Pakaammo

Tulong Maipaay Kadagiti Komite ti Bagi a Manarawidwid

Dagiti kameng ti Bagi a Manarawidwid dagiti Saksi ni Jehova, nga iti agdama ket 12 ti bilangda, agtultuloyda nga agserbi a simamatalek kadagiti annongenda. Kankanayon nga agyamyamanda kadagiti nasungdo a kameng ti umad-adu a “dakkel nga umariwekwek” gapu iti naregta a tulongda. (Apocalipsis 7:9, 15) Maigapu iti napartak a sangalubongan nga irarang-ay, kasla maiyanatup iti daytoy a tiempo a maipaayan ti Bagi a Manarawidwid kadagiti kanayonan a tulong. Naikeddeng ngarud ti panangawis kadagiti sumagmamano a katulongan, kaaduanna manipud iti dakkel nga umariwekwek, a makipaset kadagiti miting ti tunggal maysa kadagiti Komite ti Bagi a Manarawidwid, nga isuda ti, Personnel, Publishing, Service, Teaching, ken Writing Committee. Ngarud, ti bilang dagiti tumabtabuno kadagiti miting ti tunggal maysa kadagitoy a komite ket manayonan tapno agbalin a pito wenno walo. Iti sidong ti panangiwanwan dagiti kameng ti komite ti Bagi a Manarawidwid, dagitoy a katulongan makipasetda kadagiti panangsalaysay ken ibaklayda dagiti nagduduma nga annongen nga ited kadakuada ti komite. Daytoy a kabbaro nga urnos ket agipekto inton Mayo 1, 1992.

Iti adun a tawen, ti bilang dagiti natda a napulotan a Saksi ket bumasbassit, bayat a ti bilang ti dakkel nga umariwekwek ket ngimmato iti labes pay dagiti kadadakkelan a pananginanamatayo. (Isaias 60:22) Anian a pagyamanantayo ni Jehova maigapu iti daytoy nakaskasdaaw nga irarang-ay! Idi a ti baro a nagan, a Saksi ni Jehova, ket siraragsak a naawat idi 1931, ti kangatuan a bilang dagiti agibumbunannag ti Pagarian ket 39,372, a kaaduan kadagita ket inaklonda a napulotan a kakabsat ida ni Kristo. (Isaias 43:10-12; Hebreo 2:11) Innem a pulo a tawen kalpasanna, idi 1991, ti sangalubongan a kangatuan a bilang dagiti agibumbunannag ket 4,278,820, a kadakuada 8,850 laeng ti nangaklon a kameng ti napulotan a natda. Kas napadaanan iti lawag dagiti Kasuratan, ti “dakkel nga umariwekwek” ad-adu ti bilangda itan ngem iti natda ti “bassit nga ipastoran” iti rukod a nasurok a 480 iti 1. (Lucas 12:32; Apocalipsis 7:4-9) Iti panangtaripatoda maipaay iti sumaksaknap nga intereses ti Pagarian, sigurado a kasapulan ken apresiaren dagiti natda ti pannakitinnunos ken saranay ti dakkel nga umariwekwek.

Kas nailawlawag iti daytoy a ruar Ti Pagwanawanan, adda maysa a grupo a makipagserserbi iti naespirituan nga Israel ita a maidilig kadagiti Netineo ken kadagiti annak a lallaki dagiti adipen ni Salomon a nagsubli manipud pannakakayaw idiay Babilonia kadua dagiti natda a Judio; dagidiay di-Israelita ad-aduda pay ngem dagidiay Levita a nagsubli. (Esdras 2:40-58; 8:15-20) “Dagiti naited” manipud iti agdama a dakkel nga umariwekwek ket nataengan a Kristiano a lallaki a naaddaanen kalkalainganna a kapadasan kas resulta ti panangtaripatoda maipaay iti panangaywan kadagiti sanga, iti panagdaliasat a trabaho, ken kadagiti 66,000 a kongregasion a naipasdek itan iti intero a daga.

Iti kallabes, dagiti Kingdom Ministry School ket naangay iti sangalubongan agpaay a pakasursuruan dagiti manangaywan ken dagiti katulonganda a ministerial nga adipen. Idiay Estados Unidos laeng, 59,420 a manangaywan ti timmabuno. Dagitoy a “lallakay” ket nakabalanda ngarud tapno ad-adda nga epektibo a maitungpalda dagiti responsabilidadda.​—1 Pedro 5:1-3; idiligyo ti Efeso 4:8, 11.

Idiay hedkuarter dagiti Saksi ni Jehova sadi Brooklyn, dadduma a “naited” ti nagserbin iti nakaad-adu a tawen. Dagitoy iramanna dagiti nataengan a manangaywan manipud iti dakkel nga umariwekwek a nakaragpaten iti kinabaknang ti abilidad ken kapadasan. Ngarud, ti Bagi a Manarawidwid nangpili iti sumagmamano kadagita a manangaywan tapno tumulong kadagiti miting dagiti komite ti Bagi a Manarawidwid. Dagitoy saan met a nasken nga isuda dagiti lallaki nga addaan kaatiddugan a rekord ti serbisio. Imbes ketdi, isuda ket nataengan, aduan-kapadasan a lallaki nga addaan kualipikasion a tumutop kadakuada maipaay iti panangted iti tulong kadagiti masinunuo a tay-ak. Ti pannakadutokda a makipagtrabaho iti maysa a komite ket saan a mangted kadakuada iti naisangsangayan a takder. Kas kuna ni Jesus maipanggep kadagiti adalanna, “dakayo amin agkakabsatkayo.” (Mateo 23:8) Nupay kasta, adut’ maitalek kadagitoy a lallaki, ket maigiddato nga “adu met ti makalikaguman” kadakuada.​—Lucas 12:48.

Pagrag-oantayo ti panagabante ti organisasion ni Jehova ita. Iti napalabas a sangapulo a tawen, addan ngangngani 100 a porsiento nga irarang-ay iti bilang dagidiay agserserbi idiay tay-ak, maitunos iti padto maipanggep iti Dakdakkel a David, ni Jesu-Kristo: “Iti irarang-ay ti gobiernona ken ti talna awanto ti patinggana.” (Isaias 9:7, King James Version) Iti isu met laeng a pamay-an a dagiti Netineo nakipagtrabahoda kadagiti papadi iti panangtarimaanda kadagiti bakud ti Jerusalem, kasta met ita a matungtungpal ti padto maipanggep iti organisasion ni Jehova: “Ket dagiti ganggannaet bangonendanto dagiti bakudmo.” (Isaias 60:10; Nehemias 3:22, 26) Rebbeng a makomendaran dagiti moderno-aldaw a Netineo gapu iti regta nga ipakitada iti panangibangon iti pudno a panagdayaw, a tultulonganda “dagiti papadi ni Jehova” iti aniaman a trabaho wenno serbisio a maituding iti sangalubongan nga organisasion ni Jehova.​—Isaias 61:5, 6.