Panangilaksid​—Maysa Aya a Naayat a Probision?

“SANTO, santo, santo ni Jehova a Dios, ti Mannakabalin-amin.” (Apocalipsis 4:8) Maitunos iti dayta a panangiladawan, ni Jehova ti Gubuayan dagiti nasantuan a pagalagadan. Nailanad dagitoy iti “nasantuan a sursurat,” ket obligado dagiti Kristiano a mangsurot kadagitoy a pagalagadan. Kinapudnona, kasapulan a liklikanda ti aniaman a banag a narugit iti imatang ni Jehova.​—2 Timoteo 3:15; Isaias 52:11.

Silalawag nga ibilin ti Biblia: “Maitunos iti Daydiay Santo a nangayab kadakayo, agbalinkayo met a nasantuan a mismo iti isuamin a kababalinyo, agsipud ta adda a naisurat: ‘Agbalinkayo a nasantuan, agsipud ta nasantuanak.’” (1 Pedro 1:15, 16) Manipud pay nabuangay ti kongregasion Kristiano, 19 a siglon ti napalabas, nakidangadang dagiti pudno a Kristiano tapno masalakniban dayta manipud iti naespirituan ken moral a kinarugit.​—Judas 3.

No Apay a Kasapulan ti Pannalaknib

Sangsanguen ti isuamin nga adipen ti Dios ti karit a panagtalinaed a nadalus iti moral ken naespirituan. Gapu iti daytoy, kasapulan a sarangten ti tallo a nabileg a kabusor​—ni Satanas, ti lubongna, ken dagiti dakes a nainlasagan a pagannayasantayo. (Roma 5:12; 2 Corinto 2:11; 1 Juan 5:19) Sulisogennakay ti lubong ni Satanas nga agbalin nga imoral, allukoyennakay a tumulad kadagiti aramidna, ken itukonna kadakayo ti material a kinabaknang, dayaw, saad, kinatan-ok, ken pannakabalin. Ngem dagidiay determinado a mangsurot iti pudno a panagdaydayaw pagkedkedanda dagiti itukon ni Satanas ken agtalinaed nga “awanan mulit manipud iti lubong.” Apay? Gapu ta kayatda ti agtalinaed iti sidong ti pannalaknib ken naayat a panangaywan ti nadalus nga organisasion ni Jehova.​—Santiago 1:27; 1 Juan 2:15-17.

Nangipaay ni Jehova iti tulong para iti siasinoman a kameng ti kongregasion Kristiano a matnag kadagiti pannulisog ni Satanas gapu kadagiti pagkapuyan ti tao. Nadutokan dagiti kualipikado iti naespirituan a papanglakayen a mangsalaknib iti kongregasion ken siaayat a tumulong kadagiti managbasol nga agbabawi iti basolda ket agaramid kadagiti kasapulan a panagbalbaliw tapno makasubli. Siasinoman a Kristiano nga agbasol rumbeng a siaanus a tulongan nga agbabawi ken mangbalbaliw kadagiti danana.​—Galacia 6:1, 2; Santiago 5:13-16.

No Kasano a Kinamanagayat ti Panangilaksid

Dagiti bautisado nga adipen ni Jehova a sipapakinakem nga agaramid iti kinadakes ken di agbalbaliw kasapulan a mamatmatan kas di managbabawi ket ngarud di maiparbeng ti Nakristianuan a pannakilangen. (Idiligyo ti 1 Juan 2:19.) Dagiti kasta nga indibidual di mapalubosan nga agtalinaed iti nadalus a kongregasion Kristiano ket iti kasta rugitanna dayta. Kasapulan a mailaksidda.

Ti kinaumiso ti panangilaksid kadagidiay agaramid iti kinadakes mayarig iti sumaganad a kasasaad: Gapu iti iyaadu dagiti panangraut ken panangranggas kadagiti estudiante, sinurot ti sumagmamano nga eskuelaan ti paglintegan a “mangikalikagum iti naan-anay a pannakasuspinde dagiti estudiante nga agaramat wenno agpangta a mangaramat kadagiti igam,” ipadamag ti The Globe and Mail, maysa a pagiwarnak idiay Toronto, Canada. Naaramid ti panangilaksid tapno masalakniban dagiti estudiante a mayat a magunggonaan iti edukasional a programa a di mairaman iti naranggas nga ar-aramid.

Apay a kinamanagayat ti panangilaksid iti di managbabawi a managbasol manipud iti kongregasion? Maysa nga ebkas ti panagayat ken Jehova ken kadagiti danana ti panangaramid iti kasta. (Salmo 97:10) Daytoy a panagtignay mangipakita iti ayat kadagidiay mangal-alagad iti kinalinteg agsipud ta ikkatenna iti nagtetengngaanda daydiay makaipaay iti dakes nga impluensia kadakuada. Salaknibanna met ti kinadalus ti kongregasion. (1 Corinto 5:1-13) No mapalubosan nga agtalinaed iti kongregasion ti nakaro nga imoralidad wenno kinarugit iti naespirituan, mamulitanto dayta ket saanton a maitutop a pangaramidan iti sagrado a panagserbi ken Jehova, a nasantuan. Maysa pay, ti pannakailaksid ti managbasol tumulong kenkuana a mangkita iti kinadagsen ti kinasukirna, agbabawi, ken mangaramid kadagiti kasapulan a panagbalbaliw ket iti kasta maawat manen iti uneg ti kongregasion.

Ti Epektona iti Sabsabali

No ti maysa a kameng ti kongregasion makaaramid iti nadagsen a basol, kas ti pannakikamalala, saanna a parparagsaken ti puso ni Jehova. (Proverbio 27:11) Siasinoman a Kristiano a maigamer iti seksual nga imoralidad awan duadua a di agpampanunot a kas ken Jose idi isut’ ginandat a sulisogen ti asawa ni Potifar tapno makidenna kenkuana. Kastoy ti kinuna ni Jose: “Kasano ngarud ti panangaramidko itoy naindaklan a kinadakes ken makabasolak iti Dios?” (Genesis 39:6-12) Rinaem ni Jose dagiti nasantuan a pagalagadan ni Jehova ket immadayo iti pakasulisogan. Iti sabali a bangir, ti mannakikamalala agparang nga awanan umdas a panagayat iti Dios tapno liklikanna ti panangpennek iti nainlasagan a derrepna.​—Galacia 5:19-21.

Ti maysa a bautisado a tao nga agsalsalungasing kadagiti bilin ti Dios ti saan a maseknan iti pannakadangran ken saem nga iyegna kadagiti manamati a kabagianna. Ti epektona iti emosion ket nakarkaro ngem iti maibturan ti dadduma. Idi maammuanna nga imoral ti anakna a lalaki, maysa a Kristiano a babai ti nagsennaay: “Kasla bassit unay, no adda man, dagiti kakabsat a makatarus no kasanot’ pannakapasakit ken pannakariribukmi. . . . Naldaangankam unay.” Mabalin a mapagduaduaan ti nasayaat a pakasarsaritaan ti intero a pamilia. Ti panagleddaang ken pannakarikna iti basol parigatenna dagiti matalek a kameng ti pamilia. No kasta, ti dakes a dana ti managbasol mangyeg ti saem iti pamilia.

Naayat a Tulong Agpaay Kadagiti Kameng ti Pamilia

Kasapulan a laglagipen dagiti matalek a Kristiano a kameng ti pamilia dagiti nailaksid nga indibidual a ti panangilaksid ket agpadpada a naayat ken mangsalaknib. Maaramid ti amin a panagregget tapno matulongan ti nagbasol. Ngem no isut’ mapaneknekan a nagsukir iti Dios ken sipapatangken a di agbabawi, kasapulan a masalakniban ti kongregasion ket inkapilitan nga agtignay kas imbilin ti Sao ti Dios: “Ikkatenyo ti nadangkes a tao manipud iti tengngayo.” (1 Corinto 5:13) Kas kinuna ti maysa a Saksi, “ti panangilaksid ramanenna ti kinasungdo ken Jehova.”

No nailaksid ti maysa a kameng ti pamilia, agsagaba iti saem dagiti kabagian a Kristiano. Ngarud, rumbeng nga aramiden dagiti nadutokan a panglakayen ti amin a kabaelanda a mangpabang-ar kadakuada iti naespirituan. (1 Tesalonica 5:14) Mabalin nga ikararagan ida dagiti panglakayen ken [agkararag a] kaduada ida. Masansan a mabalin ti sumarungkar kadagitoy a matalek a Kristiano tapno salaysayen dagiti makapabileg a Nainkasuratan a kapanunotan. Rumbeng nga usaren dagiti pastor iti arban ti tunggal gundaway tapno mapabileg iti naespirituan dagitoy nga ipatpateg sakbay ken kalpasan dagiti Nakristianuan a panaggigimong. Maipaay ti kanayonan a pammaregta babaen ti panangkuyog kadakuada iti ministerio iti tay-ak. (Roma 1:11, 12) Kasapulan nga ipakita dagiti naespirituan a pastor ti ayat ken atension a maiparbeng kadagitoy a matalek nga adipen ni Jehova.​—1 Tesalonica 2:7, 8.

Saan a ti dakes nga aramid ti maysa a tao ti panggapuan [dagidiay adda iti kongregasion] tapno didan ikabkabilangan ti siasinoman iti pamiliana nga agtalinaed a matalek ken Jehova. Linaksid ti Dios ti dakes nga ari ti Israel a ni Saul, ngem saan a pinalubosan ni David daytoy a mangtubeng iti personal a panangipategna iti anak ni Saul a ni Jonatan. Kinapudnona, timmibker ketdi ti singgalut da David ken Jonatan. (1 Samuel 15:22, 23; 18:1-3; 20:41) Gapuna, isuamin iti kongregasion rumbeng nga agbalinda a mannakitinnulong ken managayat kadagiti Kristiano a dagiti kabagianda ti nakabasol ken Jehova.

Anian a kinaawan panagayat no di ikankano wenno agbalin a nagubsang iti kakasta a matalek a tattao! Nangnangruna nga agkasapulan iti pammaregta dagiti nasungdo a kameng ti pamilia. Mabalin a mariknada iti panagmaymaysa ken masarakanda a narikut ti kasasaadda. Nalabit a mairanudyo kadakuada ti maysa a makaparagsak a puntos iti naespirituan wenno makapabileg a kapadasan babaen ti telepono. No ti nailaksid a tao ti sumungbat iti telepono, kunaenyo laeng a kayatyo a makasarita ti kabagianna a Kristiano. Mabalinyo nga awisen dagiti matalek a kameng ti kasta a sangakabbalayan iti maysa a sosial a taripnong wenno makipangan iti pagtaenganyo. No masabetyo ida kabayatan ti panaggatang, mabalin nga aramatenyo dayta a gundaway para iti sumagmamano a makapabileg a panaglalangen. Laglagipenyo, paset pay laeng ti nadalus nga organisasion ni Jehova dagiti nasungdo a Kristiano nga addaan kadagiti kabagian a nailaksid. Nakalaklakada nga agbalin a maiputputong ken maupay. Ngarud, agalibtakkayo a mangipakita iti kinaasi ken ayat kadakuada. Itultuloyyo ti agaramid iti naimbag ‘kadagidiay amin a nainaig kadakayo iti pammati.’​—Galacia 6:10.

Apresiarenyo ti Probision ni Jehova

Anian a panagyamantayo ta mangipakpakita ni Jehova a Dios iti naayat a pannakaseknan iti tunggal maysa iti sangalubongan a pamilia dagiti agdaydayaw kenkuana. Siaayat a nangipaay iti maysa nga urnos babaen ti organisasionna tapno tulongannatayo a magna iti sanguananna a sililinteg. Uray no sipapakinakem nga agbasbasol ti maysa a kameng ti pamilia ken kasapulan a mailaksid iti kongregasion, adda pamay-an a makapagsubli no isut’ sipupudno nga agbabawi. Nayilustrar daytoy iti sumaganad a pagarigan:

Pinadas dagiti panglakayen a tulongan ti maysa a tao nga awagantay iti Anna, ngem isut’ nagsigarilio, naginum, ken nagdroga. Isut’ di nagbabawi ken di nagtalinaed iti kongregasion. Nupay kasta, di nagbayag, mailiwen ni Anna iti naayat a panaglalangen iti nadalus a kongregasion ni Jehova ken nagkararag kenkuana maipaay iti tulong. Inaminna a dina unay naan-anay a naapresiar ti panangipateg dagiti panglakayen kadagidiay maiwawa. Rinugian manen ni Anna ti tumabuno kadagiti gimong, ket daytoy ti nangiturong iti panagbabawi. Kalpasan daydi, isut’ naawat manen iti uneg ti managayat ken mannalaknib a kongregasion. Itantandudo manen ni Anna ti nangato a pagalagadan ni Jehova iti moralidad. Isut’ agyamyaman iti ayat nga impakita dagiti panglakayen ken kunaenna pay: “Saanyo a mailadawan no kasano kadakkel ti naitulong kaniak dagiti Nakristianuan a publikasion. Di pagduaduaan nga ipaay ni Jehova dagiti kasapulantayo.”

Wen, nangipaay ni Jehova iti dana a pagsublian dagidiay nailaksid manipud iti kongregasion ngem agbabawi kamaudiananna. Nakitatayo nga uray ti panangilaksid a mismo ket maysa a naayat a probision. Ngem anian a nasaysayaat nga amang a liklikan daytoy nakalkaldaang a pagbanagan babaen ti kanayon a panangsurot kadagiti nalinteg a dana ti nasantuan a Diostayo! Kanayon koma nga agyamantayo iti pribilehio a mangidayaw ken Jehova kas maysa a paset ti nadalus, naayat, ken mannalaknib nga organisasionna!

[Ladawan iti panid 26]

Mangipakpakitakay kadi iti ayat kadagiti matalek a kabagian dagidiay nailaksid manipud iti kongregasion?