Report Dagiti Manangiwaragawag ti Pagarian
Agbunga ti Panangwanas iti Naiputputong a Teritoria Idiay Paraguay
TI SANGA ti Watch Tower Society idiay Paraguay ket naan-anay a siaammo iti kasapulan a panangikasaba iti naimbag a damag kadagiti amin a teritoriana. (Aramid 1:8) Isu daytoy ti tiempo para iti amin tapno maadalda maipapan iti Pagarian ken agserbida ken Jehova sakbay a pagpatinggaenna daytoy dakes a sistema iti um-umay a “dakkel a rigat.” (Mateo 24:21, 22) Dagiti sumaganad a kapadasan ipakitada no aniat’ maar-aramidan tapno matulongan dagiti tattao kadagiti di naituding a teritoria. Ipadamag ti sanga:
Naaramid dagiti urnos tapno mawanas amin a di naituding a teritoria babaen kadagiti temporario nga espesial payunir. Kabayatan dagiti bulbulan ti Nobiembre aginggat’ Enero iti 1990 a tawen serbisio, 39 a kakabsat a lallaki ken babbai ti nakawanas iti dagup a sangagasut a siudad ken babassit nga ili a sadiay awan pay dagiti agibumbunannag ti Pagarian. Nakaiwarasda iti 6,119 a libro, 4,262 a bukleta, ken 5,144 a magasin. Kas nagbanagan daytoy nga aramid, mabuangbuangay dagiti kabbaro a grupo dagiti agibumbunannag.
◻ Inawat ti maysa a babai manipud iti maysa a payunir nga agtartrabaho iti di naituding a teritoria ti libro a Mabalinyo ti Agbiag nga Agnanayon iti Paraiso a Daga. Intukon ti payunir nga isut’ idauluanna iti panagadal ti Biblia, ket siraragsak nga inawatna. Idi nagsubli ti payunir, ti agur-uray kenkuana ket saan laeng a ti babai no di ket uray met ni lakayna ken dagiti sangapulo nga annakda. Iti simmaganad nga isasarungkar, ti pamilia kasta met dagiti gagayyem ken kaarrubada ti sisasagana maipaay iti panagadal ti Biblia! Inawis ida ti babai, a kunkunana a nakasaysayaat unay ti panagadal ken ti namnama ken dagiti bendision nga ipaay ni Jehova ket nakaskasdaaw. Maysa a banag daytoy nga awan pay nakaibagbaga kenkuana, gapuna a mariknana a rebbeng a mangngeg met dagiti kaarruba ken gagayyemna daytoy a naimbag a damag.
Tunggal idauluan ti payunir ti panagadal, nakaad-adu ti tumabuno a kasla daytat’ maysa a bassit a kongregasion. Dagitoy nga interesado a tattao inyimtuodda dagiti adu a saludsod ken nakiramanda iti panagadal. Idi nga inlawlawag ti payunir nga apaman a matrabaho ti teritoria, isut’ kasapulan a pumanaw agraman dagiti kakaduana iti baro a lugar, sidadanag nga inyimtuod ti babai no aniantot’ pagbanagan dagiti interesado a tattao. Naaramid dagiti urnos kadagiti kakabsat manipud kaasitgan a kongregasion tapno itultuloyda ti panangiyadal. Ita naitudingen dagiti espesial payunir tapno tulonganda dagitoy nga interesado, marakarnero a tattao.
◻ Bayat iti papanda iti binalaybalay iti sabali pay a di naituding a teritoria, maysa a babai a payunir ti nakasarak iti maysa a lalaki nga agarup sangapulo a tawen ti napalabasen ket nakagun-od iti libro a Ti Kinapudno a Mangiturong iti Biag nga Awan Inggana. Nanipud iti dayta a tiempo awan a pulos pannakisaritanan kadagiti Saksi ni Jehova. Nupay kasta, ammona a ni Jehova, nga inawaganna iti Jehova dagiti buybuyot, isu ti maymaysa a pudno a Dios ken Isu laeng ti rebbeng a dayawen. Iti bukodna a panagregget, insarsaritanan maipapan ken Jehova iti amin nga am-ammona. Kinapudnona, tunggal lawas isut’ nagna iti 3 a kilometro tapno sarungkaranna ti maysa nga interesado a pagassawaan tapno makisarita kadakuada maipapan iti Dios gapu ta, kas kunana, ‘No sumardengak a mangsarungkar kadakuada, malipatandanto ti maipapan ken Jehova.’ Mainayon iti daytoy a pagassawaan, adda agarup sangapulo pay a sabsabali a mayat iti panagadal ti Biblia—maigapu amin ta daytoy nga interesado a tao nangasaba kadakuada.
Naisangsangayan, sumagmamano laeng nga aldaw sakbay isasarungkar kenkuana ti payunir, daytoy met laeng a lalaki dina palubosan ti lokal a padi ken ti idadauluanna a panaglibot a sumrek iti balayna nga awitda ti ladawan ti birhen, nga ilawlawagna nga isut’ di mamati kadagiti ladawan. Nagpungtot ti padi. Iti dayta a rabii nagkararag ti lalaki ken Jehova maipaay iti tulong. Gapuna a panunotenyo no kasano karegget ken karagsakna idi nga immawag ti payunir! Dagdagus a naaramid dagiti urnos maipaay iti sistematiko a panagadal ti Biblia, ket agtutuloy ti lalaki a rumang-ay iti pannakitimpuyogna iti teokratiko nga organisasion.
Pudno unay, bembendisionan ni Jehova ti panangurnong a trabaho idiay Paraguay bayat nga ikagumaan dagiti kakabsat ti mangipaay iti nasayaat a pammaneknek kadagitoy a di naituding a teritoria.—Mateo 24:14.