Malagipyo Pay Aya?

Inapresiaryo aya a binasbasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

▫ Apay a dagiti nagkauna a Kristiano dida rinambakan ti kasangay ni Jesus?

Sigun iti The World Book Encyclopedia, “saan a rinambakan dagiti Nagkauna a Kristiano ti pannakayanak [ni Jesus] agsipud ta imbilangda ti panangrambak iti pannakayanak ti siasinoman kas maysa nga ugali dagiti pagano.”​—12/15, panid 4.

▫ Rumbeng aya a maiturong ken Jesus dagiti kararag?

Saan, agsipud ta dagiti kararag ket maysa a kita ti panagdayaw nga agpaay laeng iti Mannakabalin-amin a Dios. Babaen ti panangiturong iti amin a kararagtayo ken Jehova a Dios, ipakpakitatay nga impapusotayo ti imbilin ni Jesus a panagkararag: “Amami nga adda iti langlangit.” (Mateo 6:9)​—12/15, panid 25.

▫ Apay a naiduma ti pannakaukom ti nadagsen a basol ni Ari David no maidilig kadagiti basol da Ananias ken Safira? (2 Samuel 11:2-24; 12:1-14; Aramid 5:1-11)

Ti basol ni Ari David ket gapu iti kinakapuy ti lasag. Idi naipabigbig kenkuana ti inaramidna, nagbabawi, ket pinakawan ni Jehova​—nupay masapul a sagabaenna dagiti bunga ti basolna. Nagbasol da Ananias ken Safira iti aginsisingpet a panagulbodda, a pinadasda nga allilawen ti kongregasion Kristiano ket iti kasta ‘nagbasolda iti nasantuan nga espiritu ken iti Dios.’ (Aramid 5:3, 4) Paneknekan dayta a dakes ti pusoda, gapuna naing-inget ti pannakaukomda.​—1/1, pinanid 27, 28.

▫ Aniat’ makatulong kadatayo nga agserbi ken Jehova a buyogen iti rag-o ti puso?

Rumbeng a sukayentayo ti positibo ken addaan panangipateg a panangmatmat kadagiti bendision ken pribilehio iti panagserbi nga inted ti Dios kadatayo, ken pulos a ditay liplipatan a babaen ti panangsurottay iti Sao ti Dios, maay-ayotay isuna.​—1/15, pinanid 16, 17.

▫ Ania dagiti dua a banag a masapul a laglagipentayo tapno makaipaaytayo iti epektibo a pammaregta?

Umuna, panunotenyo no ania ti sawenyo tapno agbalin nga espesipiko ti pammaregta. Maikadua, mangsapulkay iti gundaway nga umasideg iti maysa a tao a maikari iti pammadayaw wenno agkasapulan iti pammabileg.​—1/15, panid 23.

▫ Apay a ti “dakkel a bunggoy” addaanda iti “sangsanga ti palma kadagiti im-imada”? (Apocalipsis 7:9)

Ti panangiwagayway kadagiti sanga ti palma ipasimudaagna a sirarag-o nga itantan-ok ti “dakkel a bunggoy” ti Pagarian ni Jehova ken ti pinulotanna nga Ari, ni Jesu-Kristo. (Kitaenyo ti Levitico 23:39, 40.)​—2/1, panid 17.

▫ Ania dagiti napateg a leksion a masarakan iti libro a Job?

Ipakpakita kadatayo ti libro a Job no kasano a tamingen dagiti parikut. Mangipaay daytoy kadagiti makaawis-atension nga ulidan no kasano ti maiparbeng​—ken di maiparbeng​—a panangbalakad iti maysa a naipasango kadagiti suot. Maysa pay, matulongannatay ti mismo a kapadasan ni Job nga agtignay iti natimbeng a pamay-an no maipasangotayo kadagiti narikut a kasasaad.​—2/15, panid 27.

▫ Ania ti isuro kadatayo dagiti milagro ni Jesus?

Dagiti milagro ni Jesus itan-okda ti Dios, a nangipasdek iti pagtuladan para kadagiti Kristiano a mangipadayag iti Dios. (Roma 15:6) Iparparegtada ti panagaramid iti naimbag, ti panangipakita iti kinamanagparabur, ken ti panangiparangarang iti kinamanangaasi.​—3/1, panid 8.

▫ Apay nga irepaso ti papanglakayen dagiti naisagana a saludsod kadagiti nabiit pay a nagdedikar?

Patalgedan daytoy a maawatan a naan-anay ti tunggal maysa dagiti kangrunaan a sursuro ti Biblia ken ammona no aniat’ nairaman iti panagbalin a Saksi ni Jehova.​—3/1, panid 13.

▫ Kasano a magunggonaantayo kadagiti Naimbibliaan a kararag? Babaen ti panangsukimattayo a naimbag kadagiti Nainkasuratan a kararag, mailasintayo dagidiay nayebkas kadagiti kasasaad nga umasping iti kasasaadtayo. Ti panangbirok, panangbasa, ken panangut-utob kadagiti kasta a kararag tulongannatayo a mangpasayaat iti pannakisaotayo ken Jehova.​—3/15, pinanid 3, 4.

▫ Ania ti nadiosan a buteng?

Ti nadiosan a buteng isut’ panagamak ken Jehova, nauneg a panagraem kenkuana, a napakuyogan iti makaay-ayo a panagamak a mamagpungtot kenkuana. (Salmo 89:7)​—3/15, panid 10.

▫ Ania dagiti tallo a pamay-an nga ipakpakita ti Biblia a napategtayo iti imatang ti Dios?

Isursuro ti Biblia a tunggal maysa kadatayo ket napateg iti imatang ti Dios (Lucas 12:6, 7); ilawlawagna no aniat’ kitkitaen ni Jehova kadatayo (Malakias 3:16); ken isalaysayna no aniat’ inaramid ni Jehova a mangipakita iti ayatna kadatayo. (Juan 3:16)​—4/1, pinanid 11, 12, 14.

▫ Apay a ti Hebreo 10:24, 25 ket saan laeng a maysa a bilin a dagiti Kristiano agtataripnongda a sangsangkamaysa?

Mangipaay dagitoy a sasao ni Pablo iti nadibinuan ti pannakaipaltiingna a pagalagadan kadagiti amin a Nakristianuan a panaggigimong​—kinaagpaysuanna, iti aniaman nga okasion a panagtitipon dagiti Kristiano.​—4/1, panid 16.