Dagiti Buya Manipud Naikari a Daga

Ipapan Idiay Silo​—Nasasayaat nga Annak ken Dakes

NO MAPANUNOTYO dagiti siudad, ili, wenno lugar iti Naikari a Daga, malagipyo kadi dagiti sumagmamano a nalatak a lallaki ken babbai? Mabalin a kasta, ta kaaduan a salaysay ti Biblia iramanda dagiti nataengan. Ngem dagiti ngay ubbing idi? Dardarepdepenyo met kadi ida?

Matulongannatayo ti buya nga adda iti ngato a mangipamaysa kadagiti salaysay a nakairamanan dagiti agtutubo, a sumagmamano kadakuada ti nasayaat nga ulidan agpaay kadagiti Kristiano ken dadduma kadakuada ti pakaballaagan. Mabalin a ti nagtimbukel a turod iti tengnga ti nakaisaadan ti Silo.a

Nalabit malagipyo nga idi sinerrek ti Israel ti Naikari a Daga, imbangonda nga immuna ti tabernakulo ti Dios idiay Gilgal nga asideg ti Jerico. (Josue 4:19) Ngem idi nabingbingay ti daga, inyalisda daytoy a sagrado a tolda​—ti sentro ti panagdaydayaw ti Israel​—ditoy Silo. (Josue 18:1) Daytoy ket ag-30 kilometro iti daya ti Jerusalem iti kabambantayan a deppaar ti Efraim. Nagdaliasat dagiti lallaki ken babbai a naggapu iti intero nga Israel idiay Silo; adu a tao ti mabalin nga aguummong iti tanap a nalabit abagatan ti nakaipasdekan ti tabernakulo. (Josue 22:12) Mailadawanyo kadi dagiti ubbing nga umay ditoy?

Immay dagiti dadduma. Ti kalatakan kadagitoy nga ulidan a rumbeng a maammuantayo isu ni agtutubo a Samuel. Iti maysa nga ili iti tapaw dagiti turod iti laud ti nagnaedan dagiti dadakkelna, da Elcana ken Anna. Tinawen nga umayda ditoy, a nalabit ikuyogda dagiti dadduma nga annak ni Elcana iti sabali nga asawana. Idi kamaudiananna pinaraburan ni Jehova ni Anna iti maysa nga anak a lalaki, a napanaganan iti Samuel. Dimteng ti tiempo nga isut’ pinagnaed dagiti dadakkelna idiay Silo tapno makapagserbi iti tabernakulo a kadua ti nangato a padi a ni Eli.​—1 Samuel 1:1–2:11.

Adu ti trabaho ni Samuel iti balay ti Dios, ket adu la ketdi ti gundawayna nga agsursor kadagiti asideg a turod. (1 Samuel 3:1, 15) Dadduma kadagita ti natukantukad ken napno kadagiti kayo ti olibo, kas makita iti ladawan iti panid 9. Paliiwenyo ti bassit a bato a pagwanawanan. Dita a pagwanawanan ti pagbantayan dagiti naiputputong a mannalon wenno papastor, ngem mailadawanyo nga uray ni Samuel umuli met nga agbantay. (Idiligyo ti 2 Cronicas 20:24.) Nagsayaat dayta a pagbantayan kadagiti atap nga animal.

Ad-adu ti kayo idi sadiay ngem ita, uray bakir a pagdakiwasan dagiti atap nga animal. (Josue 17:15, 18) Ammotayo daytoy babaen ti napasamak idi nagbalin ni Eliseo a kangrunaan a propeta ti Dios. Sumangsang-at idi ni Eliseo nga agturong idiay Bet-el manipud Jerico, isu nga adda iti daytoy a disso idi, ag-16 kilometro iti abagatan ti Silo. Kasanot’ panangawat kenkuana dagiti taga Bet-el, a nagbalin a sentro ti panagdayaw iti balitok a sinan-baka? (1 Ar-ari 12:27-33; 2 Ar-ari 10:29) Mabalin a kabusbusor dagiti nataengan ti propeta ni Jehova, ket kasla naipatawidda ti kababalinda kadagiti annakda.

Kunaen kadatayo ti 2 Ar-ari 2:23,24 a rinabrabak ti maysa a bunggoy dagiti agtutubo ti propeta ti Dios: “Sumang-atka, kalbo! Sumang-atka, kalbo!” Kas sungbatna, ni Eliseo “inlunodna ida iti nagan ni Jehova. Ket dua nga oso a kabáyan rimmuarda iti bakir, ket pinisangpisangda ti uppat a pulo ket dua nga ubbing kadakuada.” Rumungsot ti kakasta a maris-daga nga oso ti Siria no makigtotda wenno no kasla agpeggad dagiti urbonda. (2 Samuel 17:8; Proverbio 17:12; 28:15) Inusar ida ti Dios a nangdusa kadagiti nangumsi iti pannakabagina, a katupagna ti panangumsi ken ni Jehova a mismo.

Ti posibilidad a makasabet ti ubing iti kasta a narungsot nga ayup kadagiti turod iti aglawlaw ti Silo tulongannatay koma nga ad-adda a mangapresiar iti pammati nga impakita dagiti dadakkel ni Samuel iti panangipan kenkuana nga agserbi iti tabernakulo.

Adda pay immun-una a pudno a managdaydayaw a nangipakita iti umasping a pammati ken debosion​—ni Ukom a Jefte. Isut’ nagnaed iti katurturodan nga ili ti Gilead iti daya a bangir ti Jordan. Naregta maipaay ken ni Jehova a maibusor kadagiti Ammonita, insapata ni Jefte nga idatonna ken ni Jehova ti umuna a sumabat kenkuana nga aggapu iti balayna. Ti birhen nga anakna a babai ti immuna a simmabat kenkuana. Isu nga impanna ti kakaisuna nga anakna iti santuario ti Dios idiay Silo, a nagnaedan ken simamatalek a nagserbianna iti unos ti panagbiagna.​—Oc-ocom 11:30-40.

Pudno a nagsayaat ti pannakaigiddiat ti matalek a debosion nga imparangarang ni Samuel ken ti anak a babai ni Jefte idiay Silo kadagiti dakes nga ulidan ti 42 a delingkuente nga ubbing a nangrabrabak iti propeta ni Jehova iti daytoy met la a disso.​—Idiligyo ti 1 Corinto 10:6, 11.

[Footnote]

[Picture Credit Line iti panid 8]

Pictorial Archive (Near Eastern History) Est.

[Picture Credit Line iti panid 9]

Pictorial Archive (Near Eastern History) Est.

[Picture Credit Line iti panid 9]

Safari Zoo, Ramat-Gan, Tel Aviv