Ania ti Kalikaguman ti Dios Kadatayo?
“Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.”—1 JUAN 5:3.
1, 2. Apay a saan a pakasdaawan nga adda dagiti kalikaguman ti Dios kadagidiay agtarigagay nga agdaydayaw kenkuana iti wagas nga anamonganna?
“KAPKAPNEKAK ti relihionko!” Saan kadi a dayta ti masansan nga ibaga dagiti tao? Ngem iti kinapudnona, ti saludsod isu koma daytoy, “Makaay-ayo aya iti Dios ti relihionko?” Wen, adda dagiti kalikaguman ti Dios kadagidiay agtarigagay nga agdayaw kenkuana iti wagas nga anamonganna. Pakasdaawantay kadi dayta? Saan. Ipapantayon nga adda napintas a balayyo, a dakkel ti nagastoyo iti di pay nabayag a nangpatarimaan iti dayta. Palubosanyo aya ti uray asino la ditan a tao nga agnaed sadiay? Ay ket, saan! Masapul a tungpalen ti manamnama nga agnaed dagiti pagannurotanyo.
2 Umasping iti dayta, impaay ni Jehova a Dios daytoy naindagaan a pagtaengan para iti natauan a pamilia. Din agbayag, iti sidong ti panangituray ti Pagarianna, “matarimaanto” ti daga—mapagbalin a napintas a paraiso. Aramidento ni Jehova daytoy. Iti dakkel a gatad kenkuana, intedna ti bugbugtong nga Anakna tapno mapasamak dayta. Sigurado nga adda dagiti kalikaguman ti Dios kadagidiay agnaed sadiay!—Salmo 115:16; Mateo 6:9, 10; Juan 3:16.
3. Kasano a ginupgop ni Solomon ti namnamaen ti Dios kadatayo?
3 Kasanotay a maammuan no ania dagiti kalikaguman ti Dios? Pinaltiingan ni Jehova ni masirib nga Ari Solomon a manggupgop iti namnamaenna kadatayo. Kalpasan ti panangamirisna iti amin a gapuananna—a pakairamanan ti kinabaknang, panagbangon, interes iti musika, ken romantiko nga ayat—nabigbig ni Solomon daytoy: “Daytoy isu ti pagbanagan ti panggep: amin nangngegan: Agbutengka iti Dios, ket salimetmetam dagiti bilbilinna; ta daytoy isu ti dagup ti rebbeng ti tao.”—Eclesiastes 12:13.
“Dagiti Bilinna Saanda a Makapadagsen”
4-6. (a) Ania ti literal a kaipapanan ti Griego a sao a naipatarus a “makapadagsen”? (b) Apay a maikunatayo a saan a makapadagsen dagiti bilin ti Dios?
4 “Salimetmetam dagiti bilbilinna.” Dayta ti gagangay a namnamaen ti Dios kadatayo. Nalabes aya dayta a dawdawatenna? Saan. Adda makaliwliwa unay nga ibaga ni apostol Juan kadatayo maipapan kadagiti bilin, wenno kalikaguman ti Dios. Insuratna: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.”—1 Juan 5:3.
5 Ti Griego a sao a naipatarus a “makapadagsen” literal a kaipapananna, “nadagsen.” Maipanggep daytoy iti maysa a banag a narigat nga aramiden wenno tungpalen. Iti Mateo 23:4, naaramat dayta a mangiladawan kadagiti “nadagsen nga awit,” dagiti aramid-tao a paglintegan ken tradision, nga impabaklay dagiti eskriba ken Fariseo kadagiti tattao. Maalayo kadi ti kababagas ti ibagbaga ti lakayen nga apostol a ni Juan? Saan a nadagsen nga awit dagiti bilin ti Dios, ken saanda met a narigat a tungpalen. (Idiligyo ti Deuteronomio 30:11.) Iti kasumbabangirna, no ay-ayatentayo ti Dios, pagragsakantayo nga aramiden dagiti kalikagumanna. Ikkannatay dayta iti napateg a gundaway a mangipakita iti ayattayo ken Jehova.
6 Tapno maipakita ti ayattayo iti Dios, masapul nga espesipiko nga ammuentayo no ania ti namnamaenna kadatayo. Usigentay ita ti lima a kalikaguman ti Dios. Bayat a pagsasaritaantayo dagitoy a makalikaguman, laglagipenyo ti kinuna ni Juan: ‘Saan a makapadagsen dagiti bilin ti Dios.’
Pananggun-od iti Pannakaammo Maipapan iti Dios
7. Iti ania nga agpannuray ti pannakaisalakantayo?
7 Ti umuna a makalikaguman isu ti pananggun-od iti pannakaammo maipapan iti Dios. Usigentayo dagiti sasao ni Jesus iti Juan kapitulo 17. Maudi a rabii idi ti biag ni Jesus kas maysa a tao. Iti dayta a rabii insagana a naimbag ni Jesus dagiti apostolna para iti ipapanawna. Maseknan maipapan iti masakbayanda, ti agnanayon a masakbayanda. Timmangad sadi langit, inkararaganna ida. Iti bersikulo 3, mabasatayo: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno Dios, ken iti daydiay imbaonmo, ni Jesu-Kristo.” Wen, agpannuray ti pannakaisalakanda iti “pananggun-od iti pannakaammo” agpadpada maipapan iti Dios ken ni Kristo. Agaplikar met dayta kadatayo. Tapno maisalakantayo, masapul a gumun-odtayo iti kasta a pannakaammo.
8. Ania ti kayat a sawen ti ‘pananggun-od iti pannakaammo’ maipapan iti Dios?
8 Ania ti kayat a sawen ti ‘pananggun-od iti pannakaammo’ maipapan iti Dios? Ti Griego a sao ditoy a naipatarus a “pananggun-od iti pannakaammo” ipamatmatna ti “panangammo, panangbigbig” wenno “panangtarus a naan-anay.” Imutektekanyo met a ti ebkas a “pananggun-od iti pannakaammo” ipasimudaagna nga agtultuloy daytoy. No kasta, ti pananggun-od iti pannakaammo maipapan iti Dios kaipapananna ti panangammo kenkuana, saan a parparawpaw, no di ket nasinged, a mangpatanor iti pannakigayyem kenkuana a naibatay iti pannakaawat. Ti agtultuloy a pannakirelasion iti Dios parang-ayenna ti pannakaammo maipapan kenkuana. Mabalin nga agtultuloy daytoy iti agnanayon, ta ditayto pulos maammuan ti amin a mabalin nga ammuen maipapan ken Jehova—Roma 11:33.
9. Aniat’ masursurotayo maipapan ken Jehova iti libro ti nakaparsuaan?
9 Kasanot’ pananggun-odtayo iti pannakaammo maipapan iti Dios? Adda dua a libro a makatulong kadatayo. Ti umuna isu ti libro ti nakaparsuaan. Dagiti banag a pinarsua ni Jehova—agpadpada dagiti adda biagna ken awan biagna—nalawag nga ipakitada kadatayo ti personalidadna. (Roma 1:20) Usigenyo ti sumagmamano a pagarigan. Ti panagdaranudor ti nadaeg a dissuor, ti panagsabuag ti dalluyon bayat ti bagyo, ti nabituen a langit iti naariwanas a rabii—saan kadi nga isuro kadatayo dagita a banag a ni Jehova ket maysa a Dios a “napigsa iti pannakabalin”? (Isaias 40:26) Ti panagkatawa ti maysa nga ubing bayat a buybuyaenna ti panangtiliw ti maysa nga uken iti ipusna wenno ti panangay-ayam ti maysa a kuting iti bola a sinulid—saan kadi nga ipamatmat dayta a naangaw ni Jehova, “ti naragsak a Dios”? (1 Timoteo 1:11) Ti raman ti naimas a taraon, ti makaay-ayo a sayamusom dagiti sabong iti tanap, dagiti natayengteng a maris ti nangayed a kulibangbang, ti uni dagiti billit nga agkakanta iti primavera, ti nabara nga arakup ti maysa nga ay-ayaten—saan kadi nga ipamatmat kadatayo dagita a banag a ti Namarsua kadatayo ket maysa a Dios ti ayat, a kayatna a nanamentayo ti biag?—1 Juan 4:8.
10, 11. (a) Ania dagiti banag maipapan ken Jehova ken kadagiti panggepna ti ditay maadal iti libro ti nakaparsuaan? (b) Iti Biblia laeng a masarakan ti sungbat dagiti ania a saludsod?
10 Nupay kasta, adda limitasion ti maadaltayo maipapan ken Jehova iti libro ti nakaparsuaan. Kas panangiladawan: Ania ti nagan ti Dios? Apay a pinarsuana ti daga ken insaadna ti tao iti dayta? Apay nga ipalubos ti Dios ti kinadakes? Aniat’ agur-uray kadatayo iti masanguanan? Tapno maammuantay ti sungbat dagita a saludsod, masapul nga agturongtayo iti sabali a libro a mangted iti pannakaammo maipapan iti Dios—ti Biblia. Kadagiti binulongna, ipalgak ni Jehova dagiti bambanag maipapan iti bagina, a pakairamanan ti naganna, ti personalidadna, ken dagiti panggepna—impormasion a saantay a magun-od iti aniaman a sabali a gubuayan.—Exodo 34:6, 7; Salmo 83:18; Amos 3:7.
11 Iti Kasuratan, mangipaay met ni Jehova iti napateg a pannakaammo maipapan kadagiti dadduma a masapul a maammuantayo. Kas pagarigan, asino ni Jesu-Kristo, ket ania ti akemna iti pannakaibanag dagiti panggep ni Jehova? (Aramid 4:12) Asino ni Satanas a Diablo? Ania dagiti pamay-anna a mangallilaw kadagiti tattao? Kasanotay a maliklikan ti panangallilawna? (1 Pedro 5:8) Iti laeng Biblia a masarakan dagiti makaispal-biag a sungbat dagitoy a saludsod.
12. Kasanoyo nga ilawlawag no apay a saan a makapadagsen ti pananggun-od iti pannakaammo maipapan iti Dios ken kadagiti panggepna?
12 Makapadagsen aya ti pananggun-od iti kasta a pannakaammo maipapan iti Dios ken kadagiti panggepna? Saan a pulos! Malagipyo kadi no kasanot’ panagriknayo idi damo a naammuanyo a Jehova ti nagan ti Dios, nga isublinto ti Pagarianna ti Paraiso ditoy daga, nga intedna ti dungdungnguenna nga Anak kas maysa a subbot gapu kadagiti basoltayo, kasta met ti dadduma pay a napateg a kinapudno? Saan kadi nga arigna naikkat ti abbong ti kinakuneng ket nalawag kadakayo itan dagiti bambanag? Saan a makapagdagsen ti pananggun-od iti pannakaammo maipapan iti Dios. Makaparagsak dayta!—Salmo 1:1-3; 119:97.
Panangtungpal Kadagiti Pagalagadan ti Dios
13, 14. (a) Bayat a gumun-odtayo iti pannakaammo maipapan iti Dios, ania dagiti panagbalbaliw a kasapulan nga aramidentayo iti panagbiagtayo? (b) Kalikaguman ti Dios nga idiantayo dagiti ania a narugit nga aramid?
13 Bayat a gumun-odtayo iti pannakaammo maipapan iti Dios, mabigbigtayo a kasapulan a mangaramidtayo kadagiti panagbalbaliw iti panagbiagtayo. Iyegnatay daytoy iti maikadua a makalikaguman. Masapul a tungpalentayo dagiti pagalagadan ti Dios iti umiso a kababalin ken awaten ti kinapudnona. Ania ti kinapudno? Pudno kadi a napateg iti Dios ti patpatientayo ken ti ar-aramidentayo? Adu a tattao ita ti nabatad a di mangipagarup a kasta. Impamatmat ti maysa a report nga impablaak ti Church of England idi 1995 a di rebbeng nga ibilang a basol ti panagkabbalay dagiti di nagkasar. “Mangibabain ken saan a makatulong ti ebkas a ‘panagbiag iti basol,’” kinuna ti maysa nga obispo ti simbaan.
14 Gapuna, saanen kadi a basol ti “panagbiag iti basol”? Silalawag nga ibaga kadatayo ni Jehova ti panangmatmatna iti kasta a kababalin. Kuna ti Saona, ti Biblia: “Ti panagasawa nadayaw koma iti tengnga dagiti isuamin, ket ti pagiddaan ti agassawa awan koma ti tulawna, ta ti Dios ukomennanto dagiti mannakiabig ken dagiti mannakikamalala.” (Hebreo 13:4) Mabalin a saan a basol iti imatang dagiti napanuynoy a klero ken dagiti mannakimisa ti panagdenna sakbay ti kasar, ngem maysa a nadagsen a basol iti imatang ti Dios! Kasta met ti pannakikamalala, insesto, ken homoseksualidad. (Levitico 18:6; 1 Corinto 6:9, 10) Kalikaguman ti Dios nga idiantayo dagita nga aramid, a narugit iti imatangna.
15. Kasano a dagiti kalikaguman ti Dios ramanenna ti wagas a pannakilangentayo kadagiti sabsabali ken dagiti patpatientayo?
15 Nupay kasta, saan nga umdas ti panangliklik kadagiti aramid a basol iti imatang ti Dios. Karaman met kadagiti kalikaguman ti Dios ti wagas a pannakilangentayo kadagiti sabsabali. Iti pamilia, namnamaenna nga aginnayat ken agrinnaem ti agassawa. Kalikaguman ti Dios kadagiti nagannak nga ipaayda dagiti material, naespirituan, ken emosional a kasapulan dagiti annakda. Bilinenna dagiti annak nga agtulnogda kadagiti dadakkelda. (Proverbio 22:6; Colosas 3:18-21) Ket komusta met ngay dagiti patpatientayo? Kayat ni Jehova a Dios nga iwaksitayo dagiti sursuro ken kaugalian nga aggapu iti ulbod a panagdayaw wenno maisupadi kadagiti nalawag a kinapudno nga isursuro ti Biblia.—Deuteronomio 18:9-13; 2 Corinto 6:14-17.
16. Ilawlawagyo no apay a saan a makapadagsen ti panangtungpal kadagiti pagalagadan ti Dios iti umiso a kababalin ken ti panangawat iti kinapudnona.
16 Makapadagsen aya kadatayo ti panangtungpal kadagiti pagalagadan ti Dios iti umiso a kababalin ken ti panangawat iti kinapudnona? Saan no panunotentayo dagiti gunggona—panagasawa nga agpimpinnateg ti agassawa ken addaan panagtalek iti maysa ken maysa, imbes a panagasawa a narakrak gapu iti di kinamatalek; pagtaengan a pakariknaan dagiti annak nga ay-ayaten ken tarigagayan ida dagiti dadakkelda imbes a pamilia a di maipatpateg, mabaybay-an, ken di matarigagayan dagiti annak; nadalus a konsiensia ken nasayaat a salun-at imbes a pannakasidir ti konsiensia ken maysa a bagi a daddadaelen ti AIDS wenno dadduma pay a sakit a mayakar babaen ti sekso. Nalawag a saannatay a paidaman dagiti kalikaguman ni Jehova iti aniaman a kasapulantayo tapno mananamtayo ti biag!—Deuteronomio 10:12, 13.
Ipakitatayo ti Panagraem iti Biag ken Dara
17. Kasanot’ panangmatmat ni Jehova iti biag ken dara?
17 Bayat nga itunosyo ti biagyo kadagiti pagalagadan ti Dios, mabigbigyo no kasano kapateg a talaga ti biag. Usigentay ita ti maikatlo a kalikaguman ti Dios. Masapul nga ipakitatayo ti panagraem iti biag ken dara. Sagrado ti biag ken Jehova. Rebbeng a kasta, ta isu ti Ubbog ti biag. (Salmo 36:9) Kinapudnona, napateg ken Jehova uray ti biag ti di pay naipasngay nga ubing nga adda iti tian ti inana! (Exodo 21:22, 23) Ti dara itakderanna ti biag. Gapuna, sagrado met ti dara iti imatang ti Dios. (Levitico 17:14) Saan ngarud a pakasdaawan a namnamaen ti Dios a matmatantayo ti biag ken dara a kas iti panangmatmatna.
18. Aniat’ kalikaguman kadatayo ti panangmatmat ni Jehova iti biag ken dara?
18 Ania ti kalikaguman kadatayo ti panagraem iti biag ken dara? Kas Kristiano, saantay nga isagmak ti biagtayo gapu laeng iti ragragsak. Sipapanunottayo iti kinatalged, isu a siguraduentayo a natalged dagiti lugan ken pagtaengantayo. (Deuteronomio 22:8) Saantay nga agtabako, agmama, wenno agusar kadagiti droga a makaadikto wenno makadadael iti panunot kas pagraragsakan. (2 Corinto 7:1) Gapu ta ipangagtayo ti Dios no kunana nga ‘adaywanyo ti dara,’ ditay ipalubos a mayalison ti dara iti bagitayo. (Aramid 15:28, 29) Nupay ipatpategtayo ti biag, ditay gandaten nga ispalen ti agdama a biagtayo babaen ti panangsalungasing iti linteg ti Dios ket iti kasta pagpeggadentay ti namnamatayo a biag nga agnanayon!—Mateo 16:25.
19. Ilawlawagyo no kasanotayo a magunggonaan iti panagraem iti biag ken dara.
19 Makapadagsen aya kadatayo ti panangibilang iti biag ken dara a sagrado? Saan! Panunotenyo daytoy. Makapadagsen aya ti pannakailisi iti kanser ti bara a patauden ti panagsigarilio? Makapadagsen aya ti pannakailiklik iti mental ken pisikal a pannakaadikto kadagiti makadangran a droga? Makapadagsen aya ti di maakaran iti AIDS, hepatitis, wenno dadduma pay a sakit a maala iti panangyalison iti dara? Nalawag, pagimbagantayo ti panangidian kadagiti makadangran a bisio ken aramid.—Isaias 48:17.
20. Kasano a nagunggonaan ti maysa a pamilia gapu iti iyaannurotda iti panangmatmat ti Dios iti biag?
20 Amirisenyo daytoy a kapadasan. Sumagmamano a tawenen ti napalabas, nagpadara ket naitaray iti ospital iti maysa a rabii ti maysa a Saksi a babai nga ag-tallo ket kagudua a bulanen a masikog. Kalpasan nga ineksamen ti doktor, naallingagna nga imbaga ti doktor iti maysa kadagiti nars nga iregregda ti sikog. Gapu ta ammona ti panangmatmat ni Jehova iti biag ti di pay naipasngay, sititibker a nagkedked nga agparegreg, a kinunana iti doktor: “No sibibiag, bay-anyo dita!” Nagpadara latta, ngem sumagmamano a bulan kalpasanna, nangipasngay iti agkurang pay bulanna a nasalun-at a maladaga a lalaki, nga agtawen itan iti 17. Inlawlawagna: “Imbagami amin daytoy iti anakmi, ket kinunana a maragsakan agsipud ta saan a naibasura. Ammona a ti panagserbimi ken Jehova ti kakaisuna a makagapu a sibibiag pay laeng agingga ita.” Nalawag, saan a makapadagsen iti daytoy a pamilia ti iyaannurot iti panangmatmat ti Dios iti biag!
Panagserbi a Kadua ti Organisado nga Ili ni Jehova
21, 22. (a) Siasino ti namnamaen ni Jehova a kaduatayo nga agserbi kenkuana? (b) Kasano a mailasin ti organisado nga ili ti Dios?
21 Saan a datayo laeng ti mangar-aramid kadagiti kasapulan a panagbalbaliw tapno maitunostayo ti biagtayo kadagiti pagalagadan ti Dios. Addaan ni Jehova iti maysa nga ili ditoy daga, ket namnamaenna a makitimpuyogtayo kadakuada nga agserbi kenkuana. Iyegnatay daytoy iti maikapat a makalikaguman. Masapul nga agserbitayo ken Jehova a kadua ti organisasion nga iturturong ti espirituna.
22 Nupay kasta, kasano a mailasin ti organisado nga ili ti Dios? Sigun kadagiti pagalagadan a naituyang iti Kasuratan, addaanda iti napaypayso nga ayat iti maysa ken maysa, addaanda iti nauneg a panagraem iti Biblia, idaydayawda ti nagan ti Dios, ikaskasabada ti Pagarianna, ken saanda a paset daytoy dakes a lubong. (Mateo 6:9; 24:14; Juan 13:34, 35; 17:16, 17) Adda laeng maymaysa a relihioso nga organisasion ditoy daga nga addaan kadagitoy a pakailasinan ti pudno a Kinakristiano—Dagiti Saksi ni Jehova!
23, 24. Kasanotay nga iladawan a saan a makapadagsen ti agserbi ken Jehova a kadua ti organisado nga ilina?
23 Makapadagsen aya ti agserbi ken Jehova a kadua ti organisado nga ilina? Kinapudnona, saan! Iti kasupadina, maysa a napateg a pribilehio ti maaddaan iti ayat ken pannaranay ti sangalubongan a pamilia dagiti Kristiano a kakabsat. (1 Pedro 2:17) Ipapanyon a nakalasatkayo idi narba ti barko a naglugananyo ket addakayo iti danum, nga ikarkarigatanyo ti tumpaw. Idi saankayon a makaandur, adda nangyawat iti imana kadakayo a nakalugan iti lifeboat. Wen, adda dadduma pay a nakalasat! Iti lifeboat, nagsisinnublatkayo a naggaud agingga a nakadanonkayo iti takdang, bayat nga al-alawenyo ti dadduma pay a nakalasat a masalawyo.
24 Saan kadi nga umasping ti kasasaadtayo? Naalawtayon iti napeggad a “danum” daytoy dakes a lubong ket addatayon iti “lifeboat” ti naindagaan nga organisasion ni Jehova. Iti unegna, sangsangkamaysa nga agserserbitayo bayat nga agturongtayo iti “takdang” ti nalinteg a baro a lubong. No pakapsutendatayo dagiti pakarigatan iti biag, anian a yamantayo iti tulong ken liwliwa dagiti pudno a Kristiano a kakadua!—Proverbio 17:17.
25. (a) Aniat’ pagrebbengantayo kadagidiay adda pay laeng iti “danum” daytoy dakes a lubong? (b) Ania a kalikaguman ti Dios ti pagsasaritaantayto iti sumaganad nga artikulo?
25 Komusta ngay dagiti dadduma—dagiti nasingpet panagpuspusona a tattao nga adda pay laeng iti “danum”? Pagrebbengantayo a tulongan ida a sumrek iti organisasion ni Jehova, saan kadi? (1 Timoteo 2:3, 4) Kasapulanda ti tulong tapno maammuanda dagiti kalikaguman ti Dios. Iyegnatay daytoy iti maikalima a kalikaguman ti Dios. Masapul nga agbalintayo a nasungdo a manangiwaragawag iti Pagarian ti Dios. Pagsasaritaantayo iti sumaganad nga artikulo no ania ti ramanen daytoy.
Malagipyo Kadi?
◻ Apay a saan a makapadagsen dagiti bilin ti Dios?
◻ Kasanot’ pananggun-odtayo iti pannakaammo maipapan iti Dios?
◻ Apay a saan a makapadagsen ti panangtungpal kadagiti pagalagadan ti Dios iti umiso a kababalin ken ti panangawat iti kinapudnona?
◻ Ania ti kalikaguman kadatayo ti panangmatmat ti Dios iti biag ken dara?
◻ Siasino ti namnamaen ti Dios a kaduatayo nga agserbi kenkuana, ken kasano ida a mailasin?
[Dagiti Ladawan iti panid 18]
Makasursurotayo maipapan ken Jehova iti libro ti nakaparsuaan ken iti Biblia
[Credit Lines]
Buaya: Iti pammalubos ti Australian International Public Relations; oso: Safari-Zoo ti Ramat-Gan, Tel Aviv