Siasino Dagiti Pudpudno a Mensahero ti Talna?
IDI Mayo 31, 1996, inwaragawag dagiti manangipadamag ti kasla agparang a maysa a mensahe ti talna. Maysa nga aldaw sakbayna, nairuar ti opisial a pakaammo a mangipaspasingked a ni Benjamin Netanyahu, a dandanin agbalin a prime minister ti Israel, ket “determinado ti panangikagumaanna a mangitultuloy iti pannakaipatungpal ti talna, talna a buyogen ti kinatalged, iti nagbaetan ti estado ti Israel ken amin a kaarrubana, a pakairamanan ti Palestina.”
Ti nasaknap pannakaipablaakna a pannakapili ni Netanyahu pinagpanunotna dagiti adu no pumudnonto met la ngata ti talna iti Makintengnga a Daya. No agpayso a kasta, mabalin kadi a tuladen dayta ti sabsabali a nasion, a lipatenda dagiti dida pagkikinnaawatan?
Siempre, nalaklaka ti mangikari iti talna ngem ti manggun-od iti dayta. Iti panangpampanunotda iti daytoy, adu ti nagpangadua. Kas kuna ti periodista a ni Hemi Shalev, “kagudua kadagiti umili iti Israel mariknada nga asidegen ti pannakaipasubli, ket dagiti dadduma patienda a napupok [ti Israel] iti maysa nga impierno ditoy daga.” Iti pakagupgopan, kinunana: “Agragsak ti dadduma; agdung-aw ti dadduma.”
Kastoy ti kasasaad no agregget ti tao a mangyeg iti talna. Ti balligi ti maysa a lider ken dagiti mangsupsuporta kenkuana kaipapananna ti pannakaabak ti bumusbusor a bunggoy. Ti di pannakapnek agbanag iti pannakaupay, ket ti pannakaupay, masansan a mangituggod iti iyaalsa. Idiay man Makintengnga a Daya, Latin America, Makindaya a Europa, wenno sadinoman—ti panagregget ti sangatauan a mangyeg iti talna ket arapaap laeng.
Asidegen ti Pudpudno a Talna!
Idi kabarbaraan ti damag iti Makintengnga a Daya maipapan iti talna, nangngegan ti sabali pay a mensahe ti talna. Daytoy ket saan a nasaknap pannakaipablaakna a napolitikaan a diskurso; ket saan met a katulagan iti talna iti nagbaetan dagiti nasion. Imbes ketdi, daytoy a mensahe impakaammona ti talna a dumtengto babaen laeng iti Pagarian ti Dios. Sadino ti nakangngeganda iti daytoy a mensahe? Kadagiti nasurok a 1,900 a “Dagiti Mensahero ti Nadiosan a Talna” a Kombension Distrito nga inangay dagiti Saksi ni Jehova iti intero a lubong kabayatan ti 1996/97.
Naibatad kadagitoy a kombension nga awan gobierno ti tao a makaiyeg iti pudpudno a talna ken talged. Apay? Gapu ta kalikaguman daytoy ti panamagpatingga kadagiti banag a mangrabsut iti talnatayo iti inaldaw. Ti pudpudno a talna kaipapananna ti ibabangon kada agsapa nga awan pangta ti gubat wenno kinaranggas. Kayatna a sawen nga awanen ti krimen, awanen dagiti balunet kadagiti ridawtayo, awanen pagbutngan iti pannagna kadagiti lansangan, awanen ti masinasina a pampamilia. Ania a gobierno ditoy daga ti makaaramid amin iti dayta? Kinapudnona, ania a gobierno ditoy daga ti makaitured man la koma a mangikari iti dayta?
Nupay kasta, kabaelan dayta ti Pagarian ti Dios, ket aramidennanto dagitoy a banag. Ikari ti Biblia: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.” (Apocalipsis 21:3, 4) Anian a bang-ar ti iyeg dayta iti agsagsagaba a sangatauan!
Saan a parparawpaw ti kari ni Jehova a Dios. Ipanamnama kadatayo ti Biblia: “Ti Dios saan a maysa a tao tapno agtiri, di met anak ti tao tapno agbabawi: Isu ti nagkuna, dinanto aya aramiden? Wenno isu ti nagsao, ket dinanto aya tungpalen?” (Numeros 23:19) Wen, maaramidto ti inkari ti Dios—a pakabendisionan amin dagidiay dumasig kenkuana.
Dagiti Mensahero ti Talna a Dinutokan ti Dios
Agdindinamag dagiti Saksi ni Jehova iti kinaregtada a mangikaskasaba iti Pagarian ti Dios. Tinawen, sangsangkamaysa a mangbusbosda iti nasurok a sangabilion nga oras a mangiranud iti makapabileg a mensahe ti Biblia kadagiti sabsabali. Kaitungpalan daytoy ti sasao ni Jesus: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.” (Mateo 24:14) Pudno a “naimbag a damag” ti mensahe nga idandanon dagiti Saksi, tangay iwarwaragawag dayta ti nailangitan a Pagarian ti Dios kas ti kakaisuna a namnama iti sangatauan. Ket anian a nagtibker a namnama para iti masanguanan!
Uray itan, mangpatpataud ti Pagarian ti Dios iti napaypayso a singgalut ti talna ken nainkabsatan nga ayat kadagiti iturayanna. Kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Ikagkagumaan dagiti Saksi ni Jehova ti agbiag maitunos iti daytoy kangrunaan a makalikaguman iti pudno a Kinakristiano. Kas banagna, nakaskasdaaw ti panagkakabsatda a pagkaykaysaenna dagiti Judio ken Arabo, dagiti taga-Croatia ken taga-Serbia, Hutu ken Tutsi. Daytoy a talna nga ar-arapaapen laeng ti kaaduan iti sangatauan ket tagtagiragsaken itan dagiti minilion a Saksi ni Jehova iti intero a lubong.
Naitampok iti programa ti Kombension Distrito a “Dagiti Mensahero ti Nadiosan a Talna” ti pammaregta tapno agtultuloy nga agbiag maitunos kadagiti prinsipio ti Biblia ken agtultuloy a mangikasaba iti naimbag a damag ti Pagarian ti Dios. Awisendakayo a mangbasa iti sumaganad a report maipapan iti makatukay a tallo nga aldaw a kombension a tinagiragsak dagiti minilion.