Naikari ti Nasaysayaat a Biag

KAYATYO kadi ti maluk-atan kadagiti parikut a mangparigat iti biag? Kayatyo kadi ti agnaed iti maysa a lubong a ti biag ket kas iti kinaragsak ti buya a nailadawan iti makinsango ken makinlikud nga akkub daytoy a magasin? Mingminganyo a naimbag dayta a ladawan. Nawadwad ti taraon dagiti tattao. Talaga a tagtagiragsakenda dayta naimas a taraon. Naragsak ti tunggal maysa. Adda panagkakappia dagiti tattao a nagduduma ti pulída. Agkakappia uray dagiti animal! Awan ti aglalaban. Awan ti napanglaw. Awan ti masakit. Adda dagiti nakaay-ayat nga aglawlaw, nagpipintas a kaykayo, ken nasin-aw, nadalus a danum. Anian a nagngayed a buya!

Agbalinto kadi a kasta daytoy a daga? Wen, agbalinto a paraiso. (Lucas 23:43) Ti Dios, a namarsua iti daga, pinanggepna a tagiragsakento dagiti tattao ti nasaysayaat a biag iti paraiso a daga. Ket mabalin nga addakayto sadiay!

Ania a Biag ti Pilienyo?

Kasanontot’ pannakaiduma ti masanguanan a naindagaan a Paraiso iti lubong a pagbibiagantay ita? Iti agdama, nasurok a sangabilion a tattao ti agbisbisin iti inaldaw. Ngem iti Paraiso a pinanggep ti Dios para iti daga, addanto nawadwad a taraon ti tunggal maysa. Ikari ti Biblia: “Ni Jehova dagiti buybuyot agaramidto kadagiti amin nga inilin-ili iti maysa a rambak dagiti nalukmeg a banag, maysa a rambak dagiti ar-arak iti rabaw dagiti aributed.” (Isaias 25:6) Awanton kinakirang ti taraon, ta kuna ti Biblia: “Addanto kinaruay ti bukel iti daga iti tapaw dagiti bambantay.”​—Salmo 72:16.

Itatta, adu ti agnanaed kadagiti nakanumnumo a pagtaengan, wenno marigatanda a mangbayad iti abangda. Daddumat’ awan pagtaenganda ken matmaturog iti kalsada. Sigun iti World Health Organization, agarup 100 milion nga ubbing iti lubong ti awanan pagtaengan. Ngem iti Paraiso nga umayto, addaanto ti tunggal maysa iti balay a maikuna a kukuana. Kuna ti Sao ti Dios: “Bangonendanto dagiti balbalay ken agtaengdanto kadakuada; ket agmuladanto kadagiti kaubasan ket kanendanto ti bungada.”​—Isaias 65:21.

Adu dagiti agbambannog iti trabaho a dida kayat. Masansan nga agtrabahoda iti nakapapaut ken nakadagdagsen ngem nakabasbassit ti sueldoda. Agarup 1 iti kada 5 a tattao iti lubong ti agbibiag iti sueldo a nakurkurang ngem $500 iti kada tawen. Nupay kasta, iti um-umayen a Paraiso, tagiragsakento dagiti tattao ti trabahoda ket makitadanto dagiti nasayaat nga ibungana. Ikari ti Dios: “Dagiti pinilik agragsakdanto iti mabayag iti aramid dagiti im-imada. Isuda didanto agtrabaho iti ubbaw.”​—Isaias 65:22, 23.

Ita ti sakit ken an-annayen ket adda iti sadinoman. Adu dagiti bulsek. Tuleng dagiti dadduma. Di makapagna dagiti dadduma. Ngem iti Paraiso, maluk-atanton dagiti tattao manipud iti sakit ken an-annayen. Kuna ni Jehova: “Ti agtaeng dinanto kunaen: ‘Masakitak.’” (Isaias 33:24) Kadagidiay din makabael, ti makaparagsak a kari ket: “Iti kasta maluktanton dagiti mata ti bulsek, ken dagiti lapayag ti tuleng maluktandanto. Iti kasta aglagtonto ti pilay a kas maysa nga ugsa [a lalaki], ken ti dila ti umel agkantanto.”​—Isaias 35:5, 6.

Itatta, adda panagsagaba ken ut-ot, ladingit ken ipapatay. Ngem iti Paraiso ditoy daga, awanton amin dagitoy a banag. Wen, mapukawton uray pay ni patay! Kuna ti Biblia: “Ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 21:3, 4.

No kasta, nabatad a ti naindagaan a Paraiso nga inkari ni Jehova kaipapanannanto ti nasaysayaat a biag para iti sangatauan. Ngem kasanotay a masierto a dumtengto dayta? Kaanonto a dumteng, ken kasano? Aniat’ masapul nga aramidenyo tapno addakayto sadiay?