Dagiti Saludsod Manipud Kadagiti Managbasa
Maikuna kadi a ti nabiit pay a napabaro a pannakaawat maipapan iti sao a “kaputotan” iti Mateo 24:34 ipasimudaagna a mabayag pay ti panungpalan ti sistema dagiti bambanag?
Saan a pudno dayta. Iti kasupadina, ti kabarbaro a napasayaat a pannakaawat maipapan iti daytoy a banag tulongannatayo koma nga ad-adda a mangsegga iti panungpalan. Kasano a kasta?
Bueno, kas inlawlawag Ti Pagwanawanan a Nobiembre 1, 1995, inyaplikar ni Jesus ti sasao a “daytoy a kaputotan” kadagiti kasadaranna a dakes a tattao. (Mateo 11:7, 16-19; 12:39, 45; 17:14-17; Aramid 2:5, 6, 14, 40) Dayta ket saan a panangiladawan iti masnup a periodo a nangrugi iti espesipiko a petsa.
Kinapudnona, “Dagiti Saludsod Manipud Kadagiti Managbasa” iti dayta met la a ruar Ti Pagwanawanan impamaysana nga inusig ti dua a kangrunaan a punto: “Ti maysa a kaputotan dagiti tao di mamatmatan kas panawen nga addaan nakedngan a bilang dagiti tawen” ken, “Dagiti tao ti maysa a kaputotan nga agbibiag iti kalalaingannat’ kaababana a panawen.”
Masansan a kastoy ti panangaramattayo iti “kaputotan.” Kas pagarigan, maikunatayo, ‘Dagiti soldado iti kaputotan ni Napoléon awan a pulos ti ammoda maipapan kadagiti eroplano ken bomba atomika.’ Dagiti laeng aya soldado a nayanak iti isu met la a tawen a pannakayanak ni Napoléon ti dakdakamatentayo? Dagiti laeng aya soldado a Pranses a natay sakbay ti ipapatay ni Napoléon ti tuktukoyentayo? Saan; ket iti kasta a panangaramattayo iti “kaputotan” ditay met padpadasen ti mangituding iti masnup a bilang dagiti tawen. Ngem ketdi, tuktukoyentayo ti kalalaingannat’ kaababana a panawen, saan a ginasut a tawen manipud idi panawen ni Napoléon agingga iti masanguanan.
Umasping dayta iti pannakaawattayo iti kinuna ni Jesus iti padto nga impaayna iti Bantay dagiti Olibo. Ti kaitungpalan ti nagduduma a paset dayta a padto paneknekanna nga asidegen ti panungpalan daytoy a sistema. (Mateo 24:32, 33) Laglagipenyo a sigun iti Apocalipsis 12:9, 10, iti pannakaipasdek ti nailangitan a Pagarian ti Dios idi 1914, naitapuak ni Satanas iti kaparanget ti daga. Kuna pay ti Apocalipsis a makapungpungtot unay itan ni Satanas. Apay? Agsipud ta ammona nga “ababan ti periodo ti tiempona.”—Apocalipsis 12:12.
No kasta, maikanatad nga addaan Ti Pagwanawanan a Nobiembre 1 iti subtitulo nga “Agtultuloykayo nga Agbantay!” Siuumiso a kinuna ti sumaganad a parapo: “Saanen a kasapulan a maammuantayo ti eksakto a panawen a pannakapasamak dagiti bambanag. Imbes ketdi, ti panunotentayo isu ti panagsalukag, panangsukay iti natibker a pammati, ken panagserbi a siaagawa ken Jehova—saan nga iti panangpattapatta iti petsa.” Sana inadaw ti sasao ni Jesus: “Agtultuloykayo a kumitkita, agtultuloykayo a siririing, ta dikay ammo no kaano ti naituding a tiempo. Ngem ti kunaek kadakayo kunaek kadagiti isuamin, Agtultuloykayo nga agbantay.”—Marcos 13:33, 37.