Dagiti Agtutubo nga ‘Agtalek ken ni Jehova’
SAAN laeng a dagiti agtutubo ti agik-ikut iti kinaimnas, wenno dagiti laeng nataengan ti addaan iti sirib. (Idiligyo ti Proverbio 11:22; Eclesiastes 10:1.) Imbes ketdi, dagidiay addaan manayon a kinaimnas ken napaypayso a sirib isu dagidiay agtalek ken Jehova ken mangikuna kenkuana iti amin a puso: “Sika ti Diosko.”—Salmo 31:14; Proverbio 9:10; 16:31.
Iti intero a lubong umad-adu dagiti agkakapintas a tattao, agpadpada dagiti agtutubo ken nataenganen, a mangipakpakita iti kinasiribda babaen ti panagserbi iti Dios ken panangikasaba ti naimbag a damag ti Pagarian ti Dios. Alaentayo a pangarigan ni Sabrina a walo ti tawenna.
Agnanaed ni Sabrina idiay Alemania ket addan iti maikadua a tukad [iti elementaria]. Isu ti kaunaan a Saksi ni Jehova idiay eskuelaanda. Nakalkaldaang ta isu ti pagaayat nga uyawen dagiti kaeskuelaanna agingga iti aldaw nga imbaga ti maestra nga itugot dagiti estudiante ti paboritoda a libro iti klase. Inkeddeng ni Sabrina nga itugot Ti Librok dagiti Estoria ti Biblia. Iti napalabas a rabii, nupay madandanagan, nagsagana a naimbag maipaay iti klase. Yantangay adda 26 nga estudiante iti klasena, ammona a mabalin a bassit laeng ti tiempo a maipaay kenkuana. Ngem inkeddengna a dina ipalubos nga adda manglapped iti presentasionna ket mangnamnama a ni Jehova ti tumulong kenkuana. Iti naikeddeng nga aldaw, dinamag ti maestra no siasino ti nakaitugot iti libro ken mayat nga umuna a mangipakita iti dayta. Nakaskasdaaw ta ni laeng Sabrina ti nakaitugot. Nagtakder iti sanguanan ti klase ket rinugianna ti agsao, agbasa ken agipakita kadagiti ladawan iti libro ken inlawlawagna nga amin ket naibatay iti Biblia. Idi malpas sinaludsodna: “Siasino ti interesado a maaddaan ti kastoy a libro?” Inikkanna iti maysa a kopia ti maestra, ket kabayatan ti simmaganad a sumagmamano nga aldaw nakaited ti sangapulo pay a kanayonan a libro kadagiti kaeskuelaanna. Ti laeng naikuna ti maestra ket: “Diak pay pulos nakakitkita ti umasping iti dayta.” Inikkanna ni Sabrina iti A gapu iti nagapuananna.
Kinapudnona, adu dagiti agtutubo a Saksi ti naragsak nga agibumbunannag ti naimbag a damag idiay eskuelaan. Ti maysa pay a pangarigan isu ni Erika, maysa nga 11-años nga agibumbunannag idiay Mexico. Naisuro kenkuana manipud iti kinaubing ti panagayat ken ni Jehova. Nasayaat unay dagiti gapuananna iti eskuelaan. Maysa kadagiti assignmentna isut’ panangisagana iti material maipapan iti AIDS ken pannakaadikto iti tabako ken alkohol. Nagsagana a naimbag, nga inusarna ti magasin nga Agriingkayo!, ket nagun-odna ti kangatuan a grado. Dinamag ti maestrana no sadino ti nangalaanna ti impormasion ket naipaayan kadagiti magasin a naglaon kadagiti artikulo maipapan kadagiday a suheto. Kalpasanna, inusar ti maestra dagitoy a magasin a mangilawlawag kadagiti suheto iti intero a klase. Gapu iti kababalin ni Erika, ti panangraemna kadagiti mannursurona, ken dagiti nangato a markana, naikari nga umawat kadagiti sagut, diploma, ken partial scholarship. Nupay kasta, nariknana a ti kadakkelan a naaramidanna isu ti panangipabigbigna iti bagina kas maysa kadagiti Saksi ni Jehova, panangipaimana iti literatura ti Biblia, ken panangitan-okna iti nagan ti Dios.
Sa adda met dita ni Shannon, maysa a 10-años a barito nga agnanaed idiay New Zealand. Ti laeng maysa a matana ti makakita; nadadael ti maysa gapu iti kanser idi ubing pay laeng. Idi agtawen iti pito ni Shannon, rinugian ni nanangna ti makipagadal ti Biblia kadagiti Saksi ni Jehova. Nupay kasta, di nagbayag kalpasan ti panagadalna ti Biblia, nangrugi a makikabbalay iti maysa a lalaki ket inkeddengna nga isardeng ti panagadalna. Indawat ni Shannon a maitultuloy ti panagadalna iti Biblia. Napatgan ti kiddawna. Intultuloy dagiti Saksi ti simmarungkar, ket kamaudiananna amin dagiti tallo a kameng ti sangakabbalayan nagadalda ti Biblia ken rimmang-ayda iti naespirituan. Kalpasan ti panagkallaysada, nabautisaran ti nanang ni Shannon ken ti agsiuman kenkuana.
Maysa nga aldaw nagkadua da Shannon ken ti asawa ti manangaywan ti sirkito idiay tay-ak ti pangasabaan. Nagsaludsod ti bumalay ken ni Shannon: “Aniat’ napasamak kadayta matam?” “Nadadael gapu iti kanser, ket inikkatda,” kinunana. “Iti di agbayag ipaayannakto ni Jehova ti baro a mata idiay Paraiso, ket dayta ti kayatmi nga ilawlawag kadakayo.”