“Laglagipenyo Dagiti Immun-una nga Aldaw”​—Apay?

“LAGLAGIPENYO dagiti immun-una nga aldaw.” Naiturong daytoy a patigmaan ni apostol Pablo, a naisurat agarup 61 K.P., kadagiti Hebreo a Kristiano sadi Judea. (Hebreo 10:32, The New English Bible) Apay a rumbeng a maibaga daytoy? Apay a rumbeng a lagipen dagiti umuna-siglo a managdaydayaw ken ni Jehova ti napalabas? Magunggonaantay kadi no ipangagtayo ti umasping a pammalagip ita?

Kadagiti naglabas a siglo, maulit-ulit a namakdaar dagiti mannurat ti Biblia iti pananglipat wenno panangyaleng-aleng iti napalabas. Rumbeng a lagipen ken utoben dagiti naglabas a panawen ken pasamak. Uray ni Jehova kinunana: “Laglagipenyo dagiti immuna a bambanag idi ugma, ta siak ti Dios, ket awanen ti sabali, Diosak, ket awan ti pumada kaniak.” (Isaias 46:9) Usigentayo ti tallo a nabileg a rason nga ipangagtayo daytoy a patigmaan.

Pakagutugotan ken Pakaparegtaan

Umuna, daytat’ dakkel a pakagutugotan ken pakaparegtaan. Idi nagsurat ni Pablo iti Hebreo a kongregasion, agsursurat kadagiti padana a Kristiano nga inaldaw a masusuot ti pammatida gapu iti ibubusor dagiti Judio. Tangay mabigbigna a nasken a mapabileg ti panagituredda, kinuna ni Pablo: “Itultuloyyo a laglagipen dagiti immun-una nga aldaw idi, kalpasan a nalawagankayo, inibturanyo ti dakkel a salisal iti sidong dagiti panagsagaba.” (Hebreo 10:32) Ti pananglagipda kadagiti napalabas a nasungdo nga aramid iti naespirituan a pannakidangadang ti mangted iti kasapulanda a tured a mangturpos iti lumba. Kaaspingna, insurat ni mammadto Isaias: “Laglagipenyo daytoy ket aglalakikayo.” (Isaias 46:8) Gapu iti makaay-ayo met laeng nga epekto iti panunot a kinuna ni Jesu-Kristo iti kongregasion sadi Efeso: “Gapuna lagipem no iti ania ti nakatnagam [ti ayatmo idi damo], ket agbabawika ken aramidem dagiti immuna nga ar-aramid.”​—Apocalipsis 2:4, 5.

Ti panangidagadag a “laglagipem dagiti al-aldaw idi ugma, pampanunotem dagiti tawtawen dagiti adu a kapkaputotan” ti mayulit-ulit kadagiti palawag ni Moises iti Israel, bayat nga indagadagna iti nasion nga ipakitada ti awanan buteng a kinasungdo ken ni Jehova. (Deuteronomio 32:7) Usigenyo ti sasaona a nailanad iti Deuteronomio 7:18: “Dikanto agbuteng kadakuada [dagiti Cananeo]. Laglagipemto a nalaing ti inaramid ni Jehova a Diosmo ken ni Faraon, ken isuamin nga Egipto.” Ti pananglagip kadagiti panangisalakan ni Jehova iti ilina ti pammaregta iti agtultuloy a simamatalek a panangannurotda iti linlinteg ti Dios.​—Deuteronomio 5:15; 15:15.

Nakalkaldaang ta masansan a timmulok dagiti Israelita iti basol a pananglipat. Aniat’ resultana? “Sinublianda manen ti mangsuot iti Dios, ken pinaungetda ti Santo ti Israel. Saanda a linaglagip ti imana, ken daydi aldaw a pinangsubbotna kadakuada iti kabusor.” (Salmo 78:41, 42) Idi agangay, ti pananglipatda iti pammilin ni Jehova nagresulta iti panangilaksidna kadakuada.​—Mateo 21:42, 43.

Nangipaay ti salmista iti nagsayaat nga ehemplo nga insuratna: “Saritaekto dagiti ar-aramid ni Jehova, ta lagipekto dagiti nakaskasdaaw a gapuanam idi ugma. Pampanunotekto met amin nga aramidmo, ken ut-utobekto dagiti gapuanam.” (Salmo 77:11, 12) Ti kasta a panangmennamenna iti napalabas a nasungdo a serbisio ken naayat nga aramid ni Jehova ti mangipaayto kadatayo iti kasapulan a pannakagutugot, pammaregta, ken panangapresiar. Kasta met a makaikkat iti bannog ken mangabbukay kadatayo a mangikagumaan a taginayonen ti matalek a panagibtur no “laglagipen dagiti immun-una nga aldaw.”

Panagsursuro Kadagiti Napalabas a Biddut

Maikadua, makaisuro ti saan a pananglipat kadagiti napalabas a kamali ken dagiti ibungada. Sipapanunot ni Moises itoy idi binalakadanna dagiti Israelita: “Laglagipem, dika lipaten ti pananggargarim ken Jehova a Diosmo nga agpungtot idiay let-ang, nanipud idi aldaw nga ipapanawmo iti daga nga Egipto, agpapan iyaaymo ditoy a disso, nagsalungasingkayo iti maikaniwas ken ni Jehova.” (Deuteronomio 9:7) Kas impaganetget ni Moises, ti resulta ti kasta a kinasukir dagiti Israelita ket, ‘pinapagna ida ni Jehova a Diosda iti uppat a pulo a tawtawen iti let-ang.’ Apay a naparegtada a lagipen daytoy? Tapno pagpakumbabaenna ida ken maatur ti kinarebeliosoda ket iti kasta ‘dagiti bilbilin ni Jehova a Dios[da] salimetmetandanto tapno magnada kadagiti daldalanna ken agamangada kenkuana.’ (Deuteronomio 8:2-6) Rumbeng nga agnakemdan a kaipapananna a didan ul-uliten dagiti napalabas a kamalida.

Kinuna ti maysa a mannurat: “Magunggonaan ti manakem a tao iti personal a kapadasan, ngem magunggonaan ti masirib a tao kadagiti kapadasan ti sabsabali.” Nupay imbilin ni Moises iti ili nga Israel nga utobenda dagiti mismo a kamalida iti napalabas agpaay a pagimbaganda, binalakadan ni apostol Pablo ti sabsabali​—ti umuna-siglo a kongregasion iti Corinto ken, agraman kadatayo​—nga agsursuro kadagiti umasping a historikal a rekord. Insuratna: “Ita dagitoy a bambanag napagteng kadakuada [kadagiti Israelita] kas dagiti pagulidanan, ket naisuratda a pammakdaar kadatayo a nadatngan dagiti panungpalan dagiti sistema ti bambanag.” (1 Corinto 10:11) Pampanunoten idi ni Jesu-Kristo ti maysa pay a kadaanan a pasamak iti Biblia ken ti panagkasapulan a makasursuro iti dayta idi kinunana: “Laglagipenyo ti asawa ni Lot.” (Lucas 17:32; Genesis 19:1-26) Insurat ti Ingles a dumadaniw ken pilosopo a ni Samuel Taylor Coleridge: “No agsursuro la koma ti tattao iti historia, nagadu koman a leksion ti naisuroda kadatayo!”

Kinaemma ken Kinamanagyaman

Maikatlo, ti pananglagip ti mangpatanor kadatayo kadagiti makaay-ayo iti Dios a kualidad a kinaemma ken kinamanagyaman. Bayat a pagragsakantayo ti adu a parupa ti sangalubongan a naespirituan a paraisotayo, sapay koma ta ditay liplipatan nga agpannuray dayta iti sumagmamano a pagbangon a bloke. Dagitoy iramanna ti kinasungdo, ayat, panagsakripisio iti bagi, kinatured iti laksid ti ibubusor, panagibtur, mabayag a panagitured ken pammati​—dagiti kualidad nga impakita dagiti Kristiano a kakabsattayo a nangirugi iti trabaho iti napalabas a pinulpullo a tawen iti nadumaduma a pagilian. Iti panangserrana iti report iti moderno-aldaw a pakasaritaan ti ili ti Dios idiay Mexico, kinuna ti 1995 Yearbook of Jehovah’s Witnesses: “Kadagiti tattao a nabiit pay a nakitimpuyog kadagiti Saksi ni Jehova, mabalin a makapakellaat dagiti suot a sinaranget dagidiay nakipaset iti pannakairugi ti trabaho idiay Mexico. Nairuamda ngaminen iti naespirituan a paraiso a sadiay adda aglaplapusanan a naespirituan a taraon, a pakasarakan iti ginasut a ribu a managbuteng-Dios a katimpuyog, nga organisado ti panagserbi iti Dios.”

Masansan a nagtrabaho nga agsolsolo wenno iti bassit a naiputputong a grupo dagidiay immuna a nangirugi. Sinarangetda ti kinaliday, pannakaipaidam, ken dadduma a nakaro a suot ti kinatarnaw bayat nga intultuloyda nga iwaragawag ti mensahe ti Pagarian. Nupay natayen ti adu kadagitoy a nagkauna nga adipen, anian a makaparagsak a maammuan a malaglagip ni Jehova ti matalek a panagserbida! Pinasingkedan daytoy ni apostol Pablo, idi insuratna: “Saan a nakillo ti Dios tapno lipatenna ti aramidyo ken ti ayat nga impakitayo iti naganna.” (Hebreo 6:10) No buyogen panangapresiar a manglagip ni Jehova, saan kadi a rumbeng laeng nga aramidentay met ti kasta buyogen ti kinamanagyaman?

Magun-odan dagidiay a baro a nakitimpuyog iti kinapudno daytoy historikal a pannakaammo babaen iti publikasion a Dagiti Saksi ni Jehova​—Manangiwaragawag iti Pagarian ti Dios.a Kasta met a no naaddaantay iti pribilehio nga agbalin a paset ti pamilia wenno iti kongregasion Kristiano a dagiti miembrona iramanna dagidiay lallakay ken babbaketen a kakabsat a nabayagen nga agserserbi, maidagadag kadatayo ti kababagas ti Deuteronomio 32:7 a “laglagipem dagiti al-aldaw idi ugma, pampanunotem dagiti tawtawen dagiti adu a kaputotan; agimtuodka ken amam, ket isu iparangnanto kenka, kadagiti lallakaymo, ket isuda sawendanto kenka.”

Wen, ti pananglagip kadagiti napalabas nga aramid ti nadiosan a debosion ti mangabbukay kadatayo nga agtultuloy nga agibtur a sirarag-o iti Nakristianuan a serbisiotayo. Naglaon met ti historia kadagiti leksion a rumbeng a pakasursuruantayo. Ket ti panangmennamenna iti binendisionan-Dios a naespirituan a paraisotayo ti mangpatanor kadatayo kadagiti nagsayaat a kualidad a kinaemma ken kinamanagyaman. Rumbeng laeng ngarud a “laglagipenyo dagiti immun-una nga aldaw.”

[Footnote]