Dagiti Saludsod Manipud Kadagiti Managbasa
Mapagungarto aya dagiti tattao no dida awaten ti pudno a Kinakristiano ita ket matayda sakbay ti panangrugi ti dakkel a rigat?
Nasayaat nga idiantayo amin ti aniaman a pagannayasan a mangukom, agsipud ta ni Jehova babaen ken Jesu-Kristo, ti makaammo a mangukom. (Juan 5:22; Aramid 10:42; 2 Timoteo 4:1) Ngem mangipaay ti Kasuratan iti impormasion a makatulong a mangsungbat iti naidatag a saludsod.
Ti sangalubongan a panangikaskasaba ti naimbag a damag ti Pagarian ti Dios ket napateg a paset ti ‘pagilasinan ti kaadda ni Jesus.’ Makita daytoy a pagilasinan nanipud pay karrugi daytoy a siglo. Nagbanag ti trabaho a panangasaba iti panamaglalasin kadagiti tao iti amin a nasion a kaitungpalan ti pangngarig ni Jesus maipapan “dagiti karnero” ken “dagiti kalding.” Inton mairingpas daytoy trabaho a panangasaba ken panamaglalasin, iyegto ti “dakkel a rigat” ti panungpalan daytoy agdama a dakes a sistema dagiti bambanag.—Mateo 24:3, 21, 22; 25:31-46.
Ni Jehova, agraman ti Anakna, ti mangukom no daydiay mangilaksid iti mensahe ti Pagarian ken matay sakbay a bumtak ti dakkel a rigat ket maibilang kadagiti kalding. Kinuna ni Jesus a dagiti kalding “mapandanto iti dusa nga agnanayon.” Gapuna, maikunatayo a dagidiay inkeddeng ti Dios a kalding saanda a mapagungar. Maukomda a kas kadagidiay “madusa iti agnanayon a pannakapukaw” inton dakkel a rigat.—2 Tesalonica 1:9.
Ngem kasanon dagidiay saan nga umdas ti pannakaidinnada iti mensahe ti Pagarian tapno makaaramidda koma ti masnup a pili a pabor wenno maibusor iti kinapudno sakbay a matayda bayat dagitoy “maudi nga al-aldaw”?—2 Timoteo 3:1.
Kabayatan ti trabaho a panangasaba, adu dagidiay matay sakbay ti dakkel a rigat ti awan duadua a mapagungarto. Ipamatmat daytoy ti adda a mabasatayo iti Apocalipsis 6:7, 8 maipapan iti panagsakay dagiti simboliko a nakakabalio. Adu ti natay kas biktima dagiti gubat, kinakirang ti taraon, ken makapapatay a saplit. Yantangay ti “Hades” ti nangala kadagitoy a biktima ni “Patay,” mapagungardanto bayat ti Milenio a Panagturay ni Kristo, inton iyawat ti Hades dagiti amin a natay nga adda kenkuana. (Apocalipsis 20:13) Mabalin nga adu kadagidiay mapagungar ti nakaammon ti mensahe ti Pagarian sakbay a natayda.
Anian a yamantayo ta saan nga impabiang ni Jesus kadagiti tattao ti panangikeddeng no siasino dagiti marakarnero ken marakalding! Saan a matingiting a nalaing dagiti imperpekto a tattao no kasanot’ kaadu ti gundaway ti maysa a tao a dimngeg ken immawat iti naimbag a damag. Mabalintay aya nga ammuen no ania ti kasasaad ti pusona wenno pudno nga inayatna ti kinalinteg? Marukodtay aya no kasano nga inapektaran ti pamiliana, narelihiusuan a pammatina, wenno dadduma pay a bambanag ti tignayna? Nabatad a saan. Ngem, masiguradotayo a ni Jehova a Dios ken ni Jesu-Kristo matingitingda dagita ken naan-anay, nalinteg, ken maitutop ti panangukomda.—Deuteronomio 32:4; Isaias 11:1-5.
Gapuna, awan ti rasontayo a mangpugto no siasino kadagidiay nabiit pay a natay ti mapagungar wenno di mapagungar. Awan kalintegantayo a mangeddeng iti daytoy a banag. (Idiligyo iti Lucas 12:13, 14.) Ad-adda a nainsiriban no urayentayo dagiti pangngeddeng dagiti nalinteg nga Ukom, ni Jehova a Dios ken ni Jesu-Kristo. Mangipaay daytoy iti ad-adda a talna ti panunottayo kas ad-adipen ni Jehova. Tulongannatay met a mangasikaso a nasaysayaat iti naituding nga aramidentayo—‘inkayo ket pagbalinenyo nga ad-adalan dagiti tattao iti amin a nasion, nga isuroyo kadakuada ti amin a bambanag nga imbilin ni Jesus.’—Mateo 28:19, 20.
[Picture Credit Line iti panid 31]
Karnero a Leicester, Meyers