Sidudungngo a Panangipastor Kadagiti Napateg a Karnero ni Jehova
KASTA unay ti panagimdeng dagiti panglakayen. Addada idiay Mileto tapno umawatda iti pammagbaga manipud ken apostol Pablo. Agarup 50 kilometro ti dinaliasatda manipud Efeso. Ita maladingitanda a makangngeg a daytoyen ti maudi a pannakakitada ken Pablo. Isu nga ammoda a nagpateg dagiti sumaganad a sasao: “Aluadanyo ti bagbagiyo ken ti amin nga arban, a kadakuada dinutokannakayo ti nasantuan nga espiritu kas manangaywan, tapno ipastoranyo ti kongregasion ti Dios, a ginatangna iti dara ti mismo nga Anakna.”—Aramid 20:25, 28, 38.
Dakkel la ketdi ti kaipapananna kadagidiay a panglakayen a taga-Efeso ti ababa a panangtukoy ni Pablo kadagiti papastor. Ammoda ti trabaho a panangaywan kadagiti karnero iti away. Pamiliar met kadakuada ti adu a panangtukoy ti Hebreo a Kasuratan kadagiti papastor. Ken ammoda nga inyarig ni Jehova ti bagina iti maysa a Pastor ti ilina.—Isaias 40:10, 11.
Inawagan ida ni Pablo kas “manangaywan” iti “arban,” ken kas “papastor” ti “kongregasion.” Ti sao a “manangaywan” ipamatmatna no ania ti annongenda, idinto a ti sao nga “ipastoran” deskribirenna no kasano ti panangaywanda. Wen, masapul nga asikasuen dagiti manangaywan ti tunggal kameng ti kongregasion a kas iti naayat a panangaywan ti maysa a pastor iti arbanna.
Ita, manmano a panglakayen ti nakapadas a mismo nga agaywan kadagiti literal a karnero. Ngem nawadwad ti panangtukoy ti Biblia agpadpada kadagiti karnero ken kadagiti papastor, nangruna iti piguratibo a pamay-an, isu a napateg pay laeng ti sasao ni Pablo. Ken adu ti maadaltayo kadagiti salaysay maipapan kadagiti papastor a pinaraburan ni Jehova idi un-unana a panawen. Makatulong dagiti naisangsangayan nga ulidanda kadagiti panglakayen iti kaaldawantayo a makakita no ania dagiti galad a kasapulanda tapno maipastoranda ti kongregasion ti Dios.
Ti Natured a Pastor a ni David
No dagiti pastor idi panawen ti Biblia ti pagsasaritaantayo, malagiptay la ketdi ni David, ta maysa idi nga agpaspastor kadagiti karnero. Ti maysa kadagiti umuna a masursurotayo iti biag ni David isu daytoy: nanumo laeng a saad ti panagbalin a pastor. Kinapudnona, idi dimteng ni mammadto Samuel tapno pulotanna ti maysa nga anak a lalaki ni Jesse kas masanguanan nga ari ti Israel, idi damo nataliwaywayan a namimpinsan ni agtutubo a David. Sada la nalagip ni David, nga adda idiay away nga “agay-aywan kadagiti karnero,” kalpasan a linaksid ni Jehova dagiti pito nga inauna a kakabsatna a lallaki. (1 Samuel 16:10, 11) Nupay kasta, ti kapadasan ni David a kas maysa a pastor iti adu a tawen ti nangisagana kenkuana iti nadagsen nga annongen a panangipastor iti nasion ti Israel. “Pinili [ni Jehova] ni David nga adipenna ken impanawna kadagiti pagaponan dagiti karnero . . . tapno agbalin a pastor ni Jacob nga ilina,” kuna ti Salmo 78:70, 71. Maitutop la unay, insurat ni David ti napintas ken nalatak a maika-23 a Salmo, a kastoy ti rugina: “Ni Jehova ti Pastorko.”
Kas ken David, rebbeng nga agserbi dagiti panglakayen ti kongregasion Kristiano kas napakumbaba a katulongan a papastor ken saanda a sapulen ti kinatan-ok. Kas insurat ni apostol Pablo ken Timoteo, dagidiay agtarigagay itoy a pagrebbengan a kas papastor “naimbag nga aramid ti tarigagayan[da],” saan a ti kinatan-ok.—1 Timoteo 3:1.
Nupay nanumo laeng ti trabaho ni David kas maysa a literal a pastor, no dadduma sapulen daytoy ti dakkel a tured. Kas pangarigan, idi intaray ti maysa a leon ti maysa kadagiti karnero ni tatangna, situtured a rinugmaan ken pinatay ni David daytoy narungsot nga ayup. Kasta met laeng ti inaramidna idi innala ti maysa nga oso ti maysa kadagiti karnero nga ay-aywananna. (1 Samuel 17:34-36) Naisangsangayan daytoy a kinatured no panunotentayo a kabaelan ti leon a patayen dagiti ayup a daddadakkel ngem iti bagina. Ket ti kayumanggi nga oso ti Siria nga agtataeng idi idiay Palestina, nga agdagsen iti aginggat’ 140 a kilo, kabaelanna a patayen ti maysa nga ugsa babaen laeng ti maysa a karamut dagiti napigsa a kukona.
Maysa a nasayaat nga ulidan agpaay kadagiti papastor iti kongregasion Kristiano ti kinatured ni David nga agaywan kadagiti karnero ni tatangna. Binallaagan ni apostol Pablo dagiti panglakayen a taga-Efeso maipapan kadagiti “manangparigat a lobo” a “saanda a tratuen a sidudungngo ti arban.” (Aramid 20:29) Kasta met iti panawentayo, adda dagiti gundaway a masapul nga agtignay a situtured dagiti Kristiano a papastor tapno masaluadan ti espiritual a paglaingan dagiti karnero ni Jehova.
Saan laeng a masapul a situtured a salakniban ti arban no di pay ket masapul nga aywanan a sidudungngo, kas panangtulad iti naayat a pastor a ni David ken iti Naimbag a Pastor, ni Jesu-Kristo. (Juan 10:11) Gapu ta ni Jehova ti akinkukua iti arban, pulos a di koma agbalin a naulpit dagiti panglakayen kadagiti karnero a kas “agturay kadagidiay tawid ti Dios.”—1 Pedro 5:2, 3; Mateo 11:28-30; 20:25-27.
Panangsungsungbat
Ni patriarka a Jacob ti sabali pay a nalatak a pastor. Binigbigna nga adda personal a sungsungbatanna iti tunggal karnero a naipaaywan kenkuana. Simamatalek nga inaywananna dagiti arban ti katuganganna a lalaki, ni Laban, ta kalpasan ti 20 a tawen a panagserbina, naikuna ni Jacob: “Dagiti karnero ken kaldingmo a kabaian saanda a naalisan, ket diak nangan kadagiti karnerom a kalakian. Ti pinatay dagiti narungsot nga animal, diak impan kenka. Siak a mismo ti naglak-am iti pukaw. Dagiti natakaw iti aldaw man wenno rabii, iti imak ti nagsapulam.”—Genesis 31:38, 39.
Ipakita dagiti Kristiano a manangaywan ti dakdakkel a pannakaseknan kadagiti karnero a “ginatang [ti Kangrunaan a Pastor ti karkararuatayo, ni Jehova a Dios] iti dara ti mismo nga Anakna.” (Aramid 20:28; 1 Pedro 2:25; 5:4) Inyunay-unay ni Pablo daytoy nadagsen a pagrebbengan idi impalagipna kadagiti Kristiano a Hebreo a dagiti lallaki a mangidadaulo iti kongregasion “ay-aywananda dagiti kararuayo a kas la isudanto ti manungsungbat.”—Hebreo 13:17.
Ipakita met ti ulidan ni Jacob a saan a nakedngan ti panawen a panagtrabaho ti maysa a pastor. Agtartrabaho iti aldaw ken rabii ken masansan nga agsakripisio. Kinunana ken Laban: “Iti aldaw, magagaraak iti pudot, ket no iti rabii, iti lamiis, ket ti turogko napukaw kadagiti matak.”—Genesis 31:40.
Pudno daytoy kadagiti adu a naayat a Kristiano a panglakayen ita, kas ipakita ti sumaganad a kapadasan. Naipan iti intensive care unit ti maysa a hospital ti maysa a kabsat a lalaki idi a nagsagaba iti komplikasion kalpasan a naikkat ti tumor iti utekna. Adda iti sibayna ti pamiliana iti aldaw ken rabii. Tapno makaipaay iti moral a suporta ken pammaregta, binaliwan ti maysa a lokal a panglakayen ti okupado nga eskediolna tapno inaldaw a mabisitana ti masakit ken ti pamiliana. Nupay kasta, gapu iti rotina ti intensive treatment ti hospital, saan a kanayon a posible kenkuana ti bumisita iti aldaw. Kayat a sawen daytoy a masansan a mapan ti panglakayen iti hospital uray no rabii unayen. Ngem rinabii a siraragsak a napnapan sadiay. “Napanunotko a rumbeng a sumarungkarak iti oras a kumbeniente iti pasiente, saan nga iti oras a kumbeniente kaniak,” kinuna ti panglakayen. Idi nayakar ti masakit a kabsat iti sabali a paset ti hospital ta simmayaaten ti kasasaadna, intultuloy ti panglakayen ti makaparegta nga inaldaw nga isasarungkarna.
No Aniat’ Nasursuro ni Moises kas Maysa a Pastor
Kuna ti Biblia a ni Moises ti “kapakumbabaan kadagiti amin a lallaki nga adda iti rabaw ti daga.” (Numeros 12:3) Ngem, ipakita ti rekord a saan a kanayon a kasta ni Moises. Idi kabambanuaganna, pinatayna ti maysa nga Egipcio a nangpatay iti padana nga Israelita. (Exodo 2:11, 12) Saan a maaramid daytoy ti napakumbaba a tao! Kaskasdi, naikeddeng nga usaren ti Dios ni Moises iti kamaudiananna a mangipangulo iti maysa a nasion a minilion ti kaaduna idiay let-ang agingga iti Naikari a Daga. Nalawag, ngarud, a masapul a masanay pay ni Moises.
Nupay nasursuruanen ni Moises “iti amin a kinasirib dagiti taga-Egipto,” adu pay ti kasapulanna tapno maipastoranna ti arban ni Jehova. (Aramid 7:22) Ania a kita ti panagsanay daytoy? Bueno, 40 a tawen a pinalubosan ti Dios ni Moises nga agserbi kas nanumo laeng a pastor iti daga ti Madian. Kabayatan ti panangaywanna kadagiti karnero ti katuganganna a lalaki a ni Jetro, napatanor ni Moises dagiti nasayaat a galad a kas iti kinaanus, kinaemma, kinapakumbaba, mabayag a panagitured, kinatanang, ken panagteppel. Nasursurona met ti agpannuray ken Jehova. Wen, ti panangaywan kadagiti literal a karnero ti namagbalin ken Moises a maikari a pastor ti nasion ti Israel.—Exodo 2:15–3:1; Aramid 7:29, 30.
Saan kadi a dagitoy a galad ti kasapulan ti maysa a panglakayen tapno maaywananna dagiti tattao ti Dios ita? Wen, ta impalagip ni Pablo ken Timoteo a “ti adipen ti Apo . . . rebbeng a naamo kadagiti isuamin, kualipikado a mangisuro, nateppel, a mamatigmaan a siiemma kadagiti sumalungasing.”—2 Timoteo 2:24, 25.
Mabalin a maupay no dadduma ti maysa a panglakayen agsipud ta marigatan a mangsukay a naan-anay kadagitoy a galad. Nupay kasta, di rumbeng a sumuko. Kas ken Moises, mabalin nga alaenna ti naunday a panawen para iti maysa a mangpatanor a naan-anay kadagiti galad a kasapulan iti panagbalin a naimbag a pastor. Nupay kasta, inton agangay, magunggonaanto ti kasta a napasnek a panagregget.—Idiligyo ti 1 Pedro 5:10.
Kas maysa a panglakayen, nalabit sagpaminsan laeng nga usarendakayo, saan a kas kadagiti dadduma. Mabalin ngata, kas ken Moises, nga adda dagiti napateg a galad a kayat ni Jehova a parang-ayenyo pay? Dikay liplipatan a “maseknan [ni Jehova] kadakayo.” Nupay kasta, laglagipentay met koma a masapul nga ‘agkawestayo iti kinaemma iti maysa ken maysa, ta busoren ti Dios dagiti natangsit ngem ikkanna ti di kaikarian a kinamanangaasi dagiti napakumbaba.’ (1 Pedro 5:5-7) No agreggetkayo ken awatenyo ti panagsanay nga ipalubos ni Jehova, mabalin nga ad-adda nga usarennakayo, kas ken Moises.
Amin Dagiti Karnero ni Jehova ket Napateg
Binigbig dagiti mapangnamnamaan, naayat a papastor idi panawen ti Biblia nga adda sungsungbatanda iti tunggal karnero. Kasta met koma kadagiti naespirituan a papastor. Nalawag daytoy kadagiti sasao ni Pablo: “Aluadanyo . . . ti amin nga arban.” (Aramid 20:28) Siasino ti nairaman iti “amin nga arban”?
Nangted ni Jesus iti maysa a pangngarig maipapan iti maysa a tao nga addaan sangagasut a karnero ngem sinapulna a dagus ti maysa a nagtawataw tapno isublina iti arban. (Mateo 18:12-14; Lucas 15:3-7) Kasta met, rumbeng a maseknan ti maysa a manangaywan iti tunggal kameng ti kongregasion. No saan nga aktibo iti ministerio wenno manmano a tumabuno kadagiti Nakristianuan a panaggigimong ti maysa a kabsat, saan a kayat a sawen daytoy a saanen a paset ti arban dayta a karnero. Paset pay laeng ti “amin nga arban” a ‘sungsungbatan’ dagiti panglakayen ken ni Jehova.
Maseknan unay ti maysa a bagi dagiti panglakayen agsipud ta nagbalin nga inaktibo ti sumagmamano a kameng ti kongregasion. Nangaramidda iti listaan dagiti amin nga inaktibo, ken inkagumaanda a sinarungkaran dagitoy tapno matulonganda nga agsubli iti pagaponan dagiti karnero ni Jehova. Anian a yaman dagitoy a panglakayen iti Dios ta kalpasan ti dua ket kagudua a tawen, nasurok a 30 a kakabsat ti natulonganda nga agbalin nga aktibo manen iti panagserbi ken Jehova. Agarup 17 a tawen a naginaktibo ti maysa kadagidiay a natulongan!
Ad-adda pay a maipaganetget kadagiti manangaywan ti kinadagsen daytoy a pagrebbengan agsipud ta dagiti karnero ‘nagatang[da] iti dara ti mismo nga Anak [ti Dios].’ (Aramid 20:28) Awanen dakdakkel pay a gatad a mabalin a pagbayad kadagitoy napateg a karnero. Ken panunotenyo ti amin a panawen ken panagregget a mabusbusbos iti ministerio iti panangbiruk ken panangtulong kadagiti kimmarnero a tattao! Saan kadi a rumbeng nga ikagumaantay met a pagtalinaeden amin ida iti uneg ti pagaponan dagiti karnero ti Dios? Wen, napateg ti tunggal karnero iti kongregasion.
Uray no nakabasol iti nadagsen ti maysa a kameng ti arban, saan nga agbalbaliw ti pagrebbengan dagiti panglakayen. Maseknanda latta kas papastor, a sidudungngo ken siiemma nga ikagumaanda nga ispalen ti managbasol no mabalin. (Galacia 6:1, 2) Nakalkaldaang ta iti dadduma a kasasaad nalawag nga awanan ti maysa a kameng ti kongregasion iti nadiosan a panagladingit gapu kadagiti nadagsen a basol a naaramidna. Ngarud, addaan dagiti naayat a papastor iti Nainkasuratan a rebbengen a mangsalaknib kadagiti dadduma a kameng ti arban iti daytoy makaakar nga impluensia.—1 Corinto 5:3-7, 11-13.
Nupay kasta, ni Jehova a Dios ti naan-anay nga ulidan iti panangipakita iti asi kadagiti naiwawa a karnero. Kastoy ti kuna ti manangngaasi a Pastortayo: “Sapulekto daydiay napukaw, ket iyawidkonto daydiay napapanaw, ket bedbedakto daydiay nabungtol ket papigsaekto daydiay masakit.” (Ezequiel 34: 15, 16; Jeremias 31:10) Kas panangtulad itoy natan-ok nga ulidan, adda naayat nga urnos agpaay kadagiti naespirituan a papastor ita a sumarungkar kadagiti nailaksid, a mabalin a mangipangag itan iti tulongda. Nasayaat ti resulta dagitoy naasi a panagregget a mangpasubli kadagiti napukaw a karnero. Kinuna ti maysa a kabsat a babai a naisubli: “Ti isasarungkar dagiti panglakayen kaniak ti kasapulak a pammaregta tapno makasubliak.”
Di pagduaduaan a dagiti sasao ni Pablo kadagiti panglakayen a taga-Efeso ket napnuan iti kaipapanan—kadakuada ken kadagiti manangaywan ita. Ti panangtukoyna kadagiti papastor ipalagipna dagiti makaay-ayo a galad a rumbeng nga iparangarang dagiti manangaywan—dagiti galad a kas iti kinapakumbaba ken tured, kas inyulidan ti pastor ken ari a ni David; panangbigbig iti personal a sungsungbatan ken makasalaknib a panangaywan, kas makita iti panagserbi ni Jacob iti aldaw ken rabii; ken ti kinatulok nga umawat iti kanayonan a panagsanay a siaanus, kas impakita ni Moises. Pudno unay, makatulong dagitoy nga ulidan a masarakan iti Biblia kadagiti panglakayen ti kongregasion a mangpatanor ken mangiparangarang kadagiti galad a kasapulan tapno sidudungngo a ‘maipastoranda ti kongregasion ti Dios, a ginatangna iti dara ti mismo nga Anakna.’