Agimdeng Kadi ti Dios No Agkararagkayo?

TI KANGRUNAAN a manangiwayat ikeddengna no ibunongna ti maysa a banag wenno tamingenna dayta a bukbukodna. Umasping unay, ti Soberano nga Agturay ti uniberso addaan pagpilian a mangikeddeng iti rukod ti personal a pannakainaigna iti aniaman a banag. Isuro dagiti Kasuratan a pinili ti Dios nga inaig a personal ti bagina kadagiti kararagtayo ket ngarud binilinnatayo nga iturongtay dagitoy kenkuana.​—Salmo 66:19; 69:13.

Ti pili ti Dios iti daytoy a banag ipasimudaagna ti personal nga interesna iti karkararag dagiti tattao nga adipenna. Imbes nga upayenna ti ilina manipud iyaadani kenkuana buyogen amin a pannakaawat ken kinaannad, idagadagna kadakuada: “Agkararag a di agressat,” “agtalinaed iti panagkararag,” “iyallatiwmo ti babantotmo ken Jehova met laeng,” “iyallatiwmo amin a pakadanagam iti [Dios].”​—1 Tesalonica 5:17; Roma 12:12; Salmo 55:22; 1 Pedro 5:7.

No saan a kayat ti Dios ti agasikaso iti karkararag dagiti adipenna, saan koman a nangiyur-urnos iti kasta a kalasugan kenkuana ken dina koman imparegta ti nawaya a panangusar iti dayta. Daytoy, ngarud, ti panangpili ti Dios nga aramidenna ti bagina a nalaka a maasitgan ti ilina, ket maysa a rason maipaay iti panagtalek nga isut’ napaypayso nga agimdeng. Wen, utobenna ti tunggal kararag dagiti adipenna.

Saan a laksiden met ti kinapudno a sibabatad a kunaen ti Biblia a ti Dios ket agimdeng iti kararag. Ni apostol Juan, kas pangarigan, insuratna: “Daytoy ti adda kadatayo a panagtalek kenkuana, nga, aniaman a dawatentayo a maiyannurot iti pagayatanna, isu denggennatayo.” (1 Juan 5:14) Ni Ari David tinukoyna ni Jehova a Dios kas ti “Managdengngeg iti kararag” ken sitatalek nga impakaammona: “Denggenna ti timekko.”​—Salmo 55:17; 65:2.

Gapuna a nupay awan duadua a ti aramid a panagkararag ket makagunggona a mismo, ipakita dagiti Kasuratan nga ad-adu pay ti nainaig no agkararag ti maysa a nalinteg a tao. Adda maysa nga agim-imdeng. Dayta a managimdeng ket isu ti Dios.​—Santiago 5:16-18.

Dagiti Kararag a Naipangag

Aglaplapusanan ti Biblia kadagiti salaysay maipapan kadagiti tattao a dagiti kararagda, kinapudnona, ket naimdengan ken sinungbatan ti Dios. Dagiti kapadasanda silalawag a pasingkedanda a dagiti gunggona ti panagkararag ket lumabes pay iti makaagas nga epekto ti pananglawag ken panangiyebkas kadagiti kapanunotan ti maysa a tao. Lumabesda kadagiti personal a panagregget ti maysa a tao maitunos kadagiti kararagna.

Kas pangarigan, idi a naipasango iti iyaalsa ni Absalom a mangagaw iti kinaari ti Israel, inkararag ni Ari David: “O Jehova, agdawatak kenka, a ti patigmaan ni Ahitofel [mammagbaga ni Absalom] pagbalinem koma a kinamaag!” Saan nalaka a kiddaw, gapu ta “ti balakad ni Ahitofel . . . ket kas tay maysa a lalaki umum-uman iti sao ti pudno a Dios. Kasta a talaga idi ti balakad ni Ahitofel.” Kalpasanna linaksid ni Absalom ti insingasing a taktika ni Ahitofel maipaay iti panangirugpo ken Ari David. Apay? “Ni Jehova met laeng imbilinna a paayenna ti balakad ni Ahitofel nupay naimbag, iti panggep a ni Jehova maiyegna ti dakes ken Absalom.” Nalawag unay, naipangag ti kararag ni David.​—2 Samuel 15:31; 16:23; 17:14.

Umasping unay, kalpasan panagyaman ni Ezekias iti Dios maipaay iti pannakaispal manipud iti makapapatay a sakitna, isut’ nakaungar. Daytoy kadi ket gapu laeng kadagiti sikolohikal a gunggona ken Ezekias kas resulta ti panagkararagna? Saan la ketdi! Ti mensahe ni Jehova ken Ezekias, kas indanon ni mammadto Isaias, ket: “Dinengngegko ti kararagmo. Nakitak dagiti luam. Adtoy agasanka.”​—2 Ar-ari 20:1-6.

Ni Daniel, a ti kararagna ket nasungbatan a naladladaw ngem iti ninamnamana, ti pinasiguraduan ti anghel ni Jehova: “Dagiti saom naimdenganda.” Ti karkararag dagiti sabsabali, kas kadagidiay kararag ni Hanna, dagiti adalan ni Jesus, ken ti opisial ti armada a ni Cornelio, ket nasungbatan kadagiti pamay-an a saan a maipagapu iti natauan nga abilidad laeng. Ti Biblia, ngarud, silalawag nga isurona a dagiti kararag maitunos iti nadiosan a pagayatan ket awaten, denggen, ken sungbatan ti Dios.​—Daniel 10:2-14; 1 Samuel 1:1-20; Aramid 4:24-31; 10:1-7.

Ngem kasano a sungbatan ti Dios ti karkararag dagiti matalek nga adipenna ita?

Dagiti Sungbat Kadagiti Kararag

Dagiti kararag a naisitar iti ngato ket nasungbatan kadagiti makatukay, namilagruan a pamay-an. Pangngaasiyo ta laglagipenyo, nupay kasta, nga uray kadagiti panawen ti Biblia, dagiti kasansanan a sungbat kadagiti kararag ket saan a nalaka a mailasin. Daytoy ket gapu ta innaigda ti panangted iti bileg iti moral ken pannakalawag, a mamagbalin kadagiti adipen ti Dios a kumpet iti nalinteg a kurso. Nangnangruna para kadagiti Kristiano, dagiti sungbat kadagiti kararag inramanna dagiti bambanag a kangrunaanna ket naespirituan, saan a nakaskasdaaw wenno nabileg nga ar-aramid.​—Colosas 1:9.

Ngarud, saankayo koma a mabainan no dagiti kararagyo ket saan a kanayon a masungbatan iti pamay-an a namnamaenyo wenno kaykayatyo. Kas pangarigan, imbes nga ikkatenna ti suot, mabalin a pilien ti Dios nga ited kadakayo ti “bileg nga ad-adda ngem iti gagangay” tapno maibturanyo dayta. (2 Corinto 4:7; 2 Timoteo 4:17) Pulos a ditay koma tagtagibassiten ti pateg ti kasta a bileg, wenno ditay met koma ipato a di pulos pudno a sinungbatan ni Jehova ti kararagtayo.

Usigenyo ti kaso ti awan sabali no di ti Anak ti Dios, ni Jesu-Kristo. Iti pannakaseknanna a saan koma a matay kas maysa a naminar a managtabbaaw, inkararag ni Jesus: “Ama, no tarigagayam, ikkatem koma kaniak daytoy a kopa.” Daytoy kadi a kararag siuumiso a dinenggeg ti Dios? Wen, kas napatalgedan idiay Hebreo 5:7. Ti Dios dina inispal ti Anakna iti kasapulan nga ipapatay iti kayo a pagtutuokan. Imbes ketdi, “maysa nga anghel manipud langit ti nagparang kenkuana ket isut’ pinakiredna.”​—Lucas 22:42, 43.

Maysa a makatukay, namilagruan a sungbat? Iti biang ti asinoman kadatayo, kasta la ketdi! Ngem ken Jehova a Dios, ti gubuayan ti kasta a bileg, daytat’ saan a milagro. Ken ni Jesus, manipud immun-una a biagna idiay langit, ket pagaammona dagiti napalabas a gundaway idi a dagiti anghel nagparangda kadagiti tao. Gapuna a ti langa ti anghel ket awanan makatukay a samay kenkuana saan a kas iti samayna kadatayo. Uray kasta, daytoy nga anghel, a nabatad a kaunay-unay ni Jesus manipud sakbay kaaddana kas tao, ti timmulong tapno Isut’ papigsaenna maipaay iti suot nga addan iti asideg.

Iti panangsungbatna kadagiti kararag dagiti matalek nga adipenna ita, masansan nga ited ni Jehova ti kasapulan a bileg tapno agibtur. Daytoy a pannaranay ket mabalin nga iti porma ti pammaregta manipud kaunay-unaytayo a kapada a managdayaw. Adda kadi asinoman kadatayo a mayat a mangilaksid iti dayta a pammaregta, a nalabit ipatotayo a yantangay dagiti padatayo nga adipen dida pay napasaran dagiti suot nga umasping kadagiti suottayo, awananda iti takder a mangpabileg kadatayo? Mabalin koma nga innala ni Jesus ti kasta a panangmatmat iti daydiay anghel a nagparang kenkuana. Imbes ketdi, inawatna ti pammaregta a kas sungbat ni Jehova iti kararagna ket iti kasta nabaelanna nga itungpal a simamatalek ti pagayatan ni Amana. Uray datayo met kayattayo nga awaten a sidadayag ti bileg nga ipaay ti Dios kas sungbat kadagiti kararagtayo. Laglagipenyo, met, a dagiti kakasta a panawen ti naanus a panagibtur ket masansan a sarunuen dagiti di mainanama a bendision.​—Eclesiastes 11:6; Santiago 5:11.

Agtalek a ti Dios ket Agimdeng

Dikay pulos pukawen ti panagtalek iti kinaepektibo ti kararag no saankayo a masungbatan a dagdagus. Dagiti sungbat kadagiti dadduma a kararag, kas kadagidiay maipaay iti personal a pakabang-aran manipud ladingit wenno maipaay iti napaadu a responsabilidad iti serbisio ti maysa a tao iti Dios, ket mabalin nga aguray iti tiempo nga ammo ti Dios nga umiso ken kasayaatan. (Lucas 18:7, 8; 1 Pedro 5:6) No agkarkararagkayo maipanggep iti maysa a banag a nauneg ti personal a pannakaseknanyo, ipakitayo iti Dios babaen panagtalinaedyo a nabara ti tarigagayyo, a nadalus ken nasudi ti motiboyo. Imparangarang ni Jacob daytoy nga espiritu idi a, kalpasan napaut a pannakigubalna iti maysa nga anghel, kunana: “Dika palubosan a pumanaw agingga a dinak bendisionan nga umuna.” (Genesis 32:24-32) Masapul a maaddaantayo iti umasping a panagtalek a no itultuloytayo ti agdawat, umawattayonto iti bendiosion inton madanon.​—Lucas 11:9.

Maudi a kapanunotan. Ti iyaawat iti dumngeg a lapayag manipud iti Soberano ti uniberso ket maysa a napateg a pribilehio. Maigapu itoy, siaannadtayo kadi a dumngeg no ni Jehova a Dios, baeten iti Saona, ket agsao kadatayo maipapan kadagiti kalikagumna? Bayat a dagiti kararagtayo iyegdatayo a nasingsinged iti Namarsuatayo, kayattayo nga ipaayan napasnek a panangasikaso iti isuamin nga ibagana kadatayo.

[Ladawan iti panid 6]

Ti Dios agimdeng kadagiti kararag. Agimdengtayo kadi kenkuana baeten iti Saona?