Kasapulantay—Dagiti Pudno a Gagayyem
NABIAG ti panagsarsarita da Jenny ken Sue. Rumimat dagiti isem, agraniag dagiti mata—tunggal tignayda mangipalgak iti napasnek nga interes iti sawen ti tunggal maysa. Nupay nagduma ti nalikudanda, nalawag nga adu ti pagtunosanda ken dakkel ti panagraemda iti maysa ken maysa.
Iti sabali met a dasig, agbimbinnulig nga agtartrabaho da Eric ken Dennis iti proyekto, maysa laeng kadagiti adu a naaramidanda iti las-ud dagiti tawen. Kalmadoda, ken masansan ti panagkinkinnatawada. No agturong ti saritaanda kadagiti serioso a banag, sipaprangka nga agsinnukátda kadagiti kapanunotan. Raemenda ti maysa ken maysa. Kas kada Jenny ken Sue, napudno nga aggayyem da Eric ken Dennis.
Pabilgenna ti pusoyo dagitoy a panangiladawan, a mapanunotyo ket ngarud ti gagayyemyo. Iti sabali a bangir, mabalin nga il-iliwenyo ti kakasta a panaggagayyem. Magun-odyo met ti kasta!
No Apay a Masapultayo Dagiti Pudno a Gagayyem
Napateg iti mental ken pisikal a salun-attayo ti nasasayaat a panaggagayyem. Nupay kasta, no malmaldaytayo, dina kaipapanan nga adda diperensiatayo. Kuna ti dadduma a managsirarak a maysa a panagbisin ti kinaliday, maysa a nainkasigudan a pagilasinan a kasapulantay ti kakadua. Agpayso, no kasano a pedpeden wenno ikkaten ti taraon ti panagbisin, ti umiso a kita ti panaggagayyem mabalinna a kissayan ti kinaliday wenno pukawenna pay ketdi dayta. Maysa pay, saan nga imposible ti maaddaan kadagiti nasasayaat a gagayyem a mangipateg kadatayo.
Naparsua dagiti tao nga addaan tarigagay maipaay iti pannakikadua. (Genesis 2:18) Kuna ti Biblia a ti pudno a gayyem, wenno kadua, “nayanak no adda rigat.” (Proverbio 17:17) Gapuna, dagiti napudno nga aggagayyem makapagtitinnulongda no kasapulan dayta. Ngem ad-adda pay ti kaipapanan ti pannakigayyem ngem iti basta kaadda laeng ti mabalin a pagpatulongan wenno kadua iti trabaho wenno panagliwliwa. Dagiti nasayaat a gagayyem patanorenda dagiti kasasayaatan a kababalin ti maysa ken maysa. Kuna ti Proverbio 27:17: “Ti landok patademenna ti landok. Kasta met ti tao patademenna ti langa ti gayyemna.” No kasano a ti maysa a landok mabalin nga usaren a pangpatadem iti tadem a naaramid iti kasta met laeng a landok, mabalin nga agballigi ti maysa a gayyem iti panangpatadem iti mental ken espiritual a kasasaad ti sabali. No malmaldaytayo gapu kadagiti pannakapaay, makapabang-ar unay ti mannakipagrikna nga atension ken Nainkasuratan a pammaregta ti maysa a gayyem.
Iti Biblia, mainaig ti pannakigayyem iti ayat, kinasinged, panagtalek, ken panagkadua. Mairaman iti panaggagayyem dagiti kaarruba, katrabahuan, ken dadduma pay. Ibilang met ti dadduma dagiti kabagianda kas kaasitgan a gagayyemda. Nupay kasta, para iti adu ita, narigat a sapulen ken taginayonen dagiti napudno a gagayyem. Apay a kastoy? Matagiragsakyo kadi ti napudno ken manayon a panaggagayyem?