Report Dagiti Manangiwaragawag ti Pagarian
Saan a Mangidumduma ti Dios
NASUROK a 1,900 a tawenen ti napalabas, nangpaneknek ni apostol Pedro iti opisial ti armada a ni Cornelio, a kunkunana: “Iti kinapudnona makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Nangipakita ni Cornelio ti panagbuteng iti Dios ken panagayat iti kinalinteg. Inawatna ti pammaneknek ni Pedro ket nagbalin a maysa a Kristiano.
Pudno met ita dayta a prinsipio—ti Dios saan a mangidumduma. Makitatayo daytoy iti maysa a kapadasan manipud Alemania. Kunaen ti report:
“Iti teritoria ti kongregasionmi, adda maysa a dakkel a kuartel ti armada a Ruso. Idi 1989, di nagbayag kalpasan ti pannakarpuog ti Pader ti Berlin, nagsaludsod dagiti panglakayen no adda asinoman kadagiti agibumbunannag ti makapagsao iti Ruso. Makapagsao ti dadduma kadakami, isu a napanmi trinabaho daytoy a teritoria, a napaneknekan a maysa a pudpudno a rag-o. Ti sumaganad ket maysa kadagiti adu a kapadasan.
“Kaduak ti maysa a di bautisado nga agibumbunannag (a nabautisaran manipud idin) idi makasaritami ti maysa a komander. Dimngeg kadakami ti komander ket kalpasanna inawisnakam a makisarita kadagiti soldadona. Kinunana a masapul a dumngegda maipapan iti Dios ken kasta met iti Biblia, isu nga inyurnosmi ti panagsublimi.
“Inkuyogmi ti maysa a sister a nalaing nga agsao iti Ruso tapno isut’ paraipatarus. Iti clubroom ti kuartel, nangikabilkam ti lamisaan maipaay kadagiti literatura ket nakasaritami dagiti 68 a soldado ken nasungbatanmi dagiti saludsodda. Kalpasanna siraragsakda nga immawat iti 35 a libro ken agarup 100 a magasina. Idi pumanawkamin iti clubroom, nakitami ti babassit a grupo nga agsasarita maipapan kadagiti literatura.
“Inyurnosmi nga agsublikami iti Hunio 4, 1992. Idi simmangpetkami iti 10:50 t. b., imbaga kadakami ti guardia idiay ruangan ti kuartel nga ur-urayendakami dagiti soldado. Kinuyognakam ti maysa a komandante agingga idiay clubroom, ket naammuanmi a ti babai a nangala kadakami kadagiti literatura para iti libraria, impakaammona ti yaaymi babaen ti panangikabilna kadagiti plakard iti kuartel. Tallo a kakabsat a lallaki ti nangipaay iti ababa a palawag maipapan iti sangalubongan a trabahotayo ken nangipakita no apay a makapagtalektayo iti Biblia. Kalpasanna sinungbatanmi manipud Biblia dagiti saludsod dagiti agdengdengngeg. Maysa kadagiti saludsod ket, Aniat’ takder dagiti Saksi ni Jehova maipapan iti serbisio militar, ken adda kadi asinoman kadakuada ti soldado? Daytoy ti nangipaay iti gundaway para iti di bautisado nga agibumbunannag a kaduak a mangisalaysay iti 25-tawen a panagserbina iti militar idiay Makindaya nga Alemania, a kadagiti naudi a tawtawen ket nagserbi kas kapitan iti air-force. Insalaysayna no kasano a naammuanna ti maipapan iti Dios ken iti Biblia ket kayatna itan ti agbalin a maysa kadagiti Saksi ni Jehova. Nagustuan dagiti soldado ti nangngeganda. Iti las-ud laeng ti pito a minuto, naipaimamin kadagiti soldado amin a literatura nga intugotmi, ket adu ti agtarigagay a maaddaan ti Biblia. Iti maysa a paglakuan ti libro, nakaalakam ti pito a Biblia iti pagsasao a Ruso, nga inawatda a buyogen ti panangapresiar. Pudno a makaparagsak ti mangidanon iti impormasion iti Biblia kadagitoy a mabisbisinan iti naespirituan, ket mangnamnamakami nga agtignayda a maitunos iti dayta.”
Pudno la unay, ti Dios saan a mangidumduma. Babaen ti Saona isut’ makisarsarita kadagiti nasingpet-panagpuspusona a tattao asinoda man wenno sadino man ti yanda. Aw-awisenna ida nga agsursuro iti maipapan kenkuana ken iti Anakna, ni Jesu-Kristo, ket adu manipud iti amin a kasasaad ti panagbiag ti mangar-aramid iti dayta.—Juan 17:3.