Saan a Naiddep ti Silawda

IDI panawen ti Biblia adda dagiti matalek a Saksi ni Jehova a nagpasar kadagiti tuben ken pakarigatan. Naipasangoda iti ibubusor ken kasla pannakapaay. Kaskasdi, saanda a simmuko gapu iti pannakaupay. Kinapudnona, saan a naiddep ti silawda.

Kas pagarigan, naipaayan ni mammadto Jeremias iti annongen nga agbalin a mammadto ti Dios iti apostata a nasion ti Juda. Inwaragawagna ti pakdaar maipapan iti um-umay idi a pannakadadael ti Jerusalem. (Jeremias 1:11-19) Kas resultana, namin-adu a naipasango ni Jeremias kadagiti kailianna, a nangibilang kenkuana kas manangipukkaw iti didigra.

Ni padi a Pasur, ti kangrunaan nga agturay iti balay ti Dios, kinabilna iti naminsan ni Jeremias gapu iti impadtona ken inkabilna iti tul-ong. Iti daytoy agparang a tuben, kinuna ni Jeremias: “Nagbalinak a maysa a pagkatawaan iti amin nga aldaw; tunggal maysa rabakennak. Ta no mamin-ano nga agsaoak, agikkisak. Iyikkisko ti kinaranggas ken pannakarbek. Ta ti sao ni Jehova naaramid a pangbabain kaniak ken maysa nga uyaw iti amin nga aldaw.” Naupay ti mammadto agingga iti punto a kinunana: “Saankonton a dakawaten ti maipapan kenkuana [ni Jehova], ken diakto met agsaon iti naganna.”​—Jeremias 20:1, 2, 7-9.

Nupay kasta, saan a timmulok ni Jeremias iti pannakaupay. Maipapan iti “sao ni Jehova,” kinunana: “Adda ngarud iti pusok ti kas sumsumged nga apuy a naripkan kadagiti tultulangko; ket mautoyanak nga agitured, ket saanak a makaibtur.” (Jeremias 20:8, 9) Gapu ta determinado a mangipakaammo iti sasao ti Dios, napabileg ni Jeremias babaen ti nasantuan nga espiritu ket tinungpalna ti annongenna.

Aduan met ni apostol Pablo kadagiti rason tapno maupay, no pinalubosanna dagitoy. Inibturanna dagiti natural a didigra, pannakarba iti barko, pannakaidadanes, ken pannakakabkabil. Mainayon pay, ti ‘dumaruros kenkuana iti inaldaw-aldaw isut’ pannakaringgor a maipaay iti isuamin a kongregasion.’ (2 Corinto 11:23-28) Wen, inaldaw a kasapulan ni Pablo a tamingen dagiti parikut, nga idandanaganna dagiti baro a kongregasion a tinulonganna nga ipasdek. Malaksid iti daytoy, isut’ imperpekto ken kasapulan a sarangtenna ti “siit iti lasag,” posible a ti nakapuy a panagkitana. (2 Corinto 12:7; Roma 7:15; Galacia 4:15) Nagsao pay ketdi ti dadduma maibusor ken Pablo no kasta a nakalikud, ken naammuanna daytoy.​—2 Corinto 10:10.

Nupay kasta, saan a pinalubosan ni Pablo ti pannakaupay a manglapunos kenkuana. Saan, isut’ saan a maysa a karkarna a tao. (2 Corinto 11:29, 30) Aniat’ namagtalinaed iti darang ti ‘apuy iti uneg[na]’? Umuna, addaan kadagiti manangsuporta a kakadua, a sumagmamano ti kimmadua pay ketdi kenkuana idiay Roma a sadiay nagnaed iti maysa a balay kas balud. (Aramid 28:14-16) Maikadua, minatmatan ti apostol ti kasasaadna iti natimbeng a pamay-an. Dagiti manangidadanes ken bumusbusor kenkuana ti mapabasol, saan a ni Pablo. Iti panagngudo ti biagna ditoy daga, inamirisna ti ministeriona iti positibo a pamay-an ket kinunana: “Manipuden itoy a tiempo sisasaganan maipaay kaniak ti korona ti kinalinteg, nga itdento kaniak ti Apo, ti nalinteg nga ukom, kas maysa a gunggona.”​—2 Timoteo 4:8.

Kangrunaan iti amin, naynay nga immadani ni Pablo ken Jehova a Dios babaen iti kararag, ket ‘ti Apo nagtakder iti sibayna ken impastrekna kenkuana ti pannakabalin.’ (2 Timoteo 4:17) “Ta kadagiti amin a bambanag,” kinuna ni Pablo, “addaanak iti bileg gapu iti daydiay mangted kaniak iti pannakabalin.” (Filipos 4:13) Ti pannakisarita iti Dios ken kadagiti pada a Kristiano, agraman ti positibo a panangmatmat iti ministeriona, timmulong ken Pablo nga agtultuloy iti panagserbi ken Jehova.

Pinaltiingan ti Dios ni Pablo a nagsurat: “Ditay koma sumuko iti panagaramid ti nasayaat, ta iti naikeddeng a panawen agapittayto no ditay mabannog.” (Galacia 6:7-9) Agapit iti ania? Biag nga agnanayon. Gapuna, tuladentay da Jeremias, Pablo, ken ti adu a dadduma pay a matalek a saksi ni Jehova a nadakamat iti Kasuratan. Wen, tuladentay ida, ket ditay tumulok iti pannakaupay. Diyo ipalubos a maiddep ti silawyo.​—Idiligyo ti Mateo 5:14-16.

[Dagiti Ladawan iti panid 25]

Saan nga impalubos da Pablo ken Jeremias a maiddep ti silawda