Nabigbigyo Koma Ngata ti Mesias?

NABUSBOS ni Jesu-Kristo ti tallo ket kagudua a tawen a nangikasaba iti Sao ti Dios kadagiti Israelita. Ngem idi agngudon ti naindagaan a ministeriona, kaaduan kadagiti kapatadanna inlaksidda kas Mesias, wenno “Daydiay Napulotan” nga inkari ti Dios. Apay?

Tulongannatay ti Biblia a mangilasin kadagiti sumagmamano a rason no apay a dagiti Judio idi umuna a siglo dida inawat ni Jesus kas Mesias. Tallo kadagitoy a rason ti manglapped kadagiti adu a mangbigbig iti agdama a saad ni Jesus kas agturturayen a Mesianiko nga Ari.

“Kayatmi ti Makakita iti Maysa a Pagilasinan”

Maysa a rason no apay a dagidi Judio idi umuna a siglo dida nabigbig ti Mesias isut’ panagkitakitda a mangawat kadagiti Nainkasuratan a pagilasinan a mangilawlawag iti kina-Mesiasna. Naminsan, dagidi tattao nga umim-imdeng ken Jesus dinawatda a mangparuar koma iti pagilasinan tapno mapaneknekan nga isu nagtaud iti Dios. Kas pagarigan, ti Mateo 12:38 ireportna nga addada eskriba ken Pariseo a nagkuna: “Mannursuro, kayatmi ti makakita iti maysa a pagilasinan manipud kenka.” Saan kadi nga impakitan ni Jesus kadakuada dagiti pagilasinan? Impakitana.

Iti daydi a tiempo adun a milagro ti inaramid ni Jesus. Pinagbalinna nga arak ti danum, pinaimbagna daydi matmatay a barito, inagasanna ti agsaksakit a babai a katugangan ni Pedro, dinalusanna ti agkukutel, pinapagnana ti paralitiko, pinasalun-atna ti lalaki a 38 a tawenen nga agsaksakit, pinalangtona ti nagango nga ima ti maysa a lalaki, pinabang-arna dagiti adu kadagiti nagduduma nga an-annayenda, pinaimbagna ti adipen ti opisial ti armada, pinagungarna ti natay a barito ti maysa a baket a balo, ken inagasanna ti lalaki a bulsek ken umel. Naangay dagitoy a milagro idiay Cana, Capernaum, Jerusalem, ken Nain. Kanayonanna pay, ti damag maipapan kadagita a milagro nagsaknap iti intero a Judea ken dagiti kabangibang a daga.​—Juan 2:1-12; 4:46-54; Mateo 8:14-17; 8:1-4; 9:1-8; Juan 5:1-9; Mateo 12:9-14; Marcos 3:7-12; Lucas 7:1-10; 7:11-17; Mateo 12:22.

Nalawag, saan a nagkurang dagiti pagilasinan a nangpaneknek a ni Jesus isut’ Mesias. Nupay nagadu a pagilasinan ti inaramidna iti imatang dagiti tattao, dida namati kenkuana. Dagidi nakaimatang iti prueba a ni Jesus imbaon ti Dios ngem dida binigbig kas Mesias ket bulsekda iti naespirituan. Pimmulinawen dagiti pusoda ket di sumagepsep ti kinapudno.​—Juan 12:37-41.

Komusta met ita? Adda dagiti agkuna, “Patiek laeng ti makita dagiti bukel ti matak.” Ngem talaga kadi a nainsiriban ti kasta? Ipasimudaag ti padto ti Biblia a ni Jesus naitronon kas nailangitan nga Ari iti Mesianiko a Pagarian. Tangay di makita, masapultay ti pagilasinan a tumulong kadatayo a mangilasin iti panagturayna, a dayta ti nangtanda ti panangrugi dagiti maudi nga al-aldaw daytoy dakes a sistema ti bambanag. Mabigbigyo kadi ti pagilasinan?​—Mateo 24:3.

Sigun iti Biblia, ti panangrugi ti panagturay ni Kristo kas Mesianiko nga Ari ket mapakuyogan kadagiti panaggugubat, ginggined, kinakirang ti taraon, ken angol nga awan umartap ti kakaroda. Kadagiti “maudi nga al-aldaw,” ti panaglalangen ti tattao madanggayan iti panagimbubukodan, agum, ken kina-awan panagteppel. (2 Timoteo 3:1-5; Mateo 24:6, 7; Lucas 21:10, 11) Malaksid iti kronolohikal a prueba, nasurok a 20 a nagduduma nga aspeto ti maudi nga al-aldaw ipatuldoda a nangrugi ti panagturay ti Mesias idi 1914.​—Kitaenyo Ti Pagwanawanan a Marso 1, 1993, panid 5.

“Managayat iti Kuarta”

Ti materialismo sabali pay a rason no apay inlaksid dagiti Judio ni Jesus kas Mesias. Ti sobra a panangipateg iti kinabaknang linapdanna dagiti adu manipud isusurotda ken Jesus. Kas pagarigan, dagiti Pariseo nagdinamagda a “managayat iti kuarta.” (Lucas 16:14) Amirisenyo ti kaso daydi baknang a baro nga agturay nga immadani ken Jesus ket dinamagna no kasanona a magun-odan ti biag nga agnanayon. “Itultuloymo a tungpalen dagiti bilin,” insungbat ni Jesus. “Sinalimetmetakon amin dagitoy; ania pay ti pagkurangak?” inyimtuod ti baro, nalabit madlawna nga adu pay ti kasapulan ngem ti panangtungpal la iti sumagmamano a bilin. “Inka ilako dagiti sanikuam ket itedmo kadagiti napanglaw ket maaddaankanto iti gameng idiay langit, ket umayka agbalinka a pasurotko,” imbaga ni Jesus kenkuana. Anian nga oportunidad​—ti agbalin nga adalan ti Mesias! Ngem daydi agturay pimmanaw, a sileleddaang. Apay? Ngamin napatpateg kenkuana ti gameng ditoy daga ngem ti gameng sadi langit.​—Mateo 19:16-22.

Saan pay a nagbalbaliw ti situasion. Ti panagbalin a pudpudno a pasurot ti Mesianiko nga Ari kaiyuloganna a dagiti naespirituan a bambanag iyun-una ngem dagiti isuamin, agraman naindagaan a sansanikua. Iti asinoman a materialistiko ti panangmatmatna, maysa a karit daytoy. Kas pagarigan, adda agassawa a misionero iti Dumaya a nakisarita iti maysa a babai maipapan iti Biblia. Gapu ta impagarupda a kayatna nga adalen ti ad-adu pay maipapan ken Jehova a Dios ken iti Anakna, ni Jesu-Kristo, intukon dagiti agassawa Ti Pagwanawanan ken Agriingkayo! Aniat’ reaksionna? “Matulongandak ngata dagitoy a magasin tapno ad-adu a kuarta ti mateggedak?” insaludsodna. Mas interesado daydi babai kadagiti material imbes a kadagiti naespirituan a banag.

Dagitoy met la nga agassawa adda baro nga inyadalanda iti Biblia ket inrugina ti makigimong idiay Kingdom Hall. “Saysayangem la ti tiempom,” kinuna dagiti dadakkelna. “Mangalaka pay koma ti kanayonan a trabahom iti rabii tapno ad-adut’ kuartam.” Nakalkaldaang no dagiti nagannak paregtaenda dagiti annakda a mangyun-una iti material a bambanag imbes nga adalendat’ maipapan iti Mesianiko nga Ari! “Uray kasanot’ kabaknangna, ti agturay dina mabalin a gatangen ti sangapulo ribu a tawen ti biagna,” kuna ti proverbio dagiti Insik.

Adu dagiti nakabigbigen a ti panangadal ken panangsurot iti Mesianiko nga Ari dina ipalubos ti panagayat iti kuarta. Adda babai a Saksi ni Jehova a dati nga adda negosiona ken dakkel ti mapastrekna, a nagkuna: “Mayat no aduanka ti kuarta ngem saan a nesesita dayta. Ti kuarta saan nga isut’ mangparagsak iti maysa a tao.” Ita kamengen ti pamilia ti Bethel iti maysa a sanga ti Watch Tower Society idiay Europa.

“Panagbuteng Kadagiti Judio”

Ti panagbuteng iti tao maysa pay a rason no apay di inawat dagiti Judio ni Jesus kas Mesias. No bigbigenda iti publiko ti kina-Mesiasna irisgoda ti pakasarsaritaanda. Kadagiti dadduma, nangato unay a gatad dayta. Usigenyo ni Nicodemo, a miembro ti nangato a korte dagiti Judio a naawagan Sanhedrin. Gapu ta nagamanga kadagiti pagilasinan ken pannursuro ni Jesus, inadmitarna: “Rabbi, ammomi a sika kas maysa a mannursuro naggapuka iti Dios; ta awan makaaramid kadagitoy a pagilasinan nga ar-aramidem malaksid no adda kenkuana ti Dios.” Kaskasdi sinarungkaran ni Nicodemo ni Jesus idi simmipngeten, nalabit tapno di mabigbig dagiti dadduma a Judio.​—Juan 3:1, 2.

Para kadagiti adu a nakangngeg ti panagsasao ni Jesus, napatpateg ti anamong ti tattao ngem iti Dios. (Juan 5:44) Idi a ni Jesus napan idiay Jerusalem gapu ta Piesta dagiti Abong-abong idi 32 K.P., “adda idi adu a panagdayamudom dagiti bunggoy maipapan kenkuana.” Awan nagsao a sipapanayag maipapan ken Jesus “gapu iti panagbuteng kadagiti Judio.” (Juan 7:10-13) Uray ti nagannak daydi lalaki nga inagasan ni Jesus ti kinabulsekna dida kayat a bigbigen a ti milagro gapuanan ti pannakabagi ti Dios. Ta uray isuda “agbutengda idi kadagiti Judio.”​—Juan 9:13-23.

Itatta, bigbigen dagiti dadduma a ni Jesus agturturayen kas Mesianiko nga Ari sadi langit, ngem agamakda a mangbigbig a silalatak iti daytoy. Kadakuada, ti gatad a pannakapukaw ti dayawda kadagiti tattao nangina unay. Idiay Alemania, kas ehemplo, adda Saksi ni Jehova a nakipatpatang maipapan iti Biblia iti maysa a lalaki a nangadmitar: “Ti ikaskasabayo a Saksi maipapan iti Biblia pudno. Ngem no agbalinak a Saksi itan, inton bigat agdinamagen kadagiti isuamin. Aniantot’ kunada kaniakon idiay pagtrabahoak, dagiti kaarrubak, ken idiay club a nakaikamenganmi ken ti pamiliak? Diakto madaeran dayta.”

Aniat’ makagapu iti panagbuteng iti tao? Kinatangsit, panagpopular kadagiti kameng ti pamilia ken gagayyem, agbuteng a maumsi ken malais, madanagan a maisalumina kadagiti kaaduan. Ti kakasta a rikna talaga a suot nangruna kadagidiay mangrugrugi nga iyadalan dagiti Saksi ni Jehova iti Biblia. Kas ehemplo, adda babai a naayatan idi maammuanna maipapan iti Paraiso nga ipasdekto ti Mesianiko a Pagarian ditoy daga iti sidong ti turay ni Jesu-Kristo. Ngem isu naregget a mannaki-disco, ket ti panagbutengna iti tao isut’ nanglapped kenkuana a mangibaga kadagiti sabali maipapan itoy a namnama. Kamaudiananna, inturturedna nga imbaga a sibubulos maipapan iti Biblia. Inlaksid dagiti gagayyemna a mannaki-disco, ngem naginteres ni lakayna ken dagiti dadakkelna. Idi agangay nagbautisar daytoy a babai agraman ni nanangna, ket inrugi met ni lakayna ken ni tatangna nga inadal ti Biblia. Anian a gunggona no parmeken ti panagbuteng iti tao!

Talaga Kadi a Mabigbigyo ti Mesias?

Idi matmatayen ni Jesus iti pagtutuokan a kayo, presente ti dadduma nga adalanna. Nabigbigda nga isu ti naipadto a Mesias. Presente met dagidi agtuturay a Judio, a bale, isuda, agdawdawat pay laeng iti pagilasinan. “Bay-anyo nga isalakanna ti bagina, no isu daytoy ti Kristo [wenno Mesias] ti Dios, Ti Napili.” (Lucas 23:35) Saandanto kadin a pulos nga agsardeng nga agdawdawat iti pagilasinan? Adu a milagro ti inaramid ni Jesus. Mainayon pay, ti pannakayanak, ministerio, pannakabista, pannakapapatay, ken pannakapagungarna kaitungpalan dagiti adu a padto iti Hebreo a Kasuratan.​—Kitaenyo ti “Amin a Kasuratan Impaltiing ti Dios ket Naimbag,” nga impablaak ti Watchtower Bible and Tract Society of New York, Inc., panid 343-4.

Dagidi tattao a limmabas inumsida ni Jesus, ta inwaksida dagiti ebidensia ti kina-Mesiasna. (Mateo 27:39, 40) Dagidi soldado simamaterialistiko a nagbibingayanda dagiti kawes ni Jesus, a naggiginnasatanda ti makin-uneg a pagan-anayna. (Juan 19:23, 24) Ti panagbuteng iti tao ti makagapu no kadagiti dadduma a kaso. Kas pagarigan, amirisenyo ni Jose a taga Arimatea, a miembro ti Sanhedrin. “Maysa idi nga adalan ni Jesus ngem maysa a nalimed gapu iti panagbutengna kadagiti Judio.” Idi natayen ti Mesias, inasikaso da Jose ken ni Nicodemo ti bangkay ni Jesus. Naparmek ngarud idin ni Jose ti panagbutengna iti tao.​—Juan 19:38-40.

No nagbiagkayo idi umuna a siglo, nabigbigyo koma ngata ni Jesus kas Mesias? Ti panangbigbigyo kasapulanna nga akseptarenyo dagiti Nainkasuratan nga ebidensia, laksidenyo ti materialistiko a panagpampanunot, ket dikay maikulbo iti panagbuteng iti tao. Kadagitoy maudi nga al-aldaw, tunggal maysa kadatayo pagsaludsodanna koma ti bagina, ‘Mabigbigko ngata ni Jesus kas nailangitan a Mesianiko nga Ari itan?’ Din agbayag pakibiangannan dagiti maar-aramid ditoy daga. Inton mapasamak dayta, maysakayto kadi kadagidiay talaga a makabigbig ken Jesu-Kristo kas ti naikari a Mesias?

[Dagiti ladawan iti panid 28]

Dikay pulos tallikudan ti ebidensia a ni Jesus ti Mesianiko nga Ari

[Ladawan iti panid 31]

Ti panangadalyo maipapan iti Mesias masansan a kayuloganna ti panangparmekyo iti panagbuteng iti makuna dagiti sabali