Dagiti Saludsod Manipud Kadagiti Managbasa
Yantangay pudpudno a tao ti nagkauna a padi nga agnagan Melquisedec, apay a kunaen ti Biblia nga “awan kapuonan[na]”?
Nailanad daytoy a sasao idiay Hebreo 7:3. Imutektekanyo ti bersikulo iti kontekstona:
“Ta daytoy Melquisedec, ari ti Salem, padi ti Kangatuan unay a Dios, isu a nangsabet ken Abraham idi nagawid iti panangparmekna kadagiti ar-ari, ket binendisionanna ket ni Abraham imbingayanna met ti apagkapullo dagiti isuamin, ta umuna iti amin, ti kaipapananna, ‘Ari ti Kinalinteg,’ ket kalpasanna isu met ti ari ti Salem, kayatna a sawen, ‘Ari ti Talna.’ Awan amana, awan inana, awan kapuonanna, awan pangrugian dagiti al-aldawna, wenno tungpal ti biagna, ngem naaramid nga umasping iti Anak ti Dios, agtaeng a padi iti agnanayon.”—Hebreo 7:1-3.
Kas nadakamat, pudpudno a tao ni Melquisedec, kas ken Abraham, a mismo a nakalangenna. (Genesis 14:17-20; Hebreo 7:4-10) Gapu ta kasta, adda la ketdi nagannak ni Melquisedec, adda ama ken inana, ken mabalin nga adda putotna. Gapuna, kas maysa a tao adda kapuonan wenno kaamaanna. Nagpatingga met ti biagna kas tao. Iti sabali a pannao natay ni Melquisedec, maitunos kadagiti sasao ni apostol Pablo idiay Roma 5:12, 14. Ngem yantangay ditay ammo no kaano a natay ni Melquisedec ket iti kasta nagsardeng a nagserbi kas padi, iti dayta a banag isut’ nagserbi nga awan tungpalna.
Idiay Hebreo, nadakamat ni Pablo ti maipapan ken Melquisedec iti panangsalaysayna iti akem ni Jesu-Kristo kas natan-ok a Nangato a Padi. Iti panangtukoyna ken Melquisedec kas maysa a tipo, wenno padron, ni Jesus iti daytoy nga akem kas padi, kinuna ni Pablo: ‘Ni Jesus . . . nagbalin a nangato a padi a kas iti kinapadi ni Melquisedec.’ (Hebreo 6:20) Iti ania a pamay-an?
Ammo ni Pablo a saan a mangipaay ti rekord ti Biblia kadagiti detalye maipapan iti kaamaan ni Melquisedec—dagiti inapona wenno aniaman a posible a kaputotanna. Dayta nga impormasion ket saan laeng a basta nairekord iti Biblia. No kasta, iti punto de vista ti ammo ni Pablo wenno ti ammotayo, siuumiso ngarud a maikuna nga “awan kapuonan [ni Melquisedec]” (New World Translation of the Holy Scriptures; American Standard Version), “awan listaan ti nagtaudanna” (W. J. Conybeare), wenno “awan kaamaanna.”—J. B. Phillips.
Iti ania a wagas a mayasping ni Jesus iti dayta? Pudno, ammotayo a ni Jehova a Dios ti Ama ni Jesus ket ni Maria ti natauan nga inana a nagtaud iti tribo ni Juda. Kaskasdi, adda nagpadaan da Melquisedec ken Jesus. Kasano a kasta? Saan a nagtaud ni Jesus iti tribo ni Levi, ti tribo dagiti papadi iti nasion ti Israel. Saan, saan a nagbalin ni Jesus a padi babaen ti natauan a kapuonan. Uray ni Melquisedec, saan a naaramid a padi ‘sigun iti linteg ti bilin a nainlasagan,’ kayatna a sawen, saan a nagtaud iti tribu ken pamilia dagiti papadi. (Hebreo 7:15, 16) Imbes a nagbalin a padi babaen ti natauan nga ama a padi a mismo, “ti Dios tinudinganna [ni Jesus] a kangatuan a padi kas iti kinapadi ni Melquisedec.”—Hebreo 5:10.
Kanayonanna, awan a pulos ti kaputotan ni Jesus wenno simmuno iti kinapadina. Iti kastoy met a pamay-an, awan kapuonanna. Agnanayonto nga annongenna ti kinapadina kas mannakitulong a mannursuro. Nagkomento ni Pablo maipapan iti daytoy nga agnanayon a serbisio, a kunana:
“Agsipud ta agtalinaed [ni Jesus] nga agnanayon, adda kinapadina a di maipatawid. Gapuna, mabalinna met nga isalakan agingga iti awan pagkuranganna dagiti umasideg iti Dios babaen kenkuana, ta isu sibibiag a kankanayon tapno ibabaetna ida.”—Hebreo 7:24, 25.
Ti panangsalaysaytayo kadagiti sasao ni Pablo idiay Hebreo 7:3 ket rumbeng ngarud a saan la koma a basta pannakammo nga ipempen iti isiptayo. Rumbeng a pabilgenna ti apresasiontayo iti naayat a probision nga inaramid ni Jehova a Dios kadatayo tapno mapakawan ti basoltayo iti agnanayon ken iti pamay-an nga inyurnosna tapno magun-odtayo ti tulong ken panangiwanwan iti agnanayon.