Apay a Mangtedtayo ken Jehova?

BAYAT a nagtindek ti init idiay Sarepta a bassit nga ili ti Sidon, adda babai a balo a sirurukob nga agpidpidut iti kayo. Masapul a mangaron tapno mangluto ti sangkabassit a makan​—nalabit maudi daytan a kanenna a kaduanat’ barito nga anakna. Inkagumaanna a makalasatda nga agina iti dayta napaut a tikag ken bisin, ket daytoy ti nakapimpiman a nagbanaganda. Agbisbisindan.

Adda lalaki nga immasideg. Elias ti naganna, ket di nagbayag nadlaw ti balo nga isu propeta ni Jehova. Kasla nadamdamagnan daytoy a Dios. Ni Jehova naigiddiat ken Baal, a ti naulpit, makarimon a panagrukbab kenkuana nagraira iti dagana a Sidon. Gapuna idi dimmawat ni Elias kenkuana iti mainum a danum, sigagagar a nangipaay. Nalabit impapanna a ti kasta nga aramid pakagun-odannanto ti pabor ni Jehova. (Mateo 10:41, 42) Ngem adda pay dinawat ni Elias​—sangkabassit a taraon. Inlawlawag [ti balo] nga adda nabati a taraon para laeng iti maudin a pannangan. Kaskasdi, impilit ni Elias, nga impatalgedna kenkuana a simimilagronto a mangipaay ni Jehova iti taraonna agingga nga agngudo ti tikag. Aniat’ inaramidna? Kuna ti Biblia: “Ket isu napan ket inaramidna ti mayannurot iti sao ni Elias.” (1 Ar-ari 17:10-15) Dagitoy simple a sasao deskribirenda ti aramid a tinignay ti dakkel a pammati​—napalalot’ kadakkelna, kinapudnona, ta indayaw ni Jesu-Kristo dayta a balo agarup sangaribu a tawen kalpasanna!​—Lucas 4:25, 26.

Uray pay kasta, kasla karkarna nga agkiddaw ni Jehova ti nawadwad unay iti maysa a babai a nakakurkurapay. Nakarkaro pay no usigentayo ti inkararag naminsan ti maysa a prominente unay a tao. Ti panagkolekta ni Ari David iti kontribusion para ken anakna a Solomon iti pannakapatakder ti templo ginutugotna ti napalalo a kinamanagparabur. No idilig iti moderno a panagkuenta, dagidi sagut a naiyabuloy aggatadda iti binilion a doliar! Kinuna ni David, nupay kasta, iti kararagna ken Jehova: “Asinoak ken ania ti ilik, tapno kabaelanmi koma ti mangidaton iti sibubulos a nakem a kas iti daytoy a kita? Ta naggapu amin a bambanag kenka, ket iti kukuam ti itdenmi kenka.” (1 Cronicas 29:14) Kas kinuna ni David, amin a banag kukua ni Jehova. Gapuna no mangtedtayo para iti irarang-ay ti nasin-aw a panagdayaw, ipapaaytay laeng ken Jehova ti sigud a kukuana. (Salmo 50:10) Gapuna tumanor ti saludsod, Apay pay la ngamin a kayat ni Jehova a mangtedtayo?

Napateg a Paset ti Pudno a Panagdayaw

Ti kasimplean a sungbat kastoy, a nanipud pay idi ugma inkeddengen ni Jehova a ti panangted napateg a paset ti nasin-aw a panagdayaw. Indaton ni matalek nga Abel ti sumagmamano kadagiti napapateg a dinguenna ken Jehova. Da patriarka a Noe, Abraham, Isaac, Jacob, ken Job, umarngi met ti indatonda.​—Genesis 4:4; 8:20; 12:7; 26:25; 31:54; Job 1:5.

Ti Linteg Mosaiko imbilin ken intudingna pay ti panangted kadagiti kontribusion ken Jehova. Kas pagarigan, amin nga Israelita naibilin ti apagkapullo, wenno idonarda ti maikasangapulo a paset ti apit ti daga ken ti immadu a dinguenda. (Numeros 18:25-28) Dagiti dadduma a kontribusion saan a kastat’ kainget ti pannakatudingda. Kas pagarigan, tunggal Israelita nakalikaguman a mangted ken Jehova kadagiti umuna a bunga ti dinguen ken apitna. (Exodo 22:29, 30; 23:19) Kaskasdi, impalubos ti Linteg a tunggal indibidual ikeddengna no kasanot’ kaadu ti umuna a bungbungana ti itedna, basta daydiay kasayaatan ti itedna. Inraman met ti Linteg dagiti daton ti panagyaman ken panagkari, a dagita interamente a boluntario. (Levitico 7:15, 16) Pinaregta ni Jehova ti ilina a mangted sigun iti kawadwad ti imbendisionna kadakuada. (Deuteronomio 16:17) Kas idi nabangon ti tabernakulo ken kalpasanna daydi templo, tunggal maysa intedna ti agtaud iti pusona. (Exodo 35:21; 1 Cronicas 29:9) Sigurado a ti kakasta a boluntario a kontribusion nakaay-ayoda unay ken Jehova!

Iti sidong ti “linteg ti Kristo,” amin a panangted masapul a boluntario. (Galacia 6:2; 2 Corinto 9:7) Di kaipapanan dayta a dagidi pasurot ni Kristo nagsardengdan a mangted wenno basbassiten ti intedda. Kasunganina ketdi! Idi nangaskasaba da Jesus ken dagiti apostolna idiay Israel, adda grupo dagiti babbai a simmursurot kadakuada ken nagserserbi kadakuada a binusbosda dagiti sanikuada. (Lucas 8:1-3) Immawat met ni apostol Pablo kadagiti sagut a nangsuporta iti panagmisionerona, sana pinaregta dagiti dadduma a kongregasion a mangipatulodda iti pondo para kadagidiay agkasapulan. (2 Corinto 8:14; Filipos 1:3-5) Nangdutok ti bagi a manarawidwid idiay Jerusalem kadagiti responsable a lallaki tapno dagiti abuloy kadagidiay agkasapulan sigurado a maibunong. (Aramid 6:2-4) Nalawag, minatmatan dagiti nagkauna a Kristiano a maysa a pribilehio ti panangsuporta iti nasin-aw a panagdayaw kadagiti kasta a wagas.

Kaskasdi, maisaludsodyo no apay a ti panangted pinagbalin ni Jehova a paset ti panagdayaw kenkuana. Amirisenyo dagiti uppat a rason.

No Apay a Mangtedtayo

Umuna, ti panangted pinagbalin ni Jehova a paset ti pudno a panagdayaw gapu ta nasayaat kadatayo ti panangaramid iti dayta. Ipaganetgetna ti panangapresiartayo iti kinaimbag ti Dios. Kas pagarigan, no ti maysa nga ubing adda gatangenna wenno aramidenna a regalo para iti naganak, apay a maragsakan ti naganak? Kasapulan unay aya ti naganak dayta a regalo a dina kabaelan a paruaren a bukod? Nalabit saan. Imbes ketdi, maragsakan ti naganak a makakita a ti ubing patpatanorenna ti manangapresiar ken manangted a kababalin. Kasta met lat’ rason a pangparparegtaan ni Jehova kadatayo a mangted ket maragsakan no aramidentayo ti kasta. Iti kastoy a wagas a maipakitatayo a talaga nga apresiarentayo amin a di matukod a kinamanangngaasi ken kinamanagparaburna kadatayo. Isu ti manangted iti “tunggal naimbag a sagut ken tunggal naan-anay a rangkap,” gapuna ditay maibusan iti rason tapno agyaman kenkuana. (Santiago 1:17) Kangrunaan iti amin, inted ni Jehova ti mismo a dungdunguenna nga Anak, nga impalubosna a matay tapno agbiagtay nga agnanayon. (Juan 3:16) Umdas aya ti panagyamantayo?

Maikadua, no iyugalitayo ti mangted, iti kasta masursurotayo a tuladen ni Jehova ken ti Anakna, ni Jesu-Kristo, iti nakapatpateg a pamay-an. Ni Jehova patinayon a mangmangted, naynay a managparabur. Kas kuna ti Biblia, insagutannatay “iti biag ken anges ken isuamin a bambanag.” (Aramid 17:25) Maiparbeng nga agyamantay kenkuana iti tunggal anges nga angsabentayo, tunggal sangasakmol a taraon a nanamentayo, tunggal naragsak ken makapnek a kanito iti biagtayo. (Aramid 14:17) Ni Jesus, kas ken Amana, imparangna ti manangted a kababalin. Dina impaidam ti bagina. Ammoyo kadi nga idi nagaramid ni Jesus kadagiti milagro, isu a mismo ti napukawan? Saan la a maminsan nga ibaga kadatayo ti Kasuratan nga idi pinaimbagna dagiti masakit, ‘rimmuar ti pannakabalin kenkuana.’ (Lucas 6:19; 8:45, 46) Napalalo ti kinamanagparabur ni Jesus ta urayna la nga imbukbok ti mismo a kararuana, ti biagna, ken patay.​—Isaias 53:12.

Isu a no mangtedtayo, panawentay man dayta, pigsatayo, wenno sanikuatayo, tultuladentay ni Jehova ken parparagsakentay ti pusona. (Proverbio 27:11; Efeso 5:1) Sursurotentay met ti perpekto a pagwadan iti natauan a kababalin nga imbati kadatayo ni Jesu-Kristo.​—1 Pedro 2:21.

Maikatlo, ti panangted punnuanna dagiti aktual ken napateg a pakasapulan. Pudno, nalaka la a punnuan ni Jehova dagiti pakasapulan para kadagiti interes ti Pagarian uray awan tulongtayo, no kasano a mapagsaona dagiti bato imbes nga usarennatayo a mangikasaba iti sao. (Lucas 19:40) Ngem kayatnatayo a padayawan iti daytoy a pribilehio. Gapuna no mangtedtay kadagiti ik-ikutantayo para iti irarang-ay dagiti interes ti Pagarian, dakkel ti pannakapnektayo no maammuantay a pudno a makipaspasettayo iti kaskenan a trabaho a maang-angay ditoy lubong.​—Mateo 24:14.

Nakabatbatad a nesesita ti kuarta tapno masuportaran ti sangalubongan a trabaho dagiti Saksi ni Jehova. Itay 1995 a tawen serbisio, nakabusbos ti Sosiedad iti agarup $60 milion tapno masuportaran laeng dagiti espesial a payunir, misionero, ken agbambaniaga a manangaywan kadagiti nakaidestinuanda a tay-ak ti serbisio. Nupay kasta, medio bassit la a kantidad dayta no idilig iti pannakapatakder ken pannakapaandar dagiti sanga nga opisina ken pagimprentaan iti intero a lubong. Kaskasdi, napaadda amin dagitoy gapu kadagiti boluntario a kontribusion!

Saan a gagangay nga ipapan ti ili ni Jehova a no nakurapay ti kabibiagda, ipabaklayda lattan ti awit kadagiti sabali. Ti kasta a kababalin itagadna ti pannakaikapistayo iti daytoy nga aspeto ti panagdayawtayo. Sigun ken apostol Pablo, dagiti Kristiano idiay Macedonia ‘nakaro ti kinakurapayda.’ Kaskasdi, nagpakpakaasida para iti pribilehio a panangted. Ket ti intedda, a pinaneknekan ni Pablo, “nalablabes ngem ti pudno a kabaelanda”!​—2 Corinto 8:1-4.

Maikapat, inaramid ni Jehova ti panangted a paset ti pudno a panagdayaw gapu ta ti panangted tumulong kadatayo nga agbalin a naragsak. Kinuna ni Jesus a mismo: “Ad-adu ti kinaragsak iti panangted ngem iti panangawat.” (Aramid 20:35) Kastat’ panangdisenio ni Jehova kadatayo. Daytoy pay ti maysa a rason no apay madlawtayo nga uray kasanot’ kawadwad ti itedtay kenkuana, ditay pulos magatadan ti apresasion nga adda iti pusotayo para kenkuana. Makaparagsak, ketdi, ta saan a namnamaen ni Jehova nga itedtayo ti ad-adu ngem ti kabaelantayo. Makapagtalektayo nga isu maragsakan no sirarag-otay nga ited ti kabaelantayo!​—2 Corinto 8:12; 9:7.

Bendision nga Ibunga ti Panagbalin a Manangted

No subliantayo ti damo a pagarigantayo, agasenyo no inkalintegan ti balo a taga-Sarepta nga adda met sabali a makabael a mangpakan ken Elias. Anian a bendision ti nakaikapisanna koma!

Di pagduaduaan a bendisionan ni Jehova dagidiay a ti kababalinda ket manangted. (Proverbio 11:25) Saan a masapul nga agsagaba daydi balo a taga-Sarepta gapu ta impadawatna daydi kunana a maudin a taraonna. Ginunggonaan ni Jehova iti milagro. Kas inkari ni Elias, saan a naatianan dagiti burnayna iti arina ken lana agingga a nalpas ti tikag. Ngem adda pay dakdakkel a gunggonana. Idi nagsakit sa natay ti anakna, ni Elias, a tao ti pudno a Dios, isut’ nangpagungar kenkuana. Anian a nakapabilganna iti naespirituan!​—1 Ar-ari 17:16-24.

Itatta ditay namnamaen a mabendisionantayo kadagiti milagro. (1 Corinto 13:8) Ngem ipanamnama kadatayo ni Jehova a sustenerenna dagidiay agserserbi kenkuana iti amin a kararua. (Mateo 6:33) Gapuna mabalintay a tuladen ti balo a taga-Sarepta iti dayta a wagas, a sibubuslon a mangted, nga agtalektayo nga aywanannatay ni Jehova. Kasta met, sagrapentayto ti nawadwad a naespirituan a gunggona. No ti panangted ket regular nga ar-aramidentayo, imbes a sagpaminsan, ken no makalagip laeng, daytantot’ tumulong a mamagsimple iti matatayo ken nakasentro kadagiti interes ti Pagarian, kas indagadag ni Jesus. (Lucas 11:34; idiligyo ti 1 Corinto 16:1, 2.) Tumulongto pay dayta kadatayo nga agbalin a nasingsinged ken Jehova agraman ken Jesus kas katrabahuanda. (1 Corinto 3:9) Ken parayrayenna ti kinamanagparabur ken manangted a kababalin a datin a pakailasinan dagiti agdaydayaw ken Jehova iti intero a lubong.

[Kahon iti panid 31]

DAGITI PAMAY-AN A PILIEN TI SUMAGMAMANO TAPNO MANGTED

KONTRIBUSION ITI SANGALUBONGAN A TRABAHO

Adu ti mangilasin wenno mangibadyet iti kantidad nga itinnagda kadagiti kahon ti kontribusion a nasuratan: “Kontribusion Para iti Sangalubongan a Trabaho ti Sosiedad​—Mateo 24:14.” Kada bulan ipatulod dagiti kongregasion dagitoy a kantidad idiay sangalubongan a hedkuarter sadi Brooklyn, New York, wenno iti lokal a sanga nga opisina.

Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, P.O. Box 2044, 1099 Manila, wenno iti opisina ti Sosiedad iti pagilianyo. Mabalin met nga idonar dagiti alahas ken dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibagbaga a dayta ket direkta a sagut.

KONDISIONAL A DONASION NGA URNOS

Mabalin nga italek ti kuarta iti Watch Tower Society agingga iti ipapatay ti nangidonar, iti kondision a no dumteng ti personal a pakasapulan, maisubli dayta iti nangidonar. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.

NAIPLANO A PANANGTED

Malaksid pay kadagiti direkta a sagut a kuarta ken dagiti kondisional a donasion a kuarta, addada pay sabali a pamay-an ti panangted a pakagunggonaan ti serbisio ti Pagarian iti intero a lubong. Mairaman kadagitoy ti:

Seguro: Mabalin a ti Watch Tower Society ti mapanaganan kas benepisario ti life insurance policy wenno ti retirement/pension plan. Rumbeng a mapakaammuan ti Sosiedad maipapan iti kasta nga urnos.

Deposito iti Banko: Mabalin nga italek wenno payable on death iti Watch Tower Society dagiti deposito iti banko, certificates of deposit, wenno individual retirement accounts, maitunos kadagiti alagaden ti lokal a banko. Rumbeng a mapakaammuan ti Sosiedad maipapan iti aniaman a kasta nga urnos.

Stocks ken Bonds: Mabalin nga idonar dagiti stocks ken bonds iti Watch Tower Society kas maysa a direkta a sagut wenno babaen ti maysa nga urnos a ti masapulan ket agtultuloy a maited iti nangidonar.

Real Estate: Mabalin nga idonar iti Watch Tower Society ti mailako a real estate babaen ti panangaramid iti direkta a sagut wenno babaen ti panangireserba ti life estate iti nangidonar, a makapagtultuloy nga agnaed sadiay bayat a sibibiag. Masapul a makiuman ti maysa iti Sosiedad sakbay ti legal a panangyallatiw kadagiti papeles ti aniaman a real estate iti Sosiedad.

Testamento ken Talek: Mabalin nga ipatawid ti sanikua wenno kuarta iti Watch Tower Society babaen ti legal a pannakapatalgedna a testamento, wenno ti Sosiedad ti mabalin a mapanaganan kas benepisario iti maysa a trust agreement. Mabalin nga adda bentahana iti buis no maysa a relihioso nga organisasion ti benepisario ti talek. Rumbeng a mapatulodan ti Sosiedad iti kopia ti testamento wenno trust agreement.

Nangisagana ti Sosiedad iti broshur iti pagsasao nga Ingles nga addaan tema a Planned Giving. Dagiti adda idiay Estados Unidos nga agpalplano a mangted itan iti maysa a naisangsangayan a sagut iti Sosiedad wenno adda ipatawidda inton pumusayda makatulong daytoy nga impormasion. Ad-adda pay a kasapulanda dayta no adda tarigagayanda nga iringpas a kalat ti pamilia wenno agplanoda maipapan iti dagada bayat nga ar-aramatenda dagiti bentaha iti buis tapno makissayan ti gastos a mainaig iti dayta a sagut wenno tawid.

Para iti kanayonan nga impormasion iti aniaman a nadakamaten, agsuratkayo iti Watch Tower, P.O. Box 2044, 1099 Manila wenno iti opisina ti Sosiedad iti pagilianyo.

PLANNED GIVING DESK

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 878-7000