Papanglakayen—Mangdutokkayo!
ISUT’ naanus, napakumbaba a lalaki, nga addaan dakkel a panangipateg iti kinahustisia a pinatanor dagiti kapadasanna iti biag. Gapuna, nasurok a tallo milion a lallaki, babbai, ken ubbing ti sitatalek nga umay agpabalakad kenkuana. Inkagumaanna a di paayen ida. Manipud bigat inggana rabii a dimngeg kadagiti parikutda ken siaanus a tinulonganna ida a makakita no kasano nga agaplikar dagiti linteg ti Dios iti kasasaadda. Wen, iti ababa nga unos ti panawen, ag-3,500 a tawenen ti napalabas, maymaysa laeng a lalaki ti nangukom kadagiti 12 a tribo ti Israel—ni Moises.
Nupay kasta, naseknan ni Jetro, katugangan ni Moises. Kasano a maaguantaan ni Moises ti trabahona? Isu a kinuna ni Jetro: “Ti aramidem saan a naimbag. Di bumurong a mapaksuyankanto, sika ken dagiti tattao a kaduam, ta daytoy nga annongen napalalo ti dagsenna kenka. Dika mabalin nga aramiden a siksika laeng.” (Exodo 18:17, 18) Ti solusion? Imbalakad ni Jetro ken Moises nga itedna ti dadduma nga annongenna kadagiti dadduma. (Exodo 18:19-23) Nasayaat a balakad!
Iti uneg ti kongregasion Kristiano ita, adu a panglakayen, kas ken Moises, ti mangay-aywan ti ad-adu ngem ti kabaelanda nga aramiden nga is-isuda laeng. Isuda ti mangiyurnos kadagiti gimong ken mangisagana ket kalpasanna mangiparang kadagiti paset iti programa iti naurnos, ken epektibo a pamay-an. (1 Corinto 14:26, 33, 40; 1 Timoteo 4:13) Asikasuen met dagiti panglakayen dagiti kasapulan dagiti indibidual a miembro ti kongregasion. (Galacia 6:1; 1 Tesalonica 5:14; Santiago 5:14) Isuda ti mangidaulo iti kapatgan a trabaho a panangasaba ti naimbag a damag ti Pagarian. (Mateo 24:14; Hebreo 13:7) Isuda met ti mangurnos kadagiti suplay ti literatura para iti kongregasion a maiwaras iti publiko.
Mainayon pay, maikkan dagiti dadduma a panglakayen kadagiti paset kadagiti programa iti asamblea sirkito ken distrito a kumbension. Agserbida kadagiti organisasion ti asamblea ken hospital liaison committees. Dagiti dadduma tumulongda iti panangbangon ti Kingdom Hall. Ket amin dagitoy mainayon kadagiti rebbengenda iti pamilia ken ti panangtaraonda iti bagbagida a mismo iti naespirituan. (Idiligyo ti Josue 1:8; Salmo 110:3; 1 Timoteo 3:4, 5; 4:15, 16.) Kasano a maibanag dagita a Kristiano a lallaki amin daytoy? Kas ken Moises, kasapulanda ti tulong. Masapul a sursuruenda ti mangdutok. Kinapudnona, ti tao a di mangdutok ket nakapuy nga organisador.
Ti Pateg ti Panangsanay kadagiti Dadduma
Adda pay dadduma a rason iti panangitalek ti annongen. Iti pangngarig ni Jesus maipapan kadagiti talento, sakbay a nagbiahe, inayaban ti apo dagiti adipenna ket intalekna kadakuada ti nagduduma a rukod ti annongen. (Mateo 25:14, 15) Iti kasta, naragpat ti apo ti sumagmamano a panggep. Umuna, bayat ti kaawanna, dagiti adipenna ti nangakem iti lugarna ket saan a gimminad ken nagsardeng dagiti nasken a trabaho bayat ti kaawanna. Maikadua, yantangay aramid ti pakakitaan, makita ti apo dagiti abilidad ken kapudno dagiti adipenna. Maikatlo, inikkan ti apo dagiti adipenna iti gundaway a makagun-od ti kasapulan-unay a kapadasan.
Adda kaipapanan daytoy a pangngarig kadatayo ita. Idi pinanawan ni Jesus ti daga, isut’ nangitalek iti annongen kadagiti napulotan nga adalanna. Sungsungbatan pay laeng dagiti natda kadagitoy ti sangalubongan nga intereses ti Pagarian. (Lucas 12:42) Bayat ti moderno-aldaw a panangaywan dagiti napulotan, nalawag a bembendisionan ni Jehova ti organisasionna. Kas nagbanaganna, nakaskasdaaw ti irarang-ayna. Iti laeng napalabas a lima a tawen, nasurok a maysa a milion a kabbaro ti nangisimbolo ti dedikasionda babaen ti bautismo iti danum! Nagresulta daytoy iti rinibo a baro a kongregasion ken ginasut a baro a sirkito.
No kasano a nangitalek ni Jesu-Kristo kadagiti annongen iti “matalek ken naannad nga adipen,” inikkanda met dagiti panglakayen ken ministerial nga adipen manipud iti “sabsabali a karnero” kadagiti annongen iti kongregasion. (Mateo 24:45-47; Juan 10:16) Nupay kasta, adu pay a dedikado a lallaki ti kasapulan a mangaywan iti dakkel nga irarang-ay. Paggapuanda ngay? Masapul a sanayen ida dagiti panglakayen. Ngem kasano koma ngay a masanay dagiti panglakayen dagita a lallaki no saanda met nga ikkan kadagiti maitutop nga annongen dagiti makabael nga indibidual? Kasano a maaddaan dagiti panglakayen iti gundaway a mangpaliiw kadagiti abilidad ken kapudno dagiti ub-ubing a lallaki?
Aniat’ Kaipapanan ti Panangdutok?
Kadagiti dadduma, ti “panangdutok” kaipapananna ti panangibbat, panangliklik, panangliway, wenno panangilusulos kadagiti annongenda. Nupay kasta, no mausar a siuumiso, ti “panangdutok” kinapudnona ket maysa a pamay-an ti panangtungpal kadagiti annongen. Ti Ingles a verbo a “to delegate” (mangdutok) ket nadepinar kas, “italek iti sabali; dutokan kas pannakabagi; ikkan ti annongen wenno autoridad.” Nupay kasta, ti nangdutok ti manungsungbat iti maaramid.
Nalabit agkedked dagiti dadduma a mangdutok gapu ta maamakda di la ket ta maawanandanton ti kontrol. Ngem, ti panangdutok dina kaipapanan ti pannakapukaw ti kontrol. Nupay di makita ken agturturay sadi langit, ni Kristo Jesus a mismo ti mangtengtengngel iti kongregasion Kristiano. Italekna met ti kongregasion iti panangaywan dagiti addaan kapadasan a lallaki.—Efeso 5:23-27; Colosas 1:13.
Mabalin nga agkedked a mangdutok dagiti dadduma gapu ta para kadakuada naparpardas no isudan a mismo ti mangtaming iti trabaho. Nupay kasta, nakita ni Jesus ti pateg ti panangsanay kadagiti dadduma. Awanen ti nalalaing pay a nangisuro ditoy daga ngem ni Jesus. (Juan 7:46) Kaskasdi, kalpasan a nangted ti instruksion kadagiti 70 nga adalanna, imbaonna ida a mangasaba. Nupay saanda a mapadisan ti abilidad ni Jesus a mangisuro, nalaus ti ragsakda a nagsubli gapu iti panagballigida. Nakipagrag-o ni Jesus kadakuada ken kinomendaranna ida, ta ammona nga isudanto ti mangituloy iti trabaho inton isut’ awanen ket dakdakkelto ti magapuananda ngem iti kabaelanna nga aramiden nga is-isuna laeng.—Lucas 10:1-24; Juan 14:12.
Ti panangdutok kaipapananna met ti panagpatulong kadagiti nasken a babassit a banag. Iti aldaw kasakbayan ti ipapatay ni Jesus, tinudinganna da Pedro ken Juan a mangisagana ti pannangan iti Paskua. (Lucas 22:7-13) Isu a di nagdanag ni Jesus ti pananggatang iti kordero, arak, awan lebadurana a tinapay, ken napait a natnateng; ken saan metten a kinasapulan nga isu ti mangisagana kadagiti alikamen, sungrod, ken dadduma pay a kasapulan. Da Pedro ken Juan ti nangasikaso kadagita.
Makagin-awa met dagiti panglakayen ita no tuladenda ti ulidan ni Jesus. Kas pangarigan, mabalinda a kiddawen iti manangaywan ti literatura nga agpedido kadagiti kasapulan a suplay para iti mapasungad a kampania. Mabalinda nga ibaga kenkuana nga adalenna dagiti rekordna tapno maammuan no kasanot’ pannakaaramat dagiti umasping a bambanag kadagiti napalabas a kampania. Mabalin nga adalenna met ti kasasaad ti teritoria ti kongregasion sakbay a mangisagana ti maitutop a porma ti pedido. Kalpasanna ipakitana ti porma iti sekretario ti kongregasion. No kabesadon ti manangaywan ti literatura ti trabahona, saanen a kasapulan pay nga uliten ti sekretario a kitaen dagiti napalabas a rekord no la ket ta rasonable dagiti dagup iti porma ti pedido. Nalawag, daytoy simple a pamay-an ti panangdutok palakaenna ken pasimplienna ti panangaramid ti pedido iti literatura kadagiti amin a maseknan.
Yantangay dakkel ti maitedna a pagimbagan, ania dagiti epektibo a pamay-an iti panangdutok?
No Kasano ti Mangdutok
Ibagayo ti aramiden. Umuna iti amin, ibagayo no ania ti kayatyo a maaramid. “Pagsapulyo agingga iti agsubliak,” daytat’ imbaga ti “natan-ok a tao” kadagiti adipenna iti pangngarig ni Jesus maipapan kadagiti mina. (Lucas 19:12, 13) Ninamnama ti apo kadagiti adipen a pagsapulda ti minana sadanto ipadamag ti nasapulanda inton sumangpet. Ammoda no aniat’ inda aramiden. Kasano nga agaplikar daytoy a prinsipio iti moderno-aldaw a proyekto a panangbangon ti Kingdom Hall? Kas pangarigan, natural laeng nga ibaga iti kabsat a natudingan a mangtarimaan iti atep no ania dagiti material a mausar, no pakasarakan kadagita, ken no kaano nga irugi ti trabaho, no ipalubos ti panniempo. Agresulta ti kasta nga espesipiko nga instruksion iti nasayaat nga urnos.
Nasken met nga ilawlawag saan laeng a no aniat’ iraman ti trabaho no di pay ket no ania a desision ti maipalubos nga aramiden ti maysa ken no ania a bambanag ti masapul a maiyuman iti sabali. Imbaga ni Moises kadagiti dinutokanna a dagiti babassit a kaso ti tamingenda, ket ipanda kenkuana dagiti narikut a kaso.—Exodo 18:22.
No mangtedkayo kadagiti annongen, kitaenyo amangan no pareho a trabaho ti maited iti dua nga indibidual. Makariro no adu ti maikkan ti pareho nga annongen. Panunotenyo ti mapasamak no iti dakkel a kumbension dagiti Saksi ni Jehova, agpadpada a ti Cleaning Department ken ti Food Service Department ti naituding a mangdalus kadagiti food stands, wenno no agpadpada a ti Attendant Department ken ti Immersion Department ti naituding a mangasikaso kadagiti mangbuya iti bautismo.
Mangpilikayo kadagiti makabael a lallaki. Imbalakad ni Jetro ken Moises: “Masapul a pumilika kadagiti makabael, managbuteng-Dios a lallaki nga aggapu kadagiti amin nga umili, mapagtalkan ken di mapasuksokan a lallaki, ket dutokam ida kas pangulo dagiti tattao.” (Exodo 18:21, The New English Bible) Nalawag, masapul a masabet nga umuna ti maysa a kabsat dagiti naespirituan a kualipikasion. Tapno madeterminar no “makabael” met laeng ti maysa a mangaramid iti maited a trabaho, masapul a kitaen dagiti bambanag kas ti personal a kababalin, kapadasan, pannakasanay, ken talento. Kas pangarigan, mabalin a maibagay ti maysa a Kristiano nga addaan naayat, makaay-ayo, mannakitulong a kababalin a mangaywan ti magasin wenno agbalin nga attendant. Umasping iti dayta, iti panangpili iti maysa a tumulong iti sekretario ti kongregasion, maiparbeng laeng a paliiwen no kasano kasinopna. Nakadaldalimanek kadi, mapangnamnamaan, ken ammona ti agilimed? (Lucas 16:10) Ti panangpanunot kadagita a banag malaksid kadagiti kasapulan a naespirituan a kualipikasion ket makatulong iti panangisaad ti maitutop a tao iti trabaho.
Itedyo amin a kasapulan. Ti agserserbi rumbeng a maaddaan kadagiti kasapulanna a mangiringpas iti naited a trabahona. Nalabit kasapulanna ti alikamen, gastosen, wenno tulong. Itedyo amin a masapulna. Kas pangarigan, mabalin a makiddaw ti maysa a kabsat a mangtarimaan iti Kingdom Hall. Siempre, nasken a maibaga kenkuana no ania dagiti rumbeng nga aramiden, ngem mabalin a masapulna ti kuarta a panggatang kadagiti kasapulan a material. Nalabit kasapulanna ti tulong. Isu a mabalin a kiddawen dagiti panglakayen kadagiti dadduma nga isut’ tulonganda wenno ipakaammoda iti kongregasion a ‘ni Kabsat Kastoy adda trabahuenna iti paggigimongan, ket mabalin nga asitgannanto ti dadduma kadakayo tapno agpatulong.’ Ti kasta a panangiplano lapdanna ti maysa a mangted ti trabaho a di mangipaay ti umdas a kasapulan. “Itedyo amin a kasapulan no mangtudingkayo,” kuna ti maysa a management consultant.
No mangtedkayo kadagiti annongen, ipakaammoyo kadagiti dadduma a ti tao a dinutokanyo ti agserbi a pannakabagiyo. Ti autoridad nga agsaad iti lugaryo ket kasapulan met. Nadutokan ni Josue kas ti baro a lider ti Israel iti sango ti “dagup ti gimong.” Naibilin ken Moises nga ‘isaadna ti tan-ok[na] kenkuana.’ (Numeros 27:18-23) Iti kongregasion, maaramid met dayta babaen ti panangipaskil laeng ti listaan dagidiay naikkan ti annongen iti information board.
Suportaranyo ti desisionda. Ita mabalinen nga irugi ti nadutokan a kabsat ti trabahona. Nupay kasta, laglagipenyo, nga isut’ maparegtayo no suportaranyo dagiti nasayaat a pangngeddengna. Kas pangarigan, kas maysa a panglakayen mabalin nga adda bukodyo a wagas ti panangisimpa kadagiti mikropono wenno muebles iti plataporma ti Kingdom Hall, a nalabit naiduma iti pamay-an ti natudingan a kabsat. Nupay kasta, no bay-anyo ti kabsat a mangasikaso iti plataporma a mangaramid iti kayatna, maadalna ti agtalek ken makagun-od ti kapadasan. Maysa pay, mabalin a pasayaatenna pay ketdi dagiti bambanag. Kinuna ti maysa a business consultant: “Itedyo ti trabaho, saan a no kasano nga aramiden dayta. . . . Masansan a rummuar ti manangparnuay a talento.”
Mainayon pay, ammo a naimbag ti kabsat nga aktual a mangar-aramid iti trabaho ti kasasaad ket mabalin ngarud nga ad-adda a maawatanna dagiti problema a nainaig iti dayta. Mabalin a tamingenna dagiti problema buyogen dagiti epektibo a solusion. Mabalin a maasikasona met dagiti banag a di madlaw dagiti agpalpaliiw. Gapuna, kinuna ti maysa a Kristiano a manangaywan maipapan iti adda padasna a kabsat a timmulong kenkuana: “No kunana nga adda parikut, mamatiak kenkuana.”
Wen, nagpateg kadagiti Kristiano a panglakayen dagiti dedikado a lallaki ken babbai a sitatallugod ken makabael a tumulong iti aniaman a maipaaramid kadakuada. Papanglakayen, usarenyo dagitoy a nagsayat a kakabsat! Ti panangdutok ket pagilasinan ti kinaemma ken kissayanna ti pakadagsenan ken pannakapaay. Saan laeng a dakdakkel ti maaramidanyo no di ket ipapaayanyo pay dagiti dadduma iti gundaway a makagun-od ti kasapulan a kapadasan.