Malagipyo Pay Aya?
Natakuatanyo kadi dagiti kallabes a ruar Ti Pagwanawanan nga addaan iti praktikal a pateg kadakayo? No kasta, apay a diyo suboken ti memoriayo babaen kadagiti sumaganad a saludsod:
◻ Ania a leksion ti maadaltayo manipud iti pannakadadael dagiti Ammonita? (Sofonias 2:9, 10)
Saan a tagtagilag-anen ni Jehova no ibubusor ti maisubad iti kinamanangngaasina, ket iti naikeddeng a tiempona, agtignayto manen, kas iti inaramidna idi ugma. (Idiligyo ti Salmo 2:6-12.)—12/15, panid 10.
◻ Kadagiti ania a wagas nga addaan dagiti Kristiano iti talna?
Umuna, addaanda iti ‘pannakikappia iti Dios baeten ken Apo[da] a Jesu-Kristo.’ (Roma 5:1) Maikadua, addaandat’ talna iti nagbabaetanda babaen ti panangsukay iti “sirib manipud ngato,” nga “umuna iti amin nadalus, sumaganad natalna.” (Santiago 3:17)—1/1, panid 11.
◻ Aniat’ sumagmamano a banag a pakayaspingan ti Sao ti Dios, ket kasano a makatulong daytoy kadatayo?
Nayasping ti Sao ti Dios iti makapasalun-at a gatas, nakired a taraon, makapabang-ar ken mangdalus a danum, maysa a pagsarmingan, ken natadem a kampilan. Ti panangtarus iti ipasimudaag dagitoy a termino tulonganna ti maysa a ministro a mangaramat a sisisigo iti Biblia.—1/1, panid 29.
◻ Ti natimbeng a sekular nga edukasion tulongannatayo koma a mangaramid iti ania?
Tapno makabasa a nalaing, makasurat a silalawag, rumang-ay iti mental ken moral, ken makagun-od iti praktikal a pannakasanay a kasapulan iti inaldaw-aldaw a panagbiag ken epektibo a sagrado a panagserbi.—2/1, panid 10.
◻ Ania a napateg a leksion maipanggep iti edukasion ti maadaltayo ken Jesus?
Rumbeng nga aramaten ti edukasion, saan a tapno itan-ok ti bagitayo, no di ket tapno idayaw ti katan-okan nga Edukador, ni Jehova a Dios. (Juan 7:18)—2/1, panid 10.
◻ Ania ti Pagarian ti Dios?
Ti Pagarian isut’ nailangitan a gobierno nga impasdek ti Dios a mangitungpal iti pagayatan ti Dios a mangikkat kadagiti epekto ti basol ken ipapatay ken mangisubli iti nalinteg a kasasaad ditoy daga. (Daniel 2:44; Apocalipsis 11:15; 12:10)—2/1, panid 16.
◻ Kasano a mangipaay ti Biblia iti edukasion a kasapulan maipaay iti agnanayon a panagpatingga ti kinaranggas?
Babaen ti Saona, ti Biblia, isursuro ni Jehova dagiti tattao tapno agbalinda a managayat iti talna ken nalinteg. (Isaias 48:17, 18) Adda bileg ti Sao ti Dios a mangdanon ken mangsagid iti puso ti maysa a tao, a mangbalbaliw iti panagpampanunot ken kababalinna. (Hebreo 4:12)—2/15, panid 6.
◻ Iti ania a pamay-an a maikuna nga adda tallo a kaitungpalan ti padto ti Isaias kapitulo 35?
Naaddaan ti padto ni Isaias iti immuna a kaitungpalanna idi nagsubli dagiti Judio manipud iti pannakakautibo idiay Babilonia idi 537 K.K.P. Naaddaan iti agtultuloy a naespirituan a kaitungpalan ita sipud pay idi naluk-atan ti naespirituan nga Israel manipud iti panangkautibo ti Babilonia a Dakkel. Ket maaddaanto iti maikatlo a kaitungpalan mainaig iti panangipanamnama ti Biblia iti literal a paraiso a kasasaad ditoy daga. (Salmo 37:10, 11; Apocalipsis 21:4, 5)—2/15, panid 17.
◻ Kasano a naipakita ti personal nga interes ti Dios iti tattao kadagiti milagro nga inaramid ti Anakna, ni Jesus?
Yantangay ‘di kabalinan nga aramiden [ni Jesus] ti maysa a banag iti bukodna a nakem, no di laeng ti makitana nga ar-aramiden ti Ama,’ ti kinamanangngaasina iladawanna ti nadungngo a pannakaipakita ti pannakaseknan ni Jehova iti tunggal maysa kadagiti adipenna. (Juan 5:19)—3/1, panid 5.
◻ Aniat’ ipasimudaag ti sasao ni Jesus a “pakalaglagipan a tanem” a naaramat iti Juan 5:28, 29?
Ti Griego a sao a mne·mei’on (pakalaglagipan a tanem) a naaramat ditoy iparipiripna a malagip ni Jehova ti rekord ti tao a natayen, agraman dagiti natawidna a kababalin ken kompleto a memoria. Daytoy ti mangted iti nabileg a pammaneknek a maseknan ti Dios kadagiti tattao iti indibidual a pamay-an!—3/1, panid 6.
◻ Ania a pammakdaar a mensahe iti padto ni Sofonias ti addaan iti praktikal a tulong kadatayo?
Saan ita a panawen a palubosantay dagiti panagduadua a rumamut kadagiti pusotayo ken itungtungkuatay iti panunottayo ti iyaay ti aldaw ni Jehova. Kasta met, agannadtayo koma maibusor kadagiti makapakapuy nga epekto ti kinaaleng-aleng. (Sofonias 1:12, 13; 3:8)—3/1, panid 17.
◻ Apay a ti kinasungdo iti Dios mangidatag iti karit?
Gapu ta ti kinasungdo agsupadida kadagiti managimbubukodan a pagannayasan a natawidtayo kadagiti nagannak kadatayo. (Genesis 8:21; Roma 7:19) Napatpateg pay, determinado ni Satanas ken dagiti demoniona a mangdadael iti kinasungdotayo iti Dios. (Efeso 6:12; 1 Pedro 5:8)—3/15, panid 10.
◻ Iti ania nga uppat a benneg a masapul a sarangtentayo ti karit ti kinasungdo, ket aniat’ tumulong kadatayo a mangaramid iti kasta?
Dagiti uppat a benneg isu ti kinasungdo ken Jehova, iti organisasionna, iti kongregasion, ken iti asawatayo. Ti maysa a makatulong iti panangsaranget kadagitoy a karit isut’ panangtarus a ti karit iti kinasungdo ti naisinggalut iti pannakaalangon ti kinasoberano ni Jehova.—3/15, panid 20.
◻ Ania a leksion ti maadaltayo manipud iti kapadasan ni David iti panangpadpadasna a mangipan iti lakasa ti tulag idiay Jerusalem? (2 Samuel 6:2-7)
Di inkankano ni David dagiti pammilin ni Jehova maipanggep iti panangawit iti Lakasa, ket daytoy ti nangyeg iti didigra. Ti leksion isut’ ditay koma pulos ipabasol ken Jehova dagiti parikut nga ibungana no ditay ikankano dagiti nalawag a pammilinna. (Proverbio 19:3)—4/1, pinanid 28, 29.