Dagiti Saksi ni Jehova iti Aglikmut ti Lubong—India
INDIA! Daytoy a nalawa a subkontinente ket pagnanaedan ti 1 iti kada 6 a tao iti daytoy a planeta. Iti pakadagupanna, nasurok a 1,000 a lengguahe ken pagsasao ti maar-aramat iti daytoy a daga a yan ti nagduduma a tattao ken pagsasao. Hindu ti kaaduan a tattao, 83 porsiento kadakuada, idinto ta ti 11 a porsiento ket Muslim, ken ti nabatbati ket buklen dagiti Sikh, Budhista, Jaino, ken dagiti makuna a Kristiano.
Tinagiragsak dagiti Saksi ni Jehova ti naisangsangayan a balligi idiay India kadagiti kallabes a tawen. Nasarakanda dagiti marakarnero a tattao a situtulok nga agtakder a sititibker iti dasig ti Pagarian ni Jehova, iti laksid ti amin a kita ti pakarigatan ken ibubusor.
Kas pagarigan, nagbalin a lugpi ti maysa a balasang iti pamilia ti Hindu nga orthodox gapu iti polio sipud pay idi ubing. Ti panagsagsagabana isut’ namagpanunot kenkuana maipapan iti Dios ken ti panggep ti biag. Sinukimatna ti adu a relihion maipaay iti sungbat ngem saan a nakasarak iti bang-ar. Kas banagna, napukawnat’ pammatina iti relihion, nupay saan iti Dios.
Iti daytoy a tiempo, naam-ammo ti dua a Saksi daytoy a balasang iti panagbalaybalayda iti ministerio. “Nakaluaak idi nangngegko ida a nangibasa iti Apocalipsis 21:4,” malaglagipna. Inawatna ti adu kadagiti publikasion ti Watch Tower Society ket immanamong iti panagadal iti Biblia iti pagtaengan iti laksid ti ibubusor ni nanangna. Adut’ nagbalbaliwan ti panagbiag ti balasang, a situtured a sinangona ti ibubusor dagiti kabagian, ket nagbalin a bautisado a Saksi. Kunana: “Adut’ naaramidak a panagrang-ay iti nakarigrigat a pamay-an. Ngem kanayonnak a tinulongan ni Jehova a Dios ken inikkannak iti dakkel a talna ken rag-o.”
Kinatibker Agpaay iti Nasin-aw a Panagdaydayaw Idiay Eskuelaan
Maysa nga agtutubo a sister ti binilin ti mannursurona a mapan iti simbaan ti Katoliko a kaduana dagiti kaklasena. Sidadayaw a nagkedked ti sister, a kunana nga isut’ maysa kadagiti Saksi ni Jehova ket saanna a pagdayawan ti asinoman wenno aniaman malaksid ken Jehova. No mapan amin a sabsabali iti simbaan, kinuna ti mannursuro nga isut’ rumbeng a mapan met. Ngem nagtalinaed a natibker ti sister ket kinunana a yantangay dagiti mapan idiay simbaan ket saanda a pagkararagan ni Jehova, ammona nga isut’ di rumbeng a tumabuno sadiay.
Gapu iti kinatibker ti balasitang, tinarigagayan ti mannursurona nga ammuen ti ad-adu pay maipapan iti pammatina. Isu nga iti sumuno nga aldaw, isut’ inikkan ti sister iti artikulo ti Pagwanawanan maipapan iti panagdaydayaw ken Jehova. Gapu ta nagustuanna ti nabasana, ti mannursuro saannan nga inraman ti sister iti isuamin a narelihiosuan nga aramid iti eskuelaan. Nakaipaima ti sister iti sangapulo a magasin kenkuana ken iti dadduma pay a mannursuro.
Nagunggonaan iti Panagtulnog iti Linteg ti Dios Maipapan iti Dara
Timpuar itay nabiit ti napartak nga agsaknap a kita ti viral fever iti dadduma a paset ti estado ti Kerala. Daytoy a sakit ket nakaro unay ti panangdadaelna kadagiti bekkel ken mangituggod iti panagkasapulan iti dialysis. Gagangay a maipakpakat ti panangyalison iti dara. Iti maysa a siudad, nayospital ti 14 a tao nga addaan iti kastoy a sakit. Saksi ti maysa kadagitoy a pasiente, panglakayen iti lokal a kongregasion. Naibaga kenkuana a ti panangyalison iti dara isut’ kakaisuna a magun-odan a panangagas. Inlawlawag ti panglakayen dagiti Nainkasuratan a pammatina ket sititibker a nagkedked iti dara. (Aramid 15:28, 29) Kalpasan ti adu nga argumento, kinuna dagiti doktor nga isut’ matay gapu iti panagkedkedna a mayalisonan iti dara.
Nayalisonan iti dara dagiti 13 a sabsabali a pasiente. Nakalkaldaang, natayda amin iti las-ud ti sumagmamano nga aldaw. Ti laeng kabsat ti kakaisuna a naispal! Nasdaaw unay dagiti autoridad ti ospital. Napalalo ti siddaaw ti medical staff iti regular nga isasarungkar dagiti kameng ti kongregasion. Kalpasan ti pannakaparuarna iti ospital, nagyaman ti kabsat kadagiti doktor, ngem kinunada: “Apay a dakami ti pagyamanam? Agyamanka iti Diosmo, ni Jehova. Isut’ nangisalakan kenka. Pangngaasim ta ikararagannakami met iti Diosmo, ni Jehova.”
[Kahon iti panid 24]
KASASAAD TI PAGILIAN
1994 Tawen Serbisio
KANGATUAN A BILANG TI MANGASKASABA: 14,271
RATIO: 1 a Saksi iti 65,266
TIMMABUNO ITI MEMORIAL: 38,192
PROMEDIO DAGITI AGIBUMBUNANNAG A PAYUNIR: 1,780
PROMEDIO DAGITI PANAGADAL ITI BIBLIA: 12,453
BILANG TI NABAUTISARAN: 1,312
BILANG DAGITI KONGREGASION: 410
SANGA NGA OPISINA: LONAVLA
[Ladawan iti panid 25]
Sanga nga opisina, Lonavla
[Ladawan iti panid 25]
Panangasaba mainaig iti “Agnanayon a Naimbag a Damag” a kombension idi 1963
[Ladawan iti panid 25]
Panangasaba iti maysa nga aglaklako iti ruar ti Red Fort idiay Delhi