Report Dagiti Manangiwaragawag ti Pagarian
Ti Kinapudno ti Biblia Pagkaykaysaenna ti Pamilia
ITATTA, iti adu a paset ti lubong, gistay awanen ti nagkaykaysa a pamilia. Nupay kasta, ipalgak ti Biblia no ania ti kasapulan tapno magun-odan ti nagkaykaysa a pamilia. Usigenyo ti sasao ni Jesus: “Tunggal maysa a dumngeg kadagitoy a sasaok ket aramidenna ida maiyaspingto iti maysa a masirib a lalaki, a binangonna ti balayna iti rabaw ti masa a bato.” (Mateo 7:24) Riniwriw a pamilia kadagiti Saksi ni Jehova ti nagkaykaysa gapu iti panangipakat kadagitoy a sasao ken panangusar ti Biblia kas pundasion iti panangipasdek iti nagkaykaysa a pamilia. Maragragpat met dagiti dadduma ti kasta a panagkaykaysa, kas ipakita ti sumaganad a kapadasan.
Bayat nga agserserbi ni Daniel iti armada idiay Francia, insingasing ti chaplain ti militar a gumatang ni Daniel iti Biblia. Gimmatang ngarud, ket rinugianna a regular a basaen dayta. Kamaudiananna nayalis idiay Tahiti. Adventist ti sumagmamano kadagiti kakadua a soldado ni Daniel, ken Mormon dagiti dadduma. Masansan a relihion ti pagsasaritaanda. Maysa nga aldaw inyam-ammo ti hepe a sarhento ni Daniel iti baketna a maysa kadagiti Saksi ni Jehova. Binusbosna [ti asawa ti hepe a sarhento] ti intero a kaguduat’ aldaw a nangsungbat iti adu a salsaludsod ni Daniel ket inturongna iti maysa kadagiti lokal a kongregasion dagiti Saksi ni Jehova idiay Tahiti. Di nagbayag rinugianna ti regular a panagadal ti Biblia.
Napeklan a Katoliko dagiti nagannak ni Daniel nga agnanaed idiay Francia. Maysa a mammagbaga iti eskuelaan ti amana ken isu ti mangimatmaton iti pannakaisuro ti relihion iti maysa nga eskuelaan a Katoliko. Gapu ta kayatna nga iranud kadagiti nagannak kenkuana ti sumagmamano kadagiti naespirituan a pannakaammo a maad-adalna, in-inut a rinugian ni Daniel ti mangiragpin ti sumagmamano a Naimbibliaan a kapanunotan kadagiti suratna kadakuada.
Naragsakan ti ina ni Daniel iti damo, ngem idi agangay nasdaaw a makakita iti nagan a Jehova iti maysa kadagiti surat ti barona. Sumagmamano nga aldaw ti napalabas, nakangngeg ti programa iti radio a nangidatag kadagiti Saksi ni Jehova kas maysa a “napeggad a sekta.” Sinuratanna ni Daniel, nga indawatna kenkuana nga isardengnan a dagus ti pannakisarsaritana kadagiti Saksi. Nupay kasta, nagtultuloy a rimmang-ay ni Daniel iti panagadalna ti Biblia ken di nagbayag inyurnosna ti agikkat iti militar ket agsubli idiay Francia.
Apaman a nakaawid manen, binusbos ni Daniel ti tunggal rabii—no dadduma umadalemen ti rabii—kadagiti napaut a pannakisarsarita maipapan iti Biblia ken ni nanangna. Kamaudiananna immannugot [ni nanangna] a kumadua ken ni Daniel idiay Kingdom Hall. Iti damo nga itatabunona iti gimong, kasta unay ti panangapresiarna ta rinugianna payen ti pannakipagadalna a regular iti Biblia. Napardas ti panagrang-ayna ket di nagbayag nabautisaran.
Napabus-oy a tao ti ama ni Daniel ngem debotado unay iti propesion ken kadagiti narelihiusuan nga aktibidadna. Kaskasdi, iti maysa a gundaway intulodna babaen ti luganna ti asawana ken ni Daniel iti maysa a kumbension distrito. Hulio 14 idi, ket planona a buyaen ti parada maipaay iti Bastille Day iti siudad. Kabayatan nga agur-uray inkeddengna, gapu iti panagusioso, a kitaen ti uneg ti pagkumbensionan. Nasdaaw iti urnos ken talna a nakitana kadagiti tattao ni Jehova, ken bayat a nagpasiar iti nadumaduma a departamento ti kumbension tunggal maysa ti mangawag kenkuana ti “kabsat.” Nalipatanna ket ngarud ti maipapan iti parada ti Bastille Day ken nagtalinaed agingga a nagngudo ti kumbension. Kinalikagumanna a mayadalan ti Biblia ket napartak ti panagrang-ayna iti panangammo ti kinapudno. Nupay kasta, bayat nga umad-adu ti maadalna, ad-adda a masikoran iti sasaadenna iti trabahona, isu nga idi 58 ti tawenna, immikkat iti trabahona. Ita aminda a tallo iti pamilia ket dedikado ken bautisado ken sangsangkamaysa nga agserserbida ken Jehova.
Ti kinapudno ti Biblia ti namagkaykaysa iti pamilia ni Daniel. Mapagkaykaysana met ti dadduma pay a pamilia no naimpusuan nga adalen ken ipakatda dayta.