Dagiti Saludsod Manipud Kadagiti Managbasa
Nangidumduma kadi ti Dios iti panangpili kadagiti lallaki iti immuna a bagi a manarawidwid nga addaan iti agpapada a pulí ken nasional a nalikudan—yantangay Judioda amin?
Saan, sigurado a saan. Judio amin dagidiay immuna nga inawagan ni Jesus kas ad-adalanna. Kalpasanna, idi Pentecostes 33 K.P., dagiti Judio ken Judio a proselita isudat’ immuna a napulotán iti nasantuan nga espiritu ket ngarud maikarida a makipagari ken Kristo idiay langit. Simmaganad laeng a nairaman dagiti Samaritano ken dagiti di nakugit a Gentil a nakomberte. Gapuna, nabatad a ti bagi a manarawidwid iti dayta a tiempo ket buklen dagiti Judio, dagiti “apostol ken lallakay idiay Jerusalem,” kas nadakamat iti Aramid 15:2. Dagitoy ket lallaki nga addaan iti naun-uneg a pannakaawat iti Nainkasuratan a pannakaammo ken adun a tawen ti kapadasanda iti pudno a panagdaydayaw, ken naaddaanda iti ad-adu a panawen nga agbalin a mataengan a Kristiano a papanglakayen.—Idiligyo ti Roma 3:1, 2.
Iti daydi tiempo ti panagtataripnong ti bagi a manarawidwid a naisalaysay iti Aramid kapitulo 15, adu a Gentil ti nagbalin a Kristiano. Nairaman ditoy dagiti taga Africa, taga-Europa, ken tattao manipud iti sabsabali pay a rehion. Kaskasdi, awan rekord a naitipon iti asinoman kadagita a Gentil iti bagi a manarawidwid a mamagbalin iti Kinakristiano a makaguyugoy kadagiti saan-a-Judio. Bayat a dagitoy kabbaro a nakomberte a Kristiano a Gentil ket makipadada iti kasasaad kas kameng iti “Israel ti Dios,” rinaemda la ketdi ti kinamataengan ken ti ad-adu a kapadasan dagiti Judio a Kristiano, kas kadagiti apostol, a paset idi ti bagi a manarawidwid. (Galacia 6:16) Kitaenyo iti Aramid 1:21, 22 no kasanot’ pannakabigbig unay idi ti kasta a kapadasan.—Hebreo 2:3; 2 Pedro 1:18; 1 Juan 1:1-3.
Iti adu a siglo, nakilangen ti Dios iti naisangsangayan a pamay-an iti nasion ti Israel, a nangpilian ni Jesus kadagiti apostolna. Saan a biddut wenno di kinahustisia ta awan idi kadagiti apostol ti naggapu kadagiti agdama ita a Sud America wenno Africa wenno ti Adayo a Daya. Inton agangay, dagiti lallaki ken babbai manipud kadagidiay a lugar ti maaddaanto iti gundaway a makagun-od kadagiti pribilehio nga adayo a natantan-ok ngem ti panagbalin a maysa nga apostol ditoy daga, ti panagbalin a kameng ti immuna-a-siglo a bagi a manarawidwid, wenno pannakagun-od iti aniaman a sabali pay a pannakadutok kadagiti tattao ti Dios itatta.—Galacia 3:27-29.
Natignay ti maysa nga apostol a mangikuna a ti “Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Wen, dagiti gunggona iti subbot ni Kristo ket magun-odan ti amin, nga awan panangidumduma. Ket dagiti indibidual a naggapu iti tunggal tribu ken pagsasao ken nasion mairamandanto iti nailangitan a Pagarian ken iti dakkel a bunggoy nga agbiagto nga agnanayon ditoy daga.
Adu a tattao ti nagbalin a sensitibo kadagiti pulí, pagsasao, wenno nasional a nalikudan. Naipakita daytoy iti mabasatayo iti Aramid 6:1 maipapan iti maysa nga isyu a nangpataud iti panagtanabutob dagiti Kristiano a Griego ti pagsasaoda kadagidiay Hebreo ti pagsasaoda. Mabalin a napadakkeltayo kadagiti agdama a kinasensitibo wenno timmuladtayon iti nalabes a kinasensitibo maipapan iti pagsasao, pulí, etniko a nalikudan, wenno sekso. Maigapu iti dayta pudno unay a posibilidad, nasayaat no ikagumaantay a pagreggetan a masukog dagiti rikrikna ken reaksiontayo maitunos iti panangmatmat ti Dios, nga amin a tattao ket agpapada iti imatangna, aniaman ti makinruar a langatayo. Idi impaisurat ti Dios dagiti kualipikasion agpaay kadagiti panglakayen ken ministerial nga ad-adipen, awan dinakamatna a pulí ken nasional a nalikudan. Saan, impamaysana kadagiti naespirituan a kualipikasion dagidiay mabalin a sisasagana nga agserbi. Pudno dayta kadagiti lokal a panglakayen, agdaldaliasat a manangaywan, ken agtartrabaho kadagiti sanga [nga opisina] itatta, no kasano a pudno dayta iti bagi a manarawidwid idi immuna a siglo.