“Birukenyo ni Jehova, Dakayo Amin a Naemma”

“BIRUKENYO ni Jehova, dakayo amin a naemma iti daga, a nangtungpal kadagiti bilbilinna. Birukenyo ti kinalinteg, birukenyo ti kinaemma. Nalabit a dakayo maitalimengkayto iti aldaw ti pungtot ni Jehova.”​—Sofonias 2:3.

Inturong ni mammadto Sofonias dagita a sasao kadagiti “naemma iti daga,” ket indagadagna a “biruken[da] ti kinaemma” tapno masalaknibanda iti “aldaw ti pungtot ni Jehova.” Di pagduaduaan a nasken ti kinaemma iti pannakaisalakan. Ngem apay?

Apay a Biruken ti Kinaemma?

Naalumanay, saan a natangsit wenno napalangguad ti tao a naemma. Nainaig unay ti kinaemma kadagiti dadduma pay a nasayaat a kababalin, kas iti kinapakumbaba ken kinaamo. Gapu ta kasta, nalaka nga isuro dagiti naemma a tattao ken sidadaanda nga umawat iti disiplina manipud ken Jehova, uray pay no kasla nasakit iti damo.​—Salmo 25:9; Hebreo 12:4-11.

Mabalin a bassit ti pakainaigan ti kinaemma iti adal wenno kasasaad iti biag ti maysa a tao. Nupay kasta, dagidiay nangato ti adalna wenno naballigi iti nailubongan a wagas mabalin nga ipagarupda a kabaelanda ti mangaramid iti bukodda a pangngeddeng iti amin a banag, uray kadagiti banag a mainaig iti panagdayaw. Mabalin a daytoy ti manglapped kadakuada nga agpaisuro iti sabali a tao wenno umawat iti pammagbaga ken mangbalbaliw iti kabibiagda no kasapulan. Dagiti dadduma a nabaknang mabalin a sibibiddut a panunotenda nga agpannuray ti kinatalgedda kadagiti material a sanikuada. Gapuna, saanda a marikna ti pannakasapul iti naespirituan a kinabaknang nga aggapu iti Sao ti Dios, ti Biblia.​—Mateo 4:4; 5:3; 1 Timoteo 6:17.

Usigenyo dagiti eskriba, dagiti Fariseo, ken dagiti panguluen a papadi idi kaaldawan ni Jesus. Iti naminsan, idi nagsubli dagiti opisial nga imbaonda a mangtiliw ken Jesus a saanda a kadua [ni Jesus], kinuna dagiti Fariseo: “Napayaw-awankayo met aya? Adda aya namati kenkuana kadagiti agturay wenno kadagiti Fariseo? Ngem dagitoy adu a tao a dida ammo ti Linteg, mailunodda.” (Juan 7:45-49) Iti sabali a pannao, sigun kadakuada, dagiti laeng awan ammona ken awanan adal ti nalaka a mamatpati ken ni Jesus.

Uray pay kasta, adda dagiti Fariseo a naallukoy iti kinapudno, ken insakitda pay ketdi ni Jesus ken dagiti Kristiano. Karaman kadagitoy da Nicodemo ken Gamaliel. (Juan 7:50-52; Aramid 5:34-40) Kalpasan ti ipapatay ni Jesus, “adu unay dagiti papadi a simmurot iti pammati.” (Aramid 6:7) Awan duadua a ti kangrunaan a pangarigan isu ni apostol Pablo. Isut’ nasursuruan ken ni Gamaliel ket nangato ti nagaw-atna nga adal ken nagbalin a mararaem a manangitandudo ti Judaismo. Nupay kasta, idi agangay sipapakumbaba nga impangagna ti awag ni Kristo Jesus ket nagbalin a naregta a pasurotna.​—Aramid 22:3; 26:4, 5; Galacia 1:14-24; 1 Timoteo 1:12-16.

Ipakita amin dagitoy nga uray pay ania ti nalikudan ti maysa a tao wenno panangmatmatna iti mensahe a naggapu iti Biblia, kaskasdi nga agaplikar dagiti sasao ni Sofonias. No tarigagayan ti maysa a tao ti anamong ti Dios wenno paidalan iti Saona, nasken ti kinaemma.

Dagiti ‘Agbirbiruk ti Kinaemma’ Ita

Riniwriw a tao iti intero a lubong ti mangipangpangag iti naimbag a damag ti Pagarian. Mangidadaulo dagiti Saksi ni Jehova iti nasurok nga uppat a milion a panagadal iti Biblia iti linawas kadagiti pagtaengan dagiti kasta a tattao. Naggapu dagitoy iti adu ken nadumaduma a nalikudan ken kasasaad iti biag ken iti kagimongan. Ngem, agpapadada nga addaan iti kinapakumbaba nga umawat iti mensahe ti Biblia nga impakaammo ti maysa a tao kadakuada iti pagtaenganda wenno iti sabali a lugar. Adu kadakuada ti nasayaat ti irarang-ayna agsipud ta situtulokda a mangikagumaan a mangparmek kadagiti tuben iti dalanda. Wen, karamanda kadagiti “naemma iti daga” ita.

Alaentayo a pangarigan ni Maria a taga-Mexico. Nagturpos iti abogasia iti unibersidad ken natalged no iti pinansial gapu iti tawidna. Gapu itoy, naaddaan kadagiti agimbubukodan a kapanunotan a namagbalin kenkuana a “rebeliosa, naulpit, napalangguad, ken ateista.” “Impagarupko a kabaelan ti kuarta a risuten amin a banag ket saan a napateg ti Dios. Kinapudnona, impagarupko nga awan ti Dios,” linagip ni Maria. “No kaniak a maysa, minamaag ti relihion ken maysa laeng a sosial nga annuroten,” innayonna.

Iti saan a nabayag, nadlaw ni Maria ti namalbaliwan ti kasinsinna nanipud idi nagbalin a maysa kadagiti Saksi ni Jehova. “Dakes idi ti kabibiagna, ngem maysa itan a mannakikappia unay ken nalinteg a tao,” inlawlawag ni Maria. “Kinuna dagiti kabagiak a maysa itan a manangaskasaba ken agbasbasa iti Biblia, isut’ gapuna a saanen nga agin-inum wenno agbabbabai. Isu a kayatko nga umaynak ibasaan iti Biblia agsipud ta impagarupko nga iti kastoy a wagas masarakak ti talna ken kinatalingenngen a tarigagayak unay.” Nagbanaganna, nagpaiyadal iti Biblia ni Maria iti agassawa a Saksi.

Adu ti nasken a parmekenna, ken narigatna met nga awaten ti prinsipio ti Biblia iti kinaulo tapno agpasakop ken ni lakayna. Ngem dakkel ti namalbaliwan ti biag ken kababalinna. Impudnona: “Ti kunak, nanipud daydi isasarungkar dagiti kakabsat idiay pagtaengak, nga inyegda ti tulong ni Jehova, mariknak ti kinaragsak, kinatalingenngen, ken ti bendision ni Jehova iti uneg ti pagtaengak.” Maysa itan ni Maria a dedikado, bautisado a Saksi ni Jehova.

Iti panangalagad iti pudno a panagdayaw, adda sabali pay a benneg a napateg ti paset ti kinaemma, wenno ti kaawan dayta. Iti pamilia, masansan nga awaten ti asawa a babai ti kinapudno ken kayatna ti agserbi iti Dios, ngem agkitakit ni lakayna. Nalabit a narigat para iti maysa nga asawa a lalaki nga awaten nga adda sabali pay​—ni Jehova a Dios​—a rebbeng a pagpasakopan itan ni baketna. (1 Corinto 11:3) Idiay Chihuahua, Mexico, nagpaiyadal iti Biblia ti maysa a babai, ket di nagbayag inawatna agraman dagiti pito nga annakna ti kinapudno. Idi damo bimmusor ni lakayna. Apay? Gapu ta dina kayat a mapan ti pamiliana a mangasaba iti binalaybalay, a mangitukon kadagiti literatura ti Biblia. Mabalin a pagarupenna a mangipababa daytoy iti dayawna. Nupay kasta, nagtalinaed a natibker ti pamiliana iti pangngeddengda nga agserbi iti Dios. Idi agangay nabigbig ti asawa a lalaki ti pateg ti panangawat iti urnos ti Dios. Ngem sana la indedikar ti bagina ken ni Jehova kalpasan ti 15 a tawen.

Iti intero a Mexico, adu pay laeng dagiti naiputputong a purok, a sadiay addaan dagiti lokal nga agindeg kadagiti katutubo a pagsasao ken kannawidan dagiti Indian. Makadandanonen ti mensahe ti Biblia kadagitoy a tattao ken tultulonganna ida a mangpasayaat iti kasasaadda iti kagimongan. Saan laeng a ti kinapudno ti masursuro dagiti dadduma no di pay ket ti agbasa ken agsurat. Nupay kasta, saanna a kayat a sawen a no bassit ti adal wenno sanikua dagiti tao, nataltallugodda met nga umawat. No maminsan, gapu iti panangitangsit iti puli ken pannakaigamer kadagiti tradision dagiti inapoda, agkedked dagiti dadduma nga umawat iti kinapudno. Daytoy met ti gapuna nga iti dadduma a purok dagiti Indian, masansan nga irurumen dagiti dadduma a pumurok dagidiay umawat iti kinapudno. Isu nga adu ti langa ti kinaemma.

Agtignaykayo a Buyogen ti Kinaemma

Dakayo met ngay? Ipangpangagyo met laeng kadi ti kinapudno iti Sao ti Dios? Wenno narigatyo kadi nga awaten ti dadduma a kinapudno iti Biblia? Nalabit a kayatyo a sukimaten ti bagiyo tapno makitayo no ania ti manglaplapped kadakayo. Maringgorankay kadi gapu ta nanumo laeng a tattao ti kaaduan a maallukoy iti kinapudno? Mabalin ngata nga adda pakainaigan ti kinatangsit iti panagpampanunotyo? Nasayaat no panunotenyo a nalaing ti sasao ni apostol Pablo: “Pinili ti Dios dagiti bambanag a minamaag ti lubong, tapno babainenna dagiti mamasirib; ket dagiti bambanag a nakapuy ti lubong pinili ti Dios, tapno babainenna dagiti napigsa; ket dagiti bambanag ti lubong nga awan kapapay-anda ken dagiti maum-umsi pinili ti Dios, ken dagiti banag a di pay timmaud, tapno pukawenna dagiti adda, tapno awan ti agpasindayag a lasag iti imatang ti Dios.”​—1 Corinto 1:27-29.

Ibellengyo aya ti maysa a gameng gapu laeng ta nasarakanyo dayta iti kadawyan a damili a pagkargaan? Siempre saan! Ay ket, kasta ti wagas a pinili ti Dios a panangipakaammona iti makaispal biag a Sao ti kinapudno kadatayo, kas ilawlawag ni apostol Pablo: “Addaankami iti daytoy a gameng kadagiti damili a baso, tapno ti naindaklan a pannakabalin, biang koma ti Dios, a saan a kadakami.” (2 Corinto 4:7) Ti kinaemma ken kinapakumbaba tulongannatayo a mangbigbig iti pudno a pateg ti gameng, saan laeng a dagiti “damili a baso,” wenno tattao a nausar a nangyeg iti dayta kadatayo. No aramidentayo ti kasta, padpadakkelentay met ti posibilidadtayo a “maitalimeng iti aldaw ti pungtot ni Jehova” ken karaman kadagiti naemma nga “agtawid iti daga.”​—Sofonias 2:3; Mateo 5:5.