“Bigbigenyo Dagiti Kasta a Kita ti Tattao”

SAAN a nasayaat ti kasasaad ti kongregasion iti Corinto. Adda makapakellaat a kaso ti imoralidad, ken adda nakaro a di panagkikinnaawatan dagiti kakabsat. Naipasango ti dadduma kadagiti nakaro a personal a parikut wenno addaan kadagiti saludsod a kasapulan a masungbatan. Agsisinnaklang ti sumagmamano a kakabsat iti korte; dadduma ti mangiliblibak pay ketdi iti panagungar.

Timmanor met dagiti nakaro a saludsod. Rumbeng kadi nga agtalinaed dagidiay adda iti nasinasina a sangakabbalayan gapu iti relihion kadagiti di-manamati nga assawada, wenno rumbeng a makisinada? Ania ti akem dagiti kakabsat a babbai iti kongregasion? Maitutop ngata a kanen ti karne a naidaton kadagiti idolo? Kasanot’ rumbeng a panangangay kadagiti gimong​—agraman ti Pangrabii ti Apo?​—1 Corinto 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.

Gapu ta di pagduaduaan a naseknanda iti pagimbagan dagiti kakabsatda iti kasta a nariribuk a kasasaad iti naespirituan, nagdaliasat da Acaico, Fortunato, ken Estefanas tapno sarungkaranda ni apostol Pablo idiay Efeso. Mainayon iti kasta a makariribuk a damag, posible nga inyegda ken Pablo ti maysa a surat manipud iti kongregasion a naglaon kadagiti saludsod maipapan kadagitoy nga isyu. (1 Corinto 7:1; 16:17) Nalawag, saan laeng a dagitoy a tallo a kakabsat ti maseknan iti kasasaad. Kinapudnona, nadamagen ni Pablo babaen “kadagidiay adda iti balay ni Cloe” nga adda di panagtutunos kadagiti kameng ti kongregasion. (1 Corinto 1:11) Di pagduaduaan, ti impadamag dagiti mensahero timmulong ken ni Pablo a maaddaan iti nalawlawag a pannakaawat iti kasasaad, tapno makaikeddeng no ania a balakad ti maipaay, ken no kasano a sungbatan dagiti timmanor a saludsod. Agparang a ti surat a pagaammotayo ita kas Umuna a Corinto isut’ sungbat ni Pablo, nga indalan ti nasantuan nga espiritu ti Dios. Mabalin a da Acaico, Fortunato, ken Estefanas ti nangipan iti surat.

Asino da Acaico, Fortunato, ken Estefanas? Aniat’ maammuantayo iti panangadal iti ibagbaga ti Kasuratan maipapan kadakuada?

Ti Sangakabbalayan ni Estefanas

Ti sangakabbalayan ni Estefanas isu ti “immuna a bunga” ti ministerio ni Pablo idiay Acaya a probinsia ti Roma, iti Umabagatan a Grecia, idi agarup tawen 50 K.P., ket ni Pablo a mismo ti nangbautisar kadakuada. Nalawag, imbilang ida ni Pablo a pagulidanan, nasayaat nga impluensia a mangpabileg kadagiti taga-Corinto. Sibabara a pinadayawanna ida gapu iti aramidda iti pagimbagan ti kongregasion: “Ita bagbagaankayo, kakabsat: Ammoyo a ti sangakabbalayan ni Estefanas isu ti umuna a bungbunga ti Acaya ken intudingda ti bagbagida nga agserbi kadagiti sasanto. Itultuloyyo met koma nga ipasakop ti bagbagiyo kadagiti kasta a kita ti tattao ken iti tunggal maysa a makitintinnulong ken agbambannog.” (1 Corinto 1:16; 16:15, 16) Saan a nadakamat no asino a talaga ti mangbukel iti “sangakabbalayan” ni Estefanas. Ti sasao nalabit tukoyenna laeng dagiti kameng ti pamilia ngem mabalin nga iramanna met dagiti adipen wenno empleado. Tangay ti Acaico ket maysa a nagan a Latin a mangiladawan iti maysa nga adipen, ken ti Fortunato a mangiladawan iti maysa a tao a nawaya, ipagarup ti sumagmamano a komentarista a dagiti dua nalabit a kameng met laeng dayta a sangakabbalayan.

Aniaman ti kasasaad, imbilang ni Pablo a mapagulidanan ti sangakabbalayan ni Estefanas. Dagiti kamengna “intudingda ti bagbagida nga agserbi kadagiti sasanto.” Sigurado a naawatan ti pamilia ni Estefanas nga adda trabaho a kasapulan a maibanag a pagimbagan ti kongregasion ket sitatallugod nga inawatda daytoy a panagserbi kas personal a pagrebbengan. Awan duadua a maiparbeng iti moral a suporta ken pammadayaw ti tarigagayda nga agserbi kadagiti sasanto.

“Pinabang-aranda ti Espirituk ken ti Espirituyo”

Nupay nariribukan ni Pablo iti kasasaad idiay Corinto, nabang-aran iti isasangpet ti tallo a mensahero. Kuna ni Pablo: “Pagrag-oak ti kaadda ni Estefanas ken ni Fortunato ken ni Acaico, agsipud ta isuda ti nangisandi iti kaawanyo ditoy. Ta pinabang-aranda ti espirituk ken ti espirituyo.” (1 Corinto 16:17, 18) No usigentay ti kasasaad, ti kinaadayona kadagiti taga-Corinto ti nalabit a pakaburiboran ni Pablo, ngem ti kaawan ti intero a kongregasion napunnuan iti kaadda dagiti mensaheroda. Nalabit a babaen ti impadamagda nakita ni Pablo ti pakabuklan ti kasasaad ket uray kaskasano naikkat ti dadduma a pagdandanaganna. Mabalin a saan met gayam a kasdiay ti kinakaro dagiti bambanag a kas iti impagarupna.

Sigun ken Pablo, ti mision ti tallo saan laeng a nangpabang-ar iti espirituna no di pay ket nangpabileg met iti espiritu ti kongregasion idiay Corinto. Di pagduaduaan a nabang-aranda a makaammo a nailawlawag a naan-anay dagiti mensaheroda ken ni Pablo ti tunggal aspeto ti kasasaad ket agsublida buyogen ti balakadna.

Gapuna sibabara a nakomendaran da Estefanas ken ti dua a kakaduana gapu iti panagbannogda maipaay kadagiti taga-Corinto. Napalaus ti panangapresiar ni Pablo kadagitoy a lallaki ta iti panagsublida rumbeng nga idauluanda ti nabingaybingay a kongregasion iti Corinto. Idagadag ti apostol kadagiti kakabsat: “Itultuloyyo met koma nga ipasakop ti bagbagiyo kadagiti kasta a kita ti tattao ken iti tunggal maysa a makitintinnulong ken agbambannog. . . . Bigbigenyo dagiti kasta a kita ti tattao.” (1 Corinto 16:16, 18) Ti kakasta a nabileg a rekomendasion silalawag nga ipasimudaagna ti naan-anay a kinasungdo dagitoy a lallaki iti laksid dagiti parikut iti kongregasion. Rumbeng a maipateg dagiti kasta a kita ti tattao.​—Filipos 2:29.

Nasayaat Dagiti Ibunga ti Matalek a Panagtitinnulong

Di pagduaduaan, nasayaat dagiti ibunga ti nasinged a pannakitinnulong iti organisasion ni Jehova ken kadagiti pannakabagina. Idi inaramid ni Pablo ti surat a pagaammo ita kas Maikadua a Corinto, di nagbayag kalpasan ti umuna a surat, sumaysayaaten dagiti kasasaad iti kongregasion. Ti nagtultuloy a napinget a trabaho dagiti kakabsat a kas kada Acaico, Fortunato, ken Estefanas, kasta met ti isasarungkar ni Tito, naaddaan iti nasayaat nga epekto.​—2 Corinto 7:8-15; idiligyo ti Aramid 16:4, 5.

Magunggonaan dagiti kameng ti moderno-aldaw a kongregasion ti ili ni Jehova iti panangut-utob iti ababa a pannakadakamat dagitoy matalek a lallaki iti Kasuratan. Kas pagarigan, ipapantayon a saan a marisut nga insigida ti agdama a kasasaad iti lokal a kongregasion gapu iti sumagmamano a rason ken maap-apektaran dagiti kakabsat. Aniat’ rumbeng nga aramiden? Tuladenyo da Estefanas, Fortunato, ken Acaico, a dida nagsanud iti rebbengenda a mangipakaammo ken Pablo ti kasasaad sa kalpasanna sitatalek nga ipannurayyo dagiti banag iti ima ni Jehova. Pudno a ti regta maipaay iti kinalinteg dina tinignay ida nga agaramid a bukbukod wenno “agtanabutob a maikaniwas ken Jehova.”​—Proverbio 19:3.

Kukua ni Jesu-Kristo dagiti kongregasion, ket iti maitutop a tiempona, a kas met idi idiay Corinto, agtignay tapno risutenna dagiti aniaman a parikut a mamagpeggad iti naespirituan a salun-at ken talnada. (Efeso 1:22; Apocalipsis 1:12, 13, 20; 2:1-4) Kabayatanna, no surotentayo ti nasayaat nga ulidan da Estefanas, Fortunato, ken Acaico ken agtultuloytayo nga agbannog iti panagserbi kadagiti kakabsattayo, sisusungdo a suportarantay met ti urnos iti kongregasion, a mangpabileg kadagiti kakabsattayo, ken ‘mangparparegta kadakuada iti ayat ken nasayaat nga ar-aramid.’​—Hebreo 10:24, 25.