Apay nga Ayatem ti Kaarrubam?
AGPANNURAY ti biag nga agnanayon iti panagayattayo iti Dios ken iti kaarruba. Naigunamgunam dayta iti maysa a panagsarita a napasamak agarup 2,000 a tawenen ti napalabas.
Maysa a Judio a nalaing iti Linteg Mosaiko ti nagsaludsod ken Jesu-Kristo: “Ania ti aramidek tapno matawidko ti biag nga agnanayon?” Simmungbat ni Jesus: “Ania ti adda a naisurat iti Linteg? Kasano ti panangbasam?” Iti panangadawna iti Linteg, kinuna ti lalaki: “Ayatem ni Jehova a Diosmo iti amin a pusom ken iti amin a kararuam ken iti amin a pigsam ken iti amin a panunotmo,’ ken, ‘ayatem ti kaarrubam a kas iti bagim.’” “Husto ti insungbatmo,” kinuna ni Jesus. “Itultuloymo nga aramiden daytoy ket magun-odmonto ti biag.”—Lucas 10:25-28.
Kalpasanna, kinuna ti lalaki nga agsalsaludsod ken Jesus: “Siasino kadi nga agpayso ti kaarrubak?” Imbes a diretsa a sungbatanna, insalaysay ni Jesus ti pangngarig maipapan iti maysa a Judio a sinaneb, kinabkabil, ken pinanawan dagiti tulisan a dandanin matay. Nairana a limmabas ti dua a Judio—ti umuna, maysa a padi ket ti maikadua, maysa a Levita. Agpada a nakitada ti sasaaden ti padada a Judio ngem saanda man la a tinulongan. Idi kuan immay ti maysa a Samaritano. Simnek ti asina, ket binedbedanna dagiti sugat ti nadangran a Judio, impanna iti maysa a pagdagusan sana tinaripato.
Sinaludsod ni Jesus iti lalaki: “Asino kadagitoy tallo ti pagarupem a kaarruba daydi tao a sinaneb dagiti tulisan?” Nalawag nga isu daydiay naasi a Samaritano. Impakita ni Jesus a ti pudno a panagayat iti kaarruba awan isalsaluminana a puli.—Lucas 10:29-37.
Kinaawan Panagayat iti Kaarruba
Itatta kumarkaro ti guranggura iti nagbabaetan dagiti tattao a nagtaud iti nadumaduma nga etniko a grupo. Kas pangarigan, itay nabiit idiay Alemania indumudom dagiti moderno a Nazi ti maysa a lalaki sada binaddebaddekan. Numona ta nagdadagsen dagiti botasda. Natukkol ti gistay amin a paragpagna. Kalpasanna binukbokanda iti nakaing-ingel nga arak sada pinasgedan. Dinarupda ti lalaki agsipud ta impapanda a maysa a Judio. Iti sabali pay a pasamak, nauram babaen ti bomba ti maysa a balay iti asideg ti Hamburg, a nakatayan ti tallo a Turko—a pakairamanan ti maysa a balasitang nga agtawen iti sangapulo.
Iti deppaar ti Balkan ken iti dayaenna, rinibribo a biag ti pinukaw dagiti etniko a gubgubat. Natay dagiti dadduma kadagiti panagraranget dagiti tattao a nagduduma ti nalikudanda idiay Bangladesh, India, ken Pakistan. Ket idiay Africa, adu a biag ti pinukaw dagiti panagdadangadang gapu iti tribu ken puli.
Uray la agkullayaw ti kaaduan iti kasta a kinaranggas ket pulos a dida maitured a dangran ti kaarrubada. Kinapudnona, adda dagiti dadakkel a demonstrasion a naangay idiay Alemania a nangkondenar iti etniko a kinaranggas sadiay. Nupay kasta, kuna ti The New Encyclopædia Britannica: “Dagiti kameng ti gistay amin a kagimongan ditoy lubong ibilangda ti bukodda a wagas ti panagbiag a natantan-ok ngem iti wagas ti panagbiag uray dagiti nadekket a kaarrubada.” Lapdan dagiti kasta a kapanunotan ti panagayat iti kaarruba. Adda kadi maaramidan maipanggep itoy, nangruna ta kinuna ni Jesus nga agpannuray ti biag iti panagayat iti Dios ken iti kaarruba?
[Picture Credit Line iti panid 2]
Akkub: Jules Pelcog/Die Heilige Schrift
[Picture Credit Line iti panid 3]
The Good Samaritan/The Doré Bible Illustrations / Dover Publications, Inc.