Pannakitaripnong Kadagidiay Agbuteng iti Dios

“IL-ILIWEN dagiti tattao iti sadinoman ti wayawaya manipud buteng​—buteng iti kinaranggas, buteng iti kinaawan trabaho, ken buteng iti nakaro a sakit. Il-iliwentay met dayta. . . . Apay ngarud a pagsasaritaantayo no kasanot’ panangsukay iti panagbuteng?” Naibangon daytoy a mamagpanunot a saludsod iti pannulbek a palawag kadagiti “Nadiosan a Panagbuteng” a Kombension Distrito, a nangrugi idi Hunio 1994.

Dagiti riniwriw a timmabuno​—immuna idiay Norte America, ket kalpasanna idiay Europa, Central ken Sud America, Africa, Asia, ken kadagiti puro ti taaw​—magagaranda a mangadal no kasano a sukayen ti panagbuteng. Apay? Gapu ta ti pannakairamantayo kadagiti bendision nga ipaay ni Jehova a Dios iti ilina ket agpannuray iti kaadda kadatayo ti nadiosan a panagbuteng. Sangsangkamaysa nga immay dagitoy a kombensionista tapno adalenda ti maipapan iti nadiosan a panagbuteng, ket kabayatan ti tallo-aldaw a programa, adut’ naadalda maipapan iti daytoy nakapatpateg a Nakristianuan a kababalin.

‘Agbutengka iti Dios ket Salimetmetam Dagiti Bilinna’

Daytat’ tema ti immuna nga aldaw ti kombension, a naibatay iti Eclesiastes 12:13. Aniat’ kaipapanan ti panagbuteng iti Dios? Iti kaunaan a paset ti programa, inlawlawag ti tsirman iti kombension a ti nadiosan a panagbuteng yanninawna ti panagamak ken nauneg a panagraem ken Jehova kasta met ti makapasalun-at a panagbuteng a mangpaluksaw kenkuana. Saan a dakes ti kasta a nadiosan a panagbuteng; makapasalun-at ken maitutop dayta.

Kasanotay a magunggonaan iti daytoy makapasalun-at a panagbuteng? Ti simmaganad a palawag a, “Dikay Mabannog ken Sumuko,” inlawlawagna a ti nadiosan a panagbuteng isut’ mangtignay kadatayo a mangsalimetmet iti bilbilin ti Dios a buyogen iti rag-o. Ti kasta a panagbuteng a napakuyogan iti panagayat iti Dios ken kaarruba, pabilgennatayo iti naespirituan. Wen, matulongannatay ti nadiosan a panagbuteng a mangliklik iti kinabannayat iti lumba para iti agnanayon a biag.

Ti simmaruno iti programa ket dagiti interbiu a nangidatag iti nabiag a pammaneknek a matulongannatayo ti nadiosan a panagbuteng. Inlawlawag dagidiay napagsaludsodan no kasano nga inimpluensiaan ida ti nadayaw a panagbuteng iti Dios tapno makapagtultuloy iti ministerio iti laksid dagiti kinaaleng-aleng, kinaindiperente, wenno pannakaidadanes ken tinulonganna ida a makapagibtur uray iti sidong dagiti narikut a personal a pakasuotan.

Ngem, apay nga adda nadiosan a panagbuteng ti dadduma a tattao idinto ta awan kadagiti dadduma? Iti palawag a “Panangsukay ken Pannakagunggona Manipud iti Nadiosan a Panagbuteng,” inlawlawag ti nangipaay iti pannulbek a palawag nga iti Jeremias 32:37-39, inkari ni Jehova nga ikkanna ti ilina iti managbuteng-Dios a puso. Intukit ni Jehova ti nadiosan a panagbuteng iti puspusotayo. Kasano? Babaen ti nasantuan nga espirituna ken ti naipaltiing a Saona, ti Biblia. Nupay kasta, nalawag a kasapulan a sipapasnek a reggetantayo nga adalen ti Sao ti Dios ken naan-anay nga aprobetsarentayo ti nawadwad a naespirituan a probision nga impaayna. Karaman kadagitoy dagiti kombension ken panaggigimongtayo iti kongregasion, a tumulong kadatayo nga agsursuro no kasano ti agbuteng kenkuana.

Naluktan ti programa iti malem babaen ti pammalagip iti panagtalek ken ni Jehova ken iti Saona. Sinaruno daytoy ti diskusion maipapan kadagiti kangrunaan a pamay-an a rumbeng a pangapektaran ti Pagarian iti biagtayo kas Kristiano.

Kalpasanna, simmaruno ti immuna kadagiti tallo a simposium a naidatag iti kombension. “Ti Nadiosan a Panagbuteng Tignayennatayo nga Agtulnog Kadagiti Nadibinuan a Pagalagadan” isut’ tema daytoy a simposium, nga impamaysana ti atension iti pamilia. Ti sumaganad ket maysa a pagarigan ti Nainkasuratan​—ken praktikal​—a pammalakad a naidatag.

□ Para kadagiti assawa a lallaki: Ti nadiosan a panagbuteng rumbeng nga isut’ mangtignay iti maysa a lalaki a mangayat ken ni baketna kas ti mismo a bagina. (Efeso 5:28, 29) Saan nga iranta ti maysa a lalaki a dangran ti mismo a bagina, ibabain ti bagina iti sanguanan dagiti gagayyemna, wenno idanondanon ti maipapan kadagiti bukodna a pagkapuyan. Isu a rumbeng a tratuenna ni baketna a buyogen ti dayaw ken respeto nga ipapaayna iti bagina.

□ Para kadagiti assawa a babbai: Ti nadiosan a panagbuteng ni Jesus isut’ nangtignay kenkuana a ‘kankanayon a mangay-ayo iti Dios.’ (Juan 8:29) Nasayaat daytoy nga ugali a tuladen dagiti assawa a babbai iti pannakilangen kadagiti assawada.

□ Para kadagiti nagannak: Maipakita dagiti Kristiano a nagannak ti nadiosan a panagbuteng babaen ti sipapasnek a panangannongda kadagiti pagrebbenganda kas nagannak, nga ibilangda dagiti annakda kas tawid a naggapu ken Jehova. (Salmo 127:3) Ti kangrunaan a kalat dagiti nagannak rebbeng nga isu ti panangpadakkel kadagiti annakda tapno agbalinda a pudpudno a Kristiano.

□ Para kadagiti annak: Binilin ni Jehova dagiti annak nga agtulnogda kadagiti ‘nagannakda a maikaykaysa iti Apo.’ (Efeso 6:1) Gapuna, ti panagtulnog kadagiti nagannak ket panagtulnog iti Dios.

Ti pangserra a palawag iti dayta nga aldaw inapektaranna dagiti emosiontayo, ta sinalaysayna dagiti nauneg a karirikna a mapasarantay amin no matay ti maysa nga inay-ayattayo. Nupay kasta, iti agarup katengngaan ti palawag, adda maysa a sorpresa. Pinaragsak ti nagpalawag dagiti timmabuno babaen ti panangipakaammona iti pannakairuar ti maysa a baro a broshur a No Adda Matay nga Ay-ayatenyo. Daytoy 32-pinanid, de kolor a publikasion adut’ dakamatenna a makatulong kadagidiay agladladingit a mangtarus ken mangsaranget kadagiti karirikna ken emosion a tumaud kalpasan ti ipapatay ti maysa nga inay-ayat. Nagparikutkayo kadin no aniat’ sawenyo iti maysa a tao a nagminatay? Salaysayen ti maysa a paset daytoy a broshur no kasanotay a matulongan dagidiay malmaldaang. Bayat a dengdenggenda ti agpalpalawag, pampanunoten ti adu kadagiti timmabuno no siasino ti mabalin a magunggonaan manipud iti daytoy baro a broshur.

‘Mangipaay iti Sagrado a Panagserbi Buyogen ti Nadiosan a Buteng ken Panagamak’

Isu dayta ti tema iti maikadua nga aldaw, a naibatay iti Hebreo 12:28. Kabayatan ti programa iti bigat, dimteng ti maikadua a simposium a, “Dagiti Kongregasion a Magmagna iti Panagbuteng ken Jehova.” Ti immuna a paset ket maipapan iti itatabuno kadagiti gimong. Ti kaaddatayo kadagiti gimong ipakitana ti panagraemtayo iti Dios ken kadagiti naespirituan a probisionna. Babaen ti itatabuno, ipakpakitatay nga agbutengtayo iti naganna ken sigagagartayo a tumunos iti pagayatanna. (Hebreo 10:24, 25) Inlawlawag ti maikadua nga ispiker a tapno makapagna ti intero a kongregasion iti panagbuteng ken Jehova, masapul nga aramiden ti tunggal maysa ti pasetna iti panangtaginayon iti nasayaat a kababalin. Dinakamat ti naudi a nagpalawag ti maipapan iti pribilehio ken annongen dagiti amin a Kristiano​—ti panangiwaragawag iti naimbag a damag nga awan sardayna. Kasanot’ kabayag ti panagtultuloytayo a mangasaba? Agingga nga ibaga ni Jehova nga isardengtayon.​—Isaias 6:11.

“Ti Rag-o ni Jehova Isu ti Sarikedkedyo” ti tema ti simmaruno a palawag, kas nasalaysay ita kadagiti maadal nga artikulo iti daytoy a magasin. (Nehemias 8:10) Apay a naragsak ti ili ni Jehova? Imbalabala ti nagpalawag ti sumagmamano a makagapu. Ti maysa a nakapatpateg ket ti nadekket a relasiontayo iti Dios pagbalinennatayo a kararagsakan a tattao ditoy daga. Panunotenyo laengen, impalagip ti nagpalawag kadagiti kombensionista, nga addaantayo iti pribilehio a karaman kadagiti tattao nga inyasideg ni Jehova ken Jesu-Kristo. (Juan 6:44) Anian a nagbileg a rason iti panagrag-o!

Ti tampok ti tunggal kombension isu ti bautismo, ket kasta met kadagiti “Nadiosan a Panagbuteng” a Kombension. Iti palawag a “Dedikasion ken Bautismo iti Panagbuteng ken Jehova,” inlawlawag ti ispiker a dagiti personal nga obligasion dagiti amin a bautisado a tattao ket nagkapat a paset: (1) Kasapulan nga adalentayo ti Sao ti Dios babaen ti tulong dagiti publikasion a bumadang kadatayo a mangtarus ken mangyaplikar iti dayta; (2) kasapulan nga agkararagtayo; (3) kasapulan a makitimpuyogtayo kadagiti kapammatiantayo iti gimgimong ti kongregasion; ken (4) kasapulan a mangipaaytay iti pammaneknek iti nagan ken Pagarian ni Jehova.

Nairugi ti programa iti malem ti Sabado babaen ti makaliwliwa a suheto a “Ti Ili a Saan a Binaybay-an ni Jehova.” Tallopulo ket lima a siglon ti napalabas, idi naipasango ti nasion ti Israel kadagiti narikut a tiempo, nangipaay ni Jehova iti pammasiguro babaen ken Moises, a kunkunana: “Ni Jehova a Diosmo . . . dinakanto baybay-an wenno panawan a mamimpinsan.” (Deuteronomio 31:6) Pinaneknekan ni Jehova dayta a pammatalged babaen ti panangsalaknibna kadagiti Israelita idi simrekda iti Naikari a Daga ken tinagikuada dayta. Itatta, no maipasango kadagiti narikut a pakasuotan, mabalintay met ti maaddaan iti naan-anay a panagtalek a dinatay baybay-an ni Jehova, no la ket ta agtalinaedtay a nadekket kenkuana ken ipangagtayo dagiti pammalakad iti Saona.

Kasanoyo a masarakan ti rag-o iti panagbasa iti Biblia? Iti palawag nga “Inaldaw a Basaenyo ti Sao ti Dios, ti Nasantuan a Biblia,” insingasing ti nagpalawag ti panagbasa nga addaan iti managpalutpot a panunot ken buyogen ti panangibangon kadagiti kastoy a saludsod: Aniat’ isuro kaniak daytoy a salaysay maipapan kadagiti kualidad ken daldalan ni Jehova? Kasano nga ad-adda pay a matuladko ni Jehova kadagitoy a pamay-an? Ti panangbasa iti Biblia iti kastoy a pamay-an ket maysa a makaparagsak ken makagunggona a kapadasan.

Ti atension ket simmaganad a naiturong iti maikatlo a simposium ti programa a, “Dagiti Probision a Tumulong Kadagidiay Agbuteng ken Jehova.” Nupay saan nga agaramid ni Jehova kadagiti datdatlag nga agpaay kadagiti adipenna itatta, awan duadua a tulonganna dagidiay agbuteng kenkuana. (2 Pedro 2:9) Inusig daytoy a simposium dagiti uppat a probision manipud ken Jehova a tumulong kadatayo kadagitoy napeggad a tiempo: (1) Babaen ti espirituna, pabilgennatay ni Jehova a mangiringpas kadagiti trabaho a ditay kabaelan nga aramiden iti bukodtayo a pigsa. (2) Babaen ti Saona, ipaayna ti pammalakad ken panangiwanwan kadatayo. (3) Babaen ti subbot, ipaayannatayo ti nadalus a konsiensia. (4) Babaen ti organisasionna, a pakairamanan dagiti panglakayen, idalan ken saluadannatayo. (Lucas 11:13; Efeso 1:7; 2 Timoteo 3:16; Hebreo 13:17) Babaen ti panangaprobetsartayo kadagitoy a probision, makapagibturtayo ket magun-odantay ngarud ti anamong ni Jehova.

Ti maudi a palawag iti malem ti Sabado ket napauluan iti “Asidegen ti Nakaam-amak nga Aldaw ni Jehova,” a naibatay iti padto ni Malakias. Adda dagiti nakaam-amak nga aldaw iti napalabas, kas idi naiwayat ti panangukom iti Jerusalem idi 70 K.P. Ngem ti kangrunaan a nakaam-amak nga aldaw iti amin a mapasaran ti tao isunto ti sumungsungad nga aldaw ni Jehova inton ‘mayeg ti pammales kadagidiay di makaammo iti Dios ken kadagidiay di agtulnog iti naimbag a damag maipapan ken Apotayo a Jesus.’ (2 Tesalonica 1:6-8) Kasanot’ kaasidegen dayta? Kinuna ti nagpalawag: “Ti panungpalan ket asidegen! Ammo ni Jehova dayta nga aldaw ken oras. Saanna a baliwan ti pagorasanna. Rumbeng nga agibturtayo a siaanus.”

Narigat a patien a dua nga aldaw ti limmabasen. Aniat’ yeg ti maudi nga aldaw?

“Agbutengkayo iti Dios ket Ipaayyo Kenkuana ti Dayag”

Ti tema ti maikatlo nga aldaw ket naibatay iti Apocalipsis 14:7. Kabayatan ti programa iti bigat, intampok dagiti agsasaruno a palawag ti maipapan kadagiti dadduma a doktrinal a sursuro a nakaigidiatan dagiti Saksi ni Jehova manipud kadagiti amin a narelihiusuan nga organisasion.

Iti palawag nga “Addanto Panagungar Dagiti Nalinteg,” nangibangon ti nagpalawag iti makapainteres a saludsod: “Kabayatan dayta sangaribu a tawen nga Aldaw ti Panangukom, kaanonto ti pannakapagungar dagidiay natay a simamatalek kadagitoy maudi a tawen ti sistema dagiti bambanag ni Satanas?” Ti sungbat? “Saan nga ibaga ti Biblia,” inlawlawag ti ispiker. “Nupay kasta, saan kadi a lohikal a mapagungar a nasapsapa dagidiay matay iti kaaldawantayo tapno makiramanda a kadua ti dakkel a bunggoy a makalasat iti Armagedon iti naindaklan nga edukasional a trabaho a maaramidto kabayatan ti Aldaw ti Panangukom? Talaga a kasta!” Addanto kadi makalasat? Sigurado nga addanto. Dagiti pannursuro ken pagarigan iti Biblia a mangipatalged kadatayo iti daytoy ket sibabatad a nailawlawag iti simmaganad a palawag a, “Makalasat a Sibibiag iti Dakkel a Rigat.”

Nabayagen a natarusan dagiti Saksi ni Jehova nga adda dua a pagtungpalan nga idatag ti Biblia​—agnanayon a biag iti maysa a paraiso a daga para iti di mabilang a riniwriw a tattao ken nailangitan nga imortal a biag para iti limitado a bilang dagidiay makipagturayto ken Kristo iti Pagarianna. Ti nailangitan a namnama ket naisalaysay iti palawag a “Dikay Agbuteng, Bassit nga Ipastoran.” (Lucas 12:32) Gapu iti agdama a kasasaad ti lubong, kasapulan a di agbuteng ti bassit nga ipastoran; masapul nga agibtur ti tunggal maysa kadakuada agingga iti panungpalan. (Lucas 21:19) “Ti kinaturedda,” kinuna ti nagpalawag, “agserbi a mangparegta kadagidiay kameng ti dakkel a bunggoy. Kasapulan met a sukayenda ti natured a kababalin bayat a padpadaananda ti pannakaisalakan kabayatan ti kadakkelan pay laeng a tiempo ti riribuk ditoy daga.”

Iti ngudo ti programa iti bigat, siraragsak a binuya dagiti timmabuno ti drama iti Biblia a Dagiti Panagpili a Naipasango Kenka. Idi kaaldawan ni Josue, ken kasta met ken mammadto nga Elias, kasapulan a mangngeddeng dagiti Israelita. Masapul nga agpilida. Kinuna ni Elias: “Agpapan kaano ti panagallaallayo iti dua a panunot? No ni Jehova isu ti pudno a Dios, sumurotkayo kenkuana; ngem no ni Baal, sumurotkayo ngarud kenkuana.” (1 Ar-ari 18:21) Kasta met itatta, ti sangatauan ket kasapulan a mangaramid iti pangngeddeng. Saan a panawen daytoy ti panagallaalla iti dua a nagduma a kapanunotan. Aniat’ umiso a pilien? Daydi met laeng pinili ni Josue idi ugma. Kinunana: “No maipapan kaniak ken ti sangakabbalayak, agserbikamto ken Jehova.”​—Josue 24:15.

Kasla pagammuan laeng, malemen iti Domingo ket panawenen para iti palawag publiko a napauluan iti “Apay a Pagbutngan Itan ti Pudno a Dios.” Iti Apocalipsis 14:6, 7, naigunamgunam iti amin a sangatauan: “Agbutengkayo iti Dios ket ipaayyo kenkuana ti dayag.” Apay a naganat ti panagbuteng iti Dios itan? Agsipud ta, kas ituloy a kunaen ti kasuratan, “ti oras ti panangukomna dimtengen.” Babaen ti Anakna, a naitronon kas Ari iti nailangitan a Pagarian ti Dios, pagpatinggaenton ni Jehova ti agdama a narugit, rebelioso a sistema dagiti bambanag. Inlawlawag ti ispiker a daytoy ti kakaisuna a pamay-an tapno mabang-aran dagidiay agbuteng iti Dios ken kasta met tapno masalbar ken mataginayon ti naindagaan a taengtayo. Tangay dagitoyen ti maudi nga al-aldaw daytoy a sistema dagiti bambanag, kasapulan a pagbutngantayo ti pudno a Dios itan!

Kasaruno ti pannakagupgop ti maadal [nga artikulo] iti Pagwanawanan para iti dayta a lawas, simmagpat iti plataporma ti naudi a nagpalawag. Kas resulta ti programa iti kombension, inlawlawagna a naaddaan iti nagpateg a kaipapanan ti nadiosan a panagbuteng kadagiti timmabuno. Impaganetgetna dagiti adu a gunggona a magun-odan dagidiay agbuteng iti Dios. Impakaammo ti nagpalawag ti pannakairuar ti maysa a baro a video nga​—United by Divine Teaching. Itampokna dagiti naisangsangayan nga aspeto ti “Nadiosan a Panangisuro” a Kombension Internasional a naangay idi 1993-94. Bayat nga agngudngudo ti palawag, nayimtuod dagiti adu, ‘Aniat’ mabalin a padaanantayo inton umay a tawen?’ Ti tallo-aldaw a kombension distrito kadagiti adu a lugar.

Kas paggibusan, dinakamat ti nagpalawag ti Malakias 3:16, a kunana: “Iti kasta dagiti nagbuteng ken Jehova nagsaoda iti maysa ken maysa, tunggal maysa iti kaduana, ket ni Jehova nagimdeng ken nangipangag. Ket maysa a libro a pakalaglagipan nasuratan iti saklangna, agpaay kadagidiay nagbuteng ken Jehova ken kadagidiay a nagpanunot iti naganna.” Nagawid dagiti kombensionista nga addaan iti nabatad a determinasion a sipapanunot iti nagan ni Jehova ken agserbi kenkuana a buyogen ti nadiosan a panagbuteng.

[Ladawan iti panid 24]

Dagiti kandidato iti bautismo kasapulan nga itultuloyda nga iparangarang ti nadiosan a panagbuteng

[Ladawan iti panid 25]

Ti drama a “Dagiti Panagpili a Naipasango Kenka” ginutugotna dagiti dimngeg a rumbeng a desididoda nga agserbi ken Jehova

[Ladawan iti panid 26]

Naragsakan dagiti kombensionista nga umawat iti baro a broshur a “No Adda Matay nga Ay-ayatenyo”