Malagipyo Pay Aya?

Natakuatanyo kadi dagiti kallabes a ruar Ti Pagwanawanan nga addaan iti praktikal a pateg kadakayo? No kasta, apay a diyo suboken ti memoriayo babaen kadagiti sumaganad a saludsod?

◻ Anianto ti kasasaad inton Armagedon? (Apocalipsis 16:14, 16)

Saanto a nuklear a pannakatalipupos wenno didigra a gapuanan dagiti tattao. Saan, daytoy ket gubat ti Dios a mamagpatingga iti amin a gubat ti tao, mangikisap iti amin a mangitantandudo kadagita a gubat, ken mangyeg iti pudno a talna kadagidiay mangipatpateg iti talna. Saanto nga agtaktak. (Habacuc 2:3)​—4/15, panid 17.

◻ Ania a kita ti kasar ti mangidayaw ken Jehova?

Pudno a mangidayaw ken Jehova ti kasar a mangipangpangruna kadagiti naespirituan nga aspeto imbes a dagiti nailubongan nga aramid. Matagiragsak dagiti Kristiano ti okasion no liklikanda dagiti dakes a nailubongan a kustombre, an-anito, ken panaglablabes; no dida palubosan dayta a mangsinga kadagiti regular a nateokratikuan nga aktibidad; ken no iparangarangda ti kinaemma imbes a panagparammag.​—4/15, panid 26.

◻ Kasano a mailasin ti tao a natarnaw?

Mapagtalkan ti tao a natarnaw, saan laeng nga iti padana a tao no di ket, napatpateg pay, iti Dios. Makita ti kinadalus ti puso ti kasta a tao kadagiti aramidna. Saan a managinsisingpet. Saan a manangallilaw wenno dakes. (2 Corinto 4:2)​—5/1, panid 6.

◻ Apay a kinuna ni Jeremias: “Naimbag iti tao nga awitenna ti sangol ti kinaagtutubona”? (Un-unnoy 3:27)

Ti panagsursuro a mangsaranget kadagiti pakasuotan bayat ti kinaagtutubo tulonganna ti maysa nga agsagana a mangsaranget kadagiti karit ti kinanataengan. (2 Timoteo 3:12) Dagiti pagimbagan ti kinamatalek rimbawanna ti aniaman a temporario a bang-ar a mabalin nga iyeg ti pannakikompromiso.​—5/1, panid 32.

◻ Ania ti inladawan ti panagparang da Moises ken Elias iti sirmata maipapan iti panagbalbaliw ti langa ni Jesus?

Iti konteksto ti panagbalbaliw ti langa ni Jesus, maitutop da Moises ken Elias a mangisimbolo kadagiti napulotan a kakabsat ni Jesus. Ti ‘panagparangda [agraman ni Jesus] a buyogen ti dayag’ insimbolona a dagiti napulotan a Kristiano ‘maipadayagdanto a sangsangkamaysa’ ken Jesus iti urnos ti nailangitan a Pagarian. (Lucas 9:30, 31; Roma 8:17; 2 Tesalonica 1:10)​—5/15, panid 12, 14.

◻ Ania ti “sagrado a palimed” ti Dios? (1 Corinto 2:7)

Nakasentro ken Jesu-Kristo ti “sagrado a palimed” ti Dios. (Efeso 1:9, 10) Nupay kasta, saan laeng a ti kinasiasino ni Jesus kas ti naikari a Mesias. Ramanenna ti nailangitan a gobierno, ti Mesianiko a Pagarian ti Dios, ken ramanenna ti akem ni Jesus iti panggep ti Dios.​—6/1, panid 13.

◻ Kasano koma ti panangmatmat ti maysa a Kristiano iti panaglakay wenno panagsakit?

Imbes nga ibilangna ti kakasta a suot kas lapped iti panagserbina ken Jehova, ibilangna koma dagitoy kas gundaway a mangparayray iti panagpannurayna kenkuana. Laglagipenna met koma a marukod ti pateg ti maysa a Kristiano, saan nga iti kaadu ti magapuananna no di ket iti pammati ken kinapasnek ti ayatna. (Marcos 12:41-44)​—6/1, panid 26.

◻ Kasano a ti panangusar ni Jehova kadagiti tattao a mangisurat iti Biblia imbes a dagiti anghel, ipakitana ti naindaklan a siribna?

No saan a tao ti nagsurat, mabalin a marigatantayo a mangtarus iti mensahe ti Biblia. Kasta met, addaan ti Biblia iti kinabara, panagduduma, ken panangallukoy nga itden ti natauan nga elemento.​—6/15, panid 8.

◻ Ania ti sekreto ti kinaragsak iti pamilia?

Masarakan ti sekreto kadagiti binulong ti Sao ti Dios, ti Biblia, ken ti panangyaplikar kadagiti prinsipiona, kas iti panagteppel, panangbigbig iti kinaulo, nasayaat a komunikasion, ken ayat.​—6/15, panid 23, 24.

◻ Kasano a ti panangagas ni Jesus naiduma unay iti gagangay nga ar-aramiden dagidiay agkunkuna nga adda bilegda a mangagas ita?

Awan ti nakaro nga ebkas ti rikna manipud iti bunggoy ken saan a dramatiko ken naariwawa ti panangagas ni Jesus. Mainayon pay, awan masakit a di naagasan ni Jesus gapu ta saan a sibubulos ti panagdatonda wenno gapu ta awan pammatida.​—7/1, panid 5.

◻ Kasano a tinulongan ni Jehova ti ilina a maaddaan lugar iti nadibinuan a panggepna mainaig iti nagan ken Pagarianna?

Umuna, intalek ni Jehova ti kinapudno iti ilina. Maikadua, inikkanna ida iti nasantuan nga espirituna. Ken maikatlo, addaantayo iti sangalubongan a panagkakabsat ken organisasional nga urnos ni Jehova para iti panagdayaw.​—7/1, panid 19, 20.

◻ Ania ti kinasingpet?

Ti kinasingpet ket kinasayaat iti moral, kinaimbag, umiso a panagtigtignay ken panagpampanunot. Saan a basta galad no di ket aktibo, positibo a galad. Saan laeng a panangliklik iti basol ti ramanen ti kinasingpet; kaipapananna ti panagaramid iti naimbag. (1 Timoteo 6:11)​—7/15, panid 14.

◻ Ania ti kapatgan a maipatawid dagiti nagannak kadagiti annakda?

Ti kapatgan a maipatawidda isu ti ulidanda a mismo iti panangipakita iti ayat kadagiti sabsabali. Kangrunaanna, kasapulan a makita ken mangngeg dagiti annak nga iyebkas ken ipakita ti nagannak kadakuada ti pudno nga ayatda iti Dios iti amin nga aramidda.​—7/15, panid 21.

◻ Ania ti sumagmamano a napateg a banag para iti epektibo a panagadal ti pamilia?

Kasapulan a regular ti panagadal ti pamilia. Masapul a ‘gatangenyo ti tiempo’ para iti panagadal. (Efeso 5:15-17) Pagbalinenyo ti panawen ti panagadal a makapaganaygay kadagiti ubbing babaen ti panangidatag iti Biblia a nabiag. Tapno matagiragsak dayta dagiti ubbing, masapul a mariknada a makiramramanda.​—8/1, panid 26, 28.