Report Dagiti Manangiwaragawag iti Pagarian
Ti Mangdalus a Bileg ti Sao ti Dios
NAIPADAMAG a kaaduan nga adikto iti droga subliananda ti bisioda kalpasan a makaruarda iti rehabilitation center. Ngem kabaelan nga ibanag ti Sao ti Dios ti gagangay a di maaramidan dagiti klinika. (Hebreo 4:12) Adu ti natulonganen ti Sao ti Dios ken ti espirituna a mangparmek iti pannakaadikto iti droga ken mangyaplikar iti balakad a: “Dalusantayo koma dagiti bagbagitayo iti tunggal pakatulawan iti lasag ken iti espiritu, nga an-anayentayo ti kinasanto iti panagbuteng iti Dios.”—2 Corinto 7:1.
Alaentay a pagarigan ti maysa a kapadasan manipud Myanmar. Isalaysay ti maysa a lalaki a nakidangadang iti pannakaadikto iti droga iti adu a tawen: “Naadiktoak iti droga idi tin-edyerak pay laeng. Adu a daras a pinadasko ti rumuk-at, ngem napaayak. Tapno masuportarak ti panagdrogak, nagtakawak. Kas resultana, idi 1988, naibaludak iti makatawen.
“Kalpasan a nawayawayaanak iti pagbaludan, nakisinnarakak manen kadagiti dati a gagayyemko. Di nagbayag kalpasanna nagsubliak manen iti panagdrogak. Gapu iti daytoy mangperdi iti bagi nga aramid, liniklikandakon nga interamente dagiti kameng ti pamiliak. Mainayon pay, gapu iti kinarebeliosok kabutengdakon ti adu iti komunidad, ket liniklikandak metten.
“Maysa nga aldaw adda di napakpakadaan a napasamak—nasobraak ti dosis ti droga. Naibaludak manen, iti daytoy a gundaway iti tallo a tawen. Nupay nagrigat ti biag iti pagbaludan, uray kaskasano nakalasatak.
“Kalpasan a nakaawidak manipud pagbaludan, kiniddawko ti pammakawan ti pamiliak kadagiti napalabas a biddutko. Siaayat nga inawatdak, ngem manen, sinugsogandak dagiti gagayyemko nga agsubli iti dati nga aramidko.
“Kamaudiananna, inrekomenda ni lelangko iti pastor iti lugarmi a tumabunoak iti maysa a pagadalan iti Biblia. Immanamong ti pastor. Nupay kasta, sakbay a rinugiak ti tumabuno, ni ikitko, a maysa kadagiti Saksi ni Jehova, kinunana a no talaga a kayatko ti makasursuro iti Biblia, rumbeng a makipagadalak kadagiti Saksi.
“Napanak iti Kingdom Hall ket nayam-ammoak iti maysa a lalaki nga immanamong a mangyadal iti Biblia kaniak. Adu kadagiti timmabuno ti sibabara a nangkablaaw kaniak ken nangiparikna a maawatak.
“Kalpasan a rinugiak ti makipagadal iti Biblia ken tumabuno kadagiti Nakristianuan a panaggigimong, ti panaggartem iti droga nasuktan iti tarigagay nga umadani iti Dios. Makatawen kalpasanna rimmang-ayak agingga nga indedikarko ti biagko ken Jehova a Dios, sa insimbolok dayta a dedikasion babaen ti panagpabautisar iti danum.
“Iti di pay nabayag, kabayatan ti panagbalaybalay, nasarakak ti maysa kadagiti dati a kaduak nga agus-usar iti droga. Dina pulos patien ti dakkel a panagbalbaliw nga inaramidko. Daytoy ti nangted kaniak iti gundaway a mangasaba, ket nabaelak nga insalaysay kenkuana ti maipapan iti namnama iti Pagarian.
“Kamaudiananna nasarakak met laengen ti pudpudno a panggep ken kaipapanan ti biag. Gapu iti tulong ti Dios ken balakad manipud iti Saona, matulongak itan dagiti sabsabali a mangiwaksi iti makadadael a bisio a panagabuso iti droga.”