Gayyemnakayo Aya ti Dios?—No Ania ti Ipalgak Dagiti Kararagyo
NAKAAL-ALLINGAGKAY kadin a di inggagara iti panagsarita ti dua a tao? Awan duadua a nabiityo la a naammuan no ania ti relasionda—no nadekketda wenno saanda nga agam-ammo, agam-ammoda laeng wenno nasinged, agtintinnalek nga aggayyem. Umasping iti dayta, dagiti kararagtayo maipalgakda ti relasiontayo iti Dios.
Ipanamnama ti Biblia kadatayo a ti Dios “saan nga adayo manipud iti tunggal maysa kadatayo.” (Aramid 17:27) Kinapudnona, aw-awisennatayo a mangammo kenkuana. Mabalintay pay ti makigayyem kenkuana. (Salmo 34:8; Santiago 2:23) Mabalintay a tagiragsaken ti pudpudno a nadekket a relasion kenkuana! (Salmo 25:14) Nalawag, ti relasiontayo iti Dios ti kapatgan a maikutantayo kas imperpekto a tattao. Ken ilalaen ni Jehova ti pannakigayyemtayo. Nabatad daytoy ta ti pannakigayyemtayo kenkuana naibatay iti pammatitayo iti bugbugtong nga Anakna, a nangipaay iti biagna gapu kadatayo.—Colosas 1:19, 20.
Rebbengna ngarud nga iyanninaw dagiti kararagtayo ti napasnek a panagayat ken panangipateg ken Jehova. Nupay kasta, madlawyo kadi a no dadduma kasla saan a naimpusuan dagiti kararagyo, nupay nadayawda? Saan a karkarna dayta. Ania ti mangpasayaat kadagiti bambanag? Panangtaripato iti pannakigayyemyo ken Jehova a Dios.
Iwayaanyo ti Agkararag
Umuna iti amin, kasapulan ti panawen tapno mataripato ken tumanor ti panaggayyem. Mabalin nga adu dagiti tattao a makablaawan wenno makasaritayo pay ketdi iti inaldaw—dagiti kaarruba, katrabahuan, drayber ti bus, ken dagiti agtartrabaho iti tiendaan. Ngem di kayat a sawen daytoy a pudpudno a gagayyemyo ida. Rumusing ti panaggayyem no makasaoyo a naimbag ti maysa a tao, manipud iti basta pannakipatpatang laeng agingga iti panangipeksa iti rikrikna ken pampanunotyo.
Umasping iti dayta, ti kararag pasingedennatayo ken Jehova. Ngem masapul nga iwayaantay dayta; saan nga umdas ti ababa a panagyaman iti oras ti pannangan. No masansan a makisaokayo ken Jehova, ad-adda a mausigyo ti rikrikna, motibo, ken tigtignayyo. Makapanunotkayo iti solusion dagiti narikut a problema bayat nga ipalagip ti espiritu ti Dios dagiti prinsipio iti Saona. (Salmo 143:10; Juan 14:26) Kanayonanna, bayat nga agkarkararagkayo, ad-adda nga agbalin ni Jehova a napaypayso kadakayo, ken ad-adda a mariknayo ti naayat a panangipateg ken pannakaseknanna kadakayo.
Pudno daytoy nangruna no masungbatan dagiti kararagyo. Kinapudnona, kabaelan ni Jehova ti “mangaramid iti ad-adda pay a siwawadwad unay ngem kadagiti isuamin a bambanag a dawaten wenno panunotentayo”! (Efeso 3:20) Di kayat a sawen daytoy a mangaramid ti Dios kadagiti milagro maipuon kadakayo. Ngem, babaen ti naisurat a Saona, dagiti publikasion ti klase matalek nga adipen, wenno iti bibig dagiti naayat a kakabsat, mabalin nga ipaayannakayo iti kasapulan a balakad wenno pannarabay. Wenno mabalin nga ikkannakayo iti kired a kasapulanyo tapno madaeran wenno masarangetyo ti sulisog. (Mateo 24:45; 2 Timoteo 4:17) Dagiti kasta a kapadasan punnuenda ti pusotayo iti panangipateg iti nailangitan a Gayyemtayo!
Gapuna, masapul nga iwayaantayo ti agkararag. Pudno, kurang ti panawen kadagitoy nariribuk nga aldaw. Ngem no talaga a maseknankayo iti maysa a tao, kadawyanna nga iwayaanyo ti makilangen kenkuana. Imutektekanyo no kasano ti panagrikna ti salmista: “Kas panagal-al ti ugsa a mawaw kadagiti baresbes a dandanum, kasta ti panagal-al toy kararuak a mawaw kenka, O Dios. Toy kararuak mawaw iti Dios, iti sibibiag a Dios: kaano ti idadatengkonto a dumatag iti saklang ti Dios?” (Salmo 42:1, 2) Mailiwkay met kadi a makisao iti Dios? No kasta iwayaanyo nga aramiden dayta!—Idiligyo ti Efeso 5:16.
Kas pagarigan, mabalinyo ti agriing a masapa tapno adda gundawayyo nga agkararag a dakdakayo. (Salmo 119:147) Adda kadi dagiti rabii a dikay makaturog? No kasta, kas iti salmista, mabalinyo nga ipeksa iti Dios dagiti pakaringgoranyo kadagita a makapasikor a kanito. (Salmo 63:6) Wenno saan, mabalinyo ti agkararag iti apagbiit laeng iti sumagmamano a daras iti agmalem. Kinuna ti salmista iti Dios: “Sika ti umkisak nga agmalmalem.”—Salmo 86:3.
Panangpasayaat Kadagiti Kararagtayo
No dadduma makatulong met nga iyat-atiddog dagiti kararagyo. Iti ababa a kararag, mabalin a dagiti gagangay laeng a banag ti madakamatyo. Ngem no at-atiddog ken napaspasnek dagiti kararagyo, ad-adda a maipeksayo ti pampanunot ken rikriknayo. Naminsan, nagpatpatnag a nagkararag ni Jesus. (Lucas 6:12) Sigurado a napaspasnek ken nabagbagas dagiti kararagyo no dikay agap-apura.
Di kayat a sawen daytoy nga agpalpalikawkayo no bassit laeng ti maibagayo; dina met kayat a sawen nga ulit-ulitenyo nga aramaten dagiti di nabagas a sasao. Namakdaar ni Jesus: “No agkarkararagkayo, dikay ulit-uliten a sawen dagiti isu met laeng a bambanag, a kas iti aramiden dagiti tattao iti nasnasion, ta pagarupenda a maipangagdanto gapu iti panagusarda iti adu a sasao. Gapuna, dikay pagbalinen ti bagbagiyo a kas kadakuada, ta ti Dios nga Amayo ammona no ania dagiti bambanag a kasapulanyo sakbay pay a dawatenyo kenkuana.”—Mateo 6:7, 8.
Nabagbagas ti kararag no panunotenyo nga umuna no ania ti kayatyo nga ibaga. Nakaad-adu ti mabalintay nga ikararag—ti rag-otayo iti ministerio, dagiti pagkapuyan ken pagkurkurangantayo, pannakapaay, pakaringgoran iti panagbiag, parparikut iti panggedan wenno iti eskuelaan, pagimbagan ti pamiliatayo, ken ti naespirituan a kasasaad ti lokal a kongregasiontayo, ken dadduma pay.
Agtawataw kadi no dadduma ti panunotyo no agkarkararagkayo? No kasta, ipaspasnekyo ti agpanunot. Kinapudnona, madadaan ni Jehova a ‘mangimdeng iti asugtayo.’ (Salmo 17:1) Saan kadi a rebbengna a panunotentayo a naimbag dagiti kararagtayo? Wen, ‘iturongyo ti panunotyo kadagiti bambanag ti espiritu,’ ken diyo ipalubos nga agtawataw.—Roma 8:5.
Napateg met ti wagastayo a makisao ken Jehova. Nupay kayatna nga ibilangtayo a kas gayyem, ditay koma pulos liplipatan a makisasaotayo iti Soberano ti uniberso. Basaen ken utobenyo ti nakaskasdaaw a buya a nailadawan iti Apocalipsis kapitulo 4 ken 5. Iti dayta nakita ni Juan iti sirmata ti kinadayag Daydiay pagkarkararagantayo. Anian a pribilehio ti adda kadatayo ta mabalintay ti umadani ken makisao iti “Daydiay situtugaw iti trono”! Ditay kayat nga awan daydayaw ken dignidad ti panagsaotayo. Imbes ketdi, ikagumaantayo a ‘dagiti sasao ti ngiwattayo ken ti pampanunot ti pusotayo makaay-ayoda koma ken Jehova.’—Salmo 19:14.
Nupay kasta, tandaanantay koma a saantay a mapasiddaaw ni Jehova kadagiti natayok a sasao. Maragsakan kadagiti nadayaw, naimpusuan nga ebkastayo, uray kasano kasimple ti pannakayebkasda.—Salmo 62:8.
Liwliwa ken Pannakaawat iti Kanito ti Panagkasapulan
No kasapulantayo ti tulong ken liwliwa, masansan nga agpasaranaytayo iti nasinged a gayyem ken kayattayo a makipagrikna kadatayo. Bueno, awanen ti sabali pay a gayyem a nalaklaka nga asitgan no di ni Jehova. Isu ket “sisisibay unay a saranay iti panagdukot.” (Salmo 46:1) Kas “Dios ti amin a liwliwa,” maawatanna ti kasasaadtayo nga ad-adda ngem iti asinoman. (2 Corinto 1:3, 4; Salmo 5:1; 31:7) Ken pudpudno a makipagrikna ken kaasianna dagidiay marigrigatan. (Isaias 63:9; Lucas 1:77, 78) Tangay ammotayo a ni Jehova ket mannakaawat a gayyem, nawayatayo a makisao kenkuana a naimpusuan, sipapasnek. Matignaytayo a mangyebkas kadagiti pagam-amkan ken pakaringgorantayo. Iti kasta mapasarantayo a mismo no kasano a ‘dagiti pangliwliwa [ni Jehova] patalgedenda ti kararuatayo.’—Salmo 94:18, 19.
No dadduma mabalin a mariknatayo a saantay a maikari nga umadani iti Dios gapu kadagiti basoltayo. Ngem ania ti aramidenyo no nagbasol kadakayo ti nasinged a gayyemyo ket dumawat iti pammakawan? Saankay aya a matignay a mangliwliwa ken mangpakired kenkuana? Saan aya a kasta met ti namnamaenyo nga aramiden ni Jehova? Sipaparabur a pakawanenna dagiti gagayyemna a nakabasol gapu iti natauan a kinaimperpekto. (Salmo 86:5; 103:3, 8-11) Iti pannakaammotayo iti daytoy, saantay a bumdeng a mangipudno kadagiti basoltayo kenkuana; makapagtalektayo iti ayat ken asina. (Salmo 51:17) No maldaangantayo gapu kadagiti pagkurkurangantayo, maliwliwatayo iti sasao ti 1 Juan 3:19, 20: “Babaen itoy maammuantayto a nagtaudtayo iti kinapudno, ket pagtalgedentayto dagiti pusotayo iti sanguananna maipapan iti aniaman a pangkondenaran kadatayo dagiti pusotayo, agsipud ta ti Dios dakdakkel ngem kadagiti pusotayo ket ammona ti isuamin a bambanag.”
Nupay kasta, saanen a kasapulan nga agrigattayo tapno matagiragsaktayo ti naayat a pannakaseknan ti Dios. Interesado ni Jehova iti amin a mangapektar iti naespirituan ken emosional a pagimbagantayo. Wen, di rebbeng a panunotentayo a dagiti rikrikna, pampanunot, ken pakaringgorantayo ket awan kaes-eskanna a dakamaten iti kararag. (Filipos 4:6) No kaduayo ti nasinged a gayyemyo, dagiti laeng aya napateg a pasamak iti biagyo ti pagsaritaanyo? Saan aya a madakamatyo met dagiti banag a saan unay a napateg? Umasping iti dayta, nawayakayo a makisao ken Jehova maipapan iti aniaman a banag iti biagyo, nga ammoyo nga “isu maseknan kadakayo.”—1 Pedro 5:7.
Siempre, saan nga agpaut ti panaggayyem no ti laeng maipapan iti bagiyo ti ibagbagayo. Kasta met, saan koma a ti bagitayo laeng ti nakaipamaysaan dagiti kararagtayo. Iyebkastay met koma ti ayat ken pannakaseknantayo ken Jehova ken kadagiti banag nga agpaay kenkuana. (Mateo 6:9, 10) Ti kararag ket saan laeng a gundaway tapno dumawat iti tulong ti Dios no di pay ket gundaway tapno agyaman ken agdaydayaw. (Salmo 34:1; 95:2) Ti “pananggun-od iti pannakaammo” babaen ti regular a personal a panagadal tulongannatayo iti daytoy a banag, ta tulongannatay dayta a mangammo nga ad-adda ken Jehova ken kadagiti dalanna. (Juan 17:3) Mabalin a makatulong unay kadakayo ti panangbasa iti libro dagiti Salmo ken panangimutektek no kasano ti pannakisao dagiti dadduma pay a matalek nga adipen ni Jehova.
Pudno a napateg a sagut ti pannakigayyem ken Jehova. Sapay koma ta ipakitatayo nga ilalaentay dayta babaen ti napaspasnek, ad-adda a naimpusuan, ken personal a karkararagtayo. Iti kasta masagraptayo ti ragsak nga inyebkas ti salmista, a nagkuna: “Nagasat ti tao a piliem, ket paasitgem kenka.”—Salmo 65:4.
[Dagiti Ladawan iti panid 28]
Mabalintay ti agkararag iti Dios iti agmalem no adda gundaway