Panangitulok a Mapukaw ti Adu Maipaay iti Banag a Napatpateg

KAS INSALAYSAY NI JULIUS OWO BELLO

Iti las-ud ti 32 a tawen maysaak nga Aladura.a Mamatiak a ti panangagas babaen ti pammati ken kararag risutenna amin a parikutko ken agasanna amin a sakit. Diak pulos gimmatang iti aniaman nga agas, uray kadagiti pangep-ep iti ut-ot. Kadagidiay a tawen, awan uray maysa iti pamiliak ti nayospital. No adda asinoman nga agsakit kadagiti annakko, ikararagak ida iti aldaw ken rabii agingga nga umimbagda. Mamatiak nga ipangpangag idi ti Dios dagiti kararagko ken bembendisionannak.

NAIKAMENGAK iti Egbe Jolly, ti kalatakan a sosial a gunglo iti Akure, maysa nga ili idiay makinlaud a Nigeria. Gagayyemko dagiti kababaknangan ken addaan impluensia a tattao iti komunidadmi. Ti Deji, nga ari iti Akure, masansan a sumarungkar iti pagtaengak.

Maysaak met a poligamo, nga adda innem nga asawak ken adu a kamalala. Rimmang-ay ti negosiok. Nasayaat amin a banag kaniak idi. Ngem, kas iti agdaldaliasat a negosiante iti ilustrasion ni Jesus maipapan iti perlas, nakasarakak iti banag a nagpateg unay ta inidiak ti lima kadagiti assawak, dagiti kamalalak, simbaan, sosial a gunglo, ken ti nailubongan a kinalatak a maipaay a kasukat dayta.​—Mateo 13:45, 46.

No Kasano a Nagbalinak nga Aladura

Damo a nangngegak ti maipapan kadagiti Aladura idi 1936, idi agtawenak iti 13. Kinuna kaniak ti maysa a gayyem nga agnagan Gabriel: “No sumarungkarka iti Christ Apostolic Church, mangngegam nga agsao ti Dios.”

“Kasanot’ panagsao ti Dios?” insaludsodko kenkuana.

Kinunana: “Umayka, ket makitam.”

Magagaranak a dumngeg iti Dios. Gapuna iti karabiyanna, kimmuyogak ken Gabriel idiay simbaan. Napno kadagiti managdaydayaw ti bassit a patakder. Nangrugi nga agkanta ti kongregasion: “Umaykayo! Ditoy ti ayan ni Jesus!”

Kabayatan ti panagkakanta, adda nagpukkaw: “Bumabaka, nasantuan nga espiritu!” Adda maysa pay a nangbatingting iti kampana, ket nagulimek ti kongregasion. Kalpasanna, rinugian ti maysa a babai ti agsao a sipapartak. Pagammuan ta impukkawna: “Dumngegkayo iti mensahe ti Dios! Kastoy ti kinuna ti Dios: ‘Ikararaganyo dagiti mangnganup tapno saanda a papatayen dagiti tao!’” Napno ti aglawlaw iti emosion.

Namatiak a nagsao ti Dios babaen kenkuana, gapuna iti simmaganad a tawen nabautisaranak kas miembro ti Christ Apostolic Church.

Damo a Pannakisarita Kadagiti Saksi ni Jehova

Idi 1951, immawatak iti maysa a kopia ti magasin a Pagwanawanan iti Saksi nga agnagan Adedeji Boboye. Makapainteres ti magasin, gapuna nagsuskribiak ken regular a binasbasak dayta. Idi 1952, timmabunoak iti uppat nga aldaw a kombension distrito dagiti Saksi ni Jehova idiay Ado Ekiti.

Nasdaawak iti nakitak iti kombension. Pinanunotko a naimbag ti maipapan iti panagbalinko a maysa kadagiti Saksi ni Jehova ngem inwaksik dayta. Ti parikutko ket adda tallo nga asawak ken maysa a kamalala iti daydi a tiempo. Impagarupko a diak mabalinan ti agbiag a maymaysa laeng ti asawak.

Idi nagsubliak idiay Akure, pinasardengko ni Adedeji a sumarsarungkar kaniak, ken diakon pinabaro ti suskripsionko a Pagwanawanan. Ad-adda a nagbalinak nga aktibo iti simbaanmi. Total, inkalintegak, pinaraburannak ti Dios sipud idi naikamengak iti Christ Apostolic Church. Nangikallaysaak iti tallo nga assawa ken naaddaankami iti adu nga annak. Nakaipatakderak iti balayko. Saanak pay a pulos a nayospital. Tangay kasla sungsungbatan ti Dios dagiti kararagko, apay a balbaliwak ti relihionko?

Panaglatak a Napakuyogan iti Pannakaupay

Rinugiak ti agidonar iti dakkel a kuarta iti simbaan. Di nagbayag pinagbalindak a panglakayen iti simbaan, maysa a saad a timmulong kaniak a makakita iti ar-aramiden dagiti addaan annongen iti simbaan. Nariribukanak iti nakitak. Pagaayat ti pastor ken “dagiti mammadto” ti kuarta; naldaangak gapu iti kinaagumda.

Kas pagarigan, idi Marso 1967 naaddaanak iti tallo nga annak iti nadumaduma nga asawa. Nakayugalian iti simbaan a mabuniagan ti ubing. Gapuna nangyegak kadagiti sagut​—ikan, lemonada, ken soft drinks a nakabotelia​—iti pastor kas panagsagana iti seremonia.

Iti aldaw ti misa, kinuna ti pastor iti sanguanan ti intero a kongregasion: “Masdaawak kadagiti babaknang iti daytoy a simbaan. Kayatda ti agpabuniag, ket soft drinks ken ikan laeng ti iyegda. Awan karne! Awan kalding! Agasenyo! Nangipaay ni Cain iti Dios iti dadakkel a tugi kas daton, ngem saan nga inawat ti Dios ti kasta a daton tangay awan darada. Kayat ti Dios dagiti banag nga adda darada. Nangyeg ni Abel iti animal, ket naawat ti datonna.”

Gapu iti dayta, timmakderak ket rimmuarak a makapungpungtot. Nupay kasta, nakimisaak pay latta. Masansan, ad-adu nga oras ti mabusbusbosko iti pannakipulapol ken itatabuno kadagiti miting ti gunglomi. Pasaray tumabunoak kadagiti gimong idiay Kingdom Hall, ket pinabarok ti suskripsionko iti Pagwanawanan. Nupay kasta, kaskasdi a saanak pay a nakasagana nga agbalin a maysa kadagiti Saksi ni Jehova.

Ti Pangngeddeng nga Agserbi ken Jehova

Dimteng ti dakkel a panagbalbaliw kaniak idi 1968. Maysa nga aldaw binasak ti maysa nga artikulo iti Pagwanawanan a mangiladladawan iti naulpit a pannakaidadanes dagiti Saksi ni Jehova idiay Malawi. Dinakamatna ti maipapan iti 15-ti-tawenna a balasitang a naigalut iti kayo ken narames iti namin-innem gapu iti panagkedkedna a mangikompromiso iti pammatina. Iti panagalinggagetko, insardengko a binasa, ngem pinampanunotko dayta. Nautobko nga awan balasitang iti simbaanmi a makaiparang iti kasta a kita ti pammati. Iti karabiyanna, innalak ti magasin ket binasak manen dayta a panid.

Rinugiak ti serioso a panagadal iti Biblia. Bayat nga immadu ti pannakaammok, nakitak no kasano ti kadakkel ti panangal-allilaw kadakami ti simbaan. Kas idi nagkauna a tiempo, dagiti papadimi ‘agar-aramidda iti kinaderrep.’ (Oseas 6:9) Karaman ti kakasta a tattao kadagiti ulbod a mammadto a maipapan kadakuada namakdaar ni Jesus! (Mateo 24:24) Diakon namati kadagiti parparmata ken namilagruan nga aramidda. Inkeddengko ti umikkat iti ulbod a relihion ken tumulong kadagiti sabsabali a mangaramid met iti kasta.

Panangikagumaan a Mamagtalinaed Kaniak iti Simbaan

Idi naammuan dagiti panglakayen iti simbaan a naikeddengkon ti umikkat iti simbaan, nangibaonda iti maysa a delegasion tapno agpakpakaasi kaniak. Dida kayat ti mapukawan iti nagpateg a panguartaan. Intukonda a pagbalinendak a Baba Egbe, ti patron ti maysa kadagiti simbaan ti Christ Apostolic iti Akure.

Pinaayko ida ken imbagak no apay. “Ul-ulbodennatayo ti simbaan,” kinunak. “Ibagbagada nga amin a naimbag a tao mapan idiay langit. Ngem nabasak ti Biblia, ket kombinsidoak a 144,000 laeng a tattao ti mapan idiay langit. Dagiti sabsabali a nalinteg a tattao ket agbiag iti maysa a paraiso a daga.”​—Mateo 5:5; Apocalipsis 14:1, 3.

Inkagumaan ti pastor iti simbaan nga impluensiaan dagiti assawak a bumusor kaniak. Imbagana kadakuada a dida pastreken iti balaymi dagiti Saksi ni Jehova. Maysa kadagiti assawak ti nangsabidong iti taraonko. Dua kadakuada ti namakdaar kaniak maipapan iti sirmata a nakitada idiay simbaan. Impakita ti sirmata a matayak no umikkatak iti simbaan. Iti laksid dayta, intultuloyko a kinaskasabaan dagiti assawak, nga inawisko ida a kumuyog kaniak kadagiti panaggigimong. “Makasarakkayto sadiay iti sabali nga asawa,” kinunak. Nupay kasta, awan kadakuada ti naginteres, ken intultuloyda nga inkagumaan ti nangupay kaniak.

Kamaudiananna, idi Pebrero 2, 1970, idi nakaawidak manipud panagbiahe iti kabangibang nga ili, nasangpetak nga awan tao iti balay. Pimmanaw amin dagiti assawak agraman dagiti ubbing.

Panagtalinaed nga Addaan Maymaysa nga Asawa

‘Mailintegko itan ti kasasaadko kas naasawaan,’ napanunotko. Inawisko ti kaunaan nga asawak, ni Janet, nga agsubli iti pagtaengan. Immanamong. Nupay kasta, siiinget a binusor ti pamiliana. Idi naammuan ti dadduma nga asawak a kiniddawko nga agsubli ni Janet, napanda iti pagtaengan ni amana ket pinadasda a kabilen. Iti kasta pinaayabannak ti pamiliana iti maysa a miting.

Agarup 80 a tattao ti presente iti miting. Ti uliteg ni Janet, nga isu ti ulo ti pamilia, kinunana: “No kayatmo manen nga asawaen ti anakmi, no kasta masapul nga alaem ti dadduma pay a babbai. Ngem no kayatmo nga alagaden ti baro a relihionmo ken agtalinaed nga addaan maymaysa nga asawa, no kasta agbirokka iti sabali a babai. No alaem manen ni Janet, papatayen ti dadduma nga assawam, ket dimi kayat a matay ti anakmi.”

Kalpasan ti napaut a panagsasarita, nautob ti pamilia a determinadoak a maaddaan iti maysa laeng nga asawa. Kamaudiananna immanamongda. Kinuna ti uliteg: “Saanmi nga alaen ti asawam. Mabalinmon nga ikuyog.”

Idi Mayo 21, 1970, nagkallaysakami ken ni Janet maitunos iti linteg. Kalpasan ti siam nga aldaw nabautisaranak kas maysa kadagiti Saksi ni Jehova. Iti Disiembre iti daydi met laeng a tawen, nabautisaran met ni Janet.

Panangtagiragsak iti Bendision ni Jehova

Impadto dagiti dati a kamiembruanmi iti simbaan a no agbalinkami a Saksi, mataykami. Agarup 30 a tawenen ti napalabas manipud idi. Uray no matayak ita, dayta kadi ket gapu ta nagbalinak a maysa kadagiti Saksi ni Jehova? No matay ita ni baketko, maikuna kadi ti asinoman a dayta ket gapu ta nagbalin a maysa kadagiti Saksi ni Jehova?

Inkagumaak nga ipakita iti 17 nga annakko ti dana ti kinapudno. Nupay adu kadakuada ti nataenganen idi agbalinak a Saksi, pinaregtak ida nga agadal iti Biblia ket inkuyogko ida kadagiti gimong ken kombension. Pagrag-oak a lima kadakuada ti kaduak nga agserserbi ken Jehova. Ti maysa ket padak nga agserserbi kas panglakayen iti kongregasion. Ti maysa met ket ministerial nga adipen iti kabangibang a kongregasion. Dua kadagiti annakko ti agserserbi kas regular pioneer.

No lagipek ti napalabas, masmasdaawak iti di kaikarian a kinamanangngaasi ni Jehova iti panangtulongna kaniak nga agbalin nga adipenna. Anian a pudno unay ti sasao ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangiyasideg kenkuana”!​—Juan 6:44.

[Footnote]