Liwliwa ken Pammaregta—Dagiti Saniata nga Adut’ Parupana
NAPASARANEN ti kaaduan kadatayo ti pannakarikna iti nakaro a kinapanglaw—saan a kinapanglaw iti pinansial no di ket iti espiritu. Napukaw ti namnamatayo, a nagleddaang pay unay. Kaskasdi, kadagita a tiempo, makagun-odtayo iti napateg a banag a makagunggona unay kadatayo. Dayta a “saniata” isu ti pammaregta.
Iti Biblia maymaysa laeng a Griego a sao ti naaramat para iti “pammaregta” ken “liwliwa.” Agpadpada nga iparipirip dagitoy a sao ti kababagas a panangipaay iti tured, bileg, wenno namnama. Nabatad ngarud a no agkakapuy wenno malmaldaangantayo, talaga a kasapulantayo ti liwliwa ken pammaregta. Sadino ti pakasarakan kadakuada?
Ipanamnama kadatayo ti Biblia a ni Jehova isu “ti Dios ti amin a liwliwa.” (2 Corinto 1:3) Ibagana met kadatayo nga “isu saan nga adayo manipud iti tunggal maysa kadatayo.” (Aramid 17:27) Gapuna magun-odan ti liwliwa ken pammaregta. Usigentay ti uppat a kangrunaan a paset a pangipaayan ni Jehova iti pammaregta.
Babaen ti Personal a Relasion iti Dios
Ti kadaklan a gubuayan ti liwliwa isu ti personal a relasion ken Jehova a Dios. Makaparegta a posible ti kasta a relasion. Iti kasunganina, asino koma nga agturay iti lubong ti umawat kadagiti awagtayo iti telepono wenno mangyebkas iti personal nga interes kadagiti parikuttayo? Nabilbileg nga adayo ni Jehova ngem kadagiti kasta a tao. Kaskasdi, isut’ napakumbaba—a situtulok unay a makilangen kadagiti nababa, imperpekto a tattao. (Salmo 18:35) Ni Jehova pay ketdi ti immuna a nangipakita iti ayat kadatayo. Kuna ti 1 Juan 4:10: “Ti ayat adda itoy a banag, saan a gapu ta inayattayo ti Dios, no di ket gapu ta isu inayatnatayo ket imbaonna ti Anakna a kas pangikappia a sakripisio maipaay kadagiti basoltayo.” Maysa pay, siaayat nga iyasidegnatayo ni Jehova iti Anakna.—Juan 6:44.
Nagtignay ken naliwliwakayo kadin iti pannakigayyem iti Dios? (Idiligyo ti Santiago 2:23.) Kas pagarigan, no addaankayo iti ipatpateg, nasinged a gayyem, saan kadi a naragsak ti mangbusbos iti panawen a dakdakayo laeng iti dayta a gayyem, a siwayawaya a pagsaritaan dagiti pakaringgoran ken pakaseknanyo, dagiti namnama ken rag-oyo? Kasta met ti iyaw-awis ni Jehova kadakayo. Saanna a limitaran ti pannakisaritayo kenkuana iti kararag—ken pudpudno a dumngeg. (Salmo 65:2; 1 Tesalonica 5:17) Nagkararag ni Jesus a regular ken sipapasnek. Kinapudnona, sakbay ti panangpilina kadagiti 12 nga apostolna, nagkararag a nagpatnag.—Lucas 6:12-16; Hebreo 5:7.
No dadduma, kabaelan ti tunggal maysa kadatayo ti agmaymaysa a kadua ni Jehova. Ti laengen siuulimek a panagtugaw iti maysa a tawa wenno natalinaay a pannagna makaipaayen iti nasayaat a gundaway nga agkararag a naimpusuan ken Jehova. Ti panangaramid iti dayta mangyeg iti dakkel a bang-ar ken liwliwa. No matmatantay ti sumagmamano nga aspeto ti parparsua ni Jehova kabayatan nga agmennamennatayo—uray laeng ti sangkabassit a paset ti tangatang, sumagmamano a kayo wenno tumatayab—makasaraktayo sadiay iti sumagmamano a makaliwliwa a palagip ti ayat ken pannakaseknan ni Jehova kadatayo.—Roma 1:20.
Babaen ti Personal a Panagadal iti Sao ti Dios
Nupay kasta, maipalgak kadatayo dagiti galad ni Jehova babaen ti personal a panagadal iti Biblia. Maulit-ulit nga ipalgak ti Biblia ni Jehova kas “Dios a manangngaasi ken managparabur, nainayad nga agpungtot ken aglaplapusanan iti naayat a kinamanangngaasi.” (Exodo 34:6; Nehemias 9:17; Salmo 86:15) Naikasigudan a paset ti personalidad ni Jehova ti tarigagay a mangliwliwa kadagiti adipenna ditoy daga.
Kas pagarigan, usigenyo ti sasao ni Jehova iti Isaias 66:13: “Kas iti maysa a liwliwaen ni inana, kastanto ti panangliwliwak kadakayo.” Dinisenio ni Jehova nga agbalin a managsakripisio ken nasungdo ti ayat ti ina kadagiti annakna. No nakakitakayon iti naayat nga ina a mangliwliwa iti nadangran nga anakna, ammoyon no aniat’ kayat a sawen ni Jehova no kunana a liwliwaenna ti ilina.
Adu a salaysay ti Biblia ti mangipakita iti kasta a panangliwliwa. Idi impangta ni nadangkes a Reyna Jezebel a papapatayna ni mammadto nga Elias, isut’ nagbuteng ken naglibas. Maladingitan unay ta nagkalkallautang iti let-ang iti maysa nga aldaw, a nabatad nga awan balonna a danum wenno masapsapulna. Gapu iti ladingitna, kinuna ni Elias ken Jehova a kayatnan ti matay. (1 Ar-ari 19:1-4) Aniat’ inaramid ni Jehova tapno maliwliwa ken maparegtana ti mammadtona?
Saan a binabalaw ni Jehova ni Elias gapu iti pannakariknana iti kinamaymaysa, kinaawan mamaayna, ken panagbuteng. Iti kasumbabangirna, nakangngeg ti mammadto iti “maysa a bassit a naalumamay a timek.” (1 Ar-ari 19:12) No basaenyo ti 1 Ar-ari kapitulo 19, makitayo no kasano a liniwliwa ni Jehova ni Elias, a pinakalmana, ken pinabilegna ti pammatina. Saan a pammarang daytoy a liwliwa. Sinalputna ti malmaldaangan a puso ni Elias, a pinaregtana ti mammadto nga agtultuloy. (Idiligyo ti Isaias 40:1, 2.) Di nagbayag, intuloyna ti trabahona.
Umasping iti dayta, liwliwaen ken paregtaen ni Jesu-Kristo dagiti nasungdo a pasurotna. Kinapudnona, impadto ni Isaias ti maipapan iti Mesias: “Ti Soberano nga Apo Jehova . . . imbaonnak a mamatapat iti puso a nadunor, . . . a mangliwliwa iti amin nga agdung-aw.” (Isaias 61:1-3) Iti intero a panagbiagna, sinigurado ni Jesus nga agaplikar kenkuana dagitoy a sasao. (Lucas 4:17-21) No mariknayo a kasapulanyo ti liwliwa, mennamennaenyo ti naalumamay, naayat a pannakilangen ni Jesus kadagiti tattao a nadangran ken agkasapulan. Kinapudnona, maysa a dakkel a gubuayan ti liwliwa ken pammaregta ti naannad a panagadal iti Biblia.
Babaen ti Kongregasion
Iti kongregasion Kristiano, rumimrimat dagiti saniata ti liwliwa ken pammaregta iti nagduduma a kitada. Napaltiingan ni apostol Pablo nga agsurat: “Itultuloyyo a liwliwaen ti maysa ken maysa ken pabilgen ti maysa ken maysa.” (1 Tesalonica 5:11) Kasano a masarakan ti liwliwa ken pammaregta kadagiti gimong ti kongregasion?
Umuna iti amin, siempre, tumabunotayo kadagiti Nakristianuan a gimong tapno ‘masursuruannatayo ni Jehova,’ a mangawat iti instruksion maipapan kenkuana ken kadagiti danana. (Juan 6:45) Nairanta a mangparegta ken mangliwliwa ti kasta nga instruksion. Mabasatayo iti Aramid 15:32: “Da Judas ken Silas . . . pinaregtada dagiti kakabsat babaen kadagiti adu a palawag ket pinabilegda ida.”
Napadasanyo kadin ti napan iti Nakristianuan a gimong iti panawen a malmaldaangankayo ket nagawidkayo nga addaan nasaysayaat a rikna? Nalabit adda nadakamat iti palawag, iti komento, wenno iti kararag a nangsagid iti pusoyo ken nangipaay iti kasapulan a liwliwa ken pammaregta. Gapuna dikay lumanglangan kadagiti Nakristianuan a gimong.—Hebreo 10:24, 25.
Kasta met laeng ti epekto ti pannakitimpuyog kadagiti kakabsattayo a lallaki ken babbai iti ministerio ken iti dadduma pay nga okasion. Iti Hebreo, ti sumagmamano a verbo a kayatna a sawen “pagkaykaysaen” tuktukoyenna met ti “pigsa” wenno “papigsaen”—ti nabatad a kapanunotan a napigpigsa ti bambanag no mapagkaykaysa. Pudno daytoy a prinsipio iti kongregasion. Maliwliwa, maparegta, wen, mapapigsatayo babaen ti panagtitimpuyog a sangsangkamaysa. Ket mapagkaykaysatayo babaen ti ayat, ti kabibilgan kadagiti singgalut.—Colosas 3:14.
No dadduma, ti kinamatalek dagiti naespirituan a kakabsattayo ti mangparegta kadatayo. (1 Tesalonica 3:7, 8) No dadduma, daytat’ ayat nga ipakpakitada. (Filemon 7) Ken no dadduma, daytat’ pannakipagtrabaho laeng a sangsangkamaysa, iti abagan-abaga, bayat nga isarsarita kadagiti sabsabali ti maipapan iti Pagarian ti Dios. No agkakapuy ken agkasapulankayo iti pammaregta maipapan iti ministerio, apay a dikay iyurnos ti makipagtrabaho a kadua ti maysa a nataengan wenno agibumbunannag nga aduan kapadasan? Nalabit a makasarakkayto iti dakkel a liwliwa iti panangaramid iti kasta.—Eclesiastes 4:9-12; Filipos 1:27.
Babaen “ti Matalek ken Masirib nga Adipen”
Asino ti mangyur-urnos iti makaliwliwa a parupa ti panagdaydayawtayo? Nangdutok ni Jesus iti maysa a klase a tinudinganna kas “ti matalek ken masirib nga adipen” a mangipaay iti naespirituan a ‘taraon iti umiso a tiempo.’ (Mateo 24:45) Idi umuna a siglo K.P., agtartrabahon daytoy a bagi dagiti pinulotan ti espiritu a Kristiano. Ti bagi a manarawidwid dagiti panglakayen idiay Jerusalem nagipatulodda kadagiti surat ti instruksion ken panangiwanwan kadagiti kongregasion. Aniat’ resultana? Inlanad ti Biblia no kasanot’ panagtignay dagiti kongregasion iti maysa kadagita a surat: “Kalpasan ti panangbasada, nagrag-oda gapu iti pammaregta.”—Aramid 15:23-31.
Umasping iti dayta, kadagitoy napeggad a maudi nga al-aldaw, mangipapaay ti matalek ken masirib nga adipen iti naespirituan a taraon a mangipaay iti dakkel a liwliwa ken pammaregta iti ili ni Jehova. Makiramramankayo kadi iti dayta a taraon? Magun-odan dayta kadagiti naimaldit a literatura nga ipapaay ti klase adipen iti intero a lubong. Dagiti magasin a Pagwanawanan ken Agriingkayo! kasta met kadagiti libro, broshur, ken tract nga ipabpablaak ti Watch Tower Society ti nangted iti liwliwa kadagiti adu a managbasa.
Insurat ti maysa nga agdaldaliasat a manangaywan: “Kayat ti kaaduan kadagiti kakabsattayo a lallaki ken babbai nga aramiden ti umiso, ngem masansan a makidangdangadangda a buyogen ti pannakapaay, buteng, ken ti pannakarikna nga awan gawayda a mangtulong iti bagbagida. Dagiti artikulo iti warnakantayo tultulonganna dagiti adu a mangpasubli iti kabaelanda a mangilinteg iti biag ken emosionda. Mangipaay met dagiti artikulo iti ad-adda pay ngem iti narabaw a pammaregta a maaramat dagiti panglakayen.”
Usarenyo a naan-anay dagiti literatura manipud iti klase matalek nga adipen. Dagiti naintiempuan a magasin, libro, ken dadduma pay a publikasion matulongandatayo a mangsarak iti liwliwa no narikut dagiti tiempo. Iti kasumbabangirna, no addakayo iti kasasaad a makaipaay iti pammaregta iti maysa a malmaldaangan, usarenyo dagiti Nainkasuratan nga impormasion kadagitoy a warnakan. Nakaan-annad ti pannakaisurat dagiti artikulo, masansan a kalpasan ti adu a lawas wenno bulan a naganetget a panagsukimat, panagadal, ken panagkararag. Naibatay iti Biblia, nasubok ken pudno ti balakad. Natakuatan ti dadduma a makatulong unay ti panangbasa iti maysa wenno dua a maitutop nga artikulo a kadua ti maysa a malmaldaangan. Mabalin nga agresulta daytoy iti dakkel a liwliwa ken pammaregta.
No makasarakkayo iti napateg a saniata, ilemmengyo kadi ida, wenno sipaparabur nga iburayyo ti sumagmamano a kinabaknang kadagiti sabsabali? Pagbalinenyo a kalat ti agbalin a gubuayan ti liwliwa ken pammaregta kadagiti kakabsatyo iti kongregasion. No mangparegtakayo imbes a mangupay, mangpadayaw imbes a mangbabalaw, agsao buyogen “ti dila dagiti nasursuruan” imbes a buyogen ti ‘nadarasudos a pangduyok ti kampilan,’ dakkel ti maaramidanyo iti biag dagiti sabsabali. (Isaias 50:4; Proverbio 12:18) Pudno, mabalin a matmatandakayo a mismo kas maysa a saniata—a gubuayan ti pudpudno a liwliwa ken pammaregta!
[Kahon iti panid 20]
Liwliwa Kadagidiay Agkasapulan
ADU ti nagkomento no kasano a pinauneg dagiti sumagmamano nga artikulo ti Pagwanawanan wenno Agriingkayo! ti personal a relasionda ken Jehova. Kinuna ti maysa: “Kalpasan ti panangbasak iti daytoy nga artikulo, nariknak a kaduak ni Jehova buyogen ti amin a kinabileg ken kinadayagna. Nariknak nga isut’ pudpudno a persona.” Kinuna ti sabali pay a surat: “Naisangsangayan unay ti pannakabalbaliw dagiti puso ken panunotmi iti panangmatmatmi ken Jehova a saankamin a kas iti dati. Kasla adda nangdalus kadagiti anteohosmi, ket ita nakalawlawagen a makitami ti amin.”
Dadduma ti nagsurat a mangibaga no kasano a timmulong kadakuada dagiti magasin a mangtaming kadagiti espesipiko a parikut wenno karit, a daytat’ mangipasigurado iti personal nga interes ni Jehova kadakuada. Kastoy ti kuna ti maysa a managbasa: “Pagyamanan unay iti panangipakitayo manen kadakami a kasta la unay ti panangipateg ken panagayat ni Jehova iti ilina.” Kastoy ti kinuna ti maysa a babai idiay Japan a natayán iti anak maipapan kadagiti artikulo ti Agriingkayo! iti dayta a tema: “Naibukbok ti kinauneg ti asi ti Dios manipud kadagiti pinanid, ket napalalo ti sangsangitko. Inkabilko dagitoy nga artikulo iti lugar nga alistok a mabasa ida apaman a mariknak ti ladingit ken panagleddaang.” Insurat ti sabali pay a maladladingitan a babai: “Dagiti artikulo ti Pagwanawanan ken Agriingkayo! ken ti broshur a “No Adda Matay nga Ay-ayatenyo” impaayannak iti pigsa a kasapulak tapno makapagibtur iti tiempo ti panagladingitko.”
Ti Nasantuan a Kasuratan ti kangrunaan a gubuayan ti liwliwa. (Roma 15:4) Sursuroten Ti Pagwanawanan ti Biblia kas autoridadna, ken kasta met ti kaduana a magasin, ti Agriingkayo! Gapu itoy, dagitoy a pagiwarnak ti napaneknekan a liwliwa ken pammaregta kadagiti managbasada.
[Ladawan iti panid 23]
Ti Dios ti isuamin a liwliwa isu met laeng ti Managdengngeg iti kararag