Pannakaisalakan iti Pannakaiparangarang ni Jesu-Kristo

“Itultuloyyo ti agrag-o . . . tapno makapagrag-okayo ken agrag-okayo met iti napalalo kabayatan ti pannakaiparangarang ti dayagna.”​—1 PEDRO 4:13.

1. Kasano a pinabaknang ni Jehova dagiti adipenna?

PINABAKNANG ni Jehova dagiti Saksina iti adu a sagut. Kas Naindaklan nga Instruktortayo, linawlawagannatayo iti naan-anay a pannakaammo maipapan iti pagayatan ken panggepna. Babaen ti nasantuan nga espirituna, pinaturednatayo a mangisilnag ti lawag. Kastoy ti kuna ni napaltiingan nga apostol Pablo kadatayo idiay 1 Corinto 1:6, 7: “Ti panangsaksi maipapan ken Kristo napaneknekan kadakayo, iti kasta saankayo nga agkurang iti uray ania a sagut, bayat nga ur-urayenyo ti pannakaiparangarang ni Apotayo a Jesu-Kristo.”

2. Ania a naragsak nga inanama ti ipaay ti “pannakaiparangarang ni Apotayo a Jesu-Kristo”?

² “Ti pannakaiparangarang ni Apotayo a Jesu-Kristo”​—aniat’ kaipapanan dayta? Tuktukoyenna ti tiempo inton maiparangarang ni Jesus kas nadayag nga Ari, nga agtignay a manggunggona kadagiti matalek a pasurotna ket balsenna dagiti managdakdakes. Kas ipakita ti 1 Pedro 4:13, panawento dayta nga ‘agrag-o ken agrag-o iti napalalo’ dagiti natarnaw a napulotan-espiritu a Kristiano ken dagiti nasungdo a kakaduada a dakkel a bunggoy, ta kaipapanan dayta ti kanibusanan ti sistema dagiti bambanag ni Satanas.

3. Kasanot’ rumbeng a panagtakdertayo a sititibker, kas kadagiti kakabsattayo idiay Tesalonica?

³ Bayat nga umad-adani dayta a tiempo, iti pungtotna degdegdegan ni Satanas ti panangparigatna kadatayo. Kas leon a ngumerngernger, padpadasennatay nga alun-onen. Masapul nga agtakdertayo a sititibker! (1 Pedro 5:8-10) Dagiti kakabsattayo idiay Tesalonica idi ugma, idi baroda pay iti kinapudno, nagsagabadat’ rigat kas laklak-amen dagiti adu a Saksi ni Jehova itatta. Gapuna, dakkel ti kaipapanan kadatayo ti imbaga ni apostol Pablo kadakuada. Insuratna: “Nalinteg iti biang ti Dios, a maisupapak ti rigat kadagiti mamarigat kadakayo, ngem kadakayo a maparparigat, gin-awa a mairaman kadakami iti pannakaiparangarang ni Apo Jesus nga aggapu sadi langit a kaduana dagiti mannakabalin nga anghelna iti dumardarang nga apuy, a balsenna dagiti di mangammo iti Dios ken dagiti di agtulnog iti naimbag a damag maipapan ken ni Apotayo a Jesus.” (2 Tesalonica 1:6-8) Wen, umayto ti gin-awa!

4. Apay a maikari dagiti klero a maukom iti pannakaiparangarang ni Jesus?

⁴ Idi kaaldawan ni Pablo, dagiti Judio a papangulo ti relihion ti nangparnuay iti adu a rigat. Kasta met itatta, dagidiay agkunkuna a pannakabagi ti Dios, nangruna dagiti klero ti Kakristianuan, ti masansan a mangisungsungsong iti ibubusor kadagiti managayat-talna a Saksi ni Jehova. Ibagbaga dagitoy nga ammoda ti Dios, ngem laksidenda met ti “maymaysa a Jehova” iti Biblia, a sinandianda iti misterioso a Trinidad. (Marcos 12:29) Saanda nga agtulnog iti naimbag a damag maipapan ken Apotayo a Jesus, a mangnamnamada iti turay ti tao iti pannakabang-ar ken laksidenda ti naimbag a damag ti um-umay a Pagarian ni Kristo iti kinalinteg. Masapul a mapukaw amin dagitoy a relihiuso a bumusbusor inton “pannakaiparangarang ni Apo Jesus nga aggapu sadi langit”!

Ti ‘Iyaay’ ni Jesu-Kristo

5. Kasano a ti pannakaiparangarang ni Jesus napatak pannakailadawanna idiay Mateo 24:29, 30?

⁵ Napatak ti panangiladawan ni Jesus iti dayta a pannakaiparangarang idiay Mateo 24:29, 30. Iti panangisalaysayna iti nagduduma a paset ti pagilasinan ti kaaddana ken ti panagpatingga ti sistema dagiti bambanag, kunana: “Ti init agsipngetto, ket ti bulan dinto aglawag, ket dagiti bituen matnagdanto manipud langit, ket dagiti pannakabalin dagiti langlangit mapakintayegdanto.” Iti dayta a tiempo “agparangto ti pagilasinan ti Anak ti tao iti langit.” Dagiti nasion ti daga “agdung-awdanto, ket makitadanto ti Anak ti tao [ti Mesianiko nga Ari ti Dios] nga umay iti rabaw dagiti ulep ti langit nga adda pannakabalin ken dakkel a dayagna.” Daytoy nga ‘iyaay,’ er·khoʹme·non iti Griego, tuktukoyenna ti panagparang ni Jesus kas Manangalangon ni Jehova.

6, 7. Kasano nga isu “makitanto ti tunggal mata,” ket siasino dagiti karaman iti daytoy?

⁶ Dinakamat met ni apostol Juan daytoy nga ‘iyaay’ idiay Apocalipsis 1:7, a kunana: “Adtoy! Isu umay a buyogen dagiti ulep.” Ay, dagidiay a kabusor saanda a makita ni Jesus iti literal a mata, ta “dagiti ulep” ipasimudaagna ti di makita nga iyaayna a mangukom. No literal a makita dagiti tao ti nailangitan a dayagna, mabulsekda la ketdi, kas iti pannakabulsek ni Saulo idi nagparang kenkuana ni naipadayag a Jesus iti dakkel a naraniag a lawag iti dalan nga agturong idiay Damasco.​—Aramid 9:3-8; 22:6-11.

⁷ Kunaen ti Apocalipsis nga isu “makitanto ti tunggal mata, ken dagidiay nangduyok kenkuana; ket dagiti amin a tribo iti daga agdung-awdanto gapu kenkuana.” Kayat a sawen daytoy a dagiti bumusbusor ditoy daga maawatandanto inton iyeg ni Jesus ti pannakadadaelda nga isut’ immay nga addaan pannakabalin ken dayag kas Manangikisap ni Jehova. Apay a nailadawan dagitoy a kabusor kas “dagidiay nangduyok kenkuana”? Wen, ta ti kinauyongda kadagiti adipen ni Jehova ita ket kas met laeng kadagiti manangidadanes ni Jesus. Pudno nga ‘agdung-awdanto gapu kenkuana.’

8. Aniat’ imballaag agpadpada da Jesus ken Pablo maipapan iti kellaat a pannakadadael?

⁸ Kasanonto a dumteng dayta nga aldaw a panagibales ni Jehova? Iti padto idiay Lucas kapitulo 21, insalaysay ni Jesus dagiti makadidigra a pasamak nga agserbi a pagilasinan ti kaaddana sipud 1914. Kalpasanna, idiay bersikulo 34 ken 35, namallaag ni Jesus: “Agaluadkayo di la ket ta dagiti puspusoyo mapnoda iti kinarawet ken panagbartek ken kadagiti pakasikoran ti biag, ket umayto a kellaat dayta nga aldaw kadakayo a kas maysa a silo. Ta umayto kadagiti amin nga agnaed iti rabaw ti isuamin a daga.” Wen, ti aldaw a panagibales ni Jehova umayto a kellaat, giddato! Pasingkedan daytoy ni apostol Pablo idiay 1 Tesalonica 5:2, 3, a kunana: “Ti aldaw ni Jehova umay a kas iti mannanakaw iti rabii. Inton sasawenda: ‘Talna ken talged!’ isunto metten ti giddato nga iyaay kadakuada ti kellaat a pannakadadael.” Uray itatta pagsasaritaanen dagiti nasion ti talna ken talged ken ikagkagumaanda a pabilgen ti Naciones Unidas tapno tamingen ti kasasaad kadagiti nariribuk a lugar babaen ti puersa militar.

9. Kadagiti siasino a ‘rumaniag ti silaw,’ ken apay?

⁹ Idiay 1Te 5 bersikulo 4 ken 5, ituloy a kunaen ti apostol kadatayo: “Ngem dakayo, kakabsat, awankayo iti sipnget, tapno dayta nga aldaw kellaatennakayo a kas mannanakaw, ta dakayo amin annaknakayo ti lawag ken annak ti aldaw. Datayo saantayo a taga rabii ken saan met a taga sipnget.” Agrag-otayo iti panagbalin kas annak ti lawag​—dagiti managawit iti lawag kadagiti sabsabali nga agtarigagay iti pudpudno a talna ken talged iti baro a lubong ti Dios. Idiay Salmo 97:10, 11, mabasatayo: “O dakayo nga agay-ayat ken Jehova, guraenyo ti dakes. Isu salaknibanna dagiti kararua dagiti nasungdo kenkuana; isalakanna ida iti ima dagiti nadangkes. Rimmaniag ti silaw kadagiti nalinteg, ket ti kinaragsak kadagiti nalinteg iti puso.”

Ti Panagsasaganad Dagiti Pasamak

10. Ania a pakdaar ti rumbeng nga ipangagtayo maipanggep iti aldaw a panagsingir ti Dios? (Apocalipsis 16:15)

¹⁰ Anianto ti urnos dagiti pasamak inton dumteng ti dakkel a rigat? Ukradentayo idiay Apocalipsis kapitulo 16. Paliiwenyo, kas salaysayen ti bersikulo 13 ingganat’ 16, ta dagiti narugit, dinedemonio nga espiritu urnongenda dagiti nasion iti intero a daga idiay Har–Magedon, ti gubat ti dakkel nga aldaw ti Dios a Mannakabalin-amin. Maminsan pay a naipaganetget ti kasla mannanakaw nga iyaay ti aldaw a panagsingir, ket napakdaarantayo nga agsalukag​—a sikakawes a kanayon iti naespirituan a pagan-anay a pakabigbigantayo maipaay iti pannakaisalakan. Dimtengen ti tiempo a pannakaukom dagiti tattao iti daga, dagiti nasion, ken​—ti sabali pay. Asino dayta?

11. Kasano nga impabigbig ti babai iti Apocalipsis 17:5 ti bagina?

¹¹ Maysa dayta a piguratibo a babai nga “agpapaimportante.” Nailadawan idiay Apocalipsis 17:5 kas “palimed: ‘Babilonia a Dakkel, ti ina dagiti balangkantis ken dagiti makarimon a banag ti daga.’” Ngem saanen a palimed kadagiti Saksi ni Jehova. Inlataknan ti bagina kas ti sangalubongan nga imperio ti ulbod a relihion, a dagiti sekta ti Kakristianuan ti mangbukel iti kangrunaan a paset. Makarimon iti imatang ni Jehova ti pannakinaminna iti politika, ti “pannakabartekna iti dara dagiti sasanto” babaen ti panangidadanesna kadagiti pudno a Kristiano, ken ti panangsungsungbatna iti dara “dagidiay amin a napapatay ditoy daga,” agraman nasurok a sangagasut a milion a napapatay kadagiti gubat iti daytoy maika-20 a siglo laeng.​—Apocalipsis 17:2, 6; 18:24.

12. Apay a makondenar dagiti sekta ti Kakristianuan?

¹² Kangrunaan iti amin, imbabain dagiti sekta ti Kakristianuan ti nagan ti Dios a kunkunada nga ireprepresentarda. Insursuroda dagiti pilosopia ti Babilonia ken Grecia imbes a ti nasin-aw a Sao ti Dios ken nakatulongda iti kinadakes ti moral ti amin a nasion babaen ti panangpanuynoyda iti kabibiag a maisalungasing kadagiti prinsipio ti Biblia. Dagiti naagum a nasikap a tattao kadakuada makondenarda kadagiti sasao ti Santiago 5:1, 5: “Ala, ita, dakayo a babaknang, agsangitkayo, ket aganug-ogkayo gapu kadagiti rigrigat nga umayto kadakayo. Nagbiagkayo a sinanam-ay ditoy rabaw ti daga ket naalayon ti ragsakyo. Pinalukmegyo ti puspusoyo iti aldaw ti panangparti.”

Pannakadadael ti Babilonia a Dakkel!

13. Kasano a mangrugi ti dakkel a rigat, ket ania a naganat a pakdaar ti naiyunay-unay idiay Apocalipsis 18:4, 5?

¹³ Mangrugi ti dakkel a rigat babaen ti pannakaiwayat ti panangukom ni Jehova iti Babilonia a Dakkel. Nakalawlawag ti panangisalaysay ti Apocalipsis 17:15-18 iti “panunot” ti Dios​—a mangimaniobra “[ka]dagiti sangapulo a sara,” dagiti nabileg a puersa iti uneg ti multinasional nga “atap nga animal” a NU, tapno ituangda ti Babilonia a Dakkel. “Ket ti sangapulo a sara a nakitam, ken ti atap nga animal, guraendanto ti balangkantis ket pagbalinendanto a walangwalang ken lamolamo, ket kanendanto dagiti nalasag a pasetna sadanto puoran a naan-anay iti apuy. Ta inkabil ti Dios kadagiti pusoda ti panangibanagda iti panunotna.” Di ngad pakasdaawan nga ipukpukkaw ti timek a naggapu sadi langit ti naganat a pakdaar idiay Apocalipsis 18:4, 5: “Rumuarkayo kenkuana, ilik, no diyo kayat ti mairaman kenkuana kadagiti basolna, ken no diyo kayat ti umawat iti paset dagiti saplitna. Ta dagiti basolna namuntuondan a tumukno sadi langit, ket linagip ti Dios dagiti kinakillona.” Agtultuloy a rumuar ti awag: Gupdenyo ti amin a pannakaisinggalut iti ulbod a relihion, sakbay a maladaw ti amin!

14. Siasinonto dagiti agdung-aw gapu iti pannakadadael ti Babilonia a Dakkel, ken apay?

¹⁴ Kasanot’ panangmatmat ti lubong iti pannakadadael ti Babilonia a Dakkel? Iti adayo, dagiti rinuker a politiko​—“dagiti ari ti daga”​—dung-awandanto gapu ta adu a siglo a nakaramanda iti ragsak iti naespirituan a pannakikamalalada kenkuana. Agsangit ken agdung-awto met dagiti naagum a komersiante, “dagiti agbambaniaga a komersiante . . . , a bimmaknangda gapu kenkuana.” Iyadayonto met dagitoy ti bagbagida kenkuana, a kunkunada: “Asi pay, asi pay​—ti dakkel a siudad, a nagkawes iti pino a lienso ken purpura ken eskarlata, ken naadurnuan a sibabaknang iti alahas a balitok ken napateg a bato ken perlas, ta iti maymaysa nga oras nagwalangwalang ti kasta a nagdakkel a kinabaknang!” Mapukawto iti agnanayon amin dagiti nagraranga a pagan-anay dagiti klero ken ti kinadaeg dagiti nagdadakkel a katedral ti lubong! (Apocalipsis 18:9-17) Ngem dung-awanto kadi ti tunggal maysa ti Babilonia a Dakkel?

15, 16. Anianto ti pagrag-oan ti ili ti Dios?

¹⁵ Sumungbat ti Apocalipsis 18:20, 21: “Agragsakka maipanggep kenkuana, O langit, ken dakayo a sasanto ken dakayo nga apostol ken dakayo a mammadto, ta ti Dios siuukom nga indusaannakayo kenkuana!” Kas maysa a dakkel a gilingan a bato a maipuruak iti baybay, “iti kasta a napartak a panangitapuak maipuruakto ti Babilonia a dakkel a siudad, ket saanto pulos a masarakanen.”

¹⁶ Anian a panagrag-o! Paneknekan daytoy ti Apocalipsis 19:1-8. Mamimpat a rumuar manipud langit ti awis, “Idaydayawyo ni Jah, dakayo a tattao!” Ti umuna a tallo kadagitoy nga Aleluya idaydayawna ni Jehova gaput’ nalinteg a panangukomna iti nagdakes a balangkantis, ti Babilonia a Dakkel. Awanen ti sangalubongan nga imperio ti ulbod a relihion! Kuna ti maysa a timek a naggapu iti trono ti Dios: “Daydayawenyo ti Diostayo, dakayo amin nga adipenna, dagidiay agbuteng kenkuana, dagidiay babassit ken dagidiay dadakkel.” Anian a pribilehiotayo a makiraman iti dayta a kanta!

Ti Panagkasar ti Kordero

17. No pagdiligen ti Apocalipsis 11:17 ken 19:6, iti ania a dua a konteksto a mangrugi ni Jehova nga agturay kas Ari?

¹⁷ Ti maikapat nga Aleluya iyam-ammona ti sabali pay a tema: “Idaydayawyo ni Jah, dakayo a tattao, ta ni Jehova a Diostayo, ti Mannakabalin-amin, nangrugin nga agturay kas ari.” Ngem di met aya nadakamat idiay Apocalipsis 11:17 ti umasping a koro? Sadiay mabasatayo: “Agyamankam kenka, Jehova a Dios, ti Mannakabalin-amin, . . . ta innalam ti dakkel a pannakabalinmo ken inrugimon ti agturay kas ari.” Wen. Nupay kasta, ti konteksto ti Apocalipsis 11:17 tuktukoyenna ti panangipasdek ni Jehova iti Mesianiko a Pagarian idi 1914 “a mangipastorto kadagiti amin a nasion babaen ti sarukod a landok.” (Apocalipsis 12:5) Ti Apocalipsis 19:6 ket mainaig iti pannakadadael ti Babilonia a Dakkel. Iti pannakaikkat ti kas balangkantis a relihion, maalangon ti kina-Dios ni Jehova. Agtalinaed iti awan inggana ti panagdayaw kenkuana kas Kangatuan a Soberano ken Ari!

18. Ti pannakaikkat ti Babilonia a Dakkel iwayaanna ti ania a naragsak a pakaammo?

¹⁸ Gapuna, maaramiden ti naragsak a pakaammo: “Agrag-otayo ket agragsaktay unay, ket itedtay [ken Jah] ti dayag, ta dimtengen ti panagkasar ti Kordero ket ti asawana nakasaganan. Wen, naipaay kenkuana ti panagkawesna iti nasileng, nadalus, pino a lienso, ta ti pino a lienso itakderanna dagiti nalinteg nga aramid dagidiay sasanto.” (Apocalipsis 19:7, 8) No kaanonto nga awaten dagiti napulotan a natda pay ditoy daga ti nailangitan a panagungarda, saan a naibaga. Ngem makasigurotayo iti konteksto ditoy a ti pannakiramanda iti panagkasar ti Kordero, ni Kristo Jesus, ket naragsakto, nangruna ta maimatangandanto a mismo ti pannakaibabain ti nagdakes a balangkantis, ti Babilonia a Dakkel.

Madadael ti Lubong ni Satanas

19. Ania pay a pasamak ti nadakamat idiay Apocalipsis 19:11-21?

¹⁹ Agparang manen ti puraw a kabalio a damo a nadakamat idiay Apocalipsis 6:2. Kastoy ti mabasatayo idiay Apocalipsis 19:11: “Daydiay nakasakay iti [puraw a kabalio] maaw-awagan iti Matalek ken Napudno, ket isu mangukom ken makigubat a maipuon iti kinalinteg.” Gapuna, ti “Ari dagiti ari ken Apo dagiti apo” agsakay a mangkabil kadagiti nasion ken payatenna “ti pagpespesan ti ubas ti kinaunget ti pungtot ti Dios a Mannakabalin-amin.” Barengbareng laeng nga aguurnong “dagiti ari ti daga ken dagiti buyotda” a makigubat inton bakal ti Armagedon. Ileppasto ti Nakasakay iti puraw a kabalio ti panangparmekna. Awanto ti mabati iti organisasion ni Satanas ditoy daga.​—Apocalipsis 19:12-21.

20. Aniat’ mapasamak iti Diablo a mismo?

²⁰ Ngem ti met ngay Diablo a mismo? Idiay Apocalipsis 20:1-6, nailadawan ni Kristo Jesus kas “maysa nga anghel a bumabbaba manipud langit nga adda kenkuana ti tulbek ti mangliwengliweng nga abut ken ti maysa a dakkel a kawar iti imana.” Tiliwennanto ti dragon, daydi kadaanan nga Uleg, nga isu ti Diablo ken Satanas, parautanna, igarangugongna iti mangliwengliweng nga abut, sananto rikepan ken seliuan. Itan ta awanen ni Satanas ken saannan a maallilaw dagiti nasion, mangruginton ti nadayag a Milenio a Panagturay ti Kordero ken ti nobiana. Awanton ti lulua ti ladingit! Awanton ti Adamiko nga ipapatay! Awanton ti sasaibbek, sangsangit, ut-ot! “Dagidi immuna a banag napalabasdan.”​—Apocalipsis 21:4.

21. Bayat a sigagagar nga ur-urayentayo ti pannakaiparangarang ni Jesu-Kristo, ania komat’ determinasiontayo?

²¹ Bayat a sigagagar nga ur-urayentayo ti pannakaiparangarang ni Apotayo a Jesu-Kristo, regtaantayo ti panangisarsarita kadagiti sabsabali ti maipapan kadagiti naayat a karkari ti Dios iti sidong ti Pagarian. Asidegen ti pannakaisalakan! Sapay koma ta umabantetayo, umabante a kankanayon, kas nalawlawagan nga annak ni Soberano nga Apo Jehova!

Kas Panangrepaso

◻ Aniat’ mangipakita nga asidegen ti pannakaiparangarang ni Jesu-Kristo?

◻ Kasano a dumteng ti aldaw a panagibales ni Jehova?

◻ Kasanot’ rumbeng a panangmatmat dagiti “agay-ayat ken Jehova” iti agdama a kasasaad ti lubong?

◻ Anianto ti urnos dagiti pasamak inton bumtak ti dakkel a rigat?

[Ladawan iti panid 23]

Ni Jesus ‘umay a buyogen dagiti ulep,’ saan a makita, tapno mangukom

[Ladawan iti panid 25]

Din agbayag maikkatton ti ulbod a relihion, ti dakes a sistema ni Satanas, ken ni Satanas a mismo