Kumitakay iti Labes Dagiti Banag a Makitayo!

MAYSA a bendision ti nasayaat a pisikal a panagkita. Kinapudnona, adu a tao ti agkuna a sumagmamano laeng kadagiti banag nga adda kadakuada ti napatpateg pay. Nupay kasta, para kadagiti Kristiano, adda maysa a kita ti panagkita a dinakamat ni apostol Pablo a napatpateg nga amang ngem iti nasayaat a pisikal a panagkita. “Pagtalinaedenmi ti matmatami, saan a kadagiti bambanag a makita, no di ket kadagiti bambanag a di makita,” insurat ni Pablo. (2 Corinto 4:18) Maysa la ketdi dayta a naisangsangayan unay a kita ti panagkita a mamagbalin iti maysa a makakita kadagiti banag a di makita! Maikunatay dayta a maysa a kita ti nagsayaat a naespirituan a panagkita.

Apay a Kasapulan Dayta?

Pudno a kasapulan dagiti Kristiano idi umuna a siglo ti kastoy a kita ti naespirituan a panagkita. Ibakbaklayda ti Nakristianuan a ministerioda iti sidong ti nakaro a rigat. Kastoy ti panangyebkas ni Pablo: “Marikutankami iti tunggal pamay-an, ngem saan a mailetan a di makagunay; mariribukankami, ngem saan a naan-anay nga awanan ruaran; maidadaneskami, ngem saan a nabaybay-an iti rigat; maituangkami, ngem saan a nadadael.”​—2 Corinto 4:8, 9.

Iti laksid dagiti kasta a kasasaad, nagtalinaed a natibker dagiti matalek nga adalan. Buyogen ti natibker a pammati iti Dios, maikunada ti kas ti naikuna ni Pablo: “Saankami a sumuko, ngem uray pay no ti kinataomi iti ruar ket kumapkapuy, pudno a ti kinataomi iti uneg ket mapabpabaro iti inaldaw-aldaw.” Ngem ania ti namagbalin iti kastoy a pannakapabaro iti inaldaw? Nagtultuloy ni Pablo iti panangikunana: “Ta nupay ti rigat ket apagkanito ken nalag-an, pataudenna kadakami ti maysa a dayag a naringringbaw pay ti dagsenna ken agnanayon; bayat a pagtalinaedenmi ti matmatami, saan a kadagiti bambanag a makita, no di ket kadagiti bambanag a di makita. Ta dagiti bambanag a makita temporarioda, ngem dagiti bambanag a di makita agnanayonda.”​—2 Corinto 4:16-18.

Parparegtaen ni Pablo dagiti naespirituan a kakabsatna a dida palubosan dagiti parikut, rigat, panangidadanes​—aniaman a kita ti rigat​—a mangpalidem iti panagkitada iti nadayag a gunggona nga adda iti sanguananda. Rumbeng a kumitada iti labes dagiti agdama a kasasaadda, nga ipamaysada dagiti matada iti naragsak a pagbanagan ti Nakristianuan a dana. Daytat’ nakatulong kadakuada a mangpabaro manen iti inaldaw dagiti pangngeddengda nga agtultuloy iti pannakidangadang. Kasapulan met dagiti Kristiano itatta ti umasping a nasayaat a naespirituan a panagkita.

Matmatanyo kas Temporario Laeng Dagiti Agdama a Rigat!

Kayattay man wenno saan, inaldaw a makitatayo dagiti banag a ditay koma kayat a kitaen. Ti itataldiap iti sarming ti mangipakita kadagiti di matarigagayan a depekto ken pakapilawan iti pisikal a bagi, a mangipasimudaag iti pisikal a kinaimperpekto. No kumitatayo iti sarming ti Sao ti Dios, makitatay dagiti naespirituan a depekto ken pakapilawan, agpada iti bagitayo ken iti dadduma. (Santiago 1:22-25) Ket no kitaentay ti inaldaw a warnakan wenno ti pabuya iti telebision, maldaangtay iti kinaawan-hustisia, kinaranggas, ken trahedia a makitatayo.

Kayat ni Satanas a maupaytayo gapu kadagiti banag a makitatayo wenno maisiasitayo ket mangrugi nga agkapuy iti pammati. Kasanotay a maliklikan ti pannakapasamak daytoy? Kasapulan a surotentayo ti ulidan nga impasdek ni Jesu-Kristo, a kas inrekomenda ni apostol Pedro idi kinunana: “Iti kinapudnona, naayabankayo iti daytoy a kurso, agsipud ta uray ni Kristo nagsagaba a maipaay kadakayo, a nangibati kadakayo iti maysa a pagwadan tapno surotenyo a sisisinged dagiti addangna.” (1 Pedro 2:21) Iti tunggal aspeto ti Nakristianuan a panagbiag, ni Jesus ti naan-anay nga ulidan.

Iti panangtukoyna ken Jesus kas ulidantayo, partikular a dinakamat ni Pedro a nagsagaba ni Jesus. Pudno, nagsagaba unay ni Jesus idi adda ditoy daga. Kas “mamangulo nga agobra” a presente idi pinarsua ni Jehova ti sangatauan, pagaammona unay no ania ti panggep ti Dios para kadagiti tao. (Proverbio 8:30, 31) Ngem ita direkta a nakitana ti inyeg kadakuada ti basol ken kinaimperpekto. Inaldaw a nakitana ket masapul a sanguenna dagiti kinaimperpekto ken pagkapuyan dagiti tao. Awan duadua a narigat dayta para kenkuana.​—Mateo 9:36; Marcos 6:34.

Malaksid iti rigat ti dadduma, nagpasar met ni Jesus iti bukodna a rigat. (Hebreo 5:7, 8) Ngem buyogen ti naan-anay a naespirituan a panagkita, kimmita iti labes dagitoy tapno makitana ti gunggona a pannakaitan-ok iti imortal a biag gapu iti kinatarnawna. Kalpasanna kas Mesianiko nga Ari, maaddaanto iti pribilehio a mangaon iti agrigrigat a sangatauan manipud iti narigat a kasasaadna nga agturong iti kinaperpekto nga immuna a pinanggep ni Jehova. Ti panangipamaysana iti panagkitana kadagitoy di makita a namnama iti masanguanan timmulong kenkuana a mangtaginayon ti rag-o iti nadiosan a panagserbi iti laksid dagiti rigat a nakitana iti inaldaw. Insurat ni Pablo kamaudiananna: “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.”​—Hebreo 12:2.

Pulos a saan a pinalubosan ni Jesus dagiti rigat ken makatuok a kasasaad a mangpakapuy iti pakinakemna, mangisiasi kenkuana, wenno mangdadael iti pammatina. Kas ad-adalanna, masapul a sisisinged a tuladentayo ti nagsayaat nga ulidanna.​—Mateo 16:24.

Ipamaysa ti Panagkita iti Di Makita nga Agnanayon a Bambanag!

Iti panangdakamatna no aniat’ nakatulong ken Jesus tapno makapagibtur, tinukoy met ni Pablo ti dana para kadatayo idi insuratna: “Tarayentayo koma ti lumba a naikabil iti sanguanantayo, bayat a kumitatayo a sipapasnek iti Kangrunaan nga Ahente ken Manangan-anay iti pammatitayo, ni Jesus. (Hebreo 12:1, 2) Wen, tapno mataraytayo ti Nakristianuan a dana a sibaballigi ken sirarag-o, masapul a kumitatayo iti labes dagiti banag nga adda iti sanguanantayo. Ngem kasanotay a ‘kumita a sipapasnek’ ken Jesus, ken aniat’ maaramidan dayta para kadatayo?

Kas maysa a pagarigan, idi 1914, naisaad ni Jesus kas Ari iti Pagarian ti Dios, ket agturturayen manipud langit. Siempre, di makita amin dagitoy dagiti pisikal a matatayo. Nupay kasta, no ‘kumitatay a sipapasnek’ ken Jesus, tulongannatay ti naespirituan a panagkitatayo a makakita a nakasaganan nga agtignay tapno pagpatinggaenna ti agdama a dakes a sistema ti bambanag ken ti pannakaipupok ni Satanas ken dagiti demoniona nga awan aniaman a maaramidanda. Mainayon pay, ipalgak ti naespirituan a panagkitatayo ti nakaskasdaaw a baro a lubong a sadiay “awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 19:11-16; 20:1-3; 21:4.

Gapuna, imbes a madagsenan kadagiti temporario a rigat a maipasango kadatayo iti inaldaw, apay a ditay ipamaysa ti panagkitatayo kadagiti banag nga agnanayon? Buyogen dagiti mata ti pammati, apay a ditay kumita iti labes ti sakit ken kinaagum daytoy narugit a daga tapno makitatayo ti paraiso a napno kadagiti nasalun-at, naragsak, ken manangipateg a tattao? Apay a di kumita iti labes dagiti pakapilawantayo, agpada iti pisikal ken naespirituan, ket makita a nawayawayaanen iti agnanayon ti bagitayo babaen ti pateg ti daton a subbot ni Kristo? Apay a di kumita iti labes dagiti bangkay nga imbati ti gubat, krimen, ken kinaranggas ket makita dagiti kabbaro a mapagungar a maisursuro iti kinatalna ken kinalinteg ni Jehova?

Malaksid iti daytoy, karaman met iti ‘panangkita a sipapasnek’ ken Jesus ti panangipamaysa iti naespirituan a panagkitatayo iti naaramidanen ti Pagarian, nupay saan a makita, iti ili ti Dios ditoy daga: panagkaykaysa, talna, ayat, nainkabsatan a panagayat, ken naespirituan a kinarang-ay. Insurat ti maysa a Kristiano a babai idiay Germany, kalpasan a nabuyana ti video a United by Divine Teaching: “Tulongannak nga ad-adda ti video a mangpampanunot a nakaad-adu ti Kristiano a kakabsat iti intero a lubong a sisusungdo nga agserserbi ken Jehova iti daytoy a kanito mismo​—nga ar-aramidenda daytoy iti laksid ti ibubusor ti publiko. Anian a nagpateg ti panagkaykaysatayo kas agkakabsat iti maysa a lubong ti kinaranggas ken guranggura!”

“Makitayo” met kadi ni Jehova, ni Jesus, dagiti matalek nga anghel, ken ti riniwriw a pada a Kristiano nga agtaktakder iti dasigyo? No kasta, dikay unay madanagan kadagiti “pakaringgoran daytoy a sistema ti bambanag” a mangupay ken mamagbalin kadakayo a “di nabunga” iti Nakristianuan a panagserbi. (Mateo 13:22) Gapuna ‘kumitakayo a sipapasnek’ ken Jesus babaen ti panangipamaysa iti naespirituan a matayo iti naipasdeken a Pagarian ti Dios ken kadagiti bendisionna, agpada ita ken iti masanguanan.

Ikagumaanyo ti Agbiag Tapno Makitayo Itan ti Di-Makita!

Yantangay makitatayo ti dakkel a paggidiatan ti agnanayon a baro a lubong ti Dios ken ti marmarba a daan lubong ita, rumbeng nga agtignaytayo iti pamay-an a maibilangtay kadagiti maikari nga agbiag tapno literal a makita dagiti banag a makitatay laeng ita babaen kadagiti mata ti pammati. Dagiti umariwekwek a mapagungar ti gistay dinto mamati inton mariingda a makakita iti nalinteg a paraiso a daga a naidumduma iti lubong a nakitada sakbay a natayda. Panunotenyo laengen ti ragsaktayo ta sibibiagtayo a mangabrasa kadakuada ken mangilawlawag kadakuada no ania ti inaramid ti Dios!​—Idiligyo ti Joel 2:21-27.

Wen, nagpateg ketdin ti nasayaat a naespirituan a panagkita, ken anian a nagpateg a pagtalinaedentayo dayta a nasarút! Maaramidtay daytoy babaen ti regular a personal a panagadal iti Biblia, itatabuno kadagiti Nakristianuan a gimong, pannakisarita kadagiti sabsabali maipapan iti naibatay-Biblia a namnamatayo, ken kangrunaan iti amin, panagkararag maipaay iti panangiwanwan ti Dios. Daytoy saluadanna a nasarút ken nalawag ti naespirituan a panagkitatayo, a tumulong kadatayo a kumita iti labes dagiti banag a makitatayo!