Report Dagiti Manangiwaragawag ti Pagarian
“Ti Nagan ni Jehova Nabileg a Sarikedked”
AGBIBIAGTAYO iti nariribuk a panawen. Ti kasla natalged a panagbiagtayo mabalin nga agbaliw a daras, ken di mapakpakadaan, dadduma ti agpeggad iti kasta unay sakbay a maamirisda dayta. Mabalin nga agtaud ti peggad manipud iti napolitikaan a riribuk, naranggas a tao, natural a didigra, wenno grabe a sakit. Aniaman ti kasasaad, sadino ti rumbeng a pagkamangan ti maysa a Kristiano no agpegpeggad ti biagna?
Ni David, maysa a misionero nga agnanaed iti maysa kadagiti sanga nga opisina ti Watch Tower Society, naammuanna ti sungbat dayta a saludsod iti maysa a nakaam-ames a kapadasan. Gapu ta napusgan a driver, rimmuar a nasapa iti maysa a bigat tapno iluganna ti sumagmamano a Bethelite nga agnanaed iti ruar ti sanga. Nariwet pay laeng. Nailugannan ni Rosalía ket lumabas iti estasion ti polisia idi nangngegna ti damo a kanalbuong.
Kalpasanna sipapardas a napasamak dagiti bambanag. Nakangngeg iti aweng ti kasla dakkel a rebentador ken nadlawna nga um-umpes ti maysa kadagiti pilid. Pagammuan nakitana ti maysa a soldado a nakatakder iti tengnga ti kalsada a mangpaltogen kenkuana. Tallo a banag ti agarup napasamak a naggigiddan: Agsasaruno a putok ti nangtatek iti sikigan ti Jeep, a nangbuong kadagiti tawa; nagrukob da David ken Rosalía; pinaltogan ti soldado ti windshield iti batug ti mata.
Bayat a matattatek ti Jeep kadagiti bala, nagpreno ni David aginggat’ kabaelanna bayat a nakarukob pay laeng. Pinanunot nga agpadpada da David ken Rosalía nga isu ngata daytoyen ti kanibusananda. Nagkararagda iti napigsa ken ni Jehova, nga indawatda a salaknibanna ida. Kinuna ni Rosalía kalpasanna a kadagidiay a kanito madanagan no kasanot’ panagrikna ti pamiliana no madamagda nga isu ket natayen!
Sibibiag Pay Laeng!
Nagsardeng met laeng kamaudiananna dagiti kanalbuong ken pannakabuong dagiti sarming, ket tinaldiapan ni David ni Rosalía. Idi nakitana ti bassit, nagsaknap a dara iti bukotna, kasta unay ti danagna. Ngem buong ti sarming, saan a bala, ti nairusod sadiay. Agdardara dagiti tumengna gapu iti pannakasugatna kadagiti nabuong a sarming, ngem uray kaskasano saan met a napakaruan.
Immasideg iti Jeep dagiti nakauniporme a soldado a nakabarabad iti puraw kadagiti imada ket minandaranda ida a rummuar a nakangato dagiti imada. Ti maysa, a kasla nangatngato ti ranggona, inasitganna ti maysa a soldado ket kinunana: “Kinunak a diyo palpaltogan dagiti sibilian.” Inkalintegan ti soldado ti inaramidna, nga imbagana a nakangngeg kadagiti kanalbuong ket impagarupna a naggapuda iti Jeep.
Idi inyam-ammo ni David ti bagina agraman ken Rosalía kas Saksi ni Jehova, simmayaat ti kasasaad. Inlawlawagna ti ar-aramidenna, ngem kayat pay laeng dagiti soldado a tenglen ida. Ti talaga a napasamak ket, idi parbangon iti dayta a bigat, nangiyussuat ti maysa a grupo dagiti militar iti coup d’etat, ket madama a rarauten dagitoy a soldado ti estasion ti polisia idi a lumabas da David ken Rosalía a naka-Jeep.
Kasta unay ti danag ni Rosalía ngem nagtanang met laeng idi impakpakaasi ni David a mapalubosanda. Kamaudiananna, napalubosanda—ngem imbatida ti Jeep. Masapul a magnada a mapan iti asideg a kalsada sada aglugan iti bus nga agturong iti sanga, a sadiay naipan ni Rosalía iti infirmary tapno maasikaso.
Ti Bileg ti Kararag
Adda banag a naadal ni David iti dayta a kapadasan—pulos a di tagtagilag-anen ti bileg ti napasnek a kararag, ket pulos a di liplipatan a ti situtured a panangiyam-ammo iti bagi kas maysa kadagiti Saksi ni Jehova ket masansan a salaknib. Mabalin a pudno iti literal a “ti nagan ni Jehova nabileg a sarikedked. Ti nalinteg agkamang kenkuana ket masalakniban.”—Proverbio 15:29; 18:10; Filipos 4:6.
[Picture Credit Line iti panid 19]
Fotografía de Publicaciones Capriles, Caracas, Venezuela