni Jehova babaen panangbabalawna iti wagas ti panagturay ti Dios. (Genesis 3:1-6, 13) Tagtaginayonen ni Satanas ita daytoy nga ibubusor iti Dios babaen kadagiti tiritir a pannursuro nga inwaras dagiti manangallilaw a relihiuso a ministro a “pagbalbalinenda dagiti bagbagida a ministro ti kinalinteg.” Gapuna a kunaen ti Biblia: “Ay-ayatek, dikay patien ti tunggal naipaltiing a sasao . . . ta adu dagiti saan a pudno a mammadto a rimmuar ditoy lubong.”​—2 Corinto 11:14, 15; 1 Juan 4:1.

Makaparagsak, nangalan ti Dios kadagiti addang tapno masungbatan daytoy a salisal ti panagturay. Gaput’ panangibaonna iti Anakna a mangsubbot iti sangatauan, pinagbalinna itan ni Jesus nga Ari iti nailangitan a Pagarian ti Dios, buyogen pannakabalin a mangdadael ken Satanas ken dagiti mammadtona, wenno ministrona. Daytoy ti mangipasiguradonto a ti pagayatan ti Dios ket maaramid ditoy daga, iti agnanayon a pannakabendision dagiti natulnog a tattao.​—Daniel 7:13, 14; Hebreo 2:9.

Pinalidem ni Satanas dagitoy a kinapudno. (2 Corinto 4:4) Ngarud, adda pakasapulan kadatayo nga agserbi kas ministro ti Dios, a mangibutaktak kadagiti kinaulbod ni Satanas ken mangsaksi iti kinapudno. Saannatay a piliten ni Jehova iti daytoy a serbisio. Kayatna a, kas ni Jesus, idatagtay a situtulok dagiti bagbagitayo maigapu iti panangapresiartay kenkuana ken gapu iti naaramidanna para kadatayo.​—Salmo 110:3; Hebreo 12:1-3.

Ti Kristiano a Ministerio

Ni Jesus “nagnagna kadagiti siudad ken purpurok, a nangaskasaba ken impakaammona ti naimbag a damag ti pagarian ti Dios.” (Lucas 8:1) Sinanayna met dagiti adalanna nga agbalin a ministro a kas kenkuana ken imbaonna ida a mangasaba. (Mateo 10:1-14, 27) Kalpasanna, binilinna ida a mangitultuloy iti ministerio kadagiti ungto ti daga.​—Mateo 28:19, 20; Aramid 1:8.

Naipakumit daytoy a komision kadagiti pudno a Kristiano, ket ti espiritu ti Dios ti mangtignay kadakuada a mangasaba. Kas napasamak idi Pentecostes 33 K.P., isuamin nga umawat iti naimbag a damag ibaklayda ti responsabilidad a mangaramid publiko a panangipaduyakyak iti pammatida.​—Aramid 2:1-4, 16-21; Roma 10:9, 13-15.

Ngangngani amin a tao, nupay kasta, dida makita dagiti bagbagida kas ministro. Ni Peter, maysa kadagiti Saksi ni Jehova, kunaenna: “Masansan nga ibilang dagiti lallaki idiay Alemania a maipababa ti dayawda iti panangisarita maipapan iti relihion. ‘Daytat’ trabaho dagiti klero,’ kunaenda.” Sigun ken Tony, maysa a misionero iti pinullon a tawen, kuna dagiti tattao idiay Inglatera: “Naimbag ti ibagbagayo, ket iti panagkunak nasayaat a tattao dagiti Saksi ni Jehova. Ngem ti ipapan kadagiti ruruangan a mangasaba​—talaga a diak maaramid dayta.” Inyadal iti pagbiit ni Ben ti Biblia iti maysa a lalaki a taga Nigeria a nangibaga kenkuana: “Diak maiparang ti bagik iti publiko a panangasaba iti binalaybalay; ngem makaitedak ti kuarta iti kongregasionyo tapno tulongak dagidiay situtulok a mangaramid iti dayta.” Wen, kaaduan a tattao agkurangda iti kasapulan a pammati ken panagrikna para iti Kristiano a ministerio.

Uray kasta, ti panangasaba a ministerio iti publiko ket isut’ responsabilidad ti amin idiay Kristiano a kongregasion, uray ania ti edadna wenno seksona. Daytoy ket saan laeng a para kadagiti panglakayen ken ministerial nga adipen, a ‘mangidaldalan,’ no di ket para met kadagiti amin a Kristiano. Amin ket maparegta: “Idatagyo iti Dios ti daton ti panagdayaw, kayatna a sawen, ti agaon kadagiti bibig a mangipaduyakyak iti naganna. . . . Agtulnogkayo kadagidiay mangidaldalan kadakayo.”​—Hebreo 13:15, 17.

Iti panagpalawagna iti naglalaok a bunggoy iti Sermonna idiay Bantay, kuna ni Jesus: “Saan nga amin nga agkuna kaniak, ‘Apo, Apo,’ sumrekto iti pagarian ti langit, no di ket ti mangaramid ti pagayatan ni Amak nga adda sadi langit.” Iti sabali pay a gundaway impakitana a ti panangaramid iti pagayatan ti Dios iramanna ti panangasaba kadagiti saan a manamati. Kiniddaw dagiti adalanna nga isut’ sumardeng pay a mangasaba kadagiti Samaritano tapno mangan pay, ngem kunana: “Ti taraonko isu ti panangaramidko iti pagayatan ti nangibaon kaniak ken panangturpos ti aramidna.”​—Mateo 7:21; Juan 4:27-38.

Rebbeng Kadi a Daytoy ti Karerayo?

Kadawyanna a kaykayat dagiti tattao a sapulen dagiti material a taraon ken kinabaknang. Ngem iti rugi ti Sermonna idiay Bantay, binalakadan ni Jesus dagiti managimdengna maibusor iti sipipinget a panangsapul kadagita a bambanag. “Imbes ketdi,” kunana, “agurnongkayo kadagiti gupgupit sadi langit . . . Itultuloyyo, ngarud, a biruken nga umuna ti pagarian ken ti kinalinteg [ti Dios].”​—Mateo 6:20, 33.

Ti panangbiruk nga umuna iti Pagarian kaipapananna a ditay ipalubos dagiti sabsabali nga interes a manglinged iti ministeriotayo. Nupay kasta, ti panangaramid itoy dina kaipapanan nga iwaksitayon amin a sabsabali a banag. Kas pangarigan, paregtaennatayo ti Biblia a ditay baybay-an dagiti pudpudno nga obligasion iti pamilia. Addaantay amin iti kakasta nga obligasion. Ti panangbaybay-a kadakuada ket panagtignay a maisupadi iti Nakristianuan a pammati. (1 Timoteo 5:8) Nupay kasta, rebbeng nga aramidentayo ti amin a kabaelantayo iti ministerio bayat a tamingentayo dagiti sabsabali pay a responsabilidad iti natimbeng a pamay-an.

Kuna ni Jesus: “Daytoy naimbag a damag maikaskasabanto . . . agpaay a pammaneknek kadagiti amin a nasion; ket iti kasta umayton ti panungpalan.” (Mateo 24:14) Ti konteksto dayta a padto isaadna ti kaitungpalanna iti panawentayo. Sipud 1914 ti naimbag a damag a ta ti Pagarian ket naikkanen ti pannakabalin tapno agtignay maipaay iti kinasoberano ni Jehova ken maibusor ken Satanas ken ti lubongna. (Apocalipsis 11:15-18) Rebbeng a panunotentay a naimbag dagiti ipasimudaag daytoy. Umayto ti panungpalan, ket masapul a maileppastayo ti trabaho a panangasaba sakbay dayta. Nakapusta dagiti biag; makatulongtayo a mangispal ti adu kadakuada.

Gaw-aten ti Nalawlawa a Ministerio

Adu kadagiti Saksi ni Jehova ti mangipaay iti sangapulo wenno ad-adu pay nga oras tunggal bulan iti panangiraman ti naimbag a damag kadagiti sabsabali. Rinibo dagiti mangbusbusbos ti dua nga oras iti inaldaw iti panangasaba kas auxiliary payunir, ket sabsabali pay ti agtultuloy nga agserbi kas regular ken espesial payunir. Apresiarenda ti kinaganat daytoy a trabaho ken kayatda ti maaddaan naan-anay a pannakipaset aginggat’ mabalin iti pannakaileppasna sakbay nga umay ti panungpalan daytoy di naragsak a lubong.

Maysakayo kadin nga aktibo a Saksi ni Jehova? Gaw-atenyo ngarud ti nalawlawa a pannakipaset iti serbisio. Parang-ayenyo ti kinalaingyo iti panangasaba ken panangisuro, a pagreggetanyo nga ad-adu pay ti maaramidanyo iti ministerio. No kabaelanyo ti agpayunir, aramidenyo dayta. No pudpudno a dinakayo palubosan dagiti kasasaadyo a mangaramid itoy, paregtaenyo ngarud dagidiay makabael tapno gaw-atenda daytoy a serbisio.

No saankay pay a dedikado a Saksi ni Jehova, dikay kunaen a saan a para kadakayo ti ministerio. Sabali pay a lalaki a managan Peter, maysa a mechanical engineer, ti simmuppiat unay iti panangiranud ni baketna ti naimbag a damag kadagiti sabsabali. “Kasanot’ panangipalubosko a mangasaba ni baketko iti binalaybalay?” iyimtuodna. Kalpasan tawtawen ti panangpaliiw iti natibker a pammatina maipanggep iti kinapudno ti Sao ti Dios, inkeddengna met ti agadal ti Biblia. Ita, kas ken baketna, isut’ maysa a dedikado, nabautisaranen a ministro ti naimbag a damag.

Gapuna a dikay gawidan ti bagiyo manipud pribilehio ti panagserbi ken Jehova. Paregtaendakayo a mangadal iti Biblia ken makitimpuyog kadagiti pudno a Kristiano kadagiti gimongda. Daytoy ti mangtulong kadakayo a mangsukog iti biagyo maitunos iti kinalinteg ti Dios ken tapno maibangonyo ti natibker a pammati kadagiti panggepna. No rumang-aykay iti daytoy, maikarikayonto met nga agbalin a ministro ti Dios. Maaddaankayonto ngarud ti pribilehio a makipaset iti panangitungpal iti daytoy a bilin ni Jesus: “Inkayo ngarud agaramid kadagiti adalan . . . nga isursuroyo kadakuada dagiti isuamin a banag nga imbilinko kadakayo.”​—Mateo 28:19, 20.

Wen, adda maysa a ministerio a mabalinyo a pakiramanan, ket nagangganat itan ti panangaramidyo iti dayta.

[Kahon iti panid 25]

Maysa a nars nga addaan pamilia nga aywananna ti nagkuna: “Agdaliasatak iti nasurok a maysa nga oras nga inaldaw a mapan iti ospital a pagtartrabahuak, gapuna a kunak no diak makapag-auxiliary payunir. Ngem siaannad nga inurnosko dagiti ar-aramidko tapno makipasetak iti serbisio idiay tay-ak iti tunggal agsapa sakbay ipapanko iti trabahok, kadagiti panaginana idiay trabaho, ken kadagiti aldaw ti bakasion. Rabakenyo nga, idi ngudo ti makabulan, nakabusbosak iti 117 nga oras iti panangasaba! Nakaipaimaak iti 263 a magasin, 22 a suskripsion kadagiti magasin ken nakairugiak iti 3 a panagadal ti Biblia.”

[Kahon iti panid 27]

Addaan ni Michael iti pito nga annak, ken adda ig-iggamanna a nadagsen a responsabilidad iti maysa a kolehio ti Nigeria. Isut’ maysa met a panglakayen iti lokal a Kristiano a kongregasion. Isut’ addaan panangmatmat a kapada dagiti rinibo a Saksi:

“Matmatak ti ministerio kas karerak ken kankanayon a laglagipek a kuna ni Pablo: ‘Nagmulaak, ni Apolos ti nagsibug, ngem ti Dios ti nangted idadakkel.’ Siak ken ni baketko ti ‘agmula’ kabayatan dagiti abbaba a panangisarita iti naimbag a damag iti binalaybalay. ‘Agsibugkami’ babaen isusubli kadagidiay mangipakita ti interes tapno isuromi ida manipud Biblia, kas kuna ni Jesus a rebbeng nga aramidentayo. Dagiti linawas a panagadal ti Biblia idiay pagtaengan ti nakatulongen kadagiti adu​—kadagiti adu a kaso ti intero a pamilia​—tapno dumtengda iti pannakaammo iti kinapudno.”