Dagiti Saludsod Manipud Kadagiti Managbasa

Ti kadi sasao a “nasagutan iti espiritu,” a masarakan idiay 1 Corinto 14:37, kaipapananna a ti maysa a tao ket napulotan no immawat iti nasantuan nga espiritu, wenno kaipapananna kadi nga isut’ addaan iti namilagruan a sagut manipud iti espiritu?

Iti New World Translation of the Holy Scriptures, kastoy ti mabasa iti daytoy a bersikulo: “No adda asinoman a mangipagarup nga isu ket mammadto wenno nasagutan iti espiritu, bigbigenna koma dagiti banag nga isursuratko kadakayo, agsipud ta bilbilin ida ti Apo.”​—1 Corinto 14:37.

Mabalin nga awaten ti maysa a managbasa ti sasao a “nasagutan iti espiritu” kas panangtukoy iti kinapudno a dagidi umuna-siglo a Kristiano ket napulotanda iti espiritu ket nagbalinda a naespirituan nga annak ti Dios. Wenno mabalin a tarusan ti sasao nga agaplikar iti maysa nga immawat iti naisangsangayan a sagut ti nasantuan nga espiritu. Daytoy naud-udi a kaipapanan ti kasla mayanatup, kas ipakita ti konteksto.

Inusar ditoy ni apostol Pablo ti Griego a pneu·ma·ti·kosʹ, nga addaan pamunganayan a kayulogan a “mainaig iti espiritu, naespirituan.” Dagiti porma dayta ti nausar kadagiti panangtukoy a “naespirituan a bagi,” “naespirituan a bendision,” “naespirituan a pannakaawat,” ken “naespirituan a balay.”​—1 Corinto 15:44; Efeso 1:3; Colosas 1:9; 1 Pedro 2:5.

Kadagidiay a kaso, silalawag nga ipakita ti Biblia ti suheto (bagi, bendision, pannakaawat, balay) a tuktukoyen ti “naespirituan.” Ngem iti dadduma a kaso, masapul a madeterminar iti konteksto ti anag ken maitutop a kayulogan ti “naespirituan”. Kas pangarigan, pagdumaen ti 1 Corinto 2:14, 15 ti kababalin ti tao a linalasag iti daydiay ho pneu·ma·ti·kosʹ, a maitutop a kaipapananna “ti tao a naespirituan.”

Naipamaysa ti 1 Corinto kapitulo 12 aginggat’ 14 kadagiti namilagruan a sagsagut ti nasantuan nga espiritu. Inted ti Dios dagitoy kadagiti dadduma nga immuna a Kristiano a mangiparangarang a saannan nga us-usaren ti nainlasagan nga Israel no di ket parparaburannan ti Kristiano nga “Israel ti Dios.” (Galacia 6:16) No maipapan kadagitoy a sagut, insurat ni Pablo: “Ita adda sagut a nadumaduma, ngem maymaysa ti espiritu.” (1 Corinto 12:4) Ti naisangsangayan a sirib, pannakaammo, ken pammati ti sumagmamano a sagut ti espiritu, a kas ti panagipadto, panagsao iti nadumaduma a pagsasao, ken ti panagipatarus kadagiti sasao.​—1 Corinto 12:8-11.

Napulotan iti nasantuan nga espiritu ti Dios dagiti Kristiano idiay Corinto a sinuratan ni Pablo. Kinuna ni Pablo: “Ngem nadalusankayo, ngem napagsantokayo, ngem napalintegkayo iti nagan ni Apotayo a Jesu-Kristo ken iti espiritu ti Diostayo.” (1 Corinto 6:11; 12:13) Wen, immawat ti amin iti ‘tanda daydiay umay, nga isu ti espiritu.’ (2 Corinto 5:5) Nupay kasta, saan nga amin kadakuada ti immawat iti naisangsangayan a sagut babaen ti nasantuan nga espiritu. Ken agparang nga adu ti nakayawan iti panagsao ti nadumaduma a pagsasao, nga inikkanda ti di maiparbeng a kinapateg daytoy a sagut. Nagsurat ni Pablo tapno maatur ti pampanunotda ken ingunamgunamna a dagiti pagsasao dina gunggonaan ti adu a tao a kas iti maaramidan ti sagut ti panagipadto. Iti pagnguduan ti kapitulo 12, binalakadan ni Pablo dagiti taga-Corinto: “Itultuloyyo a biruken a sireregta dagiti nasaysayaat a sagsagut.”​—1 Corinto 12:28-31.

Kalpasanna, iti pangrugian ti kapitulo 14, indagadagna: “Surotenyo ti ayat, ket itultuloyyo a biruken a sireregta [ta pneu·ma·ti·kaʹ], ngem nangnangruna a maipaay iti panagipadtoyo koma.” Panagbiruk iti ania? Saanen a kasapulan dagidiay a Kristiano ti pannakapulot iti espiritu, ta addaanda ket ngaruden. Nainkalintegan a tuktukoyen ni Pablo “dagiti sagut” ti espiritu, nga, idiay pagnguduan ti kapitulo 12, indagadagna a birukenda. Gapuna, kastoy ti panangipatarus ti New World Translation of the Holy Scriptures iti 1 Corinto 14:1: “Itultuloyyo a biruken a sireregta dagiti naespirituan a sagsagut.” Dadduma a bersion ti Biblia ipatarusda ti ta pneu·ma·ti·kaʹ a kas “naespirituan a sagsagut” wenno “dagiti sagut ti Espiritu.”

Iti dayta a pagbatayan, makitatayo nga iti dandani pagnguduan ti kapitulo 14, pagnaigen ni Pablo ti panagipadto ken pneu·ma·ti·kosʹ. Kas iti bersikulo 1, isingasing ti konteksto a kaipapananna a ti maysa nasagutan iti espiritu. Ti The New Testament in Modern Speech, ni R. F. Weymouth, kastoy ti panangipatarusna: “No adda asinoman a mangibilang iti bagina a mammadto wenno tao nga addaan naespirituan a sagsagut, bigbigenna koma a kas bilin ti Apo ti isursuratko ita.”

Wen, amin a Kristiano, addaanda man iti sagut ti panagipadto wenno aniaman a dadduma a sagut ti espiritu, kasapulan nga awaten ken surotenda ti balakad nga insurat ni Pablo maipapan iti no kasanot’ rebbeng a panagandar dagiti bambanag iti kongregasion.