Panagsao iti Dildila—Agraraira a Pasamak
“MAYSA a pannakabalin ti nangkontrol iti dilak ket nagayus lattan dagiti sasao a kas danum. Anian a rag-o dayta! Kasta unay a kinadalus ti adda a riknak. Nanipud idin, saanak a kas ti datin,” indir-i ti maysa a naaddaan ti karkarna a kapadasan ti panagsao iti “di ammo a dila.”
Daytat’ panangiladawan ti maysa a tao iti kaunaan a kapadasanna a nagsao iti “di ammo a dila.” ‘Ngem ania dayta?’ mabalin a siuumiso a damagen dagiti dadduma. Daytat’ tumukoy iti maysa a kadawyan wenno pammati dagiti sumagmamano a relihion nga aklonen dagiti lallaki ken babbai a matigtignayda babaen ti espiritu ti Dios nga agsao iti ganggannaet wenno karkarna a pagsasao a dida ammo.
Daytat’ agraraira a narelihiusuan a pasamak. Naminsan a namatmatan a kas pasamak kadagiti laeng manamati a Pentecostal, ti panagsao iti dildila lab-awanna itan dagiti tradisional a pagbeddengan dagiti denominasion a mangiraman kadagiti Baptista, Episkopaliano, Luterano, Metodista, Presbiteriano, ken Romano Katoliko. Ti kasasaad ti maysa a tao nga adda iti daytoy a kapadasan ket nailadawan kas addaan rag-o, pungtot, pannakalungug, ken pannakailabeg. Awagan dagiti dadduma dayta kas di magawidan a kapadasan. Adda misterio ken pannakakayaw a mainaig iti panagsao iti dildila.
Apay Addat’ Tarigagay Ita kadagiti Sagut ti Dildila?
Iti librona a Tongues of the Spirit, isingasing ni Cyril G. Williams a mabalin nga adda “pagnaigan ti pannakapaay ken ti tarigagay nga agsao iti ‘dildila.’” Inladawanna dayta kas maysa a mekanismo a mangluk-at nga addaan “makaagas a pateg a mangkissay iti danag” ken “mangrisut iti makin-uneg a pannakariribuk.” Ti pannakapaay iti trabaho iti simbaan, pannakariribuk ti rikna, pannakapaay iti karera, pannakaulila, dandanag, wenno panagsakit iti pamilia, ket nadakamat kas bambanag a mangparnuay kadagita a narag-o a panagsao.
Umasping iti dayta, iti The Psychology of Speaking in Tongues, kunaen ni John P. Kildahl a “ti panagdandanag ket kasapulan tapno maparang-ay ti kabaelan nga agsao iti dildila.” Babaen ti personal a panagsirarak ken naannad a panaginterbiu, natakuatan a “nasurok a 85% kadagiti managsao iti dildila ti nakapadasen iti nabatad a pannakailawlawagna a panagdandanag sakbay ti panagsaoda iti dildila.” Kas pangarigan, tinarigagayan ti maysa nga ina ti makapagsao iti dildila tapno maikararaganna ti anakna a lalaki nga addaan kanser. Nangrugi a nagsao iti dildila ti maysa a lalaki bayat ti panawen nga isut’ di makaikeddeng idi naitukon kenkuana ti pannakaital-o iti trabaho. Nangrugi a nagsao ti maysa a babai iti dildila iti las-ud ti makalawas kalpasan a ni lakayna ket nakikadua iti Alcoholics Anonymous.
Aniat’ Mapadasan ti Maysa?
Impadamag ti maysa pay a nakapagsaon iti dildila iti damdamo unay: “Nariknak a masinsinit ti amin a bagik, ken agpayegpeg ken agarubos ti ling-etko, agkuyegyeg ken agkapuy dagiti saksakak.” Mainaig iti kapadasan a panagsao iti dildila, masansan nga adda karkarna a kapadasan a makariribuk kadagiti dadduma. Kas pangarigan, “ngangngani naltutan ti maysa a balasitang iti katayna bayat a nagunnat iti tugaw, a nakasanggir ti ulona iti dayta, dagiti mukodnat’ adda iti suelo, simmikkil dagiti gurongna.” Bayat ti maysa a gimong ti kongregasion “nagbalibalinsuek ti maysa a lalaki manipud maysa a pungto ti simbaan agingga iti sabali a pungto.”
“Kadagiti dadduma a tao,” insurat ni Propesor William J. Samarin, “ti panagsao iti dildila ket maysa a kasasaad a pannakabautisar iti Nasantuan nga Espiritu.” No awan dayta, “mariknada nga adda bassit kurangda.” Mamatmatmatan met dayta “kas sungbat iti kararag, maysa a pammasiguro iti nadibinuan nga ayat ken pannakaanamong.” Kinuna dagiti dadduma a daytat’ mangiparikna kadakuada iti makin-uneg a panagtutunos, rag-o, ken talna, ken iti “dakdakkel a pannakarikna ti pannakabalin” ken “nabilbileg a pannakarikna ti pannakabigbig.”
Ti kadi datdatlag a panagsao ket pudpudno a pammaneknek iti panagtignay ti nasantuan nga espiritu? Ti kadi pannakapadas ipabigbigna ti maysa a tao kas pudno a Kristiano? Ti kadi panagsao iti dildila ket paset ti maanamongan a panagdayaw ita? Dagitoy a saludsod maikarida iti nainget pannakasukimatna a sungbat. Apay? Agsipud ta kayattay nga anamongan ken bendisionan ti Dios ti panagdayawtayo.