Ti Ayat ken Jehova Pabaraenna ti Pudno a Panagdayaw
“Daytoy ti ayat iti Dios, a tungpalentayo dagiti bilbilinna.”—1 JUAN 5:3.
1, 2. Buyogen ania a motibo a rebbeng a pagserbiantayo ni Jehova?
MAYSA a grupo dagiti 80 a bisita manipud Japan ti agpaspasiar iti maysa nga Assembly Hall dagiti Saksi ni Jehova idiay California, E.U.A. Dagiti makaay-ayo nga aglawlaw, agraman hardin a napno kadagiti blue jays, kalapati, ken pagaw, ti nangaramid kadakuada a makarikna nga ad-adda a nadekketda iti Naindaklan a Namarsuada, ni Jehova a Dios. Di nagbayag nadlaw ti mangipaspasiar kadakuada a ngangngani amin iti grupo ket agserserbi iti amin-tiempo kas maysa a payunir. Gapuna, idi agangay, ti grupo ket napagimtuodan iti maysa a saludsod a masansanen a maidatdatag: “Apay a nakaad-adu unay a payunir idiay Japan?” Iti apagkanito adda panagulimek. Kalpasanna maysa nga agtutubo a babai ti nangted sungbat: “Gapu ta ay-ayatenmi ni Jehova.”
2 Ti ayat ken Jehova—anian ti pananggutugot daytoy kadatayo nga agbalin a naregta iti serbisiona! Pudno, saan nga amin ket makapagpayunir. La ketdi, kaaduan kadagiti nasurok nga uppat a milion nga agibumbunannag ti Pagarian dida nailugaran daytoy a pribilehio. Ngem adu kadagidiay ipalubos dagiti kasasaadda ti mangikagumaan itoy. Amintayo met ket “makapagtalek ken Jehova ken agaramid ti naimbag,” nga ipakpakitatayo ti ayattayo babaen naruay a pannakipaset iti trabaho a panagaramid-adalan. (Salmo 37:3, 4) Ken amin a dedikado a managdaydayaw ni Jehova mabalinda ti makiraman iti panangpadakkel iti espiritu ti kinapayunir, a mangipaayda iti naayat a saranay kadagidiay agpaypayunir.—Mateo 24:14; 28:19.
3. Ania a panagsupadi ti rebbeng a madlaw iti nagbaetan dagiti kaaduan a mangibagbaga a Kristianoda ken dagiti Saksi ni Jehova?
3 Maisupadi kadagiti kaaduanna a mangibagbaga a Kristianoda, a silalag-an nga ibilangda ti relihion kas pakabigbigan laeng ti biagda, iparang dagiti Saksi ni Jehova ti nasged nga ayat iti Dios a mangtignay kadakuada tapno agtultuloy iti “panangbiruk nga umuna iti pagarian ken ti kinalintegna.” Daytoy kinasapulanna ti panagsakripisio, ngem anian a nakapatpateg dayta a sakripisio! (Mateo 6:33; 16:24) Daytat’ timmunos iti umuna a naindaklan a bilin, damo nga imbaga ni Moises ken inulit ni Jesu-Kristo: “Ni Jehova a Diostayo isu ti maymaysa a Jehova, ket rebbeng nga ayatem ni Jehova a Diosmo iti isuamin a pusom ken iti isuamin a kararuam ken iti isuamin a panunotmo ken iti isuamin a pigsam.”—Marcos 12:29, 30; Deuteronomio 6:4, 5.
4, 5. Siasino dagidiay maibilang a matalek, ken kasano a mabalin a maipakita ti kinamatalek?
4 Maysa kadagiti mangidadaulo iti hedkuarter dagiti Saksi ni Jehova tinukoyna iti kallabes ni F. W. Franz, ti 98 ti tawenna a presidente ti Watch Tower Bible and Tract Society a nangbusbusen iti nasurok a 70 a tawen iti amin-tiempo a serbisio: “Nagbalinka a nasayaat nga ulidan iti kinamatalek, Kabsat Franz.” Ket simmungbat ni Kabsat Franz: “Wen! Rebbengyo ti agbalin a matalek.” Daytat’ pakagupgopanna. Iti aniaman a paset ti aramid ti Pagarian ti pagserbiantayo, makapagmatalektayo.—1 Corinto 4:2; Galacia 3:9.
5 Pudno, adu ti mayat nga agaramid ti ad-adu pay iti serbisio ni Jehova, ngem mabalin a lapdan ida dagiti Nainkasuratan a responsabilidad wenno parikut iti salun-at. Dagidiay saan a makapagpayunir, nupay kasta, saanda a rebbeng a maibilang a di unay matalek. Dadduma ti nakapagtalinaed a nasungdo iti sidong dagiti makasuot unay a kasasaad ken masansan iti adu unay a tawtawen. Wen, nagmatalekda! Naipakitada ti ayat ken Jehova ken nagserbida a sigagaget iti naimpusuan a panangsaranay kadagiti teokratiko nga urnosna. Innalada ti napasnek nga interes iti aramid dagiti payunir ken nakaitedda iti pammaregta kadagiti agngayngayangay nga agpayunir, a masansan dagiti mismo nga annakda, a manggaw-at iti kinapayunir kas maysa a karera ti biag a manglab-aw kadagiti sabsabali.—Idiligyo ti Deuteronomio 30:19, 20.
6, 7. Kasano a ti pakpakauna a naituyang idiay 1 Samuel 30:16-25 agaplikar ita?
6 Ti naayat a panagkaykaysa ti tignay iti amin nga ili ti Dios ita mabalin a maiyilustrar ti salaysay idiay 1 Samuel 30:16-25. Iti gubat maibusor kadagiti Amalekita, “ni David kinabilna ida nanipud iti sumipnget agingga laeng iti rumabii” ket innalana ti nawadwad a samsam. Apaman a nakasubli iti pakarso, dadduma kadagiti buyot ni David kiniddawda nga awan komat’ maited a samsam kadagidiay di kimmuyog a simmalog idi kakaro ti gubat. Ngem simmungbat ni David: “Asino ti mangipangagto kadakayo itoy a panggep? Ta no kasano ti bingay daydiay a simmalog iti gubat, kastanto met ti bingay daydiay a nabati iti gargaret. Agbingaydanto iti agpada.”
7 Isu met laeng a prinsipio ti agaplikar ita. Dagiti payunir isuda ti makinsango iti naespirituan a pannakidangadangtayo. Ngem isuamin a sabsabali idiay kongregasion mangipaay iti naimpusuan, nasungdo a pannaranay. Ket ti naindaklan a resulta ti nagdadanggay a panagtrabahoda kabayatan ti 1991 naipakita iti sumaganad a tsart.
Naipangpangruna a Padamag
8. (a) Aniat’ ipanayag ti sangalubongan a report no maipapan iti dagup dagiti agibumbunannag ken dagiti oras a binusbosda iti serbisio ni Jehova? (b) Ania dagiti punto a paginteresan ti madlawyo kadagiti pagilian nga ita laeng nga agparang iti report?
8 Wen, dagiti napalabas nga uppat a panid daytoy a magasin ipakitada no kasano a ti nagdadanggay a panagregget dagiti amin a naregta a managdayaw ni Jehova ket nakatulong iti makaparagsak a sangalubongan a panagsaknap kabayatan ti 1991. Maysa a nangayed a baro a kangatuan a bilang nga 4,278,820 nga agibumbunannag ti Pagarian ti nairekord—maysa nga 6.5-porsiento nga irarang-ay. Dagitoy nangipaayda iti 951,870,021 nga oras (ngangngani maysa a bilion!) iti serbisio. Ken paliiwenyo ti narimat a panagregget nga impaay dagiti kakabsattayo kadagiti pagilian a dati a nalapdan ngem ita agparangdan iti sangalubongan a padamag—Bulgaria, Cameroon, Czechoslovakia, Ethiopia, Mozambique, Nicaragua, Rwanda, ken U.S.S.R.
9, 10. (a) Kasano a sinungbatan dagiti payunir ti karit dagiti narigat a panawen? (b) Ania a pammaregta ti naipaay iti iseserrek iti kinapayunir a serbisio?
9 Kadagiti kallabes a tawen nagsaknap ti espiritu ti kinapayunir iti intero a lubong. Uray kadagiti dagdaga a sadiay ti wayawaya ti panagdayaw ket napatgan laeng iti nabiit pay, agliplipias ti bilang dagiti payunir. Dagiti nakaro nga ekonomiko a kasasaad dida magawidan dagitoy a nasiglat a Saksi manipud panangipaay iti amin nga adda kadakuada iti pannakaidaydayaw ni Jehova. (Idiligyo ti 2 Corinto 11:23, 27.) Iti binulan a promedio, 14 porsiento kadagiti amin nga agibumbunannag ti Pagarian ti agpaypayunir. Ti kangatuan a bilang dagiti payunir ket 780,202, maysa a nagpaiduma a 18 porsiento iti dagup dagiti agibumbunannag.
10 Iti panangpaliiw kadagiti rag-o a napasaran dagiti payunir, dadduma met ti naparegta tapno alaenda daytoy a serbisio. No saankay pay nga agpaypayunir, ti kadi ayatyo ken Jehova maparayraynakayo a mangibaga, kas mabasatayo idiay Isaias 6:8, “Adtoyak! Ibaonnak”? Wenno baeten iti nagaget a panagadalyo ti Biblia, di kadi masigiaban ti Sao ti Dios ti sumsumged a tarigagay iti pusoyo, tapno alaenyo ti kanayonan nga addang iti iseserrek iti kinapayunir a serbisio? Uray iti panawen ti suot, ti sao ni Jehova pinarayrayna ni Jeremias, tapno isut’ saan a kumapoy.—Jeremias 20:9.
Naayat a Serbisio iti Sangatauan
11. Kasano a rimmang-ay ti aramid a panagadal ti Biblia iti pagtaengan?
11 Maysa kadagiti naidumduma a parupa ti report iti tawen ket isu ti ingangato ti bilang dagiti libre a panagadal ti Biblia iti pagtaengan, 3,947,261, a regular a maidadauluan iti binulan iti intero a lubong. Daytoy ket maysa a naayat nga urnos a sadiay dagiti Saksi ni Jehova ad-adda a tulonganda dagiti interesado a masarakanda iti panagbalaybalay a trabahoda. Maragsakantayo a mangidaulo kadagiti panagadal ti Biblia kadagiti tattao iti isuamin a nasionalidad ken nagtaudanda a rasa, nga agtrabahotayo buyogen ti isu met laeng a kinaregget nga impakita ni apostol Pablo. Ti ‘naimbag a panangsaksina agpada kadagiti Judio ken kadagiti Griego’ ti awan duadua kinasapulanna ti adu nga oras ti panangisuro ti kinapudno. (Aramid 20:20, 21) Kasta met laeng ita. Dagiti Saksi ni Jehova tultulonganda “amin a kita ti tao [tapno] maisalakan ken dumteng iti umiso a pannakaammo ti kinapudno.”—1 Timoteo 2:4.
12-14. Aniada a makaparag-o a damag ti agtaud manipud Europa?
12 Anian a makapagagar dagiti report iti naparang-ay a panangiyadal ti Biblia nga aramid idiay Makindaya nga Europa! Iti dinikdekada kinasapulan dagiti kakabsattayo ti agtitipon iti babassit a grupo, nalabit addaanda laeng iti maysa a napalanas, a naiprenta babaen ti mimeograpo a kopia ti daan a Pagwanawanan para kadakuada amin idiay a grupo. Ngem itan aglaplapusanan a bilang ti Biblia ken literatura ti Biblia ti sumangsangbay kadagidiay a dagdaga. Ipalagipna iti maysa ti Canta ni Salomon 2:4, ti King James Version: “Isu [ni Jesu-Kristo] inyegnak iti [naespirituan] a pagdadayaan, ket ti wagaywayna kaniak isu idi ti ayat.” Gaput’ kaadda dagiti personal a kopiada kadagiti magasin, adu ti agbalbalin a naan-anay pannakakabalna a mangaramat “iti umiso ti sao ti kinapudno.”—2 Timoteo 2:15.
13 Maysa a kongregasion a buklen dagiti 103 nga agibumbunannag idiay St. Petersburg, Russia, ti nangireport iti nabiit pay iti nasurok a 300 a panagadal ti Biblia iti pagtaengan. Kas bunga daytoy a panagregget iti panangiyadal ti Biblia, 53 a kabbaro a Saksi ti nabautisaran iti walo laeng a bulan. Nasurok a kagudua ti kongregasion ti walo a bulanda pay laeng iti kinapudno wenno nakurang pay! Ket awan ti panglakayenda—maysa laeng a ministerial nga adipen a mangtaming iti naespirituan nga irarang-ayda.
14 Maysa nga agibumbunannag ti Pagarian idiay Estonia ti pinagsaludsodan ti maysa a maiyad-adalan ti Biblia no mabalinna nga awisen ti sumagmamano a gagayyemna iti panagadal. Idi simmangpet ti Saksi iti balay ti maiyad-adalan iti sumuno a lawas, nasangpetanna ti nasurok a 50 a tao a nagtitipon! Siempre, kasapulan dagiti naidumduma nga urnos para iti agtultuloy a pannakataming dagita amin a panangipakita ti interes.
15. Aniat’ maikuna maipapan iti timmabuno iti Pananglaglagip ken dagiti panagbautisar?
15 Adu kadagiti agad-adal umuna a maramananda ti Nakristianuan a pannakitaripnongda babaen itatabuno iti Pananglaglagip iti ipapatay ni Jesus. Daytoy napalabas a tawen, ti timmabuno linab-awanna ti 10,000,000 iti umuna a gundaway, 10,650,158 ti nagtitipon iti intero a lubong kadagiti 66,207 a kongregasion maipaay iti daytoy narag-o a pasken. Iti nakaad-adu a Latin-Americano, Africano, ken Makindaya nga Europeo a pagilian, addada bilang ti timmabuno a mamitlo wenno mamimpat a daras nga ad-adu ngem ti bilang dagiti agibumbunannag ti Pagarian. Ita masapul a rugiantayon ti agsagana maipaay iti Pananglaglagip a maangay iti daytoy a tawen inton Biernes, Abril 17. Mainanama nga adu kadagiti kabbaro a maiyad-adalan ti Biblia a tumabtabuno iti Pananglaglagip ti agtultuloy a rumang-ay agturong iti panagbautisar. No maipapan kadagiti panagbautisar, idi 1991 naaddaantayo manen ti nasurok a 300,000 a nangisimbulo ti dedikasionda ken Jehova a Dios babaen ti pannakaitaneb iti danum.
Dagiti Managayat iti Nadiosan a Wayawaya
16. Aniada a makaparagsak a padamag ti aggapu manipud kadagiti “Managayat iti Wayawaya” Distrito a Kumbension?
16 Maysa a nakadidillaw a parupa ti 1991 a tawen ti serbisio ket isu dagiti serie ti “Managayat iti Wayawaya” Distrito a Kumbension, a naringpasen idiay Makinamianan a gudua ti Lubong ngem agtultuloy agingga iti 1992 iti Makinabagatan a gudua ti Lubong. Iti umuna a gundaway, ti kumpleto a programa ti kumbension ket naiparang iti adu a pagilian ti Makindaya nga Europa, a sadiay dagiti kakabsattayo ket agragrag-oda a mangaramat kadagiti kabbaro a wayawayada iti pannakaidayaw ni Jehova. Idi Oktubre 1991 ti dagup dagiti naipadamag a timmabuno kadagiti immuna a 705 a kumbension iti 54 a pagilian ket 4,774,937.
17, 18. (a) Aniada a wayawaya ti tagtagiragsaken ken padpadaanan dagiti managdaydayaw ni Jehova? (b) Kasano a naiduma ti nadiosan a wayawaya manipud kadagiti nailubongan a wayawaya?
17 Kuna ni Jesus kadagiti adalanna: “Ti kinapudno wayawayaannakayto.” (Juan 8:32) Ita, ti kinapudno ti Biblia winayawayaannan dagiti minilion manipud sursuro ti Kakristianuan. Dagitoy a minilion naadalda a ti probision ni Jehova a daton a subbot ni Jesus pagbalinennanto a posible para iti sangatauan a “mawayawayaan manipud pannakaadipen iti panagrupsa ken maaddaan ti nadayag a wayawaya dagiti annak ti Dios.” (Roma 8:19-22) Anian a naindaklan a wayawayanto dayta—panagbiag nga agnanayon iti maysa a paraiso a daga iti uneg dagiti umiso a pagbeddengan a siaayat nga ikeddeng ni Jehova!—Isaias 25:6-8; idiligyo ti Aramid 17:24-26.
18 Dagiti wayawaya a tagtagiragsaken itan dagiti Saksi ni Jehova, ken dagiti padpadaananda pay a tagiragsaken nga ad-adda iti baro a sistema dagiti bambanag ti Dios, ket nagtaud iti Diostayo, ni Jehova. (2 Corinto 3:17) Saanda nga agpannuray iti aniaman a napolitikaan wenno rebolusionario a gakat. (Santiago 1:17) Tapno masaluadan maibusor iti aniaman a di umiso a pannakaawat iti daytoy a punto, dagiti tsapa nga inkapet dagiti Saksi ni Jehova para iti 1991 a kumbension kadagiti sumagmamano a dagdaga ti Makindaya nga Europa linaonna dagiti sasao a “Dagiti Managayat iti Nadiosan a Wayawaya” imbes a basta “Dagiti Managayat iti Wayawaya” laeng.
Nasged nga Ayat ken Jehova
19. Kasanonatayo a taginayonen ti managkararag a kinasinged ken Jehova?
19 Ti ayattayo ken Jehova ken ti panagtalektayo kenkuana ti mamagbalin kadatayo nga agtalinaed a nadekket kenkuana iti kararag. Daytoy a kinasinged ken Jehova ti timmulong kadagiti kakabsattayo tapno ibturanda ti adu a rigat ken pannakaidadanes. (Salmo 25:14, 15) Iti oras ti kadadakkelan a pannakasuotna, tinaginayon ni Jesus ti kinasingedna iti Amana baeten ti kararag. (Lucas 22:39-46) Ti kasta a managkararag a kinasinged ken Jehova ti nangtaginayon ken Esteban kabayatan ti panagtutuok iti kinamartirna. Sitatangad bayat nga isut’ mauboren ken patay, kunana: “Adtoy! Kitkitaek dagiti langit a silulukat ken ti Anak ti tao [ni Jesus] nga agtaktakder iti makanawan ti Dios.”—Aramid 7:56.
20-22. Kasano nga iyilustrar ti maysa a kapadasan a denggen ti Dios dagiti kararag?
20 Kas masansanen a napasaran dagiti Saksi ni Jehova, sungbatan ni Jehova dagiti kararag a maitunos iti pagayatanna. Kas pangarigan, iti maysa a pagilian ti Africa a sadiay ti trabaho dagiti Saksi ni Jehova ket maiparit, maysa nga espesial payunir ti nagdaliasat babaen iti bus nga agpaamianan ket isut’ addaan dakkel a sako a napno iti literatura ti Biblia ken supsupot nga itulnogna. Ti pahenante a mangkarkarga iti bus sinaludsodanna ti kabsat: “Aniat’ linaon ti sako?” Imbaga ti kabsat ti immuna a napanunotna: “Sursurat.”
21 Idiay dalan, linabsan ti bus ti maysa a gagangay a pagsardengan, kimmamat dagiti polis ti trapiko ket pinasardengda dayta, nga in-inapenda a naglaon dayta kadagiti kontrabando. Imbilinda a dumsaag amin a pasahero iti bus ket amin a gargaret ti masukimat. Maysa a peggad daytoy! Nagna nga immadayo ti kabsat manipud agtatanabutob a tattao ket, iti panagparintumengna, nagkararag ken Jehova. Idi isut’ nagsubli iti bunggoy, tunggal gargaret ket malukluktan ken masuksukisok a naimbag. Idi maluktan koman ti sako nga awit ti kabsat, isut’ siuulimek nga immawag ken Jehova maipaay ti tulong.
22 “Makin-sako ditoy, ken aniat’ kargana?” impukkaw ti polis. Sakbay a makapagsao ti kabsat, simmungbat ti pahenante ti bus ket kunana: “Dagita ket surat manipud opisina ti koreo ti ———— agturong idiay opisina ti koreo ti ————.” “Nasayaat unay,” kuna ti soldado. Pinidotna ti sako ket inyawatna dayta iti pahenante. “Siguraduem a maidulin daytoy iti natalged a lugar kabayatan ti panagdaliasat,” imbilinna kenkuana. Nagparintumeng manen ti espesial payunir tapno agyaman iti Managdengngeg ti kararag.—Salmo 65:2; Proverbio 15:29.
23. Aniat’ impakitan ni Jehova, ket apay a no dadduma ipalubosna nga agpaut ti pannakaidadanes?
23 Daytoy dina kaipapanan, nupay kasta, a dagiti saksi ni Jehova ket naan-anay a mailisida kadagiti makadidigra a pasamak. Kadagiti sumagmamano a kasasaad, agpada idi panawen ti Biblia ken ita, impakita ni Jehova a mabalinanna nga ispalen ti ilina. Ngem maitunos iti pannakasungbat ti salisal ti kinatarnaw, no dadduma agparang a palubosanna nga agpaut ti pannakaidadanes. (Idiligyo ti Mateo 26:39.) Kasta met, saan nga automatiko a salakniban ni Jehova ti ilina manipud kadagiti aksidente, panagaapa ti umili, wenno krimen, nupay ti panangaramat iti naibatay-Biblia a praktikal a kinasirib ket napateg met. (Proverbio 22:3; Eclesiastes 9:11) Nupay kasta, makapagtalektayo a maispaltay man manipud makakarit a kasasaad wenno saan, magunggonaanto ti kinamatalektayo, uray babaen iti panagungar no isut’ kasapulan.—Mateo 10:21, 22; 24:13.
24. Aniada a naayat a sagut ti impaay ni Jehova, ken kasanotay a mabalin a masubadan ti ayatna?
24 Anian a nakaskasdaaw dagiti naayat a sagut ni Jehova! Ti daga a sagutna iti sangatauan ken isuamin nga adda kenkuana ket maysa a naisangsangayan nga ebkas ti ayatna. (Salmo 104:1, 13-16; 115:16) Ken ti nadungngo a sagut ti Dios nga isu ti Anakna, ni Jesu-Kristo, tapno subbotenna ti sangatauan manipud basol ken ipapatay ket isu ti kaaayatan pay laeng a sagut a naaramid. “Daytoy ti nakaiparangarangan ti ayat ti Dios kadatayo, nga imbaon ti Dios ti Anakna a bugbugtong ditoy lubong tapno maragpattayo ti biag gapu kenkuana. Ket daytoy ti ayat, saan a gapu ta inayattayo ti Dios, no di ket gapu ta isu inayatnatayo ken imbaonna ti Anakna a daton a subbot kadagiti basoltayo.” (1 Juan 4:9, 10) Kas subad dayta nga ayat, sapay koma ta maallukoytayo “nga uray ni patay wenno dagiti anghel wenno dagiti pagturayan wenno dagiti bambanag nga agdama wenno dagiti bambanag nga umayto wenno dagiti pannakabalin wenno kinangato wenno kinababa wenno aniaman a sabsabali a parsua didatay mabalinto nga isina iti ayat ti Dios nga adda ken Kristo Jesus nga Apotayo.”—Roma 8:38, 39.
Panangrepaso iti Daytoy nga Artikulo
◻ Aniat kaipapanan ti panagbalin a matalek?
◻ Kadagiti ania a lawlaw ti aramid ti mabalintayo a pangipakitaan ti ayat ken Jehova?
◻ Aniada a parupa ti report iti serbisio ti tawen
ti naginteresanyo unay?
◻ Kasanotayo a mabalin nga ipakita ti
panangapresiar kadagiti naayat a sagut ni Jehova?
[Kahon iti panid 15]
APAY NAKAAD-ADU UNAY A PAYUNIR?
Naipadamag nga, iti 2,600 a tawen dagiti Hapon ket nareggetda a managdaydayaw kadagiti emperadorda. Kadagiti gubat iti daytoy maika-20 a siglo laeng, nasurok a tallo a milion a mannakigubat a Hapon ti nangisakripisio kadagiti biagda, ta impagarupda nga awanen dakdakkel a dayaw ngem ti ipapatay maipaay iti emperador-diosda. Ngem naabak ti Budhista-Shinto nga armada idi Sangalubongan a Gubat II, ket kalpasan dayta imbabawi ti emperador ti kinadiosna. Aniat’ mangpunno iti daytoy a narelihiusuan nga awang? Makaparagsak, dagiti panagadal ti Biblia iti pagtaengan nga indauluan dagiti misionero kadagiti Saksi ni Jehova ken kalpasanna babaen kadagiti lumugar a Saksi tinulonganda ti adu tapno masarakanda ti pudno a Dios, ni Jehova, ken tapno idedikarda dagiti biagda kenkuana. Daytoy a dedikasion dakkel kaipapananna kadagidiay Saksi a Hapon. No kadagidi immuna a panawen mabalin a naidatonda koma dagiti biagda iti maysa nga emperador-dios, anian nga adayo a dakdakkel ti regtada ita a mangipaay kadagiti pigsada kas payunir iti panangdaydayaw iti sibibiag a Dios ken Namarsua iti uniberso—ti Soberano nga Apo Jehova!
[Tsart iti panid 10-13]
1991 TAWEN SERBISIO A SANGALUBONGAN A REPORT DAGITI SAKSI NI JEHOVA
(Kitaem ti bound volume)
[Ladawan iti panid 16]
Dagiti managayat iti nadiosan a wayawaya—dagiti managdayaw ni Jehova iti kumbension idiay Prague, Agosto 9-11, 1991