Ti Relihionyo—Maysa a Barko a Di Rumbeng a Panawan?
ADDA iti tengnga ti nadawel a bagyo ti maysa a barko. Naipasango iti nainget a pangngeddeng dagiti tripolante, a mangikarkarigatan a mangsalbar iti barkoda: agtalinaedda iti barko wenno panawanda dayta tapno maispalda ti bagbagida. Ammoyo kadi a maar-aramat daytoy nakaal-alingget a buya kas maysa a teolohikal nga ilustrasion?
Masansan a yarig dagiti teologo, nangruna dagiti eskolar a Katoliko, ti iglesiada iti maysa a barko a mangsarsarked iti bagyo. Kunada a daytoy a barko, a ni Jesus wenno ni Pedro ti pannakatimon, itakderanna ti kakaisuna a pakaisalakanan. Kastoy ti panangmatmat dagiti klero, ‘Pulos a diyo pampanawan ti barko. Adun a nakaro a krisis ti napasaran ti iglesia, ngem maysa dayta a barko a nakalasat iti amin a bagyo iti napalabas.’ Kuna dagiti dadduma, ‘Apay koma a panawantayo? Adda kadi pay sabali a pagpilian? Apay a ditay ketdi agtalinaed ket tumulongtayo a mangiturong iti dayta iti nalinlinak a taaw?’
Maitunos iti daytoy a pangyaspingan, adu a tattao, a naikameng iti amin a kita ti relihion, ti mangikalintegan, ‘Ammok nga adut’ di umiso iti relihionko, ngem namnamaek nga agbalbaliwto. Diak kayat a panawan. Kayatko ti tumulong a mangparmek kadagiti pakarigatan daytoy.’ Mabalin a naibatay ti kastoy a panagrasrason iti napasnek a panangipateg iti relihion dagiti inapoda wenno iti pay ketdi amakda a “mangliput” iti dayta.
Alaentayo a pagarigan ni Hans Küng, maysa a nalatak a kritiko a teologo a Katoliko. Inut-utobna: “Rumbeng kadi a panawak ti barko kabayatan ti bagyo, a bay-ak a dagidiay kakaduak nga aglaylayag agpapan ita ti makaammon a mangsaranget iti angin, mangkaras iti danum, ken nalabit mangikarigatan a mangispal iti biagda?” Insungbatna: “Diak ibbatan ti akemko iti uneg ti iglesia.” Ti sabali a pagpilian isu ti “isisina iti daytoy nga iglesia, gapu iti panagtallikudna, gapu iti panagayat kadagiti natantan-ok a prinsipio, ken nalabit, tapno agbalin nga ad-adda a pudpudno a Kristiano.”—Die Hoffnung bewahren.
Ngem mabalin kadi nga agtalinaed ti maysa a tao iti barko ti bukodna nga iglesia a mangnamnama a ti Dios, gapu iti asina, palubosanna dagiti amin a relihion nga agbalbaliw iti unos ti di nakedngan a panawen? Maysa dayta a napateg a saludsod. Kas impakita ti ilustrasion, ti sidadarasudos a panangpanaw iti agpegpeggad a barko babaen ti panaglugan kadagiti di natalged a salbabida ket kas kapeggad ti panagtalinaed iti lumlumned a barko. Nainsiriban kadi ti agtalinaed iti maysa nga iglesia uray pay aniat’ mapasamak, aniaman ti kasasaadna? Mabalbaliwan pay kadi dagiti relihion iti panawentayo? Kasano pay kabayag ti panangipalubos ti Dios kadakuada a bumusor iti pagayatanna?
[Credit Line iti panid 3]
Chestnot/Sipa Press