Ti Nasaysayaat a Lubong—Maysa Laeng Aya a Tagtagainep?
NO MAYSAKA idi a pasurot ti Mazdaismo nga inkaskasaba daydi propeta nga Iranio a ni Zoroaster, mabalin a pinadpadaanam ti aldaw a pannakaisubli ti sigud a pintas ti daga. No nagbiagka idiay kadaanan a Grecia, mabalin nga inar-arapaapmo a makagteng iti perpekto a Nagasat a Purpuro wenno makita ti pannakaisubli ti Nabalitokan a Panawen nga inladawan ni mannaniw a Hesiod idi maikawalo a siglo K.K.P. Mabalin a birbiruken pay laeng ti maysa a Guaraní nga Indian idiay Sud America ti Daga nga Awan Kinadakes. Iti kaaldawantayo, nalabit mangnamnamaka a rumang-ayto ti lubong gapu iti maysa a kita ti politikal nga ideolohia wenno kas resulta ti moderno-aldaw a pannakaseknan iti ekolohia.
Nabalitokan a Panawen, Nagasat a Purpuro, Daga nga Awan Kinadakes—dagitoy ti sumagmamano kadagiti adu a nagan a mangiladawan iti isu met laeng a panagtarigagay, panangnamnama iti nasaysayaat a lubong.
Awan duadua a di makaay-ayo a lugar daytoy a lubong, ti lubongtayo. Kasla awan pagpatinggaan ti listaan dagiti nagdakes a kasasaad iti agdama kas iti kumarkaro a naulpit a krimen, panagdadangadang dagiti agkakadaaran a napakuyogan iti awan pay kapadana a kinaranggas, sapasap a pammapatay, panangiyaleng-aleng iti panagsagaba dagiti sabsabali, kinapanglaw ken bisin, kinaawan panggedan ken panagkaykaysa, parparikut iti aglawlaw, ken di maagasan a saksakit a mangsapsaplit iti riniwriw. Iti panangut-utobna kadagiti gubat a mapaspasamak ita, kinuna ti maysa a periodista nga Italiano: “Ti saludsod a mabalin a nainkasigudan nga iyimtuod ti maysa ket no ti kinaulpit met laeng ti kapigsaan a rikna iti panawentayo.” No panunotenyo ti kasasaad, iti panagkunayo realistiko aya ti agtarigagay iti maysa a banag a naiduma, nasaysayaat? Wenno ti aya kasta a panagtarigagay ket maysa laeng a panangiliw iti Utopia, maysa a tagtagainep a pulos a dinto pumudno? Agbibiagtay aya iti kasayaatan kadagiti amin a posible a lubong?
Saan a baro a pakaseknan dagitoy. Sinigsiglon nga ar-arapaapen dagiti tao ti maysa a lubong nga agari ti panagkaykaysa, kinahustisia, kinarang-ay, ken ayat. Iti panaglabas ti tiempo, adu a pilosopo ti sipapatak a nangiyebkas kadagiti kapanunotanda maipapan kadagiti perpekto nga Estado, nasaysayaat a lubong. Ngem, nakalkaldaang ta saanda a mailawlawag no kasano nga ibanag a sibaballigi dagitoy.
Adda aya maisuro kadatayo daytoy sinigsiglon-kadaanna a listaan dagiti arapaap, Utopia, ken ti panagtarigagay ti tao iti nasaysayaat a kagimongan?
[Ladawan iti panid 3]
Daytoy aya ti kasayaatan a lubong?