Kasanoyo a Mapasayaat Dagiti Kararagyo?
NAIDUMDUMA ti kararag kadagiti naayat a probision ni Jehova a Dios. Mabalin nga alaen dagiti bumusbusor ti Bibliayo wenno lapdandakayo a makitaripnong kadagiti padayo a managdaydayaw, ngem awan ti makalapped kadakayo nga agkararag. Nakapatpateg ti kararag. Anian a nagpateg ngarud iti tunggal maysa kadatayo nga ipateg ken gundawayan daytoy a pribilehio. Aniat’ makatulong kadakayo a mangpasayaat kadagiti kararagyo?
Ti Biblia ket saan a maysa a libro ti kararag. Kaskasdi, maikuna a dayta ti kasayaatan a libro ti sangatauan maipapan iti kararag. Ti laengen Hebreo a Kasuratan ket naglaon iti nasurok a 150 a kararag. Ababa ti dadduma; atiddog ti dadduma. Nayebkas dagitoy iti publiko wenno iti pribado, babaen kadagiti ari wenno dagiti balud, iti balligi wenno iti rigat. Kas inkanta ni David iti Salmo 65:2, agbaw-ing “dagiti amin a lasag” ken ni Jehova, ti “Dumngeg iti kararag.” Apay a pinaltiingan ti Dios dagiti mannurat ti Biblia a mangilanad kadagita a nakaad-adu a napili a kararag?
Tapno masungbatan dayta a saludsod, usigenyo ti 2 Timoteo 3:16. Kunana: “Amin a Kasuratan impaltiing ti Dios ken makagunggona.” No kasta, naisurat dagiti kararag iti Biblia tapno iwanwandatayo, kas met laeng kadagiti Nainkasuratan a padto, prinsipio, ken historia. Kasanodatay a magunggonaan dagitoy a kararag?
Babaen ti panangsukimat kadagiti Nainkasuratan a kararag, mailasintayo dagidiay nayebkas kadagiti kasasaad nga umasping iti kasasaadtayo. Maammuantayo no kasano a nagduduma ti panggep ken ti kasasaad a pakayebkasan dagiti kararag. Kanayonanna, makatakuattayo kadagiti baro nga ebkas a pagdayaw ken pagyaman ken makasaraktayo kadagiti baro a sasao [a mausartayo] iti dawdawat ken ar-ararawtayo. Iti ababa a pannao, matulongannatay dagiti kararag iti Biblia a mangpasayaat kadagiti kararagtayo.
Ni Maria, a nagbalin nga ina ni Jesus, ket maysa a tao a nalawag a nagunggonaan kadagiti ebkas a naaramat iti maysa a kararag a nailanad iti Biblia. Sinarungkaranna ti kabagianna a ni Elisabet kalpasan a nagsikog ti tunggal maysa kadakuada iti lalaki babaen ti tulong ti Dios. Indaydayaw ken pinagyamanan ni Maria ti Dios, ket nakakadkadlaw ta umarngi ti dadduma a sasaona kadagidiay linaon ti maysa a kararag iti Hebreo a Kasuratan. Kasla kabesado ni Maria ti kararag nga insawang ni Anna, ti ina ni Samuel a mammadto. Nagsikog met ni Anna iti lalaki babaen ti tulong ti Dios, nasurok a 1,000 a tawen sakbayna. Mabalin ngata nga inut-utob ni Maria daytoy a kararag gapu ta inyanninawna ti kaririknana?—1 Samuel 2:1-10; Lucas 1:46-55.
Dakayo ngay? Adda kadi malagipyo a kararag iti Biblia a nayebkas kadagiti kasasaad nga umasping iti kasasaadyo? Ti panangbirok, panangbasa, ken panangut-utob kadagiti kasta a kararag tulongannakayo a mangpasayaat iti pannakisaoyo iti Dios. Iti sumaganad nga artikulo, awisendakayo a mangusig iti tallo a kararag manipud iti Nasantuan a Kasuratan. Nayebkas dagitoy iti nadumaduma a kasasaad, a nalabit umasping iti kasasaadyo.