Inaramidda ti Pagayatan ni Jehova
Panangipangag iti Pammakada a Sasao ni Jesus
ITI rabii ti Nisan 14, 33 K.P., nagsadag ni Jesu-Kristo ken dagiti 11 a matalek nga apostolna iti maysa a lamisaan iti akinngato a siled idiay Jerusalem. Gapu ta ammona nga asidegen ti ipapatayna, kinunana kadakuada: “Addaak a kaduayo iti apagbiit laengen.” (Juan 13:33) Kinapudnona, mapmapan idin ni Judas Iscariote tapno makikumplot kadagiti dakes a tattao nga agtarigagay a mangpapatay ken Jesus.
Awan asinoman iti dayta nga akinngato a siled ti nakatarus iti kinaganat ti kasasaad a kas iti pannakatarus ni Jesus. Ammona unay a dandanin agsagaba. Ammo met ni Jesus nga isut’ baybay-anto dagiti apostolna iti dayta met laeng a rabii. (Mateo 26:31; Zacarias 13:7) Yantangay daytoy idin ti maudi a gundaway a pannakisarita ni Jesus kadagiti apostolna sakbay ti ipapatayna, makasiguradotayo a naipamaysa dagiti pammakada a sasaona kadagiti banag a kapapatgan.
“Itultuloyyo nga Aramiden Daytoy kas Panglaglagip Kaniak”
Kaduana dagiti matalek nga apostolna, nangipasdek ni Jesus iti baro a rambak a mangsukát iti Paskua a Judio. Inawagan daytoy ni apostol Pablo kas “ti pangrabii ti Apo.” (1 Corinto 11:20) Idi alaenna ti di nalebaduraan a tinapay, nagkararag ni Jesus. Kalpasanna pinisina ti tinapay ket intedna kadagiti apostolna. “Alaenyo, kanenyo. Daytoy kaipapananna ti bagik,” kinunana. Kalpasanna innalana ti maysa a kopa ti arak, nagkararag iti panagyaman sana inted kadagiti apostol, a kunkunana: “Uminumkayo manipud iti dayta, dakayo amin; ta daytoy kaipapananna ti ‘darak iti tulag,’ a maiparukpok maigapu iti adu a maipaay iti pannakapakawan dagiti basol.”—Mateo 26:26-28.
Aniat’ kaipapanan daytoy a pasamak? Kas impakita ni Jesus, ti tinapay inladawanna ti awan basolna a bagina. (Hebreo 7:26; 1 Pedro 2:22, 24) Ti arak insimbolona ti naiparukpok a dara ni Jesus, a mamagbalin a posible iti pannakapakawan dagiti basol. Ti daton a darana pasingkedanna met ti baro a tulag iti nagbaetan da Jehova a Dios ken ti 144,000 a tattao, a makipagturayto kamaudiananna ken Jesus idiay langit. (Hebreo 9:14; 12:22-24; Apocalipsis 14:1) Babaen ti panangawisna kadagiti apostolna a makiraman iti daytoy a pannangan, impakita ni Jesus a makiramandanto kenkuana iti nailangitan a Pagarian.
Maipanggep iti daytoy nakallalagip a pannangan, imbilin ni Jesus: “Itultuloyyo nga aramiden daytoy kas panglaglagip kaniak.” (Lucas 22:19) Wen, ti Pangrabii ti Apo agbalin a maysa a tinawen a pasamak, a kas iti Paskua idi. Nupay ipalagip ti Paskua ti pannakaluk-at dagiti Israelita manipud iti pannakaadipen idiay Egipto, ti Pangrabii ti Apo ipamaysana iti ad-adda pay a dakdakkel a pannakaluk-at—daytat’ pannakasubbot ti sangatauan manipud iti pannakaadipen iti basol ken ipapatay. (1 Corinto 5:7; Efeso 1:7) Maysa pay, dagidiay makiramraman iti emblema a tinapay ken arak ti mapalagipan kadagiti masanguanan a pribilehioda kas ar-ari ken papadi iti nailangitan a Pagarian ti Dios.—Apocalipsis 20:6.
Pudno a ti ipapatay ni Jesu-Kristo ti kapatgan a pasamak iti pakasaritaan ti tao. Dagidiay mangapresiar iti inaramid ni Jesus agtulnogda iti bilinna maipanggep iti Pangrabii ti Apo: “Itultuloyyo nga aramiden daytoy kas panglaglagip kaniak.” Tinawen a laglagipen dagiti Saksi ni Jehova ti ipapatay ni Jesus iti petsa a katupag ti Nisan 14. Iti 1996, agtinnag daytoy a petsa iti Abril 2, kalpasan ti ilelennek ti init. Sibabara a maawiskayo a tumabuno iti Kingdom Hall iti lugaryo.
‘Itedko Kadakayo ti Maysa a Baro a Bilin’
Malaksid iti panangirugina iti Pangrabii ti Apo, adda sumagmamano a pammakada a balakad ni Jesus kadagiti apostolna. Iti laksid ti nasayaat a pannakasanayda, adu pay ti masapul nga adalen dagitoy a lallaki. Saanda a naan-anay a natarusan ti panggep ti Dios para ken Jesus, para kadakuada, wenno iti masanguanan. Ngem saan nga inkagumaan ni Jesus nga ibatad amin dagitoy a banag iti daytoy a tiempo. (Juan 14:26; 16:12, 13) Imbes ketdi, dinakamatna ti maipapan iti maysa a banag a nakapatpateg. “Mangtedak kadakayo iti maysa a baro a bilin,” kinunana, “nga ayatenyo ti maysa ken maysa; kas ti panagayatko kadakayo, kasta met nga ayatenyo ti maysa ken maysa.” Kalpasanna, innayon ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”—Juan 13:34, 35.
Iti ania a pamay-an a “maysa a baro a bilin” daytoy? Bueno, imbilin ti Linteg Mosaico: “Ayatemto ti padam a tao a kas ita bagim.” (Levitico 19:18) Nupay kasta, kinuna ni Jesus kadagiti pasurotna nga ipakitada ti managsakripisio nga ayat agingga iti punto nga ipaay ti maysa ti biagna maigapu kadagiti padana a Kristiano. Siempre, ti ‘linteg ti ayat’ agaplikar met kadagiti saan unay a napeggad a kasasaad. Iti amin a kasasaad, ti maysa a pasurot ni Jesu-Kristo ti mangyun-una a mangipakita iti ayat babaen ti panangtulong kadagiti sabsabali iti naespirituan ken iti dadduma pay a banag.—Galacia 6:10.
Iti daytoy maudi a rabii a panagbiag ni Jesus ditoy daga, ti ayat ti nangtignay ken Jesus nga agkararag ken Jehova a Dios maigapu kadagiti adalanna. Iti pasetna, inkararagna: “Isuda addada iti lubong ket um-umayakon kenka. Nasantuan nga Ama, aywanam ida maigapu iti bukodmo a nagan nga intedmo kaniak, tapno maymaysada koma a kas kadata.” (Juan 17:11) Nakadidillaw nga iti daytoy a kiddawna iti Amana, inkararag ni Jesus ti naayat a panagkaykaysa dagiti pasurotna. (Juan 17:20-23) Kasapulan nga ‘ayatenda ti maysa ken maysa kas ti panagayat ni Jesus kadakuada.’—Juan 15:12.
Impangag dagiti matalek nga apostol dagiti pammakada a sasao ni Jesus. Agtulnogtayo met koma kadagiti bilinna. Kadagitoy napeggad a “maudi nga al-aldaw,” napatpateg itan ti ayat ken panagkaykaysa kadagiti pudno a managdaydayaw. (2 Timoteo 3:1) Kinapudnona, agtulnog dagiti pudno a Kristiano kadagiti bilin ni Jesus ken ipakitada ti nainkabsatan nga ayat. Karaman daytoy ti panagtulnog iti bilinna a panangrambak iti Pangrabii ti Apo.