Ti Namnama Parmekenna ti Leddaang!
IDIAY Webster’s Ninth New Collegiate Dictionary, ti leddaang ket nadepinar kas ti “nakaro a pannakapukaw ti namnama.” Nalawag, ngarud, tapno maparmek ti leddaang, kasapulantayo ti namnama!
Ti maysa a daksanggasat nga indibidual a napilit nga agnaed iti bangketa ket saan nga agleddaang ti nakaro no isut’ addaan namnama. Ti namnama urayna la maited kadagidiay agsagsagaba kadagiti tuok ti klinikal a leddaang ti tured ken bileg nga agibtur. Ngem ti namnama masapul a mapagtalkan! Aniat’ kaipapanan daytoy?
Ti Pakaibatayan ti Namnama
Usigenyo ti napasamak ken Sara, ti asawa ni patriarka nga Abraham. Iti iyaadanina iti 90 a tawenna, isu ket lupes pay laeng ken nabayagen a naglagawanna ti panagpasngayna man la koma iti maysa nga anak. Kaskasdi, idi a ni lakayna ket agtawen ti 99, inulit ni Jehova ti maysa a kari nga inaramidna tawtawenen ti napalabas—pudnonto a maaddaan ni Abraham iti maysa a “bin-i,” wenno agtawid. Ammo ni Abraham a maysa daytoy a mapagtalkan a kari. Panunotenyo no kasano karagsak la ketdi ni Sara idi a, simimilagro, naaramid ti naragsak a pasamak, ket impasngayna ni Isaac! (Genesis 12:2, 3; 17:1-4, 19; 21:2) Ti panagtalek ni Abraham iti Dios ket saan a di umisot’ nakaikabilanna, ta inlawlawag ni apostol Pablo: “Gapu iti kari ti Dios [ni Abraham] saan a nagdudua iti kinakurang ti pammati, no di ket nagbalin a nabileg babaen iti pammatina, nga impadayagna ti Dios”—Roma 4:20.
Iti panagsuratna kadagiti Judio a nagbalin a Kristiano iti kaaldawanna, inkalintegan ni Pablo a makapagpannurayda iti kari ti Dios maipapan pannakaisalakan baeten ken Jesus gapu iti dua a natakneng a rason. Iti panangadawna iti kari ti Dios ken Abraham ken ti impakuyogna a nadiosan a sapata, inrason ti apostol: “Dagiti tattao agsapatada babaen iti dakdakkel, ket ti sapatada isu ti panungpalan ti amin a suppiat, ta isu ti pammatalged kadakuada. Iti daytoy a banag ti Dios, idinto a pinanggep ti Dios nga ipakitana nga ad-adda pay nga aglaplapusanan kadagiti agtawid iti kari ti di panagbaliw ti balakadna, imballaetna ti maysa a sapata, tapno, baeten iti dua a di agbaliw a banag isuda a di mabalin a pagulbodan ti Dios, datayo a nakatalawen agturong iti pagkamangan maadaantayo koma iti nabileg a pammaregta a mangsalimetmet iti panginanamaan a naikabil iti sanguanantayo.” (Hebreo 6:16-18) Wen, dagiti kari ti Dios ket pudno ken mapagtalkan. Ni Jehova ket mannakabalin-amin ken naisangsangayan a makabael a mangipasigurado iti kaitungpalan ti bukodna a sao.
Namnama—“Agpada a Sigurado ken Natibker”
Insurat ni Pablo a ti Nakristianuan a namnama ket “agpada a sigurado ken natibker.” (Hebreo 6:19) Ammo ni Pablo no sadinot’ nakairamutan ti namnamana. Ilawlawagna: “Daytoy [ti namnama] sumrek nga agingga iti uneg ti abbong.” Aniat’ kaipapanan daytoy? Nagaramid ni Pablo iti nabatad a panangtukoy iti kadaanan a templo idiay Jerusalem. Iti daytoy adda Kasasantuan a siled, a naisina manipud amin a paset ti patakder babaen ti maysa nga abbong. (Exodo 26:31, 33; Mateo 27:51) Siempre, ti literal a templo idiay Jerusalem ket nabayagen a nadadael. Gapuna, ita, ania ti kaibatugan ti Kasasantuan?
Iti langit a mismo, a sadiay ti nakaitronoan ti Dios a mismo! Inlawlawag ni Pablo daytoy idi a kunana a ni Jesus kalpasan iyuulina “simrek, saan nga iti nasantuan a lugar nga inaramid dagiti im-ima [idiay templo sadi Jerusalem], a ladawan ti kinaagpayso, no di ket idiay langit a mismo, tapno agparang ita iti saklang ti persona ti Dios agpaay kadatayo.” (Hebreo 9:24) Gapuna a ti Nakristianuan a namnama, a mangtulong kadatayo a manglaban iti leddaang, agpannuray saan a kadagiti natauan a politiko no di ket iti nailangitan nga urnos. Agpannuray dayta iti Daydiay dinutokan ti Dios, ni Jesu-Kristo, a nangited iti biagna kas subbot kadagiti basoltayo ken nagparang itan iti saklang ti Dios agpaay kadatayo. (1 Juan 2:1, 2) Mainayon pay, kas masansan a naipakitan kadagiti binatog daytoy a magasin, daytoy met laeng a Jesus isu daydiay nadiosan-pannakadutokna nga agturay kas Ari iti nailangitan a Pagarian ti Dios ken ar-aramidennan dayta sipud pay 1914. Daytoy a nailangitan a Pagarian din agbayag ikkatennan dagiti bambanag a mangiturong kadagiti adu iti panagleddaang.
Namnama—“Maysa a Sinipete ti Kararua”
Tapno allukoyenna dagiti managbasana a ti namnamada iti pannakaisalakan baeten ken Jesus ket nasayaat pannakaipasdekna, nangaramat ni Pablo iti panangiyasping. “Daytoy a namnama,” inlawlawagna, “addaantayo iti dayta kas maysa a sinipete ti kararua.”—Hebreo 6:19.
Dagiti sinipete ket pagaammo unay dagiti agdaldaliasat kas ken Pablo. Dagiti nagkauna a sinipete ket umasping unay kadagiti moderno, a masansan naaramid iti landok nga addaan dua a kasla ngipen a murdong tapno kumpet a naimbag iti tukok. Iti panagturongna idiay Roma agarup idi tawen 58 K.P., nagpeggad iti pannakaisadsad ti barko a nagluganan ni Pablo. Ngem bayat a nagturong ti barko iti ab-ababaw a danum, dagiti managlayag “nangiwayatda iti uppat a sinipete manipud murdong ti barko.” Naimbag la ketdin ta adda dagidiay a sinipete, ti barko sitatalged a nakalasat iti bagio.—Aramid 27:29, 39 40, 44.
Ania, ngarud, ti aramidenyo tapno mapagbalinyo ti namnamayo kas katalged iti maysa a sinipete tapno malasatanyo ti ekonomiko a rigat, pisikal wenno emosional a sakit, wenno aniaman a sabsabali a “bagio” a mabalin a dumteng kadakayo? Umuna, ipasiguradoyo iti bagiyo a dagiti kari ti Biblia ket mapagtalkan. “Siguraduenyo dagiti amin a banag.” (1 Tesalonica 5:21) Kas pangarian, inton sumaganad a makisarita kadakayo dagiti Saksi ni Jehova, agimdengkayo iti ibagada. No mammano a sumarungkarda iti pagnanaedanyo, birukenyo ida iti kaasitgan a Kingdom Hall. Saankayonto a masugsogan a tumipon kadakuada, ngem maawiskayonto nga umawat iti maysa a libre a kurso ti panagadal ti Biblia, a naiyurnos a maidauluan sadinoman ken kaanoman a kumbeniente dayta kadakayo.
Ti kasta a panagadal ipasiguradona kadakayo a ti Dios “agbalin a mananggunggona kadagidiay sipipinget a mangsapsapul kenkuana.” (Hebreo 11:6) Maadalyo nga iti mabiit ti Pagarian ti Dios iti sidong ti Ari, ni Kristo Jesus, ikkatennanto ti kinarugit ken di panagpapada a mamagleddaang kadagiti adu ita. Iti sidong dayta a Pagarian, daytoy a daga maisublinto a paraiso, ket itedto ti Dios ti biag nga agnanayon kadagidiay mangayat kenkuana. (Salmo 37:29; Apocalipsis 21:4) Anian a nagdayag a namnama!
Siaannad a basaenyo ti Biblia tapno makitayo a pudno daytoy a namnama. Kalpasanna ikarigatanyo a patanoren ti nasinged a personal a pannakirelasion iti Dios, nga agbalin a gayyemna kas idi ken Abraham. (Santiago 2:23) Yantangay ni Jehova isu ti “Managdengngeg iti kararag,” ibagayo kenkuana dagiti pakaseknanyo. No napasnek ti iyaadaniyo, tulongannakayo ti kararagyo a mangiwaksi kadagiti babantotyo ken mangparmek iti leddaangyo. Ti espiritu ti Dios mabalin pay nga ilukatna ti dalan tapno sukatanna ti kasasaad a mangpalpaldaang kadakayo.—Salmo 55:22; 65:2; 1 Juan 5:14, 15.
“Salimetmetan a Sititibker”!
Kalpasan panangisingasingna a dagiti padana nga adalan “siguraduen[da] dagiti amin a banag,” innayon ni Pablo: “Salimetmetanyo a sititibker ti naimbag.” (1 Tesalonica 5:21) Maysa a pamay-an a maaramidan daytoy isu ti pannakitimpuyog kadagiti tattao a mangsalsalimetmet a sititibker met iti Nakristianuan a namnama. Impakdaar ni masirib nga Ari Salomon: “Ti makipagna kadagiti masirib agbalinto a masirib, ngem ti makilangen kadagiti maag pagdukotannanto.” (Proverbio 13:20) Dikay palubosan ti panangidumduma wenno rikrikna ti kinamanagbabain a manglapped kadakayo manipud panangsapul iti nasayaat a pannakilangen. Kas pangarigan, kadagiti Saksi ni Jehova adu kadakuada ti tattao nga iti napalabas ket awanandat’ namnama. Ngem ti panagadalda iti Biblia, agraman naragsak a pannakilangen kadagiti kapammatianda, papigsaenna ti pannakirelasionda ken Jehova ken ipaayanna ida iti mapagtalkan, kas sinipete a namnama. Pudno kadi a parmekenna daytoy ti leddaang? La ketdi.
Utobenyo ti kaso ni Annmarie, a nagleddaang gapu iti panagsagabana iti narungsot a panangtrato ti asawana. “Inkeddengko nga agbekkelak,” inlawlawagna, “ngem gapu iti sumagmamano a rason inkeddengko nga agkararagak pay nga umuna iti Dios. Malagipko ti panagkunak, ‘Apay a dinak matulongan? Iti nakabaybayag nanginanamaak kenka, ngem awan mamaayna.’ Ingngudok ti kararagko nga addaan panangipagarup nga awan panggep ti biag, gapuna a nasaysayaat laengen no matayak. Iti dayta a kanito adda nagtuktok iti ridaw. Inkeddengko a diak ikaskaso dayta, iti panangnamnamak a no asinoman dayta ket pumanawto met laeng.
“Nagtultuloy ti panagtuktok, ket nasingaak. Pinunasko dagiti luak ket napanko kinita no asino ti adda idiay ruangan, a namnamaek a pumanaw a dagus tapno maaramidko ti gandatko. Ngem,” kuna ni Annmarie, “pagyamanan ken Jehova, saan a kasta ti pannakapasamakna, ta idi luktak ti ridaw, nasarakak ti dua a babbai nga agtaktakder sadiay. Pudno, nariribukanak unay, ket pudno a diak naawatan ti ibagbagada. Ngem nangitukonda kaniak iti maysa a libro a mangilawlawag a ti biag ket addaan panggep. Apag-isu a daytat’ kasapulan tapno mapabarak manen ti interesko iti biag.” Inyurnos dagiti sangailina ti maysa a regular a panagadal ti Biblia kenkuana. Nasursuro ni Annmarie ti agbalin a gayyem ti Dios. Daytoy, met, ti nangted kenkuana ti panggep iti biag. Ita tultulonganna dagiti sabsabali a mangpatanor iti panagtalek iti Dios.
Nalabit ninamnamayon ti panungpalan ti leddaang a dikay inutob ti amin a nainaig. Ngem no naikararagyon: “Umay koma ti pagariam. Maaramid koma ti pagayatam, kas sadi langit kasta met ditoy daga,” no kasta inkararagyon ti iyaay ti Pagarian ti Dios iti sidong ni Jesu-Kristo, a mangpukawto kadagidiay bambanag a mangiduron kadagiti nalinteg-panagpuspusona a tattao iti leddaang. (Mateo 6:10) Ti personal a panagadalyo iti Biblia ken ti regular a pannakitimpuyogyo kadagiti sabsabali nga addaan iti isu met laeng a panagtalek papigsaennanto ti panangpetpetyo iti namnama agpaay iti iyaay ti Pagarian ni Jehova ken mangiyeg iti Paraiso ditoy dagatayo. (1 Timoteo 6:12, 19) Isu daytoy ti nadayag a namnama nga ipakpakaammo daytoy a magasin iti tunggal ruarna. Siraragsak nga abrasaenyo ti namnama tapno malabananyo ti leddaang. Pudno unay, ti namnama “saan a mangituggod iti pannakapaay.”—Roma 5:5.
[Ladawan iti panid 7]
Ti panangadal iti Biblia ipaayannatayo ti namnama nga agserbi kas “maysa a sinipete ti kararua”