No Kaanot’ Panagbasada ken No Kasanoda a Nagunggonaan

Agsapa:

Inkeddeng ti maysa a pagassawaan, nga agpada nga agtartrabaho iti ruar ti pagtaenganda, a bumangon a nasapsapa iti uray sangapulo laeng a minuto kada bigat ket aramatenda dayta a tiempo iti panagbasada a dua iti Biblia sakbay ti agap-apura nga ipapanawda iti pagtaengan. Mangipaay ti binasada iti pakaibatayan ti nasayaat a panagsasarita kalpasan ti ipapanawda iti balay.

Ar-aramaten ti maysa a panglakayen idiay Nigeria ti programa a naibalabala maipaay iti Teokratiko nga Eskuelaan ti Panagministro kas pakaibatayan ti panagbasa ti pamilia iti Biblia iti sangakabbalayanna. Mangbasada iti maysa a paset daytoy iti tunggal aldaw kalpasan a mapagsasaritaanda ti inaldaw a teksto, a masansan iti bigat. Makiddaw ti panagsisinnublat dagiti ubbing a mangbasa iti sumagmamano iti naituding a benneg. Kalpasanna, maawisda nga agsaludsod maipapan kadagiti bersikulo a nabasa.

Nabasan ti maysa nga asawa nga agtagtagibalay idiay Japan ti intero a Biblia iti maminsan kada tawen nanipud pay idi 1985. Ti programana isut’ panagbasa iti 20 aginggat’ 30 a minuto iti tunggal aldaw a mangrugi iti alas 5:00 t.b. Maipapan kadagiti gunggona, kunana: “Napabileg ti pammatik. Tultulongannak a manglipat iti sakitko ket ipamaysak iti Paraiso a namnama.”

Maysa a sister a 30 a tawenen a payunir ngem saan a Saksi ti asawana ti binigat a bumangon iti alas singko tapno agbasa iti Biblia. Ti programana kalikagumannat’ panangbasa iti agarup uppat a panid manipud iti Hebreo a Kasuratan, maysa a kapitulo iti Kristiano a Griego a Kasuratan, ken maysa a bersikulo iti Proverbio. Tinawen a mabasana ti intero a Biblia sipud pay idi 1959. Kunana: “Kas resulta ti panagbasbasak, mariknak nga inayatnak ni Jehova . . . makagun-odak iti pammaregta, liwliwa, ken pannakapalinteg.” Innayonna: “Ti panangbasa iti Biblia ket kasla pappapigsaennak ni Jehova iti tunggal aldaw.”

Maysa a sister a nakaammo iti kinapudno iti maysa a pagilian a nakaiparitan ti trabaho dagiti Saksi ni Jehova, addaan met iti asawa a bumusbusor iti patpatienna. Mabalinna ti agbasa iti Biblia manipud Lunes agingga iti Biernes, iti nagbaetan ti alas 6:00 ken alas 7:00 t.b. Daytoy ti nangted kenkuana iti makin-uneg a bileg. Iti panangyanninawna no kasanot’ panangapektar kenkuana ti panagbasbasana, kunana: “Nasursuromi nga ayaten ni Jehova ken ni Jesus ken agbiag a siraragsak, uray addaan kadagiti parikut ken pakarigatan, nga ammok a saan a mapaay dagiti kari ni Jehova.”

Determinado ti maysa a sister a timmabuno iti Pioneer Service School nga agtignay a maitunos iti pammagbaga a naipaay sadiay a pagbalinenna ti panagbasa iti Biblia kas inaldaw nga aramid. Idi damo, naaramidanna dayta iti nagbaetan ti alas 5:00 ken alas 6:00 t.b. Idi nasinga dayta gapu iti panagbaliw ti trabahona, inyalisna iti nagbaetan ti alas 9:00 ken alas 10:00 t.r. Idi timmaud dagiti sabali pay a makakarit a kasasaad, kunana, “Intultuloyko nga ibagay ti eskediulko sigun kadagiti sirkumstansia.”

Malem:

Nakayugalianen ti dua nga agkabsat a babbai a kameng ti pamilia ti Bethel idiay Brazil ti panangbasada iti Biblia iti agarup 20 a minuto iti tunggal aldaw kalpasan ti pangngaldaw. Nabasadan ti intero a Biblia iti agarup 25 a daras; ngem insuratda: “Kanayon a makasarakkami iti baro a banag, isu a ti panagbasa iti Biblia ket saan a pulos a nagbalin a makauma.”

Nautob ti maysa balasang a kabsat idiay Japan a nupay napadakkel kas maysa a Saksi, saanna unay nga ammo dagiti Kasuratan; idi nagbalin a payunir, inkeddengna ti regular a panangbasana iti Biblia. Ar-aramidenna itan ti panagbasa maipaay iti Teokratiko nga Eskuelaan ti Panagministro bayat a mapan agpaagas iti ospital iti maminsan kada lawas. Kalpasanna, mangaramid iti kanayonan a panagsukimat idiay pagtaengan[da]. Iti ngudo ti lawas, palawaenna ti panagbasa iti Biblia, a pilienna dagiti libro sigun iti agsasaruno a pannakaisuratda.

Maysa a 13-tawenna a nakabasan iti intero a Biblia iti namitlo a daras, agbasbasa ita iti maysa a kapitulo iti tunggal aldaw no makaawiden manipud iti eskuelaan. Kunana a daytoy ti timmulong kenkuana “a makarikna iti ad-adda pay a panangipateg ken Jehova.”

Maysa a Saksi nga okupado unay kas maysa a trabahador, panglakayen, asawa, ken ama, ti agdengdengngeg kadagiti audiocassette ti Biblia kabayatan ti panagbiahena iti tren nga agturong iti trabahona. Kalpasanna, personal a basaenna ti isu met laeng a material idiay pagtaengan.

Mainayon pay iti personal a panagbasana, agdengngeg ti maysa a payunir idiay Francia kadagiti audiocassette ti Biblia no agisagsagana iti pannangan, no agmanmaneho, no agib-ibtur kadagiti narigat a tiempo, wenno paglinglingayan laeng.

Malaglagip ti maysa a 21-tawenna a payunir idiay Japan nga impapilit ni nanangna a mangbasa iti naespirituan a banag iti tunggal aldaw, ket inaldaw a basbasaenna ti Biblia sipud pay idi tallo ti tawenna, nupay saan a kanayon nga iti isu met laeng a tiempo. Kalpasan ti panangbasana iti paset a pinilina iti dayta nga aldaw, siguraduenna nga uliten a basaen dagiti pannulbek a bersikulo, ket kalpasanna, mangbusbos iti sumagmamano a minuto tapno repasuenna iti panunotna dagiti nabasana.

Sabali pay a Saksi, maysa a payunir, nabasanan ti intero a Biblia iti agarup naminsangapulo a daras kadagiti napalabas a 12 a tawen. Saan a manamati ni lakayna, isu nga inyeskediulna ti panagbasana iti malem.

Rabii:

Kadagiti napalabas a walo a tawen, naaramidan ti maysa a panglakayen ken regular pioneer idiay Japan a basaen ti Bibliana iti tunggal rabii sakbay a maturog. Kunana: “Ad-adda a magustuak dagiti kasuratan a mangipasimudaag no kasanot’ panagpampanunot ni Jehova, no kasanot’ panagriknana kadagiti bambanag, ken no kasanot’ panangtamingna kadagiti kasasaad. Babaen ti panangmennamenna kadagitoy a kasuratan, natulonganak a mangitunos iti panagpampanunotko iti panagpampanunot ni Jehova ken tumulong kadagiti Kristiano a kakabsatko a lallaki ken babbai ken kameng ti pamiliak.”

Agbasbasan iti Biblia ti maysa a panglakayen idiay Francia iti maysa nga oras kada rabii sipud pay idi 1979. Masansan nga ikabilna ti lima wenno innem a patarus iti sanguananna maipaay iti panangidilig. Kunana a ti naannad a panagbasana isut’ timmulong kenkuana a mangtarus “no kasanot’ mangyaplikar kadagiti pannakaammo iti Biblia iti inaldaw-aldaw a kasasaad.” Daytoy met ti namagbalin kenkuana nga ad-adda nga epektibo no mangipapaay iti balakad manipud kadagiti Kasuratan.

Iti napalabas a 28 a tawen, inyugalin ti maysa a kabsat idiay Nigeria a basaen iti rabii ti Nainkasuratan a teksto a naidatag iti Panangsukimat Kadagiti Kasuratan iti Inaldaw-aldaw a mapagsasaritaan iti sumaganad a bigat. Mainayon iti dayta, basaenna ti intero a kapitulo ti Biblia a nakaadawan ti teksto. Idi nagasawan, intultuloyna daytoy nga ugali, a basaen ken pagsaritaanda ti material a kaduana ni baketna.

Inyugali ti maysa nga agtutubo a saan a Saksi dagiti nagannakna ti agbasa iti lima agingga iti sangapulo a minuto kada rabii sakbay a maturog. Napateg kenkuana dagidiay a minuto, ket isut’ agkararag sakbay ken kalpasan ti panagbasa. Ti kalatna isut’ panangammo iti mensahe nga impaisurat ni Jehova iti tunggal mannurat iti Biblia.

Kuna ti maysa a naasawaan a kabsat nga agserserbi iti Bethel a kadagiti napalabas a walo a tawen, nabasanan ti Biblia iti maminsan iti makatawen. Agbasa iti 20 agingga iti 30 a minuto sakbay ti pannaturogna iti rabii. Uray napalalot’ bannogna, natakuatanna a no agidda a di agbasa, isut’ saan a makaturog. Masapul a bumangon ket tamingenna dayta a naespirituan a kasapulan.