Dagiti Saludsod Manipud Kadagiti Managbasa

Kuna ti Efeso 3:14, 15 a ti Dios ti “nakautangan ti tunggal pamilia idiay langit ken iti daga ti naganna.” Adda kadi pampamilia idiay langit, ken agpayso aya nga innala ti tunggal pamilia ti tao ti naganna manipud ken Jehova?

Awan dagiti pamilia idiay langit a kas kadagiti adda ditoy daga, nga addaan iti ama, ina, ken annak​—nga agkakabagianda amin. (Lucas 24:39; 1 Corinto 15:50) Nalawag nga impakita ni Jesus a saan a mangasawa dagiti anghel, ket awan ti mangiparipirip a mangpataudda kadagiti annak.​—Mateo 22:30.

Nupay kasta, dakamaten ti Biblia iti piguratibo a pamay-an ni Jehova a Dios kas asawa ti nailangitan nga organisasionna; isut’ naasawaan iti naespirituan a kaipapanan. (Isaias 54:5) Mangpatpataud dayta a nailangitan nga organisasion kadagiti annak, kas kadagiti anghel. (Job 1:6; 2:1; 38:4-7) Gapuna, iti daytoy a kaipapanan, adda nakaskasdaaw a naespirituan a pamilia idiay langit.

Maysa pay, adda tumataud a baro a piguratibo a pamilia idiay langit, a buklen da Jesu-Kristo ken ti nobiana a kongregasion dagiti 144,000. (2 Corinto 11:2) Natayen ti kaaduan kadagitoy a napulotan, a mangnamnama iti nailangitan a biag. Sibibiag pay laeng ti dadduma ditoy daga. Aminda ti sigagagar a kumitkita iti masanguanan iti nailangitan a “panagkasar ti Kordero.” Innaig ti Biblia dayta a panagkasar iti tiempo ti umad-adanin a dakkel a rigat​—ti pannakadadael ti Babilonia a Dakkel, sa kalpasanna ti pannakaikkat ti nabatbati pay a sistema ni Satanas.​—Apocalipsis 18:2-5; 19:2, 7, 11-21; Mateo 24:21.

Maipanggep kadagiti naindagaan a pamilia, saan nga ipampamatmat ni apostol Pablo iti Efeso 3:15 a direkta nga alaen ti tunggal indibidual a grupo ti pamilia ti naganda manipud ken Jehova. Imbes ketdi, nabatad nga adda iti panunot ni Pablo ti agsasaruno a kaputotan ti pamilia a mangitaltalimeng iti maysa a nagan. Mangipaay ti Josue 7:16-19 iti maysa a pagarigan. Imbutaktak ni Jehova sadiay ti basol ni Acan. Umuna, naipamaysa wenno naiturong laeng ti basol iti tribu ni Juda. Sa kalpasanna ad-adda a naiturong iti pamilia dagiti Zerahita. Kamaudiananna, naibutaktak ti sangakabbalayan ni Acan. Namatmatan ni Acan agraman ti asawa ken dagiti annakna, wenno naikuna, kas paset ti sangakabbalayan (wenno, pamilia) ni Zabdi, ti apong a lakay ni Acan. Iti kasta, dayta a pamilia isu ti napadakkel a grupo a nangtaginayon iti nagan ti inapoda a ni Zera.

Kadagiti Hebreo, napateg dagiti kasta nga agsasaruno a kaputotan ti pamilia, nga adu ti nailista iti Biblia. Sinuportaran ti Dios ti pannakaitalimengda babaen ti panagaramid iti probision, no kasapulan, tapno mayallatiw ti nagan ti pamilia babaen ti Levirate, wenno pannakiasawa iti kayong.​—Genesis 38:8, 9; Deuteronomio 25:5, 6.

Kas sabali pay a pagarigan iti kasta a dakdakkel wenno napadakkel a pamilia, usigenyo ni Jesus kas ti anak ni David. Nabatad a saan nga isut’ anak a mismo ni Ari David, a nayanak sinigsiglon kalpasan ti pannakatay ni David. Kaskasdi, ti maysa a pakailasinan iti Mesias masapul nga aggapu iti pamilia ni David, kas pagaammo idi dagiti kaaduan a Judio. (Mateo 22:42) Naggapu ni Jesus iti kaputotan ni David agpadpada babaen ti ina ken ti pannakaamana.​—Mateo 1:1; Lucas 2:4.

Ngem kasano nga alaen ti kakasta a pamilia ti naganda manipud ken Jehova? Ti kinapudno ket, adda sumagmamano nga okasion​—kas iti kaso da Abraham ken Isaac​—idi literal a ninaganan ni Jehova ti ulo ti pamilia. (Genesis 17:5, 19) Saan a kankanayon a kasdiay. Kaaduanna, saan nga ikkan ni Jehova ti kada pamilia iti nagan a maipasa kadagiti annak.

Nupay kasta, ni Jehova ti namunganay iti natauan a pamilia idi binilinna da Adan ken Eva nga ‘agbungada ken agaduda ken punnuenda ti daga.’ (Genesis 1:28) Ken pinalubosan ni Jehova da imperpekto nga Adan ken Eva a mangpataud kadagiti annak, a nangibangon ngarud iti pundasion para iti amin a natauan a pamilia. (Genesis 5:3) Gapuna nga umisu la unay, mabalin a maawagan ti Dios kas ti Namunganay kadagiti nagan ti pamilia.

Saanen a marikna ti adu a kultura itatta ti kinapateg ti panangtaginayon iti nagan ti pamilia kadagiti kaputotan. Nupay kasta, iti amin a daga, agyaman dagiti Kristiano ken Jehova gapu iti urnos ti pamilia ken isut’ dayawenda babaen ti panangikagumaan a mamagballigi iti indibidual a pamiliada.